LUKE 23
23
Jesus éí Páílat bidááhdę́ę́' niho'deedlóóz
(Mt. 27:1,2,11-14; Mk. 15:1-5; Jn. 18:28-38)
1Ákohgo diné áłah silį́'ígíí t'áá át'é nídiijéé', áádóó Jesus éí Páílat yidááhdę́ę́' nideizlóóz. 2Áko hak'i dahodii'aahgo yaa nídiikaigo ádaaní, Díí dinéhígíí nihidine'é t'áá ádzaagóó neinitingo yóó'ayii'éésh lá, áádóó Síízar ałdó' t'áadoo nályééh bich'į' nidahohłéhí, nihiłníigo, índa, T'áá bí Aláahgo Naat'áanii Christ nishłį́, níigo nihił béédahoozin. 3Áko Páílat, Da' niísh Jew dine'é Aláahgo biNanit'a'í nílį́? hałníigo nahódééłkid. Áko ábizhdííniid, Jó, bee háínídzíí'. 4Áádóó Páílat éí aláahgo nááda'iiłniihii índa diné áłah silį́'ígíí áyidííniid, Díí diné yee ádąąh dah hast'áanii doo ła' bá shił bééhoozin da. 5Nidi dooda yee naastee'go ádaaní, Jó, Gáliliidóó háát'i'go Judíya t'áá át'éé nít'éé' bii' t'áá kojį' nidi, na'nitingo diné yił hááhoniłcha'.
Jesus éí Hérad bidááhdę́ę́' niho'deedlóóz
6Áko Páílat éí yidiizts'ą́ą'go t'áá daats'í aaníí Gálilii dine'é ła' jílínígíí yína'ídééłkid. 7Nít'éé' Hérad éí kéyah yii' naat'áanii nilínígíí bii'dę́ę́' nijigháago bił bééhoozingo, Hérad yich'į' ahóół'a'; íídą́ą́' Hérad t'áá bí Jerúsalemdi naaghá. 8Áko Hérad éí Jesus yiyiiłtsą́ągo, t'áá íiyisí yąą bił hóózhǫǫd, háálá t'ah ałk'idídą́ą́' hwiideestsééł ch'ééh nízin, háálá haa hodiizts'ą́ą́', áko álílee k'ehgo bee ééhózinii ła' shinááł ázhdoolííł hó'ní. 9Áádóó t'áá nízaadgóó nahódééłkid, nidi t'áadoo bich'į' hadzoodzíi' da. 10Áko aláahgo nááda'iiłniihii índa bee haz'áanii yínda'niłtinii t'áá chaałída hak'i dahodii'aahgo naazį́. 11Áádóó Hérad índa bisiláo éí doo bił jílį́į́góó há nidahast'i', índa éé' ayóó ánóolninii yee hadahodiilaago Páílat yich'į' nát'ą́ą́' anáhóół'a'. 12Áko t'áá éí bijį́ Hérad índa Páílat ałk'is silį́į́', háálá díí bítséedidą́ą́' ałk'ee di'niih nít'éé'.
Jesus hodi'yoolyéełjį' há nihoot'ą́
(Mt. 27:15-26; Mk. 15:6-15; Jn. 18:39—19:16)
13Ákohgo Páílat éí aláahgo nááda'iiłniihii índa naat'áanii danilíinii índa diné ałdó' áłah áyiilaago, 14áyidííniid, Diné t'áá ádzaagóó neinitingo yóó'ayii'éésh dadohníigo díí diné bił shaa noohkai, áko nihinááł nabídééłkid. Jó akonee', díí diné bik'i dahodooh'aahígíí bąąhági át'éii bąąh ádingo shił bééhoozin; 15Hérad nidi ch'ééh áát'įįd, háálá t'óó nihich'į' anáhóół'a'. Jó akonee', biniinaa dazdootsaałígíí bą́ą́h ílį́įgo ájíít'įįdii éí t'áá ádin; 16éí bąą t'óó náhodínéestsxisgo hwéédideeshchił. 17[Jó, hodílzingo áłah ná'ádleeh néi'aahgo awáalyaaí t'ááłá'ígo hach'į' ch'ééyiiłt'e'go bee haz'ą́.]#23:17 Saad ła' áádóó saad naazhjaa' ła' kót'éego daasdzohígíí [ ] bita'gi dabiká'ígíí éí Diyin God bizaad t'áá ałk'idą́ą́' bee ak'eda'ashchínígíí doo t'áá ałtso dabikáa' da, nidi ła' t'éiyá dabikáá'.
