Mateo 15
15
1Haho vizaga hamwa Yesu kufuma ku Yerusalema 2Vafarisayo na vamanicha fitabu, vuhaya, Kungunoki vahemba vako valifileka fitilwe fya va kale? Kwisi vakavile kwikalava makono ulu valilya. 3Alisi witavukaga na wavawilaga, Kuki inwe vene muliguleka mukumo gwa Mulungu kunguno ya fitilwe finwe? 4Kwisi Mulungu wahayaga,
Umukuzye nso na noko;
na,
Homwene alimufusa ise ninga nina afwe lufu.
5Alisi inwe muliyomba, Homwene akumuwila ise ninga nina ati, icho ulikova kugwasiwa na nene chavile kipanwa kumwa Mulungu, mwenuyu akafundile kumukuzya ise na nina. 6Na sisyo inwe mwaguvulaga muhayo gwa Mulungu kunguno ya fitilwe finwe. 7Inwe vagulumi, Yesaya wafumbulaga loleyene kunguno yinwe aho wayombaga,
8Va chalo cheniki valinkuzya na mulomo,
Alisi myoyo yavo yili kule na nene.
9Alisi valinkuvila cha gele,
Kwisi valihembeka mavuhembeki hogene gali mikumo ya vanhu.
10Na haho wayitanaga mbuto, wavawilaga, Igagwi na 11mumaniche, ngʼo icho kilingilila mu mulomo kilimwilavuzya munhu, sumbwa icho kilifumila ku mulomo, chenicho kilimwilavuzya munhu. 12Haho vahemba vamwegelaga, vumuwila, Ulimanicha ati Vafarisayo vagayaga aho vigagwa muhayo gwenugu? 13Alisi witavukaga, uhaya, Mimelo yose yikahambilwe na Vava wane 14wʼilunde yikudubulwa. Muvaleke! Vali vahofu hovene valivatongela vahofu vichavo; alisi ulu muhofu alimutongela muhofu mwiye, vose vavili vakugwila mwikandilo. 15Na Petro witavukaga, umuwila, Utulotolele mukolani ugu. 16Yesu wayombaga, Ninga inwe 17vene mutali muli vuduhu masala? Mutali kumanicha ati chenicho kilingilila mu mulomo kilivita mu nda na 18kilifumiliziwa kwibala? Alisi hogene galifumila ku mulomo galifuma ku moyo, na genaya galimwilavuzya munhu. 19Kwisi ku moyo galifuma miganiko mavi: vuvulagi, vusihya, vuyanzi, wivi, vulembekezya, vufusani. 20Genaya galimwilavuzya munhu, alisi kulya na makono gakikalavile kukavile kumwilavuzya munhu.
21Na Yesu wafumaga kwenuko na wajaga ku magunguli ga Tiro na Sidoni. 22Na mukima Mukananaya wafumaga ku magunguli genayo na wamuhamukilaga, uhaya, Umbonele kisa Guku, Mwana wamwa Davidi, mwanike wane alidimwa sivi na migavo. 23Alisi akamwitavukile ninga muhayo gumo. Na vahemba vakwe vamwegelaga, vamulombaga, vuhaya, Umuleke aje, kwisi alilila kunuma yiswe. 24Alisi wavitavukaga, Nkatumizivilwe sumbwa ku ngʼholo zyazimilile zya numba ya Israeli. 25Alisi uyu wizaga wamukuvila, uhaya, 26Guku, ngwasaje! Alisi wamwitavukaga, uhaya. Yikavelile kusola mukate gwa vana na kuguponezya ku tuwa. 27Alisi wayombaga, Ahene Guku, alisi tuwa twene tukulyaga tuvuvungili twenutu tuligwa hansilili na meza zya vaguku vato. 28Haho Yesu witavukaga na wamuwila, Mukima, isanizyo lyako lili ihanya; yikukwilile kitisi ulikova. Na mwanike wakwe wapilaga itungo lyenilo.
29Na Yesu wafumaga kwenuko na wafikaga bihi na nyanza ya Galilaya na walinaga ku lugulu na wikalaga kwenuko. 30Na mbuto ningi zya vanhu vizaga kuwakwe, hovene vavaletaga valema, vihinile, vahofu, va 31kameme, na vangi vingi; na vavatulaga ha magulu gakwe, nawe wavapizaja. Sisyo vose vakumaja aho vavonaga va kameme valiyomba na vihinile valipila na valema valiyumba na vahofu valivona; na vamukumukaja Mulungu wa Israeli.
32Haho Yesu wavitanaga vahemba vakwe, uvawila, Nene ndisatiwa lusungu ku mbuto yeniyi, kwisi vadilaga nsiku idatu hawane, na vakavile nacho chakulya; na kuvadahya vali na nzala nkatogilwe, kwigela ngʼo vagwe wesa mu nzila. 33Na vahemba vakwe vamuwilaga, Tupiwe kuhe henaha mwibalangu mikate ya kukwila, 34va mbuto yeniyi nhanya vigute? Na Yesu alivawila, Muli nazyo mikate zinga? Alisi ava vahaya, Mpungati na tusomba tudo. 35Na walagilaga mbuto yikale hasi. 36Na wayisolaga mikate mpungati na masomba, na walumbilaga, na wayimegulaga, na wavapaga vahemba, 37navo vayipaga mbuto. Na vose valyaga na vigutaga; na vasolelaga matonge gasigalaga na gokalaga matala mpungati. 38Alisi avo hovene valyaga vavagi vagosya fihumbi finne, kuleka vakima na vana. 39Na wayidahaja mbuto, na wingilaga mu wato na wajaga ku malwande ga Magdala.
Voafantina amin'izao fotoana izao:
Mateo 15: Nym51
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Nyamwezi New Testament © Bible Society of Tanzania, 1951.