Matiu 10
10
Safuhudohudoꞌi-Luwaga Yesu ya Duidi
Matiu 10:1-4
(Maleko 3:13-19; Luka 6:12-16)
1Yesu ana hewahewali 12 ya yogaidi be gigibwali ya feledi, haba yaluwa heyaheyayadi dodoga ganahewadi yai, yo asiyebo hudoꞌi-hudoꞌi haba sa faloholohodi.
2Tau faꞌona wasawasa#10:2 Lausoisoi 1, iyen, <<Yesu ana hewahewali,>> inmoho lausoisoi 2, iyen, <<Tau faꞌona wasawasa,>> pa'ana Alina Giliki te famuli watan. ya fasinabodi hesadi itete:
Bwaꞌibwaꞌina mate Saimon. Hesana hesa Pita, yo hidana Endulu; Sebedi nanatuna, Diyemsi yo hidana Diyon;
3Pilipi, Batolomiu, Tomasi, yo takesi tau tanotano Matiu, yo Alefaiyesi natuna Diyemsi yo Tadiyesi;
4Saimon Seloti,#10:4 <<Seloti>> aniyona mate, <<in ena nuꞌu ya fanuha wananahai.>> yo Diudasi, Yesu ana tau wewe.
Yesu ana Hewali adi Paisowa ya Feledi
Matiu 10:5-15
(Maleko 6:7-13; Luka 9:1-6)
5Dodoga safuhudohudoꞌi luwaga, Yesu ya faꞌoinigugudi mulina yai ya duidi, na iyen,
Tabu au lau taꞌowawa ai pwaludi o au sola lau Samaliya edi taon hesa-hesa yai. 6Au lau Isalaela sipidi sa gege ai lisidi moho.
7Ami lauwasi mate wasa te au guguyaꞌen auwen,
<<Galewa Aba Baꞌisana Nuꞌuna mate ya sigisigima.>>
8Tau peꞌi au famwahulidi. Tau asiyebo au faloholohodi yo demoni dodoga ganahewadi yai au liba duidi. Yo lepela tau abidi au faloholohodi. Gigibwali E felemiu hige au famaisa, be ami fapaisowa mate tabu au kawa maisa.
9Gole, siluba, o moni, tabu au abidi.#10:9 Uliꞌuli haisa tiyen, <<Emi bwaꞌulu o poketi ganahewana yai.>> 10Emi adau yai te, tabu paosi,#10:10 <<Paosi>> mate <<laulau kode.>> luhuluhu hagahagana, tabu buti o tuꞌe au abidi,paꞌana, tau paisowa wa, ena fanufanuha mate dodoga adi paopao.
11Yena ai taon ami mahano, dodoga dudulaidi au yo'o haba ai lisidi ami miya ee–, ami aulaha boda. 12Ai lumana ami luhulau, auwen, <<Yauwedo.>>#10:12Diusi alinadi yai tiyen, <<shalom>> na aniyona wananahana mate doha <<nuwa esega ai lisimiu.>> 13Yena luma dodogadi sa failobahimiu, ainiya au miya. Inmoho yena hige ti ita wata komakoma'inimiu, mate luma o taonna au lau afulen.#10:13 Uliꞌuli haisa tiyen, <<Yena higeꞌe, emi lautoꞌi e emi nuwatalu lisidi yai au abi fuyo.>>
14Na sai hige i yoga hitimiu, o emi liba hige ti atahiyen, nuꞌuna au lau afulen, na ahemiu fufuꞌadi au oiluhiluhidi.
15E falibamiu mate, ai <<Fakasa Lahaina>> haba Yaubada haba Yaubada ena manabala la'ila'i ya talu ai taon ni, habahim Sodom yo Gomola. (Genesi 19:24-28)
Fuya Heyaya Haba sa Laoma
Matiu 10:16-25
(Maleko 13:9-13; Luka 21:12-17)
16Yau E duimiu, doha sipi, ꞌwayoꞌwayowa pwaludi yai. Debana yai bena ami sonoga doha weso, yo bena ami tauꞌulu doha waliliya.
17Au ita komakoman! Dodoga haba sa aumiu, be sa lawemiu edi nuꞌu koniseladi lisidi yai, yo Diusi edi aba oigogo yai sa pidilimiu.
18Yau debagu yai haba sa lawemiu gawana yo kin matadi yai, be sa falau fatalamiu, na iti yo taꞌowawa ai matadi haba egu ami wikinisi.
19Yena sa aumiu tabu au mode, auwen,
<<Sidohana haba ema libaliba yo somo haba ꞌe libaen?>>
Maihalana yai ni, somo bena ami libaen mate Yaubada haba ya felemiu.
20Libadi ami libaedi mate hige umi emi nuwatuhu. Ai ganahewamiu haba Tamamiu Yaluwana ya libaliba lau lisidi.
21Dodoga haba ꞌwasinadi tefadi sa liba afuledi be sa wunuidi, yo tama haba natuna ya liba afulen hinaga doha; na wawaya haba afa tinadi yo afa tamadi edi abiꞌabidi doha, be dodoga haba sa lau funuhidi be sa peꞌi.