18Nidi t'áá ałtso hadadeeshghaazhgo ádaaní, Eii diné sołhé, Barábasgo nihich'į' ch'ééníłt'e'. 19(Éí dinéhígíí kin haal'áagi hááhoniłcha'go naat'áanii yił da'ahigą́ągo, índa diné neiłtseedgo biniinaa awáalyaa góne' yah eelt'e'.) 20Éí bąą Páílat éí Jesus béédideeshchił nízingo hach'į' hanáánáádzíí', 21nidi dadilwoshgo ádaaní, Tsin ałnáoszid bikáa'jį' bił o'ołkaałgo sołhé héii, bił o'ołkaałgo sołhé! 22Páílat táadi hadzidziih góne' ánáábizhdoo'niid, Ha'át'éegoshą', ha'át'íí doo aaníí shį́įshą' baa nijiyá? Bee ádąąh dah hodzist'ą́ągo biniinaa dazdootsaałii doo ła' há shił bééhoozin da; éí bąą t'óó náhodínéestsxisgo hwéédideeshchił nisin. 23Nidi hoł i'doolkałgo yéego dayókeedgo hodi'yoolyéłígíí yee naastee'go [aláahgo nááda'iiłniihii ałdó'] ádaanínígíí yee ak'eh dadeesdlį́į́'. 24Áko Páílat éí diné dayókeedígíí bi'doolnííł biniyé bee lą́ adzisłį́į́'. 25Naat'áanii yił ahoogą́ą'ii índa diné neiłtseedii awáalyaa góne' yah eelt'e'ígíí nídayókeedgo bich'į' ch'éézhníłt'e', nidi Jesus éí t'áá bí danízinígi ádeidoolííł biniyé diné baazhníłtį́.
Tsin ałnáoszid bikáa'jį' Jesus hoł o'oolkaal
(Mt. 27:32-44; Mk. 15:21-32; Jn. 19:17-27)
26Áádóó dah dahodiilóóz, nít'éé' Sairíinii hoolyéédę́ę́' diné léi', Sáíman joolyéego, éí dáda'ak'ehdę́ę́' joogáałgo dahasił, áko hawostisgi tsin ałnáoszid dah deiztą́ągo, Jesus bikéé' nihizhnítą́. 27Nít'éé' diné t'óó ahayóí áádóó asdzání éí Jesus yaa ák'idadiit'aahgo daachago Jesus yikéé' nánízą́. 28Nidi Jesus hach'į' názyizgo áháłní, Jerúsalem bich'é'éké danohłíinii, t'áadoo shaa daahchaí, nidi t'áá nihí índa niha'áłchíní baa daahcha. 29Háálá jó'akon, diné kódazhdidooniiłígíí t'áá áhánídę́ę́' bich'į' yoołkááł, Doo da'ałchíhígíí índa doo daaltsánígíí, índa doo dabi'doolt'ódígíí éí dabízhánee'! 30Áadi índída dził kódeiłníi dooleeł, Nihik'i daołdaas, áádóó dah daask'idígíí, Nídanihidoł'įįh, daaníigo yaa nídidookah.#Hos. 10:8; Rev. 6:16. 31Háálá tsin ditłée'go kódaat'į́įgo, ákoshą' tsin sigango haa daat'į́į doo?
32Ádąąh dah hast'ánígíí nidilt'éego ałdó' nidootsiłjį' hoł bi'deet'eezh. 33Áádóó Tsiits'in hoolyéego haz'ánígi íldee'go, ákwii tsin ałnáoszid bikáa'jį' hoł ada'askaal, ádąąh dah hast'ánígíí ałdó', ła' honish'náájígo dah hidiilt'e', ła' éí honishtł'ajígo dah hidiilt'e'. 34Áko Jesus ádííniid, ShiTaa', díí yaa naakaígíí t'áadoo bik'ijį' síníł'ání, háálá doo bił béédahózingóó ádaat'į́. Áádóó ha'éé' ałtaadeis'nii' biniyé yáá'iilt'e' yaa naaskai.#Ps. 22:18. 35Áádóó diné dadéez'į́į'go naazį́, áádóó naat'áanii éí há nidahałt'i'go ádaaní, Ła' éí yisdádziiznil; Diyin God biChrist éí Diyin God néidiiłtíinii jílį́į́ ládą́ą́', háni'dii t'áá hó yisdá'ázhdílteeh!#Ps. 22:7. 36Siláo ałdó' há nidahałt'i'go hayaajį' niikaigo ch'il na'atł'o'ii bitoo' dók'ǫ́zhígíí haa deiziidgo#Ps. 69:21. 37ádaaní, T'áá aaníí Jew dine'é Aláahgo biNanit'a'í nílį́įgo, t'áá ni yisdá'ádílteeh! 38Kót'éego ałdó' [Gríik áádóó Látin índa Hííbrew k'ehjí bee ak'e'alchíhígíí] bee ak'e'ashchį́įgo hak'igi dah yistą́, Díidí Jew dine'é Aláahgo biNanit'a'í nilį́.
