Mr 10
10
“Mija rõmia taabekaja”, ãrĩwaꞌri Jesúre nare wãrõeka
(Mt 19.1-12; Lc 16.18)
1Caᵽernaúm wejeaᵽi aꞌritirã Judea kaꞌiarã Jesúre aꞌrika. Aꞌririjarikõrĩ, Jordán wãmeiria kiwaataꞌriwaꞌrika. Aᵽeᵽẽꞌrõtorã keyaeka ᵽoto, rĩkimarã ᵽoꞌimajare kiᵽõꞌirã rẽrĩka ate. Kire neyaekarõꞌõrãja, kiwãrõrijarika uᵽakaja nare kiwãrõeka. 2-3Ᵽoꞌimajare wãrõbaraka kimaeka ᵽoto fariseokaka ᵽuᵽajoairãre kiᵽõꞌirã etaeka. “Kiyiꞌriwãrũberirũ”, ãrĩwaꞌri ikuᵽaka kire najẽrĩaeka:
—¿Ĩmirĩji kirũmure kijaꞌataika, baꞌiaja baarika bai sime?== kire narĩka imarĩ ikuᵽaka nare kiyiꞌrika:
—¿Marãkãꞌã Moisére mijare jãꞌmeka jeꞌe?==
4Iꞌsuᵽaka kẽᵽakãꞌã, ikuᵽaka kire nayiꞌrika:
—Ikuᵽaka sime Moisés imaekakire bojaeka: “Ĩꞌrĩka kirũmure kitaariyaᵽajĩkareka, ᵽaᵽera kioꞌojĩñu. ‘Mire yitaaerã baayu’, ãrĩwaꞌri ᵽaᵽera oꞌoeka kore ĩjiweatirã najaꞌatabuꞌajĩñu”, Moisére ãrĩka,== narĩka fariseokaka ᵽuᵽajoairã.
5Suᵽa naᵽakãꞌã, ikuᵽaka nare kẽrĩka:
—Tuᵽarãre ãꞌmitiriᵽẽarika yaᵽaberikarã mija ñekiarãre imamaka iꞌsuᵽaka Moisére naroꞌsi soꞌoeka. Iꞌsuᵽakajaoka sime mijaroꞌsi. 6-7Iꞌsuᵽaka kibaaeka simakoꞌomakaja ᵽoꞌimajare kiᵽoꞌijiaeka ᵽotorãja, “Ĩmirĩjire suᵽabaatirã rõmore Tuᵽarãre ᵽoꞌijiaeka. Suᵽa imarĩ rõmieꞌetirã kiroꞌsiji ĩmirĩjire imarãñu kirũmuka. Iꞌsuᵽaka simamaka kiᵽakiarãre kikõrõtaᵽarãñu. 8Imakoꞌomakaja kirũmuka rakakaja ᵽuᵽajoabeyurã najayu mae. Ĩꞌᵽarã imakoꞌomakaja ĩꞌrĩka uᵽakaja sime naᵽuᵽaka”, ãrĩwaꞌri sabojayu Tuᵽarãrika oꞌoeka ᵽaᵽera ᵽũñurã. 9“Iꞌsuᵽaka nimarũ”, Tuᵽarãre ãñua simamaka, mija rõmia taabekaja mija imabe,== nare kẽrĩka.
10Wiꞌiarã kãkawaꞌritirã kijaikakaka kika wãrũrimajare kire jẽrĩaeka. 11Iꞌsuᵽaka naᵽakãꞌã ikuᵽaka nare kiyiꞌrika:
—Mamarĩji kirũmu imaekakore jaꞌatatirã aᵽeko keꞌekoᵽeiko kirũmumarĩko koime Tuᵽarã ñakoareka. Kirũmumarĩkoreje kiwãꞌimañua mamarĩkako kirũmutakore baꞌiuᵽakaja baawaꞌri suᵽa kibaayu. 12Iꞌsuᵽakajaoka sime rõmo kotĩmire jaꞌatatirã aᵽikaka kotĩmiarikoᵽeika kotĩmimarĩka kime Tuᵽarã ñakoareka. Kotĩmitakimarĩkaka kowãꞌimañua simamaka mamarĩkaki kotĩmitakire baꞌiuᵽakaja baawaꞌri iꞌsuᵽaka kobaayu,== Jesúre nare ãrĩka.
