Matius 14
14
Yohanes ik olomu ʼbelabenebise laga aʼge ano ebe werigisa wene
(Markus 6:14-29; Lukas 9:7-9)
1O eria hegit e, at Herodes o Galilea doʼgo ʼgain onuk logo aʼge welaga aʼge ano, Yesus en taga laga aʼge ano obok hwelegeitik e, 2at osi disogo moʼgulentesi,
“Yohanes ik olomu ʼbelabenebise laga aʼge ebe weregismu waraga aʼge ano pobuk elaluk aga ai en e, elalin tu puk aʼge til denago ai o,” oluk ebe Yesus taga laga aʼgeat egei o. 3-5At Herodes en Yohanes pageat weregei ai re, wene disogo oluk. At ʼgain Herodes en e, ot Filipus ugwe Herodias ai delogo wesi ai en e, at Yohanes en e, Herodes disogo moʼgulesi,
“Hwe Herodias wo ukmuat wegen ai, wogo wolom mia o,” oluk moʼgulesi ai en e, Yohanes ebe eʼgik herle wusogo re, o eneʼgik herle wusogo onobugumu ʼgwelakpesirik werigoluk tegei aʼgeat de, is aphwami en e,
“Yohanes ai Allah iak moʼgulentasu aʼge,” oluk ogumu re, woru ogorlok aga.
6Aʼgeat de, agauwa at Herodes ai ebe dagaga hegit lau wagama re, seni sorogulat e, at hwe Herodias agalogo salisik aʼge ai, aphwami aʼbik eneʼgerlakma en darlik tagalat da horlok ya horlok til denagoma re, at ʼgain Herodes ai ogola agai aʼbik hesi. 7Agai aʼbik en Allah onuk hoʼbuk ʼbalogo, hwele ano moʼguleselat e,
“Hat no ʼgonu moʼgulnorogun holuk, wokheigat o. Holuk e, mesik ʼgonu moʼgulnemin da,” oluk moʼgulesi. 8Asogo moʼgulesimu, hwele salisik aʼge ano ia en arat esaʼgo weregeimu no oluk e, disogo moʼgulesi,
“Naik, at Yohanes ik olomu ʼbelabenebiso aʼge ano aʼgul ʼbalogo re, piring lok aʼge pam dalogo woknemin o,” oluk moʼgulesi. 9Asogo moʼgulesimu, at ʼgain Herodes ano ede wiak aga aʼgeat de,
“An en Allah onuk hoʼbuk ʼbalogo obok moʼgulosokhwe aphwami aʼbik seni sakho nouwogoluk odoktu egesa aʼge yema arat enesaʼgo hweligisarikmu re,” oluk, osi en hwele ano egei hegitsogoat aʼgul ʼbalogo wogesi louwagoluk moʼgulentesi. 10Asogo moʼgulentesimu legesarik e, at Yohanes ano aphwami eneʼgik herle wusogo onobugumu ebano oruakma ʼgoluk e, oʼgorlop ʼbaligisa. 11Oʼgorlop ʼbalogo aʼgul ʼbelak ano piring pam dalogo poluk hwele salisik aʼge ano wogosu wegesema re, at en e, ia wogesi laga. 12Asogo tigisema re, at Yohanes osi iak wogu legesa aʼge wegesarik e, ebe werak ano ʼgwiangma selak poluk e, obok nak Yesus moʼgulesi legesa.
Asogo takpoluk welat, at Herodes en Yesus obok hwelegeitik,
“Yohanes elaluk agarik denago hegi,” oluk egei ai o.
Yesus en aphwami enebe 5.000 aʼge soʼboru eseik-ʼbeseiksogo wogentesi wene
(Markus 6:30-44; Lukas 9:10-17; Yohanes 6:1-14)
13Aphwami pema en e,
“Herodes en Yohanes ano weregei o,” oluk egesema Yesus esaʼgo hwelegeitik e, o eba ukpoluk e, ik so wusogo omuat ʼgeksogo o aphwami enareng erlakma eba lagama, aphwami enebe modok aʼbik enesaʼgo holholuk e, onowi seli loʼbok en, ik esaʼgoʼgwe en eʼberlik legesa. 14Is naduk legesarik oruakma, at Yesus pobuk ik so wusogo lagarik, so ogola en eneʼbek libagarik, il yerontoluk edeabenebegeitik e, is pema ou wiak aʼge ebano obabenebegei. 15Asogo obabenebisokhwe, o arat hup agama re, at iak wogu legesa aʼge ebano Yesus eʼbek wegesarik e, disogo moʼgulegisa,
“Nis o yema aphwami enareng erlak en oruakhwe, o arat lobuk egei yema re, aphwami aʼbik yema onsoʼboru oʼgo ʼbaluagoluk e, o yema esaʼgo esaʼgo seli wei oʼgwe peragenebemen o,” oluk moʼgulegisema, 16at Yesus en e,
“Is ai lo puk o. His enat wogentemit o,” oluk moʼgulentesi. 17Asogo moʼgulentesimu, is en e,
“Nis e, soʼboru roti aʼge nak e, huaben oruak. Ye, hiane re, ʼbiren oruak. We, eria nak de, tenak welege o,” oluk moʼgulegisa. 18Asogo moʼgulegisema, at Yesus en e,
“Eriayat woknosu manis o,” oluk moʼgulentesi. 19Asogo moʼgulentesimu re, eʼgigem pou wegesema, at Yesus en aphwami aʼbik ebano disogo moʼgulentesi,
“ʼBugubugu petne eba huretil lit o,” oluk moʼgulentesimu huretil legesema re, soʼboru roti aʼge huaben eriano emin, hiane ʼbiren eriano emin, eʼgikmu wesirik e, il ʼbogorl akhit likharok welat, Allah hau werak poluk ʼgusogo re, osi iak wogu legesa aʼge ebano en soʼburontouwagoluk eneʼgigem pesimu soʼburentigisa. 20Asogo soʼburentigisema, is enebe ʼberlegat onogumsogo neʼgesarik dedilogo re, mul sum 12 emde lorophegeik yagasogo pegesa. 21Aphwami enebe ʼberlegat neʼgesa aʼge ai, malik emin, hwami emin, wenagonobu erlak. We, ap enarlue nak e, enebe 5.000 wenagenebigisa.
