San Juan 6
6
Jesú rekuätürü ttu̧kuȩ iyinü
(Mt 14.13-21; Mc 6.30-44; Lc 9.10-17)
1Jua̧u̧ 'kuäopäji o'ka'a, Jesú-mä̧ Galirea rü̧ä̧dubora ji̧jä̧ku̧nä̧ 'chi̧nü̧, Tiberias pä'ü mikuomȩku̧. 2Ja̧'wa̧nü̧ ja̧'a̧ ttü̧ja̧ rekuätü o'ka'anä̧ 'chi̧nä̧tü̧, na̧nȩpä̧tü̧rü̧ aditü ikuä'chiyä̧u̧. 3Ja̧'wa̧nü̧ ja̧'a̧, Jesú-mä̧ mü̧ä̧'kara̧'a̧ 'cha'ächächäji̧'ka̧, jua'attümä̧ u̧wo̧juȩtä̧u̧ku pä̧mä̧di̧nü̧. 4Ja̧'wa̧ta̧nü̧ judío jȩttä̧'i̧jü̧ Pacua pä'käri, täkü tü'küwächi'ina̧'a̧. 5Ja̧'wa̧nü̧ ja̧'a̧ Jesú-mä̧ toomȩnä̧, ttü̧ja̧ rekuätü ttü̧ka̧ka̧kuä̧ji̧yä̧ku̧, Felipe-rü pä'inü̧:
—¿Jitüja ttü̧ja̧ o'katoi'ünä̧ ttukua pä'ümä̧, torü tȩmä̧kua̧'a̧jä̧ttü̧?
6Ja̧'wa̧nü̧ ja̧'a̧nä̧, kka̧kuä̧mü̧ topü päinä̧ku̧, jȩä̧kuȩmä̧ u̧wo̧jua̧'a̧nä̧. 7Päomȩnä̧ Felipe-mä̧, ädätinä̧ku̧:
—Pärätämä̧, todäre mo̧ro̧ jo̧mȩnä̧ ä̧tȩkuo̧mȩ aditi'ü'kotü, ttȩma̧ja̧ pä'ü'i̧nä̧ ttu̧kuȩmä̧ pa̧ja̧kuä̧chü̧ juiyü'anü̧ ja̧'a̧.
8Päiyäku u̧wo̧juȩtä̧u̧ttü̧ ya̧tȩ, Simón Peduru ü̧jä̧wa̧ André-mä̧, pä'inü̧:
9—Pȩnȩ́, ya̧tȩ mü̧ä̧ya̧ kkü̧, cebada ire o̧si̧ ji̧mü̧tȩ jäwä jo̧mȩnä̧tä̧ ja̧'wa̧ta̧nü̧ po̧i̧rü̧'i̧nä̧ ta̧ju̧ru̧tä̧ kku̧nä̧rü̧; ja̧'wa̧nü̧ ja̧'a̧nä̧ ¡juȩnȩnä̧ rekuätümä̧ ttü̧'a̧kuä̧cho̧ko̧mȩtä̧!
10Päiyäku, Jesú-mä̧ pä'inü̧:
—Ttü̧ja̧rü̧ ttü̧'ȩjä̧mü̧nä̧ we'i.
Juȩnȩmä̧ isä'kua rü̧ȩnä̧ kki̧no̧mȩ ja̧'wa̧nü̧ ja̧'a̧ttü̧ juȩnȩ, pȩjä̧mi̧nä̧tü̧ u̧mä̧tü̧tä̧mä̧, cinco mil-nü̧ jo̧mȩnä̧ ji̧na̧'a̧. 11Ja̧'wa̧nü̧ ja̧'a̧ Jesú-mä̧, jua̧u̧ o̧si̧ ȩmo̧po̧'ü̧, Dio-rü eseu pä'äji̧'ka̧, u̧wo̧juȩtä̧u̧rü iyä'chinü̧, jua'a yabo juätümä̧ ttü̧ja̧ pȩjä̧tü̧rü̧ ttiyä'chünä̧. Ja̧'wa̧ta̧nü̧tä̧ jȩpi̧nü̧ po̧i̧rü̧'i̧nä̧. 12Ja̧'wa̧nü̧ kuä̧nü̧ jo̧mȩnü̧ suttädi'äji o'ka'a, Jesú-mä̧ u̧wo̧juȩtä̧u̧rü pä'inü̧:
—Ttukua'anä̧ kka̧kui̧pä̧ji̧ ka̧ka̧tä̧tu̧kui̧, surojuoächü juiyäkua'anü̧.