“Meꞌrãka yiᵽõꞌirã iꞌtairãte mija jãjibaaꞌsi”, Jesúre ãrĩka
(Mt 19.13-15; Lc 18.15-17)
13Jesús ᵽõꞌirã meꞌrãka ᵽoꞌimajare eꞌeraꞌaeka. “Nare rabebaraka ‘Jia nare mibaabe, Tuᵽarã’, ãrĩka naroꞌsi kijẽñerũ”, ãrĩᵽuᵽajoawaꞌri kiᵽõꞌirã meꞌrãka neꞌeraꞌaeka. Suᵽa nabaamaka ĩatirã, ikuᵽaka Jesúka wãrũrimajare nare ãrĩka:
—Jesúre najoꞌaꞌsi, kiᵽõꞌirã meꞌrãka mija eꞌeraꞌaꞌsi,== ᵽoꞌimajare narĩka.
14Suᵽa naᵽakãꞌã Jesúre boebarika kika wãrũrimajare. Suᵽabaatirã ikuᵽaka nare kibojaeka:
—Meꞌrãka yiᵽõꞌirã etarika mija jãjibaaꞌsi. Jiiᵽuᵽarãre jia ãꞌmitiriᵽẽairã nime meꞌrãka. Nimauᵽaka yire ãꞌmitiriᵽẽairãre jia Tuᵽarãre imaruᵽutarãñu. 15Rita mijare yibojayu. Meꞌrãrĩjaka jia yiꞌyuakaka ᵽuᵽajoatirã Tuᵽarãre jia mija yiꞌririjarijĩñu. Iꞌsuᵽaka yiꞌribeyurãre ᵽuri Tuᵽarãre eꞌetoribesarãñu kijãꞌmerũkirãroꞌsi,== kika wãrũrimajare kẽrĩka.
16Iꞌsuᵽaka nare ãrĩweatirã meꞌrĩre keꞌerikaeka. Keꞌerikaeka rakamarãre naruᵽukoꞌarã kiᵽitaka jaꞌaᵽeatirã ikuᵽaka kẽrĩka: “Jia nare mibaabe”, ãᵽaraka Tuᵽarãre naroꞌsi kijẽñeka.
Ĩꞌrĩka niñerũ baꞌiᵽite Jesúka jairĩ eyaeka
(Mt 19.16-30; Lc 18.18-30)
17-18Jesúre toᵽi aꞌrirã baaeka ᵽoto kiᵽõꞌirã ĩꞌrĩka ĩmirĩjire rĩrĩeyaeka. Jesús wãjitãji ñukuruᵽatirã ikuᵽaka kire kẽrĩka:
—Jiitaki mime wãrõrimaji. Tuᵽarãka õñia imajiᵽarika yiyaᵽayu. ¿Marãkãꞌã yibaajĩñu?== kire kẽrĩka imarĩ, ikuᵽaka kire kiyiꞌrika:
—¿Dako baaerã, “Jiitaki mime”, yire meñu jeꞌe? Tuᵽarã ĩꞌrĩkaja kime jiika. 19-20Tuᵽarãka õñia imajiᵽarika miyaᵽarãkareka kijãꞌmeika uᵽakaja mibaarijaᵽe. “Ᵽoꞌimaja jããbekaja. Rõmika imakoꞌomakaja, aᵽekoka wãꞌimarĩbekaja. Kareeꞌerimarĩa. ‘Baꞌiaja kibaaraᵽe’, ãᵽaraka waᵽuju aᵽerãre bojaᵽakibekaja. Ᵽoꞌimajare baꞌiaᵽiji ᵽakitirã naniñerũ mija ẽꞌmaꞌsi. Miᵽaki, miᵽakoreoka jia mija ãꞌmitiriᵽẽabe”, ãrĩka sabojayu Tuᵽarã majaroᵽũñurã oꞌoeka. Iꞌsia jia õñuka mime,== kire kẽrĩka ᵽoto ikuᵽaka kire kiyiꞌrika:
—Miaꞌmitiᵽe wãrõrimaji. Tuᵽarãre jãꞌmeika õrĩwaꞌri yimeꞌrãrĩji jia sayiꞌririjarikaki ñime,== kire kẽrĩka.
21Iꞌsuᵽaka kẽᵽakãꞌã, Jesúre kire wayuĩaeka mae. Suᵽa imarĩ ikuᵽaka kire kẽrĩka:
—Ĩꞌrãbaꞌi mibaarika jariwaꞌyua ruᵽu. Mibaꞌirĩjia aᵽerãre mijiᵽatabe sawaᵽa mitõᵽoerã. Suᵽabaatirã wayuoka baairãre samijibe. Suᵽa mibaarãkareka Tuᵽarã ᵽõꞌirã eyatirã rĩkimabaji sawaᵽa mitõᵽorãñu. Ñañu uᵽakaja miyiꞌrirãka beꞌerõꞌõ, miꞌtabe yika wãrũrimaji mimaokaroꞌsi,== kire kẽrĩka.
22Rĩkimaka baꞌirĩjiki imarĩ, baꞌiaja kiᵽuᵽariwaꞌrika.
23Keꞌrika beꞌerõꞌõ kika wãrũrimajare ĩatirã ikuᵽaka Jesúre ãrĩka:
—Rĩkimaka baꞌirĩjia rikairãroꞌsi, “Tuᵽarãre takaja yiꞌriwaꞌri kiyaᵽaika uᵽakaja yibaarãñu”, ãrĩᵽuᵽajoarika kaꞌwisika sime,== nare kẽrĩka.
24-25Iꞌsuᵽaka kẽᵽakãꞌã, marãkãꞌã marĩwãrũberijĩka simaeka naroꞌsi. Suᵽa imarĩ ikuᵽaka nare kibojaeka ate:
—Mija ãꞌmitiᵽe yijeyomarã. “Ritaja Tuᵽarãre yaᵽaika uᵽakaja yibaayeꞌe”, ãrĩtirã, kirirã najayaokoroꞌsi kaꞌwisitaka sime ᵽoꞌimajaroꞌsi. Camello joꞌbaki imarĩ, ᵽeruᵽota koᵽea kiwaᵽuꞌribeyu. Iꞌsuᵽakajaoka, “Ñiᵽamaki kimamaka, Tuᵽarãre yaᵽaika uᵽaka takaja yibaarãñu”, rĩkimaka baꞌirĩjia rikairãre ãrĩwãrũbesarãñu,== kẽrĩka.
26Iꞌsuᵽaka kẽñua ãꞌmitirikoriberikarã imarĩ, natiyiaja jaibuꞌabaraka ikuᵽaka narĩka:
—Iꞌsuᵽaka simarãkareka, maki tãrĩberijĩki mirãkiyu,== narĩka.
27Iꞌsuᵽaka nimamaka nare yoirĩkatirã ikuᵽaka Jesúre nare bojaeka:
—Naᵽuᵽayariji tãrĩbeyurã ᵽoꞌimaja. Iꞌsuᵽaka simakoꞌomakaja kire yiꞌyurã takaja Tuᵽarã ᵽõꞌirã aꞌrirãñurã, ritaja baawãrũiki kimamaka,== nare kẽrĩka.
28Suᵽa kẽᵽakãꞌã, ikuᵽaka Ᵽedrore kire yiꞌrika:
—Jia miaꞌmitiᵽe wãrõrimaji. Yija baꞌirĩjia jaꞌataraᵽarã imarĩ, mika yija ime,== kire kẽrĩka. 29-30Toᵽi ikuᵽaka kire kiyiꞌrika:
—Rita mijare yibojayu. Aᵽerãre Tuᵽarãrika bojarĩ aꞌyurã, narĩrãre jaꞌatawaꞌrirãñurã. Nabeꞌerõꞌõkarãre, naᵽakire, naᵽakore, namakarãre, nawiꞌia suᵽabaatirã narioaoka najaꞌatawaꞌririjarirãñu, yirika bojariroka bojarĩ naꞌririjarirãka ᵽoto. Yirirã imarĩ yirika bojaokoroꞌsi narĩrãre jaꞌatawaꞌyurãre, jia Tuᵽarãre baarãñu. Maekaka ritaja rikabaraka nima rĩkimabaji Tuᵽarãre nare ĩjirãñu. Wiꞌia, rioa, nabeꞌerõkarã, naᵽakoarã, rĩkimakaja makarãritiirã nimaerã Tuᵽarãre nare jaꞌatarãñu. Suᵽa simakoꞌomakaja yire naꞌmitiriᵽẽaika simamaka baꞌiaja aᵽerãre nare baarãñu. Imakoꞌomakaja õñia imajiᵽarika Tuᵽarãre nare jaꞌatarãñu. 31Rĩkimarãja imarã maekaka imatiyairã, Tuᵽarã ᵽõꞌirã neyarãka ᵽoto imatiyabeyurã najarirãñu. Aᵽerã rĩkimarãja imatiyabeyurã imarã maekaka, Tuᵽarã ᵽõꞌirã neyarãka ᵽoto imatiyairã najarirãñu,== nare kẽrĩka.
“Najããrũkika ñime”, ãrĩwaꞌri Jesúre nare bojaeka ate
(Mt 20.17-19; Lc 18.31-34)
32Beꞌerõꞌõ Jerusalénrã eyaimaꞌaᵽi naꞌrika. Torã aꞌririjari kika wãrũrimajare kiruᵽutawaꞌrika. Kibeꞌerõꞌõᵽi aꞌririjaᵽaraka ikuᵽaka najaibuꞌarijarika: “¿Dako baaerã kiruᵽu wayuᵽiꞌribekaja Jerusalénrã keꞌyu?”, narĩka. Kibeꞌerõꞌõᵽi iꞌtarijarikarã ᵽoꞌimaja jimarĩa baꞌiaja ᵽuᵽarikoᵽekarã. Nare ĩatirã, kika wãrũrimajaka takaja jaiokoroꞌsi, ᵽoꞌimajamatorã nare keꞌewaꞌrika. Torã eyatirã, “Ikuᵽaka simarãñu”, ãrĩwaꞌri nare kibojaeka baꞌiaja kire nabaawãꞌimarĩrã baaekakaka.
33—Jia mija ãꞌmitiᵽe. Jerusalénrã maꞌrirã baayu. Ĩꞌrĩka imaki Ᵽoꞌimaja Maꞌmire torã bojajããrũkika. Kurarãka ĩᵽamarã ᵽõꞌirã, suᵽabaatirã Moisére jãꞌmeka wãrõrimaja ᵽõꞌirã yire neꞌewaꞌrirãñu. Suᵽa imarĩ yire neꞌetorirãka ᵽoto, “Majããrũkika kimarũ”, narĩrãñu. Suᵽabaatirã, “Kire mija jããbe”, ãrĩwaꞌri judíotatamarĩrãre yire nijirãñu. 34Baꞌiaja jaitirã yire narijoꞌkataᵽaterãñu. Ajeaᵽi yire naᵽajerãka beꞌerõꞌõ yire najããrãñu. Suᵽa nabaakoꞌomakaja, maekarakarĩmi beꞌerõꞌõ yiᵽuᵽatũrũrãñu ate,== nare kẽrĩka.
Santiago Juanᵽitiyika, “Ikuᵽaka yija yaᵽayu”, ãrĩwaꞌri Jesúre najẽñeka
(Mt 20.20-28)
35-36Toᵽi Zebedeo makarã Santiago, Juanᵽitiyika Jesús ᵽõꞌirã eyatirã, ikuᵽaka kire narĩka:
—Miaꞌmitiᵽe wãrõrimaji. Mire yija jẽñeika miyiꞌririka yija yaᵽayu,== naᵽakãꞌã, ikuᵽaka kiyiꞌrika:
—¿Marãkãꞌã mijaroꞌo yibaarika mija yaᵽayu?== nare kẽrĩka.
37-40—Ᵽemawaꞌribaji wejeareka ritaja ᵽoꞌimajare mijãꞌmerãrĩmi seyarãka ᵽoto ikuᵽaka yijare mibaarika yija yaᵽayu: Ĩꞌrĩkare ritaᵽẽꞌrõtorã, aᵽikare kãkoᵽẽꞌrõtorã yijare miruᵽajiyebe mire yija jeyobaaimakoroꞌsi,== kire naᵽakãꞌã, ikuᵽaka nare kẽrĩka:
—Yire mija jẽñekoᵽeika jia õrĩwãrũbeyurã mija. Baꞌiaja ᵽoꞌimajare yire jũarũjerãñu. Yijũarãka uᵽakaja ¿yaje mija rakajeᵽããwãrũjĩñu jeꞌe?== kẽᵽakãꞌã,
—Ãꞌã, rakajeᵽããwãrũjĩrã yija,== kire narĩka imarĩ, ikuᵽaka nare kẽrĩka:
—Rita mijare yibojayu. Baꞌiaja yijũarãka uᵽakaja baꞌiaja mija jũarãñu mijaoka. Rakajeᵽããjĩrã mija imakoꞌomakaja mija yaᵽaika uᵽaka mijare ñimarũjewãrũbeyu. Ritaᵽẽꞌrõtorã, kãkoᵽẽꞌrõtorã yika ruᵽarũkirãre Yiᵽaki Tuᵽarã wãꞌmarãki,== nare kẽrĩka.
41Iꞌsuᵽaka Jesúre narĩka, kika wãrũrimaja ĩꞌᵽaᵽitarakamarã sãꞌmitirikarã. Suᵽa imarĩ Santiagore, Juanre naboebarika, “ ‘Aᵽerãre tẽrĩwaꞌribaji yija ime’, noñu ruku”, ãrĩwaꞌri. 42Suᵽa imarĩ nare ĩatirã, Jesúre nare akaeka, ikuᵽaka nare ãrĩrã:
—Judíotatamarĩrã ĩᵽarimarã naᵽoꞌimajare jãjiaᵽi jãꞌmerijayurã, nayaᵽaika uᵽakaja nare baawãꞌimaᵽaraka. Iꞌsia jia õñurã mija ime. 43Mija ᵽuri, nuᵽaka mija imaꞌsi. Yirirãroꞌsi ikuᵽaka sime: Mija watoᵽekarã ĩᵽi imariyaᵽaiki, “Ikuᵽaka ᵽoꞌimajare yaᵽayu”, ãrĩwaꞌri nayaᵽaika uᵽakaja aᵽerãre jia kibaajĩkareka jia sime. 44Imatiyaiki imariyaᵽaiki ᵽuri, aᵽerãre kijeyobaajĩñu. Naroꞌsi baꞌirabeĩjirimaji uᵽakaja kimajĩkareka jia sime. 45Iꞌsuᵽaka simamaka, Ᵽoꞌimaja Maꞌmi ñimakoꞌomakaja, “Yiroꞌsi ᵽoꞌimajare baꞌirabeĩjirũ”, ãrĩwaꞌrimarĩa õꞌõrã yiꞌtaeka. Ᵽoꞌimajare jeyobaarimaji imaokoroꞌsi. Suᵽa imarĩ baꞌiaja nabaaika waᵽa naroꞌsi reyarĩ õꞌõrã yiꞌtaeka,== nare kẽrĩka.
Bartimeo ñakoa Jesúre jieka
(Mt 20.29-34; Lc 18.35-43)
46Jesús kika wãrũrimajaᵽitiyika Jericó wejearã nimaeka beꞌerõꞌõ, rĩkimarãja aᵽerãᵽitiyika naꞌrika. Naꞌrika maꞌarijerã ĩabeyuka Timeomaki, Bartimeore ruᵽaeka. Wayuoka baaiki imarĩ, niñerũ aᵽerãre kijẽñeruᵽaeka. 47“Jesús Nazaretkaki oꞌyuka”, naᵽakãꞌã ãꞌmitiritirã jãjia akaserebaraka ĩabeyukare kire akaeka.
—Miaꞌmitiᵽe Jesús. Ĩᵽi David imaekaki riᵽarãmi mime. Ritaja ᵽoꞌimajare mijãꞌmeokoroꞌsi Tuᵽarãre wãꞌmaekaki, yire miwayuĩabe,== yoibeyukare kire ãrĩka.
48Iꞌsuᵽaka kiakaseremaka, rĩkimarãja ᵽoꞌimajare kire waᵽeka, “Miakasereaꞌsi”, ãrĩwaꞌri. Iꞌsuᵽaka narĩkoᵽekoꞌomakaja jãjibaji kiakasereka.
—Miaꞌmitiᵽe David riᵽarãmi. ¡Yire miwayuĩabe!== kire kẽrĩka.
49Kiakasereka ãꞌmitiritirã, Jesúre tuirĩkaeka mae.
—Kire mija akabe yiᵽõꞌirã kiꞌtarũ,== ᵽoꞌimajare kẽrĩka. Suᵽa kẽᵽakãꞌã yoibeyukare nakaeka.
—Okajãjia mijaᵽe. Suᵽabaatirã mimiꞌmirĩkabe. Jesúre mire akayu,== ᵽoꞌimajare kire ãrĩka.
50Iꞌsuᵽaka naᵽakãꞌã, ᵽemakato kijariroaka eꞌetatirã, miꞌmaari ñojimarĩji Jesús ᵽõꞌirã keꞌrika. 51-52Kiᵽõꞌirã keyaeka ᵽoto, ikuᵽaka Jesúre kire ãrĩka:
—¿Marãkãꞌã mire yibaarika miyaᵽayu?==
—Miaꞌmitiᵽe wãrõrimaji. Jia yoiiki yire mibaarika yiyaᵽayu,== kire kẽrĩka ᵽoto,
—Yire yiꞌyuka imarĩ, mire yijieyu mae,== Jesúre kire ãrĩka.
Iꞌsuᵽaka kẽrĩka rõꞌõjiteje yoibeyukare ĩaiki jarika mae. Suᵽa imarĩ,
—Miᵽeꞌririyaᵽayeꞌe, miᵽeꞌᵽe mae,== Jesúre kire ãrĩka.
Iꞌsuᵽaka kẽrĩkoꞌomakaja Jesús beꞌerõꞌõ keꞌrika ĩabeyuka imakoᵽekaki.
നിലവിൽ തിരഞ്ഞെടുത്തിരിക്കുന്നു:
Mr 10: TNC
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2019, Wycliffe Bible Translators, Inc. All rights reserved.