22Yau debagu yai haba dodoga mahudoꞌidi sa ꞌwaiyoꞌoemiu. Inmoho, sai ya nuwa adidili be sigana yai, haba Yaubada ya fofofahi.#10:22 Au italau Matiu 24:13 hinaga. 23Ai taon laꞌi sa liba faheyayamiu au gela, au lau taon hesa. E faliba dudulaimiu mate, ibege Isalaela taondi yai ami paisowa au faꞌofidi, na haba Doga Natuna ya fuyoma. 24Sibasiba tau anpateina dogana mate ana tanuwaga hige i diꞌoi. Tau lau fayofayo dogana, ibege gonowana ena baꞌisa i saipwai.
25Lisina yai tau sikulu maꞌena ana tanuwaga gonogonowadi, na fayofayo tau abina ena baꞌisa gonogonowadi. Yena boga esega ganahewada yai eda baꞌisa sa kawa Belesebuluwen#10:25 <<Satani>> hesana hesa mate <<Belesebulu.>> mate ita hinaga sa kawa Belesebuluweda.
Sai Haba te ꞌWasabuwen?
Matiu 10:26-31
(Luka 12:2-7)
26Tabu dodoga au ꞌwasabuwedi, ginauli somo simosimodi haba sa taumahata, na liba simosimodi haba liba famahatadi. 27Somo E falibamiu kamumu yai, bena ami liba bodaidi ai mahata, yo somo beyam yai sa faꞌatu fenafena bena dodoga wa faliba lidiyedi ai luma hewana. 28Saluma iti taumiu gonowana sa wunuidi, na yaluwamiu hige gonowana ti wunuidi mate, tabu au ꞌwasabuwedi. Inmoho, Yaubada, In gonowana tauda yo yaluwada ya gabu goludi ai oyagi balebalelemna hesana Gehena,#10:28 <<Ai oyagi balebalelemna>> aniyona mate <<ai Gehena.>> Au italau Matiu 5:29 hinaga. logena, In au ꞌwasabuwen!
29Toea#10:29 Beyabeyana edi <<moni dubadubana>> mate doha <<peni>> o <<toea.>> Na maisana hige i laꞌi. ainiya gonowana ataiꞌa kikiꞌuka luwaga wa famaisadi. Inmoho, Tamamiu ai matana ibege hesa i beꞌu ai tanohi.
30Umi kulumiu maihawadi mate, mahudoꞌina haꞌa ya fatilidi. 31Be tabu au ꞌwasabu. Umi maisamiu ya laꞌi, habahim ataiꞌa kikiluka.
Yesu Tabu au Fakau
Matiu 10:32-33
(Luka 12:8-9)
32Yena sai ya liba famahata haisa ai lebedi mate, in yau enehegu. Ai Galewa haba E ginauli doha Tamagu ai lisina. 33Inmoho, sai laꞌi iyen,
Yau hige Yesu ya sibai.
Tamagu Galewa yai ai lisina haba E ꞌwaiyoꞌoen.
Hige Nuwa Esega, na Waiyunu
Matiu 10:34-39
(Luka 12:51-53; Luka 14:26-27)
34Tabu emi nuwatuhu mate nuwa esega E leyama tanoꞌubu. Higeꞌe, baineti moho E leyama. 35Wawaya haba ma afa tamadi sa lulu, na wawahin ma afa tinadi sa lulu. Afa nanatudi wawahin ma afa lawadi sa lulu. 36Doga ana waiyunu wananahana mate, ena luma dodogadi.
37Sai tamana o tinana ya fanuha wananahaidi, na habahim yau, mate hige gonowana in enehegu, yo sai natuna taumoho o waihin ya gadosisiyen wananahai habahim yau, mate hige gonowana in enehegu hinaga. 38Sai yena ena kolosi hige i bahei na i famuli watanigu, mate in hige gonowana i famala tau famuli watanigu.
39Sai ena nuwatuhu yai, ya anpate be ibona mwahuli ya lobahi, haba ibege i abi, na sai ena mwahuli ya pei yau debagu yai, haba mwahuli ya lobahi.
Maisa Laꞌilaꞌina
Matiu 10:40-42
(Maleko 9:41)
40Sai ya yoga hitim mate, Yau ya yoga hitinigu, na sai ya yoga hitinigu mate, tau fatamaligu ya yoga hitini.#10:40 Uliꞌuli haisa tiyen, <<Sai ya abim mate, Yau ya abigu, na sai ya abigu mate, tau fatamaligu ya abi hinaga.>> 41Yena sai laꞌi peloweta dogana ya yoga hitin, paꞌana in peloweta dogana mate peloweta maisana haba ya abi. Na yena sai doga dudulaina ya yoga hitin paꞌana in doga dudulaina mate doga dudulaina maisana haba ya abi. 42E faliba dudulaimiu mate, yena sai ho'owa gogomana dodoga kiki'inadi te ya feledi, paꞌana in tau famuli watanigu, dudulaina mate, maisana haba ya abi.
Селектирано:
Matiu 10: Buhutu
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024, SIL Global. All Rights Reserved.