13Pä̧jä̧u̧mä̧, ji̧mü̧tȩ jäwä o̧si̧ jä̧ji̧ttü̧tä̧, ttukua'anä̧ kka̧kui̧pä̧ji̧mä̧, kko̧ro̧mü̧ttü̧nü̧ püttäwä okä tokäre jo̧mȩnä̧ suädi'ünä̧ ka̧ka̧ti̧nä̧tü̧. 14Ja̧'wa̧nü̧ rü̧ä̧chü̧nä̧, Jesú jȩa̧'a̧ topäjä'kotü topü pä'inä̧tü̧:
—Isopäi'ünä̧, profeta pi̧jä̧ra̧'a̧ i̧chä̧kua̧ pättinä̧ku̧mä̧, pidetä ja̧'a̧.
15Ja̧'wa̧nü̧ ja̧'a̧nä̧, tu̧ru̧wa̧ Rey päi'ünä̧, jȩtta̧rü̧ pä'ü ȩmü̧ ttichäkua'a wo̧jui̧'ü̧, kkatätä mü̧ä̧'kara̧'a̧ 'chi̧nü̧.
Jesú-mä̧ aje wä̧mo̧tonä̧ kue'ächinü̧
(Mt 14.22-27; Mc 6.45-52)
16Täkü yodó juomȩnä̧, Jesú u̧wo̧juȩtä̧u̧mä̧ rü̧ä̧ duborara̧'a̧ku̧ 'chi̧nä̧tü̧, 17woi'kanä̧ pȩjä̧mü̧, rü̧ä̧ duboranä̧ Cafarnaúm ütawiyära̧'a̧ku̧ kkäwinä̧tü̧. Täkü yodó juoächa'anä̧, Jesú-mä̧ ji̧nä̧ ichi'oka'a to'epinü̧. 18Ja̧'wa̧nü̧ ttüjäwa'a jakuänä̧, rü̧ȩnä̧ kkä̧rü̧'ko̧wo̧mȩnä̧ aje rü̧ȩnä̧ ppawi'ina̧'a̧. 19Täkü, cinco-nü̧ jo̧mȩnä̧kü̧, sei-nü̧ jo̧mȩnä̧kü̧ kilómetro jo̧mȩnä̧ ttüjäwäji o'ka'a, Jesú-mä̧ aje wä̧mȩnä̧ woi'kaku icha'a topü, rü̧ȩnä̧ ye'inä̧tü̧. 20Ja̧'wa̧nü̧ yettiyäku, Jesú-mä̧ päinä̧u̧:
—Yekuekuätükuä, ttütäsä.
21Pä̧u̧, tteseäkuäwinä̧ku̧, woi'kanä̧ ichi'omȩnä̧, jua̧u̧nü̧ o'ka'a yotäku rȩbȩä̧kuä̧wi̧pi̧nä̧tü̧, tti̧'cha̧ ttä̧jä̧ra̧'a̧.
Ttü̧ja̧ Jesú-ru ttusinü̧ wȩnȩ
22Kkoro mo̧ro̧juoäja'a, ttü̧ja̧ rü̧ä̧dubora ji̧jä̧ku̧nä̧ kka̧kuä̧tü̧mä̧, woi'ka ji'katenä̧tä̧, Jesú-mä̧ toünä̧ u̧wo̧juȩtä̧u̧mä̧ päkuäyotütä tti̧'chä̧ja̧'a̧ wo̧jui̧'i̧nä̧tü̧. 23Ja̧'wa̧nü̧ ja̧'a̧nä̧mä̧, Tiberias ütawiyä, cebada o̧si̧, Tu̧ru̧wa̧ Dio-rü eseu ukuoku iyä'chäjomȩttü̧ kkoro woi'kiyu rȩbȩwi̧pü̧ rü̧jä̧mi̧na̧'a̧. 24Ja̧'wa̧nü̧ rü̧jä̧ma̧'a̧nä̧, Jesú'i̧nä̧, u̧wo̧juȩtä̧u̧'i̧nä̧ to̧i̧yä̧u̧, woi'kiyunä̧ pȩjä̧mü̧, Cafarnaúm ütawiyära̧'a̧ Jesú-ru usú 'chi̧nä̧tü̧.
Jesú-mä̧, a̧'kua̧rä̧kuä̧wä̧ ire ja̧'a̧
25Ja̧'wa̧nü̧ ja̧'a̧, ttü̧ja̧mä̧ rü̧ä̧dubora ji̧jä̧ku̧nä̧ tti̧rȩbȩwi̧'o̧mȩnä̧, Jesú-ru po̧kui̧pü̧ jä'epü ä̧ju̧kui̧nä̧tü̧.
—¿Wo̧juȩkuä̧ i̧sa̧, pomä̧ ti̧yȩnü̧ kuichi'äja'ajä̧ttü̧?
26Jesú-mä̧ päinä̧u̧:
—Isopäi'ünä̧ ukuturu pä'üsä, jȩtto̧kü̧ ja̧jü̧ juei ja̧'a̧ to'kuätukua'amä̧ kusätukuokokusä, suro sukuädi'ätukunä̧ kuäjä'kotütä kusätukuäkusä. 27Ku̧kuȩtu̧ku̧ beipächünä̧mä̧ kuaditätukuä, jua̧u̧ ja̧jü̧jueimä̧ kuäkuäwä beipächokü, kkä̧kuä̧wä̧ i'ko iyinü̧tä̧ aditätukui. Ja̧'wa̧nü̧ jü̧ ja̧'a̧, kuäkuäwä ubo I̧tti̧ ukuturu i̧yä̧kuȩmä̧, isopäi'ünä̧ Jua̧u̧nä̧ pätetü u̧ju̧ni̧na̧'a̧ttü̧, Jä'o Dio-mä̧.
28Päomȩnä̧, jä'epü ttä̧ju̧kui̧nä̧ku̧:
—¿Däjé jȩtü̧'a̧nü̧jä̧ttü̧ Dio aditäwä tadita pä'ümä̧?
29Jesú ädätinä̧u̧:
—Pi̧yȩ ja̧'a̧ Dio aditäwämä̧, Chutä weinä̧ku̧ru̧ kuesetiyätükuarü pä'ü.
30Päomȩnä̧, pättinä̧ku̧:
—¿Däjénä̧ttü̧ ujuturu totünä̧ jȩ'ku̧'a̧nü̧ jü̧mä̧, jua̧u̧ topü tesetaku pä'ümä̧? ¿Däjéjä̧ttü̧ uku jȩ'ku̧mä̧? 31Tü̧tä̧mü̧ mi̧nä̧mä̧ maná kuinä̧tü̧ rȩba̧ dȩ'a̧ra̧'a̧ttü̧, wȩyu̧kuä̧ wȩnȩmä̧ pä'ija'a: Ttu̧kuȩmä̧ mo̧ro̧jä̧ jäwättü ttukunä̧ iyinä̧u̧, jü̧nä̧.
32Ja̧'wa̧ta̧nü̧ Jesú-mä̧ päinä̧u̧:
—Isopäi'ünä̧ pädäu̧jä̧, jua̧u̧ mo̧ro̧jä̧ra̧'a̧ttü̧ ttukunä̧ iyinü̧mä̧ Moisé-mä̧kü̧ ji̧na̧'a̧; ji̧nä̧so iyinü̧mä̧ Chä'o ja̧'a̧, Isopäi'ünä̧ kuäkuäwä mo̧ro̧jä̧ra̧'a̧ttü̧ iyümä̧. 33Isopäi'ünä̧ kuäkuäwä Dio iyümä̧, mo̧ro̧jä̧ra̧'a̧ttü̧ mȩyȩwi̧nü̧tä̧ ja̧'a̧ ja̧'wa̧ta̧nü̧ jua̧u̧tä̧ ja̧'a̧ pi̧jä̧ ttü̧ja̧ tta̧'kua̧rü̧ iyümä̧.
34Päomȩnä̧, juätümä̧ pättinä̧ku̧:
Chu̧ru̧wa̧, jua̧u̧nu̧mä̧, jua̧u̧ttü̧ tukua iyitü.
35Pättiyäku, Jesú-mä̧ päinä̧u̧:
Ttütäsä, kuäkuäwä tta̧'kua̧rü̧mä̧; ttüku ichümä̧, yorisotä ukua ppäi ttuokä̧kua̧; ja̧'wa̧ta̧nü̧ ttürü esetümä̧, yorisotä awa a̧di̧ri̧jo̧ko̧ku̧ jä̧kua̧. 36Ja̧'wa̧nü̧ ja̧'a̧nä̧, täkü ukuturumä̧ pä'äjisä, ttürümä̧ to'kuätukua'anä̧ kuesetätukuokokusä, jü̧nä̧. 37Isopäi'ünä̧ Chä'o ttürü i̧yä̧u̧mä̧, ttüku ichätü; ja̧'wa̧nü̧ ja̧'a̧ ttüku ichätürümä̧ ya'okuoküsä. 38Isopäi'ünä̧ ttümä̧, mo̧ro̧jä̧ra̧'a̧ttü̧mä̧ mȩyȩwo̧kü̧ pinü̧sä̧ ttürü pä̧wä̧rü̧jü̧ jȩcha̧ pä'ümä̧, suro Chä'orü, ttürü we'inü̧rü̧ pä̧wä̧rü̧jü̧tä̧ jȩpü̧ ichinü̧sä̧. 39Ja̧'wa̧nü̧ ja̧'a̧ttü̧, ttürü we'inü̧ Chä'orü pä̧wä̧rü̧jü̧mä̧, ttürü iyinäu̧ru̧mä̧ ya̧tȩrü̧'i̧nä̧ tode'ächoka'a, rüjí mo̧ro̧ wa'arettü ttodädiyarü pä'ü. 40Isopäi'ünä̧ Chä'orü pä̧wä̧rü̧jü̧mä̧, o'katoi'ünä̧ I̧tti̧rü̧ topü, jua̧u̧ru̧ esetätümä̧ kkä̧kuä̧wä̧ i'ko ttu̧ju̧nä̧ri̧ya̧rü̧ pä'ü; rüjí mo̧ro̧ päi'omȩnä̧ juätürü wa'arettü ttodäda pä'ü.
41Ja̧'wa̧nü̧ ja̧'a̧ttü̧ judío-mä̧ Jesú-ru ya̧'ä̧wä̧'chi̧nä̧tü̧: Ttütäsä kuäkuäwä, mo̧ro̧jä̧ra̧'a̧ttü̧ mȩyȩwi̧nü̧mä̧ päjiyä̧u̧. 42Ja̧'wa̧nü̧ ja̧'a̧mä̧ pä'inä̧tü̧:
—¿Pidemä̧ José i̧tti̧, Jesú pä'ijümä̧kü̧? Jä'orü'i̧nä̧, ja̧ju̧ru̧'i̧nä̧ tu̧wo̧jui̧yä̧ku̧. ¿Tta̧'a̧nü̧ pä'ü jitämä̧, mo̧ro̧jä̧ra̧'a̧ttü̧ mȩyȩwi̧nü̧sä̧ pä'attü̧?
43Pättiyäku, Jesú-mä̧ päinä̧u̧:
—Suronä̧ kukuokuätukuä. 44Ya̧tȩ'i̧nä̧ ttukumä̧ ichokü, Chä'o Dio ttüku weokoku jü̧ttü̧mä̧; ja̧'wa̧nü̧ wa̧mä̧, rüjí mo̧ro̧ päi'omȩnä̧mä̧ wa'arettü tto̧dä̧dä̧kua̧. 45Ja̧'wa̧nü̧ ja̧'a̧ttü̧ Profeta-tü̧ tti̧wȩyu̧ti̧nü̧nä̧mä̧ pä'ija'a: Dio-mä̧ o'katoi'ünä̧rü̧ u̧wo̧juȩtä̧kua̧. Ja̧'wa̧nü̧ ja̧'a̧ttü̧ o'katoi'ünä̧ Chä'ottü wo̧jui̧pä̧tü̧mä̧, ttüku ichätü.
46Jua'amä̧, ya̧tȩ'i̧nä̧ Jä'orü topinä̧tü̧mä̧ toa'a; suro ya̧tȩtä̧ ja̧'a̧ Dio-ttü ichinü̧tä̧ topinü̧mä̧. 47Ja̧'wa̧nü̧ ja̧'a̧ttü̧ isopäi'ünä̧ pädäu̧jä̧: Ttürü esetümä̧ kkä̧kuä̧wä̧ i'ko kku̧nä̧rü̧. 48Ttütäsä, kuäkuäwämä̧, tta̧'kua̧rü̧ iyümä̧, 49Ku̧tä̧mü̧ mi̧nä̧tu̧ku̧mä̧ rȩbi̧yu̧ dȩ'a̧ra̧'a̧ttü̧ maná kuinä̧tü̧ ja̧'wa̧nü̧ ji̧na̧'a̧nä̧'i̧nä̧ wa'ü ikuinä̧tü̧. 50Ja̧'wa̧nü̧ ja̧'a̧nä̧, pidemä̧ kuäkuäwä mo̧ro̧jä̧ra̧'a̧ttü̧ mȩyȩwi̧nü̧ ja̧'a̧; jua'amä̧ jua̧u̧ttü̧ o'katoi'ünä̧ kuätümä̧, 'korujuottächü juiya pä'ü. 51Jua̧u̧ kuäkuäwä a̧'kua̧rü̧mä̧, mo̧ro̧jä̧ra̧'a̧ttü̧ mȩyȩwi̧nü̧mä̧ Ttütäsä; jua̧u̧ kuäkuäwättü kumä̧, 'kuäopünä̧tä̧ ü̧jä̧kua̧. Jua̧u̧ kuäkuäwä chi̧yä̧kuȩmä̧, ttütä chidepä jä̧kua̧'a̧. Jua̧u̧mä̧ pi̧jä̧ ttü̧ja̧ tta̧'kua̧rü̧ kka̧ pä'ü chi̧yä̧kua̧sä̧.
52Ja̧'wa̧nü̧ päomȩnä̧, judío-mä̧ tta̧mü̧nä̧ wopäkuäwinä̧tü̧:
—¿Toku i̧yä̧kuä̧u̧jä̧ttü̧ idepä ttukua pä'ümä̧?
53Pättiyäku, Jesú-mä̧ päinä̧u̧:
—Isopäi'ünä̧ pädäu̧jä̧, ubo i̧tti̧ idepättü kukuätuku juiyüttümä̧ ja̧'wa̧ta̧nü̧ ukuojattü kuawätuku juiyüttümä̧, kkä̧kuä̧wä̧mä̧ juikuäkuotüjä̧. 54Chidepättü kumä̧, chukuojattü aumä̧, kkä̧kuä̧wä̧ i'ko kku̧nä̧rü̧; ja̧'wa̧nü̧ rüjí mo̧ro̧ päi'omȩnä̧ wa'arettü tto̧dä̧dä̧kua̧ jua̧u̧mä̧. 55Isopäi'ünä̧ ttü chidepämä̧, kuäkuäwä jueü jäwä ja̧'a̧ ja̧'wa̧ta̧nü̧ chukuojamä̧, adiwäjuei isoya awäwoya ja̧'a̧. 56Chidepä kumä̧ ja̧'wa̧ta̧nü̧ chukuoja aumä̧, ttütäku todeunä̧ kkü̧, ja̧'wa̧ta̧nü̧ ttü'i̧nä̧ jua̧u̧ku̧ todeunä̧ wa̧sä̧. 57Chä'o ttürü we'inü̧mä̧, a̧'kua̧rä̧kuä̧wä̧ kku̧nä̧rü̧ ja̧'wa̧nü̧ ja̧'a̧ttü̧ ttümä̧ jua̧u̧nä̧ a̧'kua̧rü̧sä̧ ja̧'wa̧nü̧ jü̧ta̧'a̧nü̧ chidepä kumä̧, ttünä̧tä̧ a̧'kua̧rä̧kua̧. 58Pide ja̧'a̧ kuäkuäwä mo̧ro̧jä̧ra̧'a̧ttü̧ mȩyȩwi̧nü̧mä̧. Pide kuäkuäwämä̧, ku̧tä̧mü̧ mi̧nä̧tu̧ku̧ ttikuinü̧ maná ji̧na̧'a̧nümä̧ jo̧kü̧, kuinü̧'kotümä̧ wa'ü ikuinä̧tü̧; ja̧'wa̧nü̧ ja̧'a̧nä̧ pi̧yȩ kuäkuäwättü kumä̧ 'kuäopünä̧tä̧ ü̧jä̧kua̧. 59Pi̧yȩmä̧ Jesú wo̧juȩti̧nü̧ Cafarnaúm ütawiyä, sinagoga isodettü.
