SAN MATEO 8
8
1Te ni nanuu Jesús yucu ún, te cuehē ñayuu cándiquīn i ya. 2Te ɨɨn tēe ndóho cuehyɨ̄ stehyú, ni quee de nuū yā. Te ni jecuɨñɨ̄ yɨtɨ́ de nuū yā, te ni cahān de jíín yá:
Jíní na jéē cuu sáha ní jéē nduvāha ná, te núu cúní ni, áchí de.
3Te Jesús ni soó yá ndaha ya sɨquɨ̄ de, te ni cahān yā:
Cúní rī. Te na ndúvāha ró, áchí yá.
Te ná ni cahān yā súcuan, te ni nduvāha‑ni tēe ndóho cuehyɨ̄ stehyú un. 4Yūcuán na te ni cahān Jesús jiín de:
Ma cáchi cuɨtɨ rō nuū ní ɨɨn. Chi quisteén rō maá ró nuū sutú, te condahá ró jeē socó rō nuū Yaā Dios, nájnūhun ni ndacu Moisés jniñu jenahán, návāha cuni ñayuu jeē ní nduvāha ró. Achí yá.
Jeē ní nasávāha ya mozo capitán
(Lc. 7.1‑10)
5Te ni quɨ̄vɨ Jesús ñuu Capernaum. Te ɨɨn tēe nación Roma jeē cúu capitán, ni quee de nuū yā, te ni cahān ndahú de jíín yá:
6Mozo na cátú i vehe ná, chi ni ījin i te ndóho xeēn i, áchí de.
7Te ni cahān Jesús:
Quihīn rī nasávāha ri i núu súcuan, áchí yá.
8Te ni cahān capitán jiín yá:
Tu cújéhnu ná jéē quihín ni quɨ́vɨ ní vehe ná. Chi máá jéē cahán‑ni ní, te na ndúvāha‑ni mozo na. 9Chi máá ná suni ndíso jníñu ná ní casáha tēe cácujéhnu ga. Te cújéhnu ná núū tācá soldado na. Te núu cáhán na jíín ɨɨn de jeē na quíhín de, te cuahān de. Te núu cáhán na jíín ɨnga de jeē na quíji de, te quíji de. Te núu ndácu ná ɨɨn jniñu nuū mozo na, te sáha i. Achí de.
10Te jeē ní jini Jesús jnūhun yáha, te ni naa ni yā. Te ni cahān yā jiín ñáyuu cándiquīn yā ún:
Jendaá cahán rī jiín ró jeē ni nación yō Israel tu ní níhín rī ni ɨɨn ñayuu candíje nīhin súcuan, nájnūhun cándíje tēe yáha, vēsú tēe nación tu jíní jnūhun Yaā Dios cúu de. 11Te cáhán rī jiín ró jeē quíjicoo cuehē ñayuu ichi núū cáne niāndii jíín ichi núū quée niāndii. Te cucōo i caji i staā jiín Abraham jiín Isaac jiín Jacob nuū ndácu Yaā Dios jniñu nde andɨvɨ́. 12Te sava ñayuu nación Israel jeē maá i quɨ̄vɨcoo núú, te sa quenehen ya i quihīn i nuū néē, chi tu ní cácandíje i. Te yūcuan ndáhyū i te nacayɨ̄hɨ́ yuhu i jeē ndoho xeēn i. Achí yá.
13Yūcuán na te ni cahān yā jiín tée cúu capitán:
Cuánuhun vehe ró, chi sáha ri nájnūhun cándíje ró jéē sáha ri.
Te mozo de un ní nduvāha‑ni i máá hora un.
Jeē ní nasávāha ya naná chīso Pedro
(Mr. 1.29‑31; Lc. 4.38‑39)
14Te ni jehēn Jesús vehe Pedro. Te ni jito ya naná chīsó de jeē catú ña yɨ́hɨ quīji ña. 15Te ni jnɨɨ ya ndaha ña, te ni quenda‑ni quīji ún ña. Te ni ndocuɨñɨ̄ ña, te ni sáha ña jeē ní cayeji de jíín yá.
Jeē ní nasávāha ya cuehē ñayuu
(Mr. 1.32‑34; Lc. 4.40‑41)
16Te jeē ní cuaa ni quecoo ñayuu jiín cuéhē ñayuu jeē ñúhun tachī ini i. Te ni quenehen ya tachī un cuángoo jíín jnúhun cáhán‑ni ya. Te suni ni nasávāha ya tāca ñáyuu cácuhū. 17Te súcuan ni cuu návāha cundaā jnūhun ni cahān Isaías, tēe ni nacani jnūhun Yaā Dios jenahán: Máá yá ni tejiyo ndɨnuū cuehyɨ̄ cándoho yó, áchí Isaías.
Sɨquɨ̄ ñayuu jeē cácuni i condiquīn i ya
(Lc. 9.57‑62)
18Te ni jito Jesús jeē ní ndicó ndúū cuehē ñayuu yā. Te ni cahān yā jiín tée cáscuáha jíín yá jeē na yáha de jíín yá ɨnga lado mar. 19Te ɨɨn tēe stéén tutu ley Yaā Dios, ni quee de nuū yā, te ni cahān de:
Maestro, condiquīn na níhín quíhīn yō ndé‑ni cúu‑ni nuū quihín ni, áchí de.
20Te ni cahān Jesús jiín de:
Tāca ñúcuii, íyó yáū cava cáñuhun tɨ. Te suni saa, iyó tácā tɨ̄. Te ruhū, Yaā ní nduu tēe, tuú nuū cusú rī, achí yá.
21Te ɨnga tēe ni cahān de jíín yá, te tēe scuáha jíín yá cúu de:
Condetu ní ndé na quíchindūji ná tátá na xíhna gā. Yūcuán na te condiquīn na níhín, áchí de.
22Te ni cahān Jesús jiín de:
Condiquīn ruhū na quíhín yō. Te stóo tāca ndɨ́yɨ na chíndūji jnáhan ndɨ̄yɨ, chi ndɨ̄yɨ cácuu ñayuu tu cácandíje. Achí yá.
Jeē ní jecuɨñɨ̄ tachī níhin jíín mar ni sáha ya
(Mr. 4.35‑41; Lc. 8.22‑25)
23Yūcuán na te ni quɨ̄vɨ Jesús ini barco, te tēe cáscuáha jíín yá ni quɨ̄vɨcoo de cuahān de jíín yá. 24Te nuū mar ni jequɨ̄hɨ ɨɨn tachī níhin, te ni stónda ndute mar, ni quɨ̄vɨ ini barco un. Te Jesús chi quíxí yā. 25Te tēe cáscuáha jíín yá ni castónda de ya, te ni cacahān de:
Jnama ní yóhó, chi je quée yó chíji ndute, áchí de.
26Te ni cahān yā jiín de:
¿Naun cáyūhú ndasɨ́ ró? Te tu cácandíje nīhin ró jéē cácu ró sáha ri, achí yá.
Yūcuán na te ni ndocuɨñɨ̄ yā, te ni cahān yā nuū tachí níhin un jíín núū mar. Te ni cuu nayúú íī‑ni. 27Te ni canaa ni de jíjnáhan de, te ni cacahān de:
¿Ndé ɨɨn ga cúu tēe yáha, jéē ndé tachī níhin jíín mar cájetáhú jéē cahán de? áchí de.
Tēe Gadara jeē cándoho tachī
(Mr. 5.1‑20; Lc. 8.26‑39)
28Te ni jinū yā ɨnga lado mar, máá región ñayuu Gadara. Te uū tēe ni quendacoo de nde nuū yíndūji ndɨ̄yɨ, ni quijnahan de ya. Te cáñuhun tachī ini de, te sɨquɨ̄ jeē yóhyo xeēn tachī ún, te ni ɨɨn ñayuu tu cúu yāha i ichi yúcuan. 29Te ni cacana cóhó de ni casáha tachī:
¿Naun vēji ní núū ná, Jesús Sēhe Yaā Dios? ¿A véji ní yáha jeē stóho ní sáña ndé ná tu quee maá quɨ́vɨ̄? áchí.
30Te nde jicá jecu cáhīin cuehē quɨnɨ̄ cájitu tɨ. 31Te tachī jeē cáñuhun ini tēe un ní cacahān ndahú jíín yá:
Núu quenehen ní sáña, te cuāha ni jnúhun na quɨ́vɨcoo ná ini quɨnɨ̄ cáhīin yūcuán, áchí.
32Te ni cahān yā jiín:
Cuángoo núu súcuan.
Te ni quendacoo tachī ún ini tēe ún, te ni quɨ̄vɨcoo ini quɨnɨ̄. Te quɨnɨ̄ un ní cajinu tɨ ni canɨngava tɨ ɨɨn yucáva, te ni ndaquɨ̄hɨ tɨ ndute mar, ni cajihī tɨ̄.
33Te tēe cándito tɨ ni cajinu de cuangoo de jeē ní cayūhú de. Te ni najinūcoo de ñuu. Te ni cacastūhún de tācá jniñu yúcuan, jíín ndese ni cuu jeē ní quendacoo tachī ini ndɨndúú tée ún. 34Yūcuán na te ndɨvii ñayuu ñuu un, ní quendacoo i cuacondēhé i Jesús. Te ná ni jinūcoo i nuū íne ya, te ni cacahān ndahú i jíín yá jeē na quénda ya región yúcuan quíhīn yā.
Jeē ní nasávāha ya ɨɨn tēe ndóho cuehyɨ̄ ni íjin
(Mr. 2.1‑12; Lc. 5.17‑26)
നിലവിൽ തിരഞ്ഞെടുത്തിരിക്കുന്നു:
SAN MATEO 8: mibDBL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 1973, Wycliffe Bible Translators, Inc. All rights reserved.