Mat 13
13
Abee ní amu na ogluglu ye su u
1Liwe lɛ klɔ ke aʋa ɛ Yesu asɛ ní kepea mɛ lɛ atrɛ ní Galilea limu ne kutu i, eze kesea lɛ ekpese banima bidɔ mɛ kubasɛ ɛ. 2Linɔkpi i lɛ gi lixogo ní yɛ su i, likeme nite si Yesu emu eku katapokpa katɔ mɛ lɛ eple e ze e. Linɔkpi le kɔ ɔ lize ní limu ne oge no. 3Lɛ abasi ba bidɔ glegle ní abee ʋa mɛ si, “Ɔnyrɔmɛdzɛ ɔtɔ atrɛ si yizeglu amu na ni yɛ kayaa mɛ liwe etɔ lɛ. 4Gi azeehle amu na ɛ. atɔ ɛwɔli i dɔ odeʋa nɔ; lɛ kudzɔʋi yɔ kwita la ɛmlɔ ɛ. 5Atɔ ɛdɔ ní akla kesea aʋa gi sise se sísrɛ ɛki la. Amubi la ɛyɛ pɔ̀ gi sise se sísrɛ ɛ, kí la onu i 6Agi kuweo kwikle dɔ la aʋa ɛ, ebi yɛyɛ la pɔ́ ɛyrɔ ɔ; Lɛ ese linu si igù ne íku kesea mɛ lɛ awlakpa vuvu na etse e. 7Atɔ ɛdɔ ni bibu ʋe me lɛ bibu ʋe biyɛ xe biwe amu vuvu na aʋa lɛ etse e. 8Pɔ̀ amubiatɔ ɛdɔ ní kese gbã aʋa; etsi gi eyo asà la; atɔ ɛkpɛ amubi alafa, atɔ aviteglo lɛ atɔ fɛ ɛkpɛ avitata ɛ.”
9Lɛ Yesu agù yɛ liboe le si, “Ɔniliɛ gi kutu kuli yɛ ɛ, atɔ onu u.”
Kidiliɛ loso gi Yesu abasi bidɔ ní abee ʋa mɛ ɛ
10Lɛ yɛ badɔkpasi ba bɛba Yesu klɔ ni kuʋiʋi si, “Ege loso wuzeegu kunugu yo ɛki banima ní abee ʋa mɛ ɛ?”
11Yesu ebu le onu si, “Aya Kaʋaŋaa eboe kpòkpò la su kuboeteo e, bɛkɔ kɔ ɛ kimlɔ; aní kí banɔ dzedze ba a. 12Lɛ ɔniliɛ klɔ awla gi bidɔ bilɛ ɛ, biaki yɛ ɔpɔnɔ, atɔ aamɔ ɔsã nɔ; pɔ̀ ɔniliɛ klɔ awla gi kididɔ kima ɛ, Aya aazi kisisami liɛ klɔ fɛ gi kiliɛ yɛ awla ɛ. 13Mizeegu kunugu yo ɛki ba ní abee me, lɛ ese linu si, bizedi bidɔ pɔ báʋimɔ ɔ; lɛ bizɛta kutu pɔ̀ baʋínu xe bianu eboe se e.”. 14Lɛ loso Aya yɛ oboedoplɛɛ Yesaya eboe la ɛba la mɛ ki ba si,
‘Bianyata kutu baa pɔ̀ bátranu kididɔ ese e.
lɛ bianyatapo odi baa, pɔ̀ bátramɔ egyesi i.
15Lɛ ese linu si ba ina nɛ mɛ ilí gagla; bɛda ba begyodi ʋa ni ba atukpa la
lɛ bɛda ba bimbi ʋe kyɛ ɛ.
Xegi aní nite e, nya ba bimbi ʋe biamɔ
ba batu ʋa bianu eboe
kɔ ba ina nɛ inu eboe ese e,
kɔ bekyi vu me e
kɔ màyɔ ni ba ɛ.’
16“Mlɔ kɔ ɛ, mlamɔ isami! Lɛ ese linu si mlɔ xunyɔ ɛ, mlɔ bimbi ʋe biimɔ lɛ mlɔ batu ʋa kyɛ beenu u. 17Matrɔ likla ní lɛ aʋa aki mlɔ si, Aya yɛ banɔ ni beboedoplɛ glegle bɛpɛ si bɛmɔ kidiliɛ gi mlɛɛmɔ ɛ, pɔ̀ bámɔ kudeonu nite e; lɛ bɛpɛ dzɛ si benu eboa la gi mleenu u, pɔ̀ bámɔ kudeonu nite e.”
Yesu ebu abee ese ní amu na ogluglu ye su u
18“Ablɔ ɛ mlata kutu, tɔ mlakpasi bidɔ ní abee ní amu na ogluglu ye su u. 19Banama gi xegi benu liboe Gbã nɛ ní Aya Kaʋaŋaa su pɔ̀ báʋinu lɛ ese e, balɛ ko ŋwisi amubi ala klɔ gi ɛdɔ ní kudeo me kinɛ ɛ. Kɔ Ozimizi ye aaba kɔ ebu eboa la gi bɛkpɛ ní ba ina nɛ mɛ kɔ ɛsɛnɔ ɛ. 20Amubi ala klɔ gi ɛdɔ ní akla kpakpla na aʋa ɛ, ba benu banama gi bɛzi liboe le ni isami kutɔpu yɔ gi benu le e. 21Pɔ̀ liboe le líʋili ní ba mɛ ɛ, lɛ baʋíze tsini ɔtɔ. Lɛ xe kunugukpɛkpɛ loo baxixa ʋa bɛba ní Aya liboe le su i, kɔ bedzi kide kyɔŋ ɛ. 22Amubi ala klɔ gi ɛdɔ ní bibu ʋe me e, ba benu banama gi xe benu liboe le e, pɔ̀ gi bekuni kelea mɛ bidɔ mɛ ni ba kulɔlɔ ki exo la kude e, kɔ liboe le litse ní ba mɛ ɛ. Nite si bátratani libi tɔtɔ kubu u. 23Amubi ala klɔ gi ɛdɔ ní kese gbã aʋa ɛ, alɛ ŋwisi banama gi xe benu liboe le e, bizenu le ese kinɛ ɛ. Ba bizɛkpɛ ebi la, batɔ alafa, batɔ aviteglo lɛ batɔ fɛ avitata.”
Yesu ebu abee ese ní amu na nì siwa sɛ su
24Yesu ebu abee dzedze aki ba si, “Lifunu ne Kaʋaŋaa kalɛ ŋwisi Onyime ɔtɔ gi eeglu amu gbã ní yɛ ɔnyrɔ mɛ kinɛ ɛ. 25Elesiatɔ, agi ɔnɔ kakaa ɔfini ní kesea ɛ, lɛ yɛ ahwafiɔnɛɛ aba efuflu siwa sɛ ebi la akpɛ ní amu na mɛ xe asɛ ɛ. 26Agi amu na etsi xe ekpese kupɔ ɛ, lɛ siwa sɛ fɛ siyɛ edono e. 27Lɛ onyimee yɛ besumubi ba bɛba yɛ klɔ lɛ bɛsi yɛ si, ‘Ɔka, aní amubi gbã woglu ní wɔ ɔnyrɔ nɔ mɛ lò o? Lɛ nifɔ siwa sɛ sidɔ ɛ?’ 28Lɛ ɔnyrɔ nɔ onetee ebu le onu si, ‘ahwafiɔnɛɛ yɛ abitɛ lɛ. Lɛ beʋi yɛ si, ‘Wɔpɛ si kuzɛɛkpaʋi siwa sɛ ebu na a?’ 29Ɔkaɛ ebu le onu si, ‘Owo, lɛ ese linu si xe mlɛɛkpaʋi siwa sɛ ɛ, mlaakpaʋi amu na a pɔni sɛ. 30Mlaki tɔ amu na ni siwa sɛ pɔ́ bitsì i kpɛ likpɔ kɔzɛna nani amu na lipapoe le e. Lipoe lɛ klɔ mɛ ɛ maaki baxwɛwa ba biakpaʋi siwa sɛ kpɛ ɔtɔ, atɔ banya sɛ etù na atɔ biakpɛ la kifu, lɛ kedee, biakpɛ amu na likpɔ atɔ biahali la a kpɛ ní mɛ owle lo me e.”