I̧wȩnȩmä̧ kkä̧kuä̧wä̧ i'ko ja̧'a̧
60Ja̧'wa̧nü̧ jiäwa'a ä̧ju̧ku̧, rekuätü Jesú o'ka'anä̧ 'chä̧tü̧mä̧ pä'inä̧tü̧:
—Pi̧yȩ jiäumä̧ juiyo 'kiyü jäwä ja̧'a̧ ¿Ditä esetä̧kuȩ ja̧'a̧jä̧ttü̧?
61Ja̧'wa̧nü̧ yä̧wȩi̧nä̧ ttukuokuäkuäwa'a wo̧jui̧'ü̧, Jesú-mä̧ jä'epü ä̧ju̧kui̧nä̧u̧:
—¿Pi̧yȩ pädomȩnä̧, kuju'kätuku juiyünä̧ päia'a? 62¿Jua̧u̧nu̧mä̧, toku jä̧kua̧'a̧jä̧ttü̧, pä'äji ji̧nü̧ta'anü̧ ubo i̧tti̧ ü̧ji̧no̧mȩku̧ käekuächa'a to'kuätüküttümä̧? 63Epíritu ja̧'a̧ a̧'kua̧rä̧kuä̧wä̧ iyümä̧; ttidepo'tämä̧ ji̧ya̧'a̧kuä̧ra̧'a̧tä̧ kka̧'a̧; ja̧'wa̧nü̧ ja̧'a̧ttü̧ ttü pädäjimä̧ epíritu ja̧'a̧nä̧, tta̧'kua̧rü̧'i̧nä̧ jü̧. 64Ja̧'wa̧nü̧ ja̧'a̧nä̧, ukututtü yotukunä̧ esetokotü kka̧kuä̧tü̧.
65Jua'a yabonü̧ pä'inü̧:
—Ja̧'wa̧nü̧ ji̧yä̧ku̧ pä'äjisä, ya̧tȩ'i̧nä̧ ttükumä̧ ichü juiyü'anü̧ ja̧'a̧ chä'o wooka'a jü̧ttü̧mä̧, jü̧nä̧.
66Juorütä kkä̧mä̧dü̧, rekuätü Jesú-ku kue'ächäjätümä̧, täkü jua̧u̧ku̧mä̧ kue'ächokotü pinä̧tü̧. 67Ja̧'wa̧nü̧ ji̧yä̧ku̧, Jesú-mä̧ u̧wo̧juȩtä̧u̧ ttü̧jä̧pü̧ttü̧ ta̧ju̧nü̧ wotürü pä'inü̧:
¿Ukutu'i̧nä̧ kui̧'chä̧tu̧kua̧ pä'ätüjä̧?
68Päomȩnä̧, Simón Peduru-mä̧ ädätinä̧ku̧:
—Chu̧ru̧wa̧, ¿Diku ti̧'chü̧'a̧nü̧ ja̧'a̧jä̧ttü̧? Uku kui̧wȩnȩmä̧ kkä̧kuä̧wä̧ i'ko jäwä ja̧'a̧. 69Ja̧'wa̧nü̧ ja̧'a̧ttü̧, ujutumä̧ täkü esetinä̧tü̧jä̧, ukumä̧ Dio kkü̧ i̧tti̧jä̧ pä'ü.
70Jesú-mä̧ ädätinä̧u̧:
—¿Ukutu ttü̧jä̧pü̧ttü̧ ta̧ju̧nü̧ wotürümä̧, ttü chȩmo̧ko̧u̧ pinä̧tü̧jä̧? Ja̧'wa̧nü̧ ja̧'a̧nä̧ ukututtü, ya̧tȩmä̧ Äwettä ja̧'a̧.
71Pa̧'a̧nü̧ päomȩnä̧mä̧, Juda ütü'kü pä'inü̧, Simón Icariote i̧tti̧. Jua'amä̧ Juda-mä̧ ttü̧jä̧pü̧ttü̧ ta̧ju̧nü̧ wotü i̧sa̧ ja̧'a̧nä̧ churutä iyü ikuäkua'a ji̧yä̧ku̧.
നിലവിൽ തിരഞ്ഞെടുത്തിരിക്കുന്നു:
San Juan 6: PNT13
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Sociedades Biblicas Unidas en Venezuela