Juan 2
2
Ña̱ꞌa̱nꞌ Jesús ɨɨn viko tána̱ꞌá nu̱u̱nꞌ ñuunꞌ Caná
1Jee sáá njia̱ꞌa ki̱vɨ̱ꞌ uníꞌ, jee ni̱yo ɨɨn viko tánáꞌá nu̱u̱nꞌ ñuunꞌ Caná ya̱ kúvi ɨɨn ñuunꞌ ya̱ tɨ́ɨn Galilea. Jee yukuán íñɨ́ nánáꞌ Jesús. 2Jee suni nkana rá ñɨvɨ vá Jesús jín rá te̱e súkuáꞌa re̱ꞌ ráa ya̱ kɨ̱ꞌɨ̱nꞌ ráa viko tánáꞌá vá. 3Jee sáá kúmániꞌ nixiꞌ nu̱xi uva ya̱ koꞌo ka̱ꞌ rá ñɨvɨ, jee nkachiꞌ nánáꞌ Jesús nu̱u̱nꞌ re̱ꞌ:
―Ntu̱náꞌ nixiꞌ nu̱xi uva íyó ka̱ꞌ ―nkachiꞌ ña.
4Jee nkachiꞌ Jesús nu̱u̱nꞌ ña:
―¿Na̱kui chi nániꞌvɨꞌ iniꞌ nú nu̱u̱nꞌ tiñu ni̱ꞌ, kánánáa? Chi ni ntiáꞌan kenta tiempúꞌ ni̱ꞌ nka̱ji Ndiosíꞌ ―nkachiꞌ Jesús.
5Saájee nkachiꞌ nánáꞌ Jesús nu̱u̱nꞌ rá ñɨvɨ ya̱ chúꞌun nixiꞌ:
―Saꞌá rán néni ɨɨn tiñu ya̱ kachiꞌ re̱ꞌ nu̱u̱nꞌ rán ―nkachiꞌ ña.
6Jee yukuán íñɨ́ i̱ñu̱ꞌ rá ki̱sɨ yu̱u̱ꞌ nu̱u̱nꞌ chúꞌun ráa nute sánikua̱ꞌ rá costumbre sáꞌá rá ñɨvɨ Israel ya̱ jiátíñú ráa maa sáva saꞌá ninuꞌun ráa maáráa nu̱u̱nꞌ Ndiosíꞌ. Jee kánta ñúꞌún yatin ku̱mi̱xiko (80) áxí ɨɨn sientúꞌ (100) litro nute iniꞌ ta ɨɨn rá ki̱sɨ yu̱u̱ꞌ vá. 7Jee nkachiꞌ Jesús nu̱u̱nꞌ rá ñɨvɨ ya̱ chúꞌun nixiꞌ:
―Chuchítú rán nute iniꞌ rá ki̱sɨ yaꞌá ―nkachiꞌ re̱ꞌ.
Jee nchu̱chítú kanáa ráa nute iniꞌ rá ki̱sɨ vá. 8Saájee nkachiꞌ re̱ꞌ nu̱u̱nꞌ ráa:
―Vitan jee tavaꞌ rán ntíꞌ, jee kuáꞌán rán jín‑i nu̱u̱nꞌ te̱e néen kuéntáꞌ viko yaꞌá ―nkachiꞌ re̱ꞌ.
Jee kua̱na̱ka ráa maa. 9Jee te̱e ya̱ néen kuéntáꞌ viko vá ni̱totúníꞌ re̱ꞌ nute ya̱ nnuvi nixiꞌ nu̱xi uva vá, sú nsáꞌ jíníꞌ re̱ꞌ né núꞌ va̱ji‑i. Soo rá ñɨvɨ ya̱ chúꞌun nixiꞌ ya̱ ntavaꞌ ráa nute vá jee jíníꞌ ráa né núꞌ va̱ji‑i. Jee sáá ni̱totúníꞌ re̱ꞌ maa jee nkana re̱ꞌ te̱e tánáꞌá vá. 10Jee nkachiꞌ re̱ꞌ nu̱u̱nꞌ‑u:
―Nta̱ká ñɨvɨ jee xíꞌna ka̱ꞌ jiáꞌa ráa maá nixiꞌ nu̱xi uva váꞌa ka̱ꞌ. Jee sáá ya̱ jíjin rá ñɨvɨ jee jiáꞌa ráa nixiꞌ nu̱xi uva láꞌví ka̱ꞌ. Soo noꞌó chi nte̱va̱ꞌa nú ya̱ váꞌa ka̱ꞌ ne̱ ntañúꞌún.
11Jee tiñu yaꞌá ya̱ nsa̱ꞌá Jesús nu̱u̱nꞌ ñuunꞌ Caná ya̱ tɨ́ɨn Galilea nkuvi seña a̱nasɨ́ xíꞌnañúꞌún ya̱ nsa̱ꞌá Jesús. Jee seña yukuán nstúvi‑i ya̱ kúñáꞌnú nasɨ́kuitɨꞌ re̱ꞌ, jee rá te̱e súkuáꞌa re̱ꞌ ráa ni̱nu̱ꞌ iniꞌ ráa re̱ꞌ.
12Jee sáá njia̱ꞌa ya̱ nkuvi rá tiñu yaꞌá, jee kuíre kua̱ꞌa̱nꞌ re̱ꞌ nu̱u̱nꞌ ñuunꞌ Capernaum, jín nánáꞌ re̱ꞌ, jín rá ñaniꞌ re̱ꞌ, jín rá te̱e súkuáꞌa re̱ꞌ ráa. Jee nééꞌ ráa yakuꞌ ni ki̱vɨ̱ꞌ yukuán.
Nna̱sánoo Jesús veñu̱ꞌun káꞌnú
(Mateo 21:12-13; Marcos 11:15-18; Lucas 19:45-46)
13Jee ya̱ nku̱yatin ki̱vɨ̱ꞌ koo viko Pascua ya̱ sáꞌá rá ñɨvɨ Israel, jee yukuán kua̱ꞌa̱nꞌ Jesús nu̱u̱nꞌ ñuunꞌ Jerusalén. #2:13 Maá Pascua kúvi ɨɨn viko ya̱ sáꞌá rá ñɨvɨ Israel, sáva nákúꞌun iniꞌ ráa, ya̱ Ndiosíꞌ nchu̱ichí najiáꞌáꞌ ííꞌ re̱ꞌ xi̱ni̱ꞌ ráa jee nsi̱káku re̱ꞌ ráa ntavaꞌ re̱ꞌ ráa ñuunꞌ Egipto. Sunisaá káꞌánꞌ 2:23, 6:4, jín 11:55 jie̱ꞌe̱ꞌ viko Pascua. 14Jee niniꞌ re̱ꞌ chíkéꞌi iniꞌ veñu̱ꞌun káꞌnú Jerusalén nééꞌ rá ñɨvɨ xíkó ráa xi̱ni̱kɨ̱ꞌ, jín rá lanchi, jín rá paloma, jee suni nééꞌ rá te̱e sáma xu̱ꞌún. 15Jee nchu̱táꞌán re̱ꞌ yoꞌo, jee nchiꞌi re̱ꞌ nta̱ká rátíꞌ ntavaꞌ re̱ꞌ rá lanchi jín rá xi̱ni̱kɨ̱ꞌ chíkéꞌi iniꞌ veñu̱ꞌun káꞌnú. Jee nxi̱náváꞌ re̱ꞌ xu̱ꞌún ka̱a rá te̱e sáma xu̱ꞌún. Jee nxi̱nániso re̱ꞌ rá mesa ráa. 16Jee nkachiꞌ re̱ꞌ nu̱u̱nꞌ rá ñɨvɨ ya̱ xíkó rá paloma:
―Tavaꞌ rán rá yaꞌá chíkéꞌi, jee koto sáꞌá rán veꞌi Tátáꞌ ni̱ꞌ ɨɨn nu̱yáꞌvi ―nkachiꞌ re̱ꞌ.
17Saájee nna̱ku̱ꞌun iniꞌ rá te̱e súkuáꞌa re̱ꞌ rává tu̱ꞌun níso nu̱u̱nꞌ Tutuꞌ nééꞌ Tu̱ꞌun Ndiosíꞌ: “Ñúkuíñɨ́ iniꞌ ni̱ꞌ jie̱ꞌe̱ꞌ ve̱ꞌí nú ne̱ tɨ́ɨn ñuꞌunꞌ nuꞌuꞌ.”
18Saájee rá te̱e kúñáꞌnú nu̱u̱nꞌ rá ñɨvɨ Israel nkachiꞌ ráa nu̱u̱nꞌ re̱ꞌ:
―¿Na̱ seña xtúvi nú nu̱u̱nꞌ ránꞌ ya̱ íyó tiñu níso nú ya̱ sáꞌá nú rá tiñu yaꞌá résa? ―nkachiꞌ ráa.
19Jee nna̱xiníkó Jesús jee nkachiꞌ re̱ꞌ nu̱u̱nꞌ ráa:
―Kanɨꞌ rán veñu̱ꞌun yaꞌá, jee ki̱vɨ̱ꞌ uníꞌ jee nakani ni̱ꞌ maa ―nkachiꞌ Jesús.
20Saájee rá te̱e kúñáꞌnú nu̱u̱nꞌ rá ñɨvɨ Israel nkachiꞌ ráa nu̱u̱nꞌ re̱ꞌ:
―U̱vi̱xiko i̱ñu̱ꞌ (46) kui̱ya̱ꞌ ya̱ va̱ji jiáni ráa veñu̱ꞌun káꞌnú yaꞌá, jee noꞌó, ¿á káchíꞌ nú ya̱ ki̱vɨ̱ꞌ uníꞌ ni jee nakani nú maa rúja? ―nkachiꞌ ráa.
21Soo veñu̱ꞌun jie̱ꞌe̱ꞌ ya̱ nkaꞌanꞌ re̱ꞌ ví jie̱ꞌe̱ꞌ ñunéꞌyúꞌ re̱ꞌ. 22Saáva sáá nna̱tekuꞌ Jesús nkene re̱ꞌ nteñu rá níꞌiꞌ, jee nna̱ku̱ꞌun iniꞌ rá te̱e nsu̱kuáꞌa re̱ꞌ ráa tu̱ꞌun yaꞌá ya̱ nkachiꞌ re̱ꞌ, jee ni̱nu̱ꞌ iniꞌ ráa rá tu̱ꞌun ya̱ níso nu̱u̱nꞌ Tutuꞌ nééꞌ Tu̱ꞌun Ndiosíꞌ jín rá tu̱ꞌun ya̱ nkachiꞌ re̱ꞌ.
Jíníꞌ Jesús ná kúvi ya̱ ñúꞌún iniꞌ ánímaꞌ ntáká rá ñɨvɨ
23Jee sáá nééꞌ Jesús nu̱u̱nꞌ ñuunꞌ Jerusalén ya̱ kúvi rá ki̱vɨ̱ꞌ viko Pascua ya̱ sáꞌá rá ñɨvɨ Israel, jee kue̱ꞌe̱ꞌ rá ñɨvɨ ni̱nu̱ꞌ iniꞌ ráa re̱ꞌ, sáá niniꞌ ráa rá seña a̱nasɨ́ sáꞌá re̱ꞌ. 24Soo Jesús chi ntu kúneí iniꞌ re̱ꞌ ráa, chi jíníꞌ re̱ꞌ iniꞌ ntáká rá ñɨvɨ. 25Jee saáva ntu̱né jíniñúꞌún re̱ꞌ ya̱ ni ɨɨn ñɨvɨ ku̱ꞌva ráa ya̱ naáꞌ nu̱u̱nꞌ re̱ꞌ jie̱ꞌe̱ꞌ rá ñɨvɨ, chi ya jíníꞌ va̱ꞌa re̱ꞌ ná kúvi ya̱ ñúꞌún iniꞌ ánímaꞌ ntáká rá ñɨvɨ.
Одоогоор Сонгогдсон:
Juan 2: meh
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2022, Wycliffe Bible Translators, Inc. All rights reserved.