39Nít'éé' ádąąh dah hast'ánígíí hoł bił o'oolkaalígíí ła' hwéédzíi'go ání, Christ nílį́į́ ládą́ą́' yisdá'ádílteeh, nihí ałdó' yisdánihínííł! 40Nidi ła'ígíí bich'ahashkéego ábíłní, Da' Diyin Godísh doo bééníldzid da? Jó, ni ałdó' t'áá hógi át'éego dadíítsaałgo ná nihoot'ą́. 41Ni áádóó shí t'éí t'áá ánihidi'doolnííł góne' nihá nihoot'ą́, háálá íidzaaígíí biniinaa t'áá ánihi'dólne' góne' ánihi'dil'į́, nidi díí diné éí doo bąąhági ádzaa da. 42Áádóó Jesus áyidííniid, Bóhólníihii, bee nóhólníihii biih yíníyáago shéénílniih doo. 43Áko ábizhdííniid, T'áá aaníígóó ándishní, Díí jį́ Kéyah Hózhǫ́ǫdi shił honílǫ́ǫ doo.
Jesus dadziztsą́
(Mt. 27:45-56; Mk. 15:33-41; Jn. 19:28-30)
44Nít'éé' ałní'ní'ą́ągo daats'í, áádóó táadi ahéé'ílkidjį' t'áá át'éé nít'éé' chahóółhéelgo 45jį́honaa'éí yiijį́į́', áádóó kin bii' sohodizin biyi' góne' ach'ą́ą́h naníbaalii#Ex. 26:31-33. ałch'áádláád. 46Áko Jesus yéego hazhdoolghaazhgo ájíní, ShiTaa', shii' sizíinii nílák'edish'aah!#Ps. 31:5. jidííniidgo hajííyol. 47Áádóó siláo binanit'a'í áhóót'įįdígíí yiyiiłtsą́ągo, Diyin God yaa haznihgo ání, T'áá aaníí díí diné ts'ídá t'áá ákogi át'éii nilį́į́ nít'éé' lá! 48Áko diné áłah daazlį́į'ii, áhóót'įįdígíí dayiiłtsą́ągo, biyid nídeineests'ingo#23:48 Yáa, yáa, yáa, dooládó' hóchxǫ' áhóót'įįd da, danízingo biyid nídeineests'in. anáhaaskai. 49Áádóó hwéédahósinígíí t'áá ałtso índa Gáliliidę́ę́' asdzání hakéé' yíkaígíí#Lk. 8:2,3. t'áá nízaadę́ę́' naazį́įgo díí áhóót'įįdígíí dayiiłtsą́.
Jesus yóó'áho'diilyaa
(Mt. 27:57-61; Mk. 15:42-47; Jn. 19:38-42)
50Áko diné ła' Jóseph yolyéego Jew dine'é yá naazíinii ła' nilį́, éí diné yá'át'éehii áádóó t'áá ákogi át'éii nilį́, 51éí yindahaz'ą́ągo yaa naaskaígíí doo atah yee lą́ asłį́į' da. Éí Arimathíya hoolyéego Jew dine'é bikin haal'áádę́ę́' naaghá, áádóó éí Diyin God bee bóhólníihgo bił haz'áanii nayólí. 52Díí dinéhígíí Páílat yaa níyáago Jesus bits'íís yíyííkeed. 53Áko na'iidiiłtį́įgo áłts'óózígo yisdizígíí bee na'at'ą́hí łigaii dits'idgo ályaii yił yizdisgo tséní'ootséél góne' niiníłtį́, ákwe'é ts'ídá t'ah doo diné ła' niilteeh da nít'éé'. 54Éí bijį́ hasht'ehodi'nééh yolyéego oo'ááł, áádóó háá'áyį́į́h jį́ k'adę́ę baa hoolzhíísh. 55Áko Gáliliidę́ę́' asdzání hoł yíkaígíí akéé' yíkaigo tséní'ootséél deinééł'į́į́', áádóó hats'íís niiltínígíí ts'ídá át'éegi bił béédahoozin, 56áko t'ą́ą́' nákaigo łikání halchinii spáis wolyéii índa tłah łikání halchinii hasht'edayiilaa. Áádóó bee haz'áanii bik'ehgo háá'áyį́į́h jį́į́ góne' háádaasyį́į́'.#Ex. 20:10; Deut. 5:14.
Селектирано:
LUKE 23: NVJOB
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).