Yesu akɔ Aya Kaʋaŋaa srɔni lisebi sisami gɔgɔ lɛ
31Yesu ebu abee dzedze aki ba si, “Aya Kaʋaŋaa kalɛ nite e: Onyime ɔtɔ akɔ lisebi sisami nɛ a kpɛ ní yɛ kesea mɛ 32Lisebi lɛ ya linu lisisami gɔgɔ lɛ ní esebi la kusi. Pɔ̀ xe ose lo etsi i, izeke me e sani ose kakaa. Aadzi ose ʋidi gi kudzɔʋi yɔ kuzɛɛwa kɔ evu na ɛkpɛ ní lɔ ayaa la mɛ ɛ.”
Yesu akɔ Aya Kaʋaŋaa srɔni kunyasi
33Yesu ebu abee dzedze asi ba si, “Aya Kaʋaŋaa kalɛ ŋwisi ɔdzɛ ɔtɔ gi akɔ kunyasi sisami kutɔ apisa kunɔ glegle gi kunyasi yɔ kwiku kunɔɔ petee me kinɛ ɛ gi liki si kunɔɔ pɔ́ kwifeke e.”
Yesu yɛ abee ʋa su axwɛwawa la ní yɛ bidɔbasɛbasɛ ʋɛ mɛ
34Yesu apani eboe la aki anɔkpi la gani abee me. Lɛ ɔ́pɛ si yipani liboeboe si ba xe líga abee ʋa mɛ ɛ. 35Apani nite tɔ liboe le gi Aya yɛ Oboedoplɛɛ apani i, liba lɛ mɛ si,
“Maagu kunugu yo ki ba ní abee ʋa mɛ;
Maasi ba eboe kpokpo la ɛdɔni kelea mɛ okpese klɔ.”
Yesu ebu abee ese ní siwa sɛ su
36Agi Yesu asɛ ní linɔkpi le su i, atrɛ ní kepea mɛ, lɛ yɛ badɔkpasi ba bɛba yɛ klɔ lɛ bɛsi yɛ si, “Bu abee ní siwa sɛ ní ɔnyrɔ nɔ mɛ su ese ki blɔ.”
37Lɛ Yesu ebu le onu si, “Ɔniliɛ klɔ gi akpɛ esebi gbã na ɛ, yɛ onu Ɔnɔɛ Yebi ye; 38Lɛ ɔnyrɔ nɔ onu kelea mɛ ɛ; esebi gbã na ɛ la enu banama gi ba kanɛ kenu Kaʋaŋaa a, siwa sɛ sinu banama gi benu Ozimizi ye yɛ banɛ ma; 39lɛ ahwafiɔnɛɛ gi akpɛ siwa sɛ ɛ, yɛ onu Ozimizi ye. Amu na kupapaa kɔ kunu kelea ɔgù klɔ lɛ banama gi bɛpa amu na ɛ, ba benu Aya yɛ baxwɛdzɛ ba. 40Kiliɛ mɛ gi bɛkpɛ siwa sɛ likpɔ ɔ, xe bɛkani sɛ ní kifu yɛ mɛ ɛ, nite ke liaze ní kelea mɛ ɔgù klɔ. 41Ɔnɔɛ Yebi ye atrákpɛ yɛ baxwɛdzɛ ba tɔ biakpɛ banama gi bɛki banima bɛta kese e ni banama gi bɛbitɛ eboe zimizi na a likpɔ dɔni yɛ kaʋaŋaa mɛ, 42lɛ biaŋwia ba kpɛ ní lifuha lɛ mɛ, ní klɔ biabemi xe biata ba ene na a. 43Lɛ Aya yɛ banima biakle ŋwisi liwo le ní ba Ɔka yɛ kaʋaŋaa mɛ ɛ. Mlatá kutu, xe batu bali mlɔ ɛ!
Yesu ebu abee ní exo kpòkpò la su
44Lɛ Yesu apani si, “Lifunu ne kaʋaŋaa kalɛ nite: Onyime ɔtɔ azɛɛmɔ exo gi bekpo ní kayaa atɔ mɛ ɛ. Lɛ agba sise se ada ní la aʋa dzɛ, amɔ isami nɛ gbɛgbɛ nite si azɛɛda kidɔ kakaa gi kilí ní yɛ awla ɛ, lɛ edzi atrɛ xe azeedzi kesea lia klɔ ʋa ɛ.
Abee ní ihwia kpákpa lɛ su
45“Dzɛ Kaʋaŋaa kalɛ nite: odziga ɔtɔ azɛɛpɛ ihwia kpakpa, 46lɛ gi azɛɛmɔ ɔtɔ gi ɛɛŋa kedzi mɔmɔmɔ ɛ, azɛɛda yɛ bidɔ mɛ petee, lɛ azɛɛkɔ e dzi ɔhwia kpákpaa lɔ klɔ ɛ.
Abee e ní bakpábu ba su
47“Dzɛ lifunu ne Kaʋaŋaa kalɛ nite: Bakpábuatɔ bɛŋwia ba dzikle ye kpɛ ní limu ne me lɛ bebu akpa ede ede na ɛ. 48Agi dzikle ye eyi i, behe ye edono ní oge no e, lɛ beze ní kesea si tɔ biakya akpa la mɛ ɛ. Bɛkpɛ agbã̀ na ní kusɔʋi yɔ mɛ, lɛ bɛkɔ anyaninyani na etu eʋe e. 49Nite litraze ní ewe gɔgɔ la mɛ ɛ. Aya yɛ baxwɛdzɛ ba biado kɔ bebu banɔ zimizi ba ní banama gi ba bede ba bɛgyɔ su i. 50Nite si biaŋwia banɔ zimizi ba kpɛ ní lifuha lɛ mɛ, niklɔ biabemi xe biata ene na a.
Yesu abasi bidɔ ní bidɔ vuvu ani bikóko su u
51Yesu eʋi ba si, “Dani mlenu eboa la ya ese e?”
Bebu le onu si, “Ee!”
52Lɛ Yesu atrɛ lɛ aʋa si, “Libasɛ si Ɔsã nɔ Ɔdɔbasɛ kakaa gi edzì lifunu ne kaʋaŋaa kede ozeno zeno e, ɔlɛ ko ŋwisi kepe ɔka ɔtɔ gi ebu yɛ bidɔ vuvu ni bikóko adɔ ní yɛ bidɔ mɛ ɔblakɔ amani oŋwe no e.”
Nazaret Banɛ ma bázɛ Yesu u
53Agi Yesu eblo ni yɛ abee ʋa ɛ, asɛ ní niklɔ 54lɛ edzi atrɛ ní yɛ kepea ɛ. Abasi bidɔ ní Yudanɛ ma ɔtsaklɔ lɛ banama gi benu yɛ eboe la ɛ ba inugu itse e. Lɛ beʋi si, “Nifɔ adɔ ni kuboeteo liɔ ya elu ni yɛ enugutseboe la na?” 55Aní yɛ onu osetsí yɛ Yebi ye lò o? Lɛ ani yene onu Maria na a? Lɛ aní yɛ beneminyime ba benu Yakobo, Yosef, Simon ani Yuda na a? 56Lɛ dani yɛ benemidzɛ ba petee fɛ bali ní blɔ kusi na a? Kɔ nifɔ adɔ ni eboa la ya petee e?” 57Lɛ loso e, bázɛ yɛ ɛ. Lɛ Yesu asi ba si, “Aya yɛ oboedoplɛ ɛ, bizɛkpɛ kubùbù ní yɛ su ní ɔkɔ kakaa; pɔ ɔ́ʋita libi ní yɛ kepea ni yɛ ɔtutɔ kepea mɛ. 58Agi kuziŋa kuze ní ba awla onu i, ɔ́bitɛ enugutseboe glegle ní niklɔ ɔ.
നിലവിൽ തിരഞ്ഞെടുത്തിരിക്കുന്നു:
Mat 13: avn
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc