Yoosuwa 10
10
AMOORÂ-MARI QEEBIL GACEN
1Yarusalaam malikiy Adoonixedek deqsitak yenehiyya Yoosuwa Qaay deqsitta magaala yibbixeeh teetil suge mara inkitanuuk bayseeh tet malik kaadu qidem yoobbeh. Yeriko deqsitta magaalak kaadu tonnah abem yoobbeh. Toh lih kaadu Gibqon mari Israayil mara lih qalla haysiteenih ken addat yaniinim yoobbe. 2Taham kaa kee kay maral kaxxa warigga tekke. Warigga keenil akah tekkem, Gibqon deqsitta magaala Qaay magaalak nabuk teneeh; malikwa luk ten magaaloolik kaxxih kaxxa magaalak ten. Teetil yen mari kaadu qeebil agiirak yenek, Israayil marak qeebih macah gacen iyyaanamak ten. 3Sarrak ta malikii, Cebron deqsitta magaalal malikih yen Hooham kee Yarmut deqsitta magaalal malikih yen Firam kee Laakis deqsitta magaalal malikih yen Yafiyaq kee Qeglon deqsitta magaalal malikih yen Dabiirih farmo ruubeeh, keenik iyyemii: 4«Gibqon magaalah mari Israayil mara kee Yoosuwa lih biceenih yaniinik, ken nabbixe'gidih amay yoo cata» keenik iyye. 5Too waqdi too koona malikiy Amoorah yoobokehiyya elle hayta qaskar esgelli heenih, Gibqon magaalat maro hayya heenih, qeebi aben.
6Too waqdi Gibqon mari Gilgal deqsita aracal yan Yoosuwah farmo ruubeeniih, iyyeenimii, «Ni amoytaw, Amoorâ malikway woo qaleelak tan baaxol tanihiyya takkeemiik lon qaskar inkih gaabossa heenih qeebi net abeenik, net takkeemik tibba maxcinay xayuk amay nee cata» kaak iyyen.
7Toh yoobbe waqdi Yoosuwaa, dooren qaskar kee raqqa 'te qaskar inkih luk gexe. 8Too waqdi YALLI Yoosuwak iyyemii, «Anu nasri koh aceeh ani'mmay, keenik mameysitin. Keenik num kot makoysitak» kaak iyye. 9Yoosuwa kee inkih tan kay qaskar inkih yan bar Gilgalaak Gibqon fan gexak xinna 'yeenih Amoorâ-marat garciik qeebi aben. 10Gibqoonul YALLI, Israayil marih foocal, Amoorâ-mara fixixiseeh, qeebit akah baditan innah keenik abe. Too waqdi YALLI ken catak, woo qalek akak taban gitak keenit aben ardah Beet-Coron deqsitta magaala fan ken baahen. Qadeeka kee Makkeda deqsitta namma magaalak gabbi qaxa raaqa arac fan gital ken qidak ken baahen. 11Amoorâ-mari Israayil marak woo qalek ooban waqdi, akak taban gitak kudak oobak sugen waqdi, YALLI kaxxa arroqle keenil ruubeeh; too arroqle Qadeeka guffa haanam fan keenil radak sugte. Israayil marih gabat tembexeemik, too arroqle qiddem tembegge.
12Too ayro YALLI Israayil mara Amoorâ-marak yiysiise waqdi, Yoosuwa YALLA lih yaabeeh; Israayil mari elle yani'kkel iyyemii,
«Ayroy, Gibqon magaalah amol idiy.
Alsay, Ayyaalon dorrih amol idiy» iyye.
13Too waqdi ayro kee alsa, Israayil mari naqboytiitik iissa 'yam fan, angayye'kal inki aracal elle sugte. Aham elle tekke inni Yaasar deqsita kitaabih addal yan. Inkih tan ayro, ayro kore'kal qaraanak gudel inki aracal teede. 14Too ayroh innah, YALLI sahdayti yab edde oggole ayro duma masuginnaay a saaku makkinna. YALLI too ayro Israayil marih qaxak gacca 'yeh qeebi abe.
15Qeebi gaba kale waqdi, Yoosuwa kee kay qaskar Gilgal deqsita aracal elle yinfiddigen ikke fan yuduuren.
WOO MALIKWA ELLE YIBBIXEN INNA
16Woo koona malik faxe innalaay, Makkeda deqsita aracal gablah addat uqurat raaqeenim timixxige. 17Too waqdi ken yuble num Yoosuwah ken warse. 18Yoosuwa iyyemii, «Kaxxa xaa bahha haay woo gabla akak culan afal haa. Tokket dacayrih sahda haa. 19YALLAY sin Dagelta kinnihiyya keenik sin yiysiiseh yanik, isinnihiiy wokkel maadayinay darre le kabuk naqboytiitit qeebi aba. Ken magaalooli fanah aduure ken kala» keenik iyye. 20Dago maray isinni magaaloolik gasoosa fanah wadbitehiyyak kalih mara Yoosuwa kee kay qaskar selli hayte. 21Sarrak Yoosuwâ mari Makkeda deqsita aracay elle yinfiddigeenihiyya fan amaanah kaal yuduuren.
Tohuk wadir woo rasul Israayil marat afak guduqqa iyyaanam yalliile num maraaqinna.
22Yoosuwa, «Gexay woo gablah afat yan xaa kalla haay woo koona malikiy wokket yanihiyya eyyeeqay yol baaha» iyye. 23Too waqdi woo gabla fakeeniih; Yarusalaam malikiiy, Cebron malik kee Yarmut malikiiy, Laakis kee Qeglon malikwa wokkek bukka heenih Yoosuwal baahen. 24Sarrak Yoosuwa Israayil qaskarah inkih seeceeh, sarrak qaskar abbobtiy kaa'lih gexxeh sugtehiyyak, «Amay a malikwak fillat ibah iqita» iyye. Oson too way fillat keenik taqqa iyyen. 25Tohuk gaba kalen waqdi qaskar abbobtik, «YALLI naqboytiitik inkih tamah sin elle yaysiisu waa innak, mameysitinaay niya haysita. A taamal digga xicay agaagul akak caba» keenik iyye. 26Sarrak Yoosuwa woo koona malik inkih qideek lakal, yakken konooyuk koona caxat ken takre. Oson woo cooxih bagut ayro culla 'tam fan takayrut sugen. 27Ayro cultek lakal woo cooxih baguk ken ginaada oobiseenih, woo duma edde yombooqoreenih sugen gablah addat ken qiden. Sarrak woo gablak afa kaxxa xeetit alfen. Woo xeet a saaku fan elle yan.
YOOSUWA AKI BAAXOOXA ELLE YIBBIXE'NNA
28Tohuk lakal Yoosuwa Makkeda deqsitta magaalat qeebi abeeh, tet kee tet malik woo qeebit yibbixe. Too magaalal suggu 'ye mara seleh. Num nuwwuk keenik macabinna. Makkedah malikik woo Yerikô-malikik abba heem abe.
29Tohuk lakal Yoosuwa kee kay qaskar Makkedak bisoh Libna fan safareeniih Libnat kaadu qeebi aben. 30YALLI kaadu too magaala kee tet malikik qeebil ken yiysiiseh. Too magaalal suggu 'ye marak num macabinnoonuy inkih selli heen. Tet malikik kaadu woo Yerikô-malikik abba heenim aben.
31Tohuk lakal Yoosuwa kee kay qaskar Libnâ-magaalak Laakis deqsitta magaala fan gexeeniih woo magaalat maro hayya heenih qeebi aben. 32Qeebi qimbiseenimik nammayhaytoh ayro, YALLI Laakis magaalah marak qeebil ken yiysiiseh. Hununuh too Libnak magaalal akah abba heen innal, num cabe'kal magaalah addal suggu 'ye mara inkih qiden. 33Geser malikiy migaaqah Hooram deqsitak yenehiyya Laakis magaalah marih catoh yemeete. Takkay immay kaa kee kay qaskarak kaadu qeebih yeyseenih, num keenik nuwwuk macabinnoonuy inkih ken qiden.
34Tohuk gaba kaleenik lakal, Laakis deqsitta magaalak Qeglon deqsitta magaala fan gexen. Too magaala gufen waqdi, marot tet hayyay, qeebi teetit aben. 35Too ayrot edde tet yibbixen. Too yibbixen ayrot edde Laakis magaalah marak akah aben innah, num keenik cabe'kal sella ken heen.
36Tokkek gaba kalen waqdi, Yoosuwa kee kay qaskar Qeglon magaalak Cebron deqsitta magaalay qaleela le baaxol tanihiyya fan gexen. Too magaalat kaadu qeebi abeenih 37sarrak tet yibbixeenih. Too waqdi tet malik kee woo magaalal suggu 'ye mara inkih qiden. Toh lih kaadu woo magaalah dariifal ten gaandoodi bayseeniih; addal akak suge mara kaadu seleenih. Yoosuwa too magaalak hununuh Qeglon magaalak akah abba hee innah, inkitanuuk tet bayisaanamal gaba kale. Teetil suge marak num macabinnay selli hee.
38Tohuk lakal Yoosuwa kee kay qaskar wadir Dabiir magaala fan gacteeh, qeebi teetit aben. 39Sarrak tet kee tet malik kee tet garil sugga 'te gaandoodih agantah inkih yibbixen. Tokkel suggu 'ye mara qideenih. Yoosuwa Dabiir magaalah mara kee tet malikik Cebron kee Libnâ-magaalah mara kee malikwak abba heem abe.
40Yoosuwa too baaxooxah marak inkih yeyseh. Woo qaleelah tan baaxoh malikwak yeyseeh; ayrô-mawqa le kabut raqta qalê-ragidit tan baaxooxa kee, tonnah kaadu, ayrô-culmat raqta mango koomaami le baaxooy, tonnah kaadu, woo bacarih tan baaxoy gabbi le qaxat raqtahiyyal suggu 'ye marak inkih yeyse. Too baaxooxal suggu 'ye marak num macabinnay ufuy elle haytam inkih qide. Tah amrissem, YALLAY Israayil doore Dageltah yanihiyya. 41Yoosuwa Kaadis-Barniqa deqsita aracay gabbi le qaxat raaqak xabba haanamaay Gaadak baddi afah amma 'yaanam takke baaxot inkih gaadu abe. Toh lih kaadu Gosen deqsita baaxok xabba haanamaay Gibqon magaalah amma 'yaanamih agantah isi gubah gacse. 42Yoosuwa a gid takke baaxo kee teetil yan mara kee malikwak edde yeysem, inki adda abe gaaduk ten. Wohim akah tekkem, YALLAY Israayil doore Dagelta kinnihiyya ken lih yeneeh; taham akah tekkem tohu. 43Tohuk gaba kalen waqdi, Yoosuwa kee kay qaskar woo elle yinfiddigeenih yenen aracay Gilgal deqsita fan yuduuren.
Voafantina amin'izao fotoana izao:
Yoosuwa 10: NKM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra