Embandizo 7
7
Omutunga nigwija
1Omukama agambira Noa ati, “Otahe omu bwato iwe n'omutungo gwawe gwona, aha rw'okuba mboine okwo n'iwe oli murungi wenkai alikunshemeleza omu muzarwa ogu. 2Omu bigunju byona ebilikwera okwatemu mushanju mushanju, ekishaija n'ekikazi kyakyo; kandi omu bigunju ebitalikwera bibili bibili, ekishaija n'ekikazi kyakyo; 3n'omu binyonyi kwakwo mushanju mushanju, ekishaija n'ekikazi; obilinde bitalija bikachweka mu nsi. 4Aha rw'okuba ebiro kabirakya mushanju ndagwisa enjura ebiro makumi ganai, na buli kintu ekirora ekyo natonzire nkisilikye omu nsi.” 5Noa akora byona eby'Omukama yamuragiire.
6Noa akaba aina emyaka rukaga orwo omutunga gw'amaizi gwabunzire ensi. 7Wenene, n'abatabani, na mukaziwe, n'abakamwana bataha omu bwato babone kukira aha mutunga. 8Omu bigunju ebilikwera n'ebitalikwera, n'omu binyonyi n'omuli byona ebyekurura: 9Bibili bibili, ekishaija n'ekikazi, akaikara nabyo omu bwato nk'okwo Ruhanga yabaire amuragiire. 10Ebiro mushanju kabyahingwire, omutunga gw'amaizi gwabunda ensi.
11Kiro ekyo Noa yagobya emyaka rukaga n'emyezi ebili n'ebiro ikumi na mushanju, enchuro zona okuzimu owa dondondo zifumuka amaizi, n'eiguru likinguka. 12Enjura egwa ebiro makumi ganai kiro na mushana. 13Aha kiro kyonene kyonene Noa, mukaziwe n'abatabani Shemu, Hamu na Yafeti, n'abakamwana bonshatu, bataha omu bwato. 14Bakabutahamu na buli kigunju kuhonderana n'engeli yakyo, n'ebitunganwa byona kuhonderana n'engeli zabyo, na buli kintu ekyekurura aha itaka kuhonderana n'engeli yakyo, na buli kinyonyi kuhonderana n'engeli yakyo. 15Ebigunju n'ebinyonyi bitaha na Noa omu bwato ekishaija n'ekikazi 16nk'okwo Ruhanga yabaire amuragiire. Ahanyuma Omukama amukingirana.
17Omutunga gukamara omu nsi ebiro makumi ganai. Amaizi geyongera, geleza obwato, bwelera eiguru. 18Gakanya muno, gaijura ensi, geleza obwato. 19Gakanya muno munonga nangu gashweka n'amabanga gona agarai garai omu nsi yona. 20Gakanya muno gashaga amabanga emita mushanju. 21Byona ebyabaire bina oburora omu nsi bifa: Ebinyonyi, ebitunganwa, ebigunju, n'ebitondwa byona ebigenda omujumbi na buli muntu. 22Buli kintu omu nsi ekyabaire kina omwoyo nikikya kikafa. 23Buli kimoi ekyabaire kina oburora omu nsi Omukama akakisilikya: Abantu, ebigunju, ebyekurura n'ebinyonyi. Noa wenkai niwe yasigaireho n'abo yabaire ainabo omu bwato. 24Amaizi gakabunda ensi ebiro kikumi mwo makumi gatanu.
നിലവിൽ തിരഞ്ഞെടുത്തിരിക്കുന്നു:
Embandizo 7: RHAY01
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Ruhaya DC Bible © Bible Society of Tanzania, 2001.