Luka 23
23
Yesu A Kǝga Bilatusi
(Mat 27:1,2,11-14; Mar 15:1-5; Yoh 18:28-38)
1Nǝb nɨ a mʊrka gwamɨ, nǝngɔ ja gun ja bɛ nǝn gɔ a kǝga Bilatusi. 2Nǝngɔ ja tǝl jǝ tuwo gǝn nɛ gɔ, “Nǝn nya balɨ nɨ kal nǝbɔ lɛ gɔ ka ja nyʊwa lɛ nǝb tǝmɔ. A kaa nǝbɔ gɔ ka ja ywa lɛ Kaisar kemʌn tǝm. Nʊng dul gǝnɔ lɛ gɔ gǝ nǝn Kiristi, fɔlɔ.”
3Bilatus a bʌ Yesu gɔ, “Nǝmɔ mʊ fɔlɔ Yahudawagɨɨ ka?”
Nǝngɔ Yesu a jǝla gǝn gɔ, “Kanga mʊ sʊwaɨ.”
4Nǝngɔ Bilatus a sʊwa dʊʊm nǝbkǝlamɔ jǝbɔ nǝbɔ a mʊrkaɨ gɔ, “N fɨɨ nʊ nɨ. Mǝ nya gǝn bɔ nǝn kɛl nɨ a yǝlam na borangɨ.”
5Ja tɨtǝn gɔ, “Mɛlalɨ gǝnɔ a gung nǝl nǝbɨɨ gwam a tǝm Yahudiya. A tǝl a mʊgɔ Galili, nǝngɔ ba la daa nɨɨ.”
Yesu A Kǝga Hiridusi
6Nǝn nyʊwatǝm kɛl nɨɨ, nǝngɔ Bilatus a bʌ gɔ, “Balɨ nɨ n bwɛ Galilii ka?” 7Kwama nɨ Bilatus ba nyǝm Yesu gǝ na nǝn yɨmɔ a daa Hiridus woi nǝn yɨm fɔlɔnɨ, nǝngɔ a tʊng Yesu a daa Hiridus woi, kwama gɔ Hiridus tǝgǝn gǝ na a Urushalima.
8Kwama nɨ Hiridus a kuwom Yesui, nǝngɔ nǝl gǝnɔ a fuloi, jʊ a bwɨɨ na swɨ lɛ gǝ kuwo Yesu a kanjǝlɔ gǝ nyʊwala lɛ a dul gǝnɨ. Ya nǝl lɛ Yesu a maa gǝm jǝ laatǝm kang. 9A tal Yesu gǝm bʌtʌm kɛlɔ a lada nyɔ, Yesu a gar gǝm bɔ kɛl wo. 10Dʊʊm nǝbkǝlamɔ jǝbɔ nǝb mɛlalɨ diilɔ tɨlam woi, ja ja kǝga nǝn kaltǝm gǝnɔ. 11Hiridus jǝbɔ sʊwajaam gǝnɔ ja tuwo Yesu. Nǝngɔ ja mal gǝm bɛllɛ dʊʊnɔ ja tʊng Yesu a daa Bilatus woi. 12A di gɔ Hiridus jǝbɔ Bilatus ja yǝlam fatǝm. Galɨgǝnɨ, jǝ maaka kii lɛ.
Ja Mwatɨ Yesu Gǝm Borang Bwaa
(Mat 27:15-26; Mar 15:6-15; Yoh 18:39; 19:16)
13Bilatus a jo dʊʊm nǝbkǝlamɔ, jǝbɔ nǝb dʊʊmɔ, jǝbɔ nǝbɔ. 14Nǝngɔ a sʊwa ji gɔ, “Jǝ́ bɛ nǝn nʊ nɨ a kǝga mɨ jengɔ nǝn gɔ kal nǝbɔ lɛ gɔ ka ja nyʊwa lɛ nǝb tǝmɨ. N fɨɨ gǝn a kǝga jen, mǝ nya gǝn bɔ nǝn kaa bwɨlangkɛl a katɨ nɨ jǝ́ tuwo gǝn nɛ nǝnɨ. 15Hiridus tǝgǝn a fɨɨ gǝn. Nǝngɔ a yǝla a tʊng gǝn a daa nǝn woi, a nya gǝn bɔ nǝn kɛl bwɨlan, a maa bɔ jʊ nɨ a la bwaaɨ. 16A dul kɛl nɨɨ, jʊ mǝ maa lɛɨ, mǝ tʊm gǝn sǝ n dem gǝm kang.” 17Nǝn kwama dikulomɔ, gwamnagɔ gǝ dem dem kang a nǝb nɨ gǝm ja bwaba ja tal a lɔsomi win, wʊnɨ nǝbɔ swɨ lɛɨ.
18Nǝngɔ gwam jinɔ ja mal kamɨgɔ a nyiyoi gɔ, “Shu nǝn nʊ nɨ! Dem nǝm kang a Barabas gǝm!” 19Barabas n nʊ nɨ ja bwa ja mal a lɔsomii a kaa kutʌm nɨ a maa a mʊgɔ tuulɔ gɨɨ, a wʊnɨ a jʌ kaam nǝb woi.
20Nǝngɔ Bilatus a yǝla a sʊwa ji gɔ gǝ dem dem kang a Yesu gǝm. 21Nǝngɔ ja ja kǝga nǝn matǝm bwaalɨgɨɨ gɔ, “Kʊʊ gǝn! Kʊʊ gǝn!”
22Bilatus a yǝla a sʊwa ji na taalɔ tʌgo gɔ, “N bwɨlangkɛl wɛ nʊ nɨ a maa jǝ kʊʊ gǝn nɛɨ? Mǝ kuwo bɔ jʊ nɨ a maa a yǝlam na bwaaɨ. Mǝ maa gǝm banjangɨ sǝ n dem gǝm kang.”
23A dul kɛl nɨ ja tɨtǝn sɨnatǝmɔ nǝn gʌleng diil gɔ, “Nǝ swɨ lɛ ja kʊʊ gǝn!” Nǝngɔ ja yab kwaan gǝnɨ. 24Nǝngɔ Bilatus a maa kanga jǝ swɨ lɛɨ. 25A dem kang a nʊ nɨ gǝm ja bwa ja mal a lɔsomi a kɛl kutʌmɔ a maa jǝbɔ jʌtǝm duli, kanga jǝ swɨ lɛɨ. Nǝngɔ a nǝ ji Yesu sǝ ja maa gǝm jʊ jǝ swɨ lɛɨ.
Ja Kʊʊ Yesu
(Mat 27:32-44; Mar 15:21-32; Yoh 19:17-27)
26Kwama jǝ shum lɛ nǝn Yesui, ja ta kaa balɨ wʊnɨ jǝ jo lɛ gɔ Saminui, n bwɛ Kuranei, wʊnɨ a jel a kuul bɛ lɛ a tuulɔɨ. Nǝngɔ ja ya gǝm tɨya nɨ jǝ kʊʊm Yesu lɛɨ gɔ a doi. 27Nǝbɔ a lada a bwangtǝn gul gǝnɨ, jǝbɔ nɔɔtǝm nɨ ji wi bwaa lɛ a dul gǝnɨ. 28Nǝngɔ Yesu a yǝla sʊwa ji gɔ, “Bɛtɨ nɔɔtǝn Urushalima, bɛ ka jǝ́ ji lɛ wi a dul mɨ. Jǝ́ ji wi a dul jen jǝbɔ bɛtɨ lɔ jeni. 29Kumtɨnɔ bɛ lɛ wʊnɨ nǝbɔ sʊwa lɛ gɔ, ‘Bwiligɔ na a nɔɔtǝm jolʌmi, jǝbɔ fʌl nɨ a bʌ bɔ bwɛ woi, jǝbɔ yʊl nɨ a bwi bɔ mwɛ yʊl woi.’ 30Jǝ sʊwa sʊwa yemtɨnɔ gɔ, ‘Jǝ́ yal a dul nǝn.’ Jǝ sʊwa sʊwa tulitɨnɔ tag gɔ, ‘Jǝ́ sum nǝn.’ 31Na nǝbɔ a maa kanjǝl nɨ nǝn kwama tɨyagɔ yʌbi gǝnɨ, n wɛ bwɨ lɛɨ na a kʊshɨɨ?”
32Kaam nǝbkuum yo wʊnɨ ja shu nǝn ji ya jǝ kʊʊ ji lɛ jǝbɔ gɨɨ. 33Ba ja la daagɔ jǝ kʊʊm gǝn nɛɨ, wʊnɨ jǝ jo lɛ gɔ kwasɨ duli, nǝngɔ ja kʊʊ gǝn jǝbɔ nǝbkuumɔ nɨ yoi, win a gwanga kang jajǝng, win a gwanga kang fɔlɔng gǝn. 34Nǝngɔ Yesu a sʊwa gɔ, “Tɛtɛ, kǝlǝm jim. Ja nyǝm bɔ jʊ jǝ maa lɛɨ.” Nǝngɔ ja tǝga dwangtɨn gǝnɔ a gola gatǝm kwannyaɨ.
35Nǝbɔ tɨlam dʌng gǝn nɛ. Nǝb dʊʊmɔ mog gǝn nɛ, jǝ sʊwa lɛ gɔ, “A bʊʊ nǝn kaamɨ, bɛ ga bʊʊ nǝn dul gǝnɔ na gǝ nǝn Kiristi a Kwaamaɨ, wʊnɨ Kwaama a jǝgǝmɨ.”
36Sʊwajaamɔ tʌji ja mog gǝn a gola nǝtǝm gǝn mwɛ fwalɨ. 37Ja sʊwa gǝn gɔ, “Na nǝmɔ mʊ fɔlɔ Yahudawagɨɨ, bʊʊ nǝn dul mʊnɔ!”
38Ja mʊla tʌgo a dul tɨya nɨ ja kʊʊm gǝnɨ gɔ, “nʊ nɨ nən gɔ fɔlɔ yahudawagɨɨ.”
39Win a kʊm nǝbkuum nɨ ja kʊʊ ji dakinii, a sʊwa gǝn kɛl bwɨlan gɔ, “Mʊ ke bɔ Kiristi ka? Bʊʊ nǝn dul mʊnɔ jǝbɔ nǝn.”
40Nǝngɔ a wini a ga gǝm wulong gɔ, “Mɨ mʊ nyʊwa taal Kwaamaɨ lɛ ka? Ja mwatɨ bǝm borang bǝnɔ win jǝbɔ a nʊ nɨɨ ka? 41Kʊʊtǝm bǝnɔ ja maaɨ n dǝngdǝng a dul bwɨlangkɛl bǝnɔ gǝm. A nʊ nɨɨ a maa bɔ kaa bwɨlangkɛl.”
42Nǝngɔ a kela gǝn gɔ, “Yesu, bɛ ń bʊʊla nǝn mǝ na ń nya fɔlɔn mʊnɨ.”
43Yesu a jǝla gǝn gɔ, “N sʊwa ń bɨlǝngǝn, dwiyen mʊ dakini jǝbɔ mǝ a dʌbʌl lɔ Kwaamaɨ.”
Yesu A Bʊla
(Mat 27:45-56; Mar 15:33-41; Yoh 19:28-30)
44Kemʌnɔ kʊb jeli yo na kɔkɔgɔ, nǝngɔ kumtojiligɔ a sumʌm tǝmɔ gwam, a yɔ nǝn a kemʌnɔ taal na kwaamɨ. 45Nyalǝm nu kwamagɔ a won bɔ. Dwang nyanga Kan Kwaamanɔ a bel yo. 46Nǝngɔ Yesu a jo jangajǝl nǝn diil gɔ, “Tɛtɛ, mǝ bǝla kʊlɨ mǝndɨ a kang mʊn.” Kwama nɨ ga sʊwam kɛl nɨɨ, nǝngɔ a bʊlaɨ.
47Dʊʊ sʊwajaam nɨ tɨm woi a kuwo jʊ nɨ a bwɨɨ, nǝngɔ a bǝlá Kwaama a sʊwa gɔ, “Bɨlǝngǝn nʊ nɨ n nǝ dǝngdǝng.”
48Kwama nǝb nɨ pʌd ba mʊrka sǝ jǝ kuwo kanga nɨ jǝ kʊʊm gǝn nɛɨ, ja kuwo jʊ nɨ a bwɨɨ, nǝngɔ ja yǝla a lɔɨ, nǝl jinɔ a kala dangǝn. 49Nǝb nɨ gwam a nyǝm gǝnɨ, jǝbɔ nɔɔtǝm nɨ ja tǝl bwangtǝm gǝnɔ a Galilii, ja tɨ a kʊta, nǝngɔ jǝ dʌng kanjǝl nɨ lɛ a bwɨɨ.
Fʌltǝm Yesui
(Mat 27:57-61; Mar 15:42-47; Yoh 19:38-42)
50Kaa nǝl wo a kʊm mʊrkalɨ nǝb dʊʊm kotere tǝm gɔ, dun gǝnɔ nǝn Yusufu. N bwɛ kaa tuulɔ Yahudiyaɨ, wʊnɨ jǝ jo lɛ gɔ Arimatiyaɨ. N nǝ nya, n nǝ dǝngdǝng. 51A dǝg bɔ dul gǝnɔ a borang nɨ ja maa gǝmɨ, jǝbɔ biyotǝm borangɔ. Gǝ yam bɛtǝm fɔlɔn lɔ Kwaamaɨ. 52Nǝngɔ bwɛ nɨ a shu a daagɔ Bilatus woi, ya kela gɔ ja nǝ gǝn bʌlʌn Yesui. 53A shig bʌlʌni, a kʊlʊm nǝn dwang lilini. Nǝngɔ a ya a mʊgɔ tuugɔ ja wʊɨ, wʊnɨ lǝga bɔ ja ya nǝl woi. 54N kum fɛkalɨ, Kum Fǝbtǝmɔ ya la lɛ.
55Nɔɔtǝm nɨ a jel a Galili jǝbɔ Yesui, nǝngɔ ja bwangtǝn Yusufui. Ya ja kuwo tuugɔ, ja kuwo kanga ja yam bʊtɔ Yesui a mʊgɔ gǝnɨ. 56Nǝngɔ nɔɔtǝm nɨ a yǝla a shu a lɔɨ, ya ja fɛka nwang nɨ nǝn kunʌn lǝmɨɨ. Ja fǝb nǝn di Kum Fǝbtǝm kanga diilɔ a sʊwa gɔ ja maaɨ.
Voafantina amin'izao fotoana izao:
Luka 23: DBD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©️2024 Luke Initiative for Scripture Translation