If you would like a copy of this version please contact info@davaraudiobibles.org

Birjia Bible New Testament, CC BY-NC-ND 4.0, New Life Literature (NLL), 2023. (Text)
Birjia New Testament Audio Bible, CC BY-NC-ND 4.0, Davar Partners International, 2025. (Audio)

Birjia New Testament (NLL)

हेरोद राजा राइज याते दोहोनय घनी, जहुदिया देस रआ बयतुलम डीही रे ईसु रआ जनम होयावलेना होनाघनी पुरुब एतेन बिदुवानकु जेरुसलेम रे वेज्‌नाकु जोटोः हुँकू सोधव लिड्कुअकु, “जहुदीकु रेनि राजा जे जनम तनय हुँनि ओकारिया? चितानतआचि आले पुरुब रे होना रआ इपील ञेल तदियाले, आले हुँनि राजा जोहारवा तआ वेज् तनाले।”
नोआँ अयुम केते राजा हेरोद, जोटोः जेरुसलेम रेनकु गोटे होड़ बोरो यनाकु। तब राजा हुँकू जहुदी होड़ रेनकु गोटे मुध पुरोहित जोटोः परमेसर रआ बचन सि-सिखाव अवलाकु जवार केते हुँकूइ सोधव लआ, “मसी रआ जनम ओकारे होयावओ चही?”
हुँकू हुँनि कथा रुवड़वा लीदियाकु, “जहुदिया रआ बयतुलम रे, चितानतआचि परमेसर पड़ा एतेन दुखमाय अवला होड़कु पड़ा एतेन ओल लआ इदानआँ,
“‘ओय बयतुलम अमः दो जहुदा राइज रआ ओत रेमा,
अमः जहुदिया रेनकु हकिमकु एतेन ओका लेका रे हों गोटे एतेन हुडिञ कुनी मिआँ,
चितानतआचि अमः एतेन मियड् हकिम दिसतारोओय,
जे इञः रेनकु इस्राएल होड़ रआ देख भले रआ चरवाहा पड़ीयोओय।’”
तब हेरोद बिदुवानकु सच मच राअ् केते सोधव लिड्कुअय हुँनि इपील ओका घनी ञेल दोहोलेनय। फिन हुँनि हुँकू बयतुलम बिदा लिड्कुअय जोटोः कथालअय, “जू सेनोःपे हुँनि सेंगोज् रआ बारे रे अछाते पता लगावेपे; जोटोः जब हुँनि ञमोअय, दो इञः हों खभाइर वाइञपे, ताकि इञः हों सेन कोते हुँनि जोहार वाइयञ।” मेनकेते हुँकू कथावा लिड्कुअय।
हुँकू राजा रआ दुखमा अयुम केते सेनोः यनाकु, जोटोः जे इपील पुरुब रे ञेलोगोन दोहोनय। हुँनि हुँकू रआ मड़ाङ-मड़ाङ सेनलअय, जोटोः जे ठँव रे सेंगोज् ईसु दोहोलेनय हुँनि अगास रे तींगु यनाय। हुँकू होड़ हुँनि इपील ञेल केते अगम खुस यनाकु हुँकू होना ओड़ाः रे सोदोर कोते हुँनि सेंगोज् एंगाते मरियम अडेकु ञेल लिदिया, हुँकू बोहोः किंड़ु केते सेंगोज् ईसु जोहारवा लिदियाकु जोटोः अपन-अपन झोला सुःअ् केते हुँनि तआ सोना, लोहबन, जोटोः गंधरस भेंट रकब् लआकु।
तब हुँकू कुमू रे चेतावनी ञम लआकु चि हेरोद एडे अलोपे रुवाड़कोः, हिनाते हुँकू एटाः होरा ते अपन देस रुवाड़ लेनाकु।

हुँकू रुवाड़ लेनाकु हिना तयोम जोसेफ कुमू रे मियड् परभु रेनि सिरमा दुत ञेल लअय, हुँनि कथालअय, “बिरीड्मी, मुनी सेंगोज् जोटोः एंगाते इदी केते मिस्र देस ञीरेमी, जोटोः इञः जबरे कइञ कथा वाम तब रे हेनेन रे दोहोनमी; चितानतआचि हेरोद नु-ई सेंगोज् गोज् एंडाय तआ ञम यतियय।”
तब हिना ञीन्द जोसेफ बिरीड् कनते सेंगोज् जोटोः एंगाते इदी केते मिस्र सेनोः यानय, जोटोः हेरोद गोजोः हमाः हेनेन रे दोहोलेनय चितानतआचि जे बचन परमेसर पड़ा एतेन दुखमाय अवला होड़कु पड़ा एतेन परभु कथा दोहोलअय पुरा योओ “इञः अपन होपोन मिस्र एतेन राअ् तदियाइञ।”

जब हेरोद ठुवा केदय चि बिदुवानकु इञः धोखा कीदिञाकु, हुँनि कयरव यानय। जोटोः बिदुवानकु जे समय बतलाव दोहोलआकु, मोताबिक बयतुलम जोटोः अस पस डीही रेनकु जे बार बरीस एतेन हुडिंञ गोटे कोड़ा सेंगोज्‌कु एर गोज् लिड्कुअय।
तब परमेसर पड़ा एतेन दुखमाय अवला होड़ जिरमयाह जे कथा दोहोलअय हेंका पुराव लेना
“रामाह रे दुख रआ घोल अयुमोना होंडे अगम इयामे जोटोः खोभरावओः रआ घोल अयुमोना,
राहेल अपन सेंगोज् तआ इयाम यतेअय;
कहियो काय मटियाव ओना,
चितानतआचि हुँनि रेनकु सेंगोज्‌कु कुनीकुआ गोज्‌यनाकु।”

हेरोद गोज् कन तयोम, परभु रेनि सिरमा दुत मिस्र रे जोसेफ एडे कुमूरे ञेल लेनय जोटोः कथालअय, “बिरीड्मी, सेंगोज् जोटोः हुँनि एंगाते इदी केते इस्राएल राइज रे सेनोःमी, चितानतआचि जे सेंगोज् रआ जीवि अँगाव तआ अराव दोहोनय हुँनि गोज् यानय।”
जोसेफ बिरीड् कनते सेंगोज् जोटोः एंगाते इदी केते इस्राएल राइज रे वेज्‌लेनय। बकिन जोसेफ अयुम लअय चि जहुदिया रे अनेज् अपाते हेरोद रआ ठँव रे अरखीलाउस राइज चलाव यतेअय, नोआँ अयुम केते होंडे सेन तआ बोरो यानय, जोटोः कुमू रे चेतावनी ञम केते गलील देस सेन कोते बसाव यनय जोटोः नासरत ञुमुन डीही रे सेन बसाव लेनय ताकि जे परमेसर पड़ा एतेन दुखमाय अवला होड़कु पड़ा एतेन कथा लआ बचन पुरायोः “हुँनि नासरत रेनि कहलावओय।”

Слушни за मती 2