MATEU 7
7
Pëwat ñaan pëleents
(Lúk 6.37-38,41-42)
1Ind tsë wat ñaan pëleents, din nda rits wata pëleents. 2#Mar 4.24Bi nduu wat bi bañaan pëleents, unk di nduu wata run pëleents buts. Kaniibi ki nduu niibëna ki, kee niibëna ind kun buts. 3We ka wun kë teen kako kan ci ki di pëkës ni nda tsaari, te m winats pëmul pan ci pi di pëkësu? 4Um bi kë ja bun ni nda tsaari: ‘Lipan-e mán pënani kako di pëkësu, te pëmul ci aatsum di pëkësu?’ 5Ko wi m ci wi nanguungu! Pënani bërun pëmul di pëkësu, din kë win bi kë pënan bi kako kan ci ki di pëkës ni nda tsaari. 6Ind tsë ngëbuus ko u yëman wi, a te ind tsë gutsar ngënkëmbe ilaants ind. Uci nda ro ank, ngë poos-poosan yul a nguu ba, ngë witsësëra ind ka tawës-tawësan.
Bëyep
(Lúk 11.9-13)
7Nda yepan, ndë wëla; nda tsasan, ndë win; nda kob-kobani, pëlëman ka waantsa ind. 8Par, na yepi, në wëla; nan tsasi, në win; a nan kob-kobani, pëlëman ka waantsaul. 9Naom ñaan tsi ind, ni abuk kë yep un pëpom, u ci pëlaak pi në wëlul pun? 10Oo në yepul utsëb, në wëlul uko-pëtsats-a? 11Ind ba waraatsa biki, ande nda me aatsum pëwël upäts ind ngëko ngëwar; a nda me koon, Asin ind nan cii di batsi, ka wël biki ka yepul biki ngëwar! 12#Lúk 6.31Ngëko bëlieng, ngi nda ŋal ngi bañaan përo ind, nda rori bukul ngul buts, par unk di ulua-Moises ja run, ni bayëlia.
Pëlëman pan kats pi
(Lúk 13.24)
13Nda niajëni tsi pëlëman pan kats punk, par pëlëman pëwaanal pun ni bëga bëwiak bun ka niaman ñaan; a bañaan bacumal kë niajëna tsi bul. 14Maa pëlëman pan kats punk, ni bëga buñíkëtsuel bun ka tsëpand ñaan pa ubiira; bapar tsi bul cumats.
Bëko, ni mbuk bul
(Lúk 6.43-44)
15Nda rukan ibats tsi bayëlia batsup; bi bu bi bi tsi ind ni kawara urafaal; maa di bametsu bukul, bë ci ngënjurtu ngëjuatsal. 16Nduu yëkëraan bukul tsi ngi bu kuu ro ngi. Ñaan a yëlan pëmar mbuk #7.16 Bëbiiñu: apënë-ni tsi përim Bíiñu; aci bulon bëko, bi kan pën bi pëwat ubiiñu bëbiiñu tsi buwuul iyu-a? Oo pëmar mbuk #7.16 Bëfiigu: apënë-ni tsi përim Fíigu; aci bulon bëko, ba naam bi bukúngël. Yeesu tib përim anaamanaan bulbëfiigu bëkungul tsi bëŋoñu-a? 17Unk, bëko bëwar, ka buk bun mbuk mwar; a bëko ba waraatsa bi, ka buk bun mbuk ma waraatsa mi. 18Bëko bëwar, yëlants pëbuk mbuk ma waraatsa mi; a bëko ba waraatsa bi, yëlants pëbuk mbuk mwar. 19#Mat 3.10; Lúk 3.9Bëko ban bëkats bi mbuk mwar, ka kënta bu gutsara bërua. 20#Mat 12.33Unk, tsi ngi bu kuu ro ngi, tsi nduu yëkëraan tsun bukul.
Bafets Yeesu bacar
(Lúk 6.46; 13.25-27)
21Cits biki ka n jain biki blieng: ‘Ajug, Ajug!’ Ka niaj bukun pësien batsi, maa aci ni kan doi uŋal Asin nji nan cii di batsi. 22Tsi unu umënts, bañaan bacumal koo jain: ‘Ajug, Ajug! Wund carats iink aleents përim tsi katimu-a? A wund ruakats iink ngëcaay tsi katimu-a? A wund roots iink ngëko ngëcumal ngi bawitsa tsi katimu-a?’ 23#Iya 6.9Din, ka ja bukul tsi ko un jënts wi: Nji n meets ind yaas; nda lawanin, ind baro ngëko kamabats!
Baniew batëb ban bofats biki pëniew
(Lúk 6.47-49)
24Wul ka wun, nan cikëndëni irim nji yi, a nuu ro ko wi n ja wi, në ci pi nalipal na niewi katoul tsi ilaak; 25a usubal subi, a uwëk-wëk bi, a ufuts natsee ee yërand kato kamënts kun, maa kato yërats, par ujuundi kul aci tsi ilaak. 26Maa, nan cikëndëni irim nji yi, a roots ko wi n ja wi, në ci pi nafuur na niewi katoul tsi kayii; 27a usubal subi, a uwëk-wëk bi, a ufuts natsee ee kob kato kamënts kun, a kato yër, a ka gara-gara.”
28 #
Mar 1.22; Lúk 4.32 Bi Yeesu ba bi pëleents ko wan, a indënd bañaan pikra tsi bëjukanul. 29Par, ka jukan pi aka pëyëlan, cits bi bapican-ulua ja bi ba roon bu kë jukan.
Voafantina amin'izao fotoana izao:
MATEU 7: KPKNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Le Nouveau Testament en langue Manjaku © Alliance Biblique du Sénégal, 2020.