Matiu 4
4
Satana I Pada Ne Jesu
(Maka 1.12-13; Luka 4.1-13)
1Spirit tabo i kenaqa ne Jesu i vazao ze de i kaega pata podopodo lavata naro, go Satana tina padane ia. 2Jesu i qaniqani torana vasiṉaulu musaqara mana vasiṉaulu kuse, taramuzina nae i lete saqo. 3Gonae Satana i lama pada ne Jesu, i sine ne, “Ṉalu aro qo Tuna God, mo sine ne qira i pakaro dena mara kavala go mara bureri.”
4Do Jesu igo, “Buka tabo i sine, ‘Basoe iki too neso kaega miki bureri do, vaogotena seko i reqeme de koe God.’ ”
5Satana go nae i lulu vazao ze Jesu Jerusalema komala tabo ne mana i za vadegere ze Jesu zakazaka sivala na padelotu ne mana i sine ne, 6“Ṉalu go qo Tuna God, ono soru za, tanego Buka tabo i sine,
‘God tina vamiasoka
zigoe aro aqeloro ia,
mana ria tarina palataru go
aro niki go zavae nigo
makemu ipaka ne.’ ”
7Jesu i sine ne Satana, “Buka tabo i sine, ‘Oniki padane God Batu aro.’ ”
8Gonae Satana i lulu vazao napu ze Jesu kubolo i lete zakazaka sivala go. Satana iva mia ze Jesu osina kolabana pua mana pata velaka ro iri koego. 9Satana igo, “Era nara teke lupo nigo aro osina pataro dena, ṉalu go qo koloku tutuṉu mana vabatu ava era.”
10Do Jesu i sine ne ia, “Kasi ne de qa koe go era, aro Satana! Tanego Buka tabo i sine, ‘Ono vabatua God Batu aro, mana ono osaka neso tanuna God.’ ”
11Gonae Satana i kasine Jesu, mana aqeloro iri lama tavise Jesu.
Jesu I Va Tupi Ze Zazu Ia Tepa Qalili
(Maka 1.14-15; Luka 4.14-15)
12Ṉalu Jesu i gata iri taru ze bara ne Jon, gonae i ule napu za kena Qalili. 13Jesu iki zako e kaega Nazaret do iza koe Kapanaum, kakia komala ikoe rikisina masi Qalili loborona kena Zebelon mana Napatali. 14I zazu ne ia dena go tina vavoto go seko i sine bana go propeta Isaia,
15“Pua na Zebelon
mana pua na Napatali,
zuka i lulu za tepa masi,
kedo tepa Jodan,
Qalili pua iri koe vano
iriki Jiu go kaega.
16Ria basoero iri koe loborona
rodoko tarinara mia tatavata lavata.
Ria iri koe loborona pua rodoko iri koe go vano iri le go,
tatavata tinara damare de iri koego.”
17Torana ṉalu nae Jesu iva tupiana ne tamana qira basoero, “Muna manava sakata ne vasakata pataro ramu, tanego vari miasoka ia God i lama garogaro.”
Jesu I Koru Qira Kavasi Disipoloro Kenaqa Ia
(Maka 1.16-20; Luka 5.1-11)
18Jesu i lama zazae rikisi masi Qalili i mia qiru karua tamakena Saimon kakia vitoṉona, Pita mana kaena vitoṉo na Aduru. Iru za gabe masi Qalili, tanego zazu riru vae iṉana so. 19Jesu i sine ne qiru, “Luluava era, era nara varove qaburu e dego palana basoe.” 20Goto nae Pita mana Aduru iru tarua gabe riru mana iru lulua Jesu.
21Jesu i kasine dego i mia napu qiru kaki karua tamakena, Jemisi mana Jon karua sale ia Zebedi. Iru koe loborona koluka, iru mia tamaqiru Zebedi iri kona gabe ria, mana Jesu i koru napu qiru. 22Gonae iru kasine koluka ne mana tamaqiru, iru lulua to Jesu.
Jesu I Vari Vatatana Mana Iva Velaka Qira Basoero Iri Mokoso Go
(Luka 6.17-19)
23Jesu igoe lupoe osina dia tepa kena Qalili. Iza e loborona Pade Lotu ria vano Jiu i vari vatatana mana i tamana qira basoero ne. I tamana qirae dego velaka ia God mana iva velaka lupo qira osiqira vano i pala qira soso mokoso rone. 24Pepeuna dego Jesu i lupoe osina vudu na Siria. Ria ivae qira go pata vokara mana i pala qira soso mokoso ro, ria i siqane qira manuru sakata, ria ivae qira kakaepale mana ria i makuru vizu tokamaqira gogone iri valama qirae so dekoe Jesu mana iva velaka lupo qira. 25Topu sasakata basoero iri muzi ne go Jesu, iri reqe me Qalili, Dekapolis, Jerusalema, Judia mana kaki tepa Jordan.
നിലവിൽ തിരഞ്ഞെടുത്തിരിക്കുന്നു:
Matiu 4: VRSNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The New Testament in Varisi, Solomon Islands © Bible Society of the South Pacific, 1994, 2004.