Mak 8
8
Jisas tevangi tarutmumu tevata vakavet
1Tei leto nanong ba tarutmumu rat tepma mwetak ben Jisas. Entorah apma tei tebulong ah tarutni nong rabat kani bi Jisas bep mini non tarutni nuhu, 2“Bwaren tarutmumu rahe modok gonani bibi ren kajil nanong nagoah ramdi bek bi apma tebulong ah rama kani. 3Tigoah nan nesro ni namul nong ba rongonan noko man gapma, gonani datngin ba rat tepma nawut.” 4Non tarutni rabep mini nuhu, “Taneli hinak ibeh li vini tebu ahe, niah mandokoi tarutmumu rahe?” 5Jisas muhleli i ni nuhu, “Ani kami bered tekeni apma?” Rabep mini nuhu, “Bol telaviru ah mwidi.”
6Maskani vehuran mini tarutmumu ah ratti nuhu rama sadok tavan li tan. Ratti sera tavan, bi Jisas mali bered ah bol telaviru, bi maskani dalen vavatlaan mini God uru bi bwabwerawera. Bi maskani mini non tarutni bi rabahtani masen tarutmumu. 7Ka biribiri ik temudi, Jisas maskani dalen vavatlaan uru bi bep mini non tarutni nuhu ramamu vahtani masen tarutmumu ah ratti. 8Mulngan tarutni nong ba tei ni tevata vakavet. Ni sera rat kubu i hinak ah rat kani. 9Tarut non Jisas ram songi watang telaviru i riaknan hinak ah rat kaniriani. Jisas moso botwot i tarutni, 10bi mwisip li aga mini non tarutni, bi ban li vinini ah Dalmanuta.
Ajinan goah rat wuhu Temwat rat toni nuhu rabat kitate kapkawu
11Ajinan goah rat wuhu Temwat ram mapma bi rabawo neuhleli vehuran i Jisas. Ramuhleli ini nuhu, nema lelte ililnan rowok tegol at lebini. Tei ratga sipnge lin. 12Rongnan nokon Jisas tekapma tokol le non vihnian. Bep mini ni nuhu, “U apma ba tarutni ah ramas mwerani, ram uhleli ililnan rowok tegol? Mwetaknga letlet nambep mini gimi, aji ah ramas nanong ba ran ba gita rowok tegol nga nanong.” 13Mamlu dini ni, bi musupmul li aga, bi mul bamul almaun sileng.
Jisas tevikat ben non tarutni gonani meta tei tebi
14Entorah rat van li aga, ba tarut non Jisas rat maluni go rama kavinte maro u ut lihal. Ka bered tegamui bol bwaleh nge teriak. 15Jisas notani ni bep nuhu, “Kan rarei, kandi nesesep u halan lelian non ajinan goah ramabuhu Temwat, bi lelian non Herod, lelian tekapma niah mwidi i maun God.” 16Non tarutni ram gamdima nedoptop nokon, rabep nuhu, “Nambih nuhu bep vehuran ahe gonan tatmaluni go tamlepte bered.”
17Jisas teililngi apma ah ratti netwo. Muhleli i ni nuhu, “U apma, nagoah kamdi nesale sige goah kat bam gavinte bered nge? Gavak kamaluni vehuran ahe? Nomi vihