Mat 2
2
Yɛmbaŋnema Mine Naŋ Yi Sapare A Wa Ka Ba Puori A Yeezu
1A Naa Hɛrɔde naaloŋ saŋ, ba naŋ da dɔge a Yeezu Bɛtelɛhɛm naŋ be Gyudiya paaloŋ poɔ, a lɛ puoriŋ, yɛmbaŋnema mine da yi la sapare wa Gyɛruzɛlɛm, 2a wa soorɔ, “Yeŋ la ka ba dɔge a bie na naŋ waa a Gyuumine Naa? Bonso, te nyɛ la a O ŋmarbiri puriyiibu a sapareŋ, a wa ka te puori O ne emmo.” 3A Naa Hɛrɔde naŋ da wa woŋ a yɛlɛ ama, o ne a Gyɛruzɛlɛm deme zaa pɔlle da teɛɛ la. 4Ka o da boɔle a Naaŋmen bagmaalkare ane a Naaŋmen bege wulwulibo lantaa a peɛre ba ka o baŋ zie na ba naŋ na dɔge a Mɛzaaya.#2:4 Mɛzaaya: A Mɛzaaya tɛgɛ la a ‘Kirista.’ 5Ka ba da yeli ko o, “Bɛtelɛhɛm teŋɛ naŋ be Gyudiya paaloŋ poɔ la, bonso, lɛ la ka a Ŋmen-yelmanneba da sɛge biŋ:
6‘Fõõ, Bɛtelɛhɛm naŋ be Gyuda paaloŋ poɔ,
fo ba waa a Gyuda namine zaa poɔ bile soba;
bonso, fo poɔŋ la ka naa na yi,
ona la na kyẽẽ N boorɔ noba Izerayɛl.’ ”
7Lɛ la ka a Naa Hɛrɔde sɔgle boɔle a yɛmbaŋnema a soore ba nɛnɛ ka o baŋ saŋ na ba naŋ nyɛ a ŋmarbiri. 8Lɛ la ka o pãã da toŋ ba Bɛtelɛhɛm a yele, “Yɛ gaa te bɔ a bie nimizeɛ zaa, ka yɛnee wa nyɛ o, yɛ leɛ wa yeli ko ma ka N meŋ gaa te puori O ne emmo.” 9Ba naŋ da wa woŋ a naa noɔre yɛlɛ baare, ba da yi gɛrɛ la, ka a ŋmarbiri na ba naŋ da nyɛ a sapareŋ la lɛ, a wa de ba weɛ, a gɛrɛ te kyulli are a zie na a bie naŋ be. 10Ba naŋ da nyɛ a ŋmarbiri ka o are, ba poore da pɛle la yaga zaa a ba taa mannoo. 11Ba naŋ wa te kpeɛrɛ a die, ba da nyɛ la a bie ne O ma Mareya, ka ba da gbi dumo a puori O ne emmo, kyɛ yuo ba woore a ko O kyɔɔtaare; salema, ensɛnse ane turaali. 12Kyɛ Naaŋmen naŋ da kpãã ba ba zannoo poɔ, ka ba ta wa leɛ gɛrɛ a Hɛrɔde zie zuiŋ, ba da tu la so-yuo a gaa ba teŋɛ.
A Igyipiti Teŋɛ Zo Gaabo Yɛlɛ
13A yɛmbaŋnema naŋ da wa gaa baare, a Daana Maleke da wa la Yuzɛb zie o zannoo poɔ, a wa yeli ko o, “Iri de a bie ne O ma zo gaa ne Igyipiti teŋɛ a te kpeɛrɛ be a te ta saŋ na N naŋ na yeli ka fo leɛ wa, bonso, Hɛrɔde nara la ka o bɔ a bie a ko.” 14Lɛ la ka a Yuzɛb iri de a bie ane O ma yi ne tensogɔ gaa ne a Igyipiti teŋɛ, 15a te bebe te ta saŋ na a Hɛrɔde naŋ wa kpi. A ŋaa da eɛɛ la ka ka a Daana yelbiri na O naŋ yeli tu a Ŋmen-yelmanna zie tu a tuubu, “N boɔle la a N Bidɔɔ ka O yi a Igyipiti teŋɛ poɔ.”
A Bibiiri Koobo Yɛlɛ
16A Hɛrɔde naŋ da wa nyɛ ka a yɛmbaŋnema bɛlle o la, o suuri da iree la yaga zaa. Lɛ la ka o toŋ ka ba te ko bibiiri na zaa naŋ ta yuomo ayi kyɛ sigre, a Bɛtelɛhɛm ane o tembilii poore. A yi o naŋ da peɛre a yɛmbaŋnema nɛnɛ a te baŋ a bie dɔgebo saŋ zuiŋ la ka o da ko a bibiiri bama. 17A yɛlɛ ama da eɛɛ la ka ka a Ŋmen-yelmanna Gyɛremaaya yelbie na tu a tuubu, aŋa lɛ o naŋ da yeli:
18“Ba da woŋ la neɛ kaŋ kɔkɔre naŋ yire Urama poɔ,
neɛ kaŋ naŋ ŋmeɛrɛ kpɛlle erɛ nemba-yɛlɛ,
Urakɛɛl kono hiine la o biiri yɛlɛ,
a ba sage ka ba mɔgle o, bonso, a o biiri ba la kyebe.”
A Igyipiti Teŋɛ Leɛ Yi Waabo Yɛlɛ
19A Hɛrɔde kũũ puoriŋ, a Yuzɛb naŋ da naŋ be a Igyipiti teŋɛ poɔ, a Daana maleke da wa la o zie zannoo poɔ, a wa yeli: 20“Iri taa a bie ne O ma ka yɛ leɛ gaa Izerayɛl teŋɛ, bonso, a banaŋ naŋ da boɔrɔ a bie koobo kpie la.” 21Lɛ la ka Yuzɛb da iri de a bie ne O ma leɛ gaa ne a Izerayɛl teŋɛ. 22Kyɛ o naŋ da woŋ ka Akyilɔ la leɛre o saa Hɛrɔde zu a di a Gyudiya naaloŋ, a Yuzɛb da zoro la dabeɛ̃ ka o gaa a be. Kyɛ ba naŋ da kpãã o, o zannoo poɔ zuiŋ, o da de la a bie ne O ma a leɛ gaa ne Galili paaloŋ. 23Be ka o da gaa te kpeɛrɛ tembile kaŋ ba naŋ boɔlɔ Naazɛrɛ. A ŋaa da eɛɛ la ka a yelbie a Ŋmen-yelmanneba naŋ da yeli na tu a tuubu, “Ba na boɔlɔ O la Naazɛrɛ Bie.”
Одоогоор Сонгогдсон:
Mat 2: DNTTP
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
First New Testament in Dagaare Language © The Bible Society of Ghana, 2013.