Yesus oyuk ik ogum petne dasobut laga wene
(Markus 6:45-52; Yohanes 6:16-21)
22Asogo arat neʼgesema en e, at Yesus en at osi iak wogu legesa aʼge ebano disogo moʼgulentesi,
“An aphwami esan yema peragenebaik en e, his naduk ik so ogola ʼgwi laguptik e, ik etle akhit libaga lemis o,” oluk iak ningsogo moʼgulentesi. 23Asogo moʼgulentesimu, libagaihwe, at Yesus en aphwami esan ebano arat peragonoboluk e, at omu nak duk pam seʼban iogoluk ligagarik osoma re, o hik egeimu re, omuat eba welaga. 24Oruakhwe, osi ebano ik so wusogo walegat ik ede ʼburl lai wegesarikmu en, yasobu annisogo onorogoleʼgwe en punhau wagama, ik erliak-ʼgwerliak hasulat aʼbik ligagokhwe, ik so ano abel eden-peden hasu laga. 25Asogo tagokhwe, o dakha iogoluk ede weʼgerlisokhwe, at Yesus oyuk ik ogum oʼgwe pil pil eneʼbek waga. 26Asogo oyuk ik ogum petne pil pil wagoma, is osi iak wogu legesa aʼge ebano enil yetholuk e, modok yuk egesarik onogorlok en e,
“Eige! Muʼgat wago yo!” oluk, eniak ngai-wai egesa. 27Asogo ogumu erianoat at Yesus en e,
“Nosi, yuk ogup. An nebeat waga legi o. Holuk, honogorlok hagup o,” oluk moʼgulentesimu re, 28at Petrus en e,
“Nue. Hat hebeat waga legen holuk e, an ik ogum petne toluk heʼbek weik en,
Suk o, oluk moʼgulnemin o,” oluk moʼgulesimu, 29at Yesus en e,
“Suk o,” oluk moʼgulesimu, at Petrus ano so ogola en libagarik e, ik ogum petne toluk Yesus eʼbek laga. 30Lasumu re, yasobu punhau wagama, il holuk ogorlok agarik e, ik ogola obuksogo ʼbiogoluk iak ngai eselat,
“Eiga! Nue a! Delnebi suk a,” oluk osokhwe erianoat, 31Yesus en eʼgik tenakho edikpasulat e,
“Hat hede nebam heʼberik erlak welegen yu re! Hede ʼbiren welegen ai nopaget,” oluk moʼgulesirik e, 32at emin so ogola ʼgwigisema re, yasobu ano ʼgarok egei. 33ʼGarok egeimu re, is ap so ogola welegesa aʼge ebano en Yesus erliktugulat e,
“Hat demat Allah omlogo hiege o,” oluk moʼgulegisa.
Yesus en aphwami o Genesaret aʼge ou obabenebegei wene
(Markus 6:53-56)
34Asogo toluk, ik so wusogo liplau wegesarik e, o Genesaret eba hegit lau wegesa. 35Wagaimu re, is aphwami eba aʼge en Yesus ebe arat pobi tigisarik e, at obok o seli loʼbok moʼgulentil legesa. Moʼgulentil legesema re, aphwami ou werak aʼge ʼberlegat wogonoboluk Yesus eʼbek wegesema re, 36is en e,
“Yesus, hosum we ologun nak neneʼgik tenhul a?” oluk eniak erlagaik ʼgusogo moʼgulegisarik, is at osum tenhegesa aʼge ogo enebe ʼberlegat op egesa.
Voafantina amin'izao fotoana izao:
Matius 14: WUL
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra