Matius 16-ൽ നിന്നുള്ള പ്രശസ്ത ബൈബിൾ വചനങ്ങൾ

പങ്ക് വെക്കു

Kong Yesus bilang pa De pe murit-murit, “Sapa tu mo iko pa Kita, dia so nimbole iko tu de pe mau, dia musti pikul de pe salib tu de pe arti dia siap mendrita sampe mati, kong iko pa Kita.

Ngana pe nama Petrus, tu de pe arti batu. Kong di atas tu batu ini, Kita mo beking jadi fondasi for Kita pe orang-orang yang percaya, kong tu maut nyanda mampu mo se kala tu Kita pe orang-orang itu.

Kita mo kase pa ngana kuasa for pimpin tu Kita pe orang-orang, itu sama deng Kita kase pa ngana tu kunci sorga. Kong apa jo tu ngana larang orang beking di bumi, itu lei mo dapa larang beking di sorga. Bagitu lei deng apa tu ngana kase for orang beking di bumi, itu lei mo dapa kase beking di sorga.”

Soalnya sapa tu hidop cuma for de pe diri sandiri, so dia yang nyanda mo dapa hidop kekal. Mar komang, sapa tu mo kase de pe hidop lantaran iko pa Kita, so dia tu mo dapa hidop kekal.

Apa so de pe untung kalu satu orang dapa samua harta di dunia, mar dia nyanda dapa hidop kekal? Kong ada so yang dia bole mo kase for se tukar supaya dia bole dapa tu hidop kekal? Nyanda ada to?

Trus Yesus batanya pa dorang, “Mar menurut ngoni, sapa dang Kita ini?” Simon Petrus manyao, “Guru itu Kristus tu Raja yang se slamat pa manusia, Tuhan Allah yang hidop pe Anak!”

Yesus bilang pa Simon, “Simon, Yunus pe anak. Ngana itu yang paling snang lantaran bukang manusia yang da kase tau tentang hal itu pa ngana, mar Kita pe Bapa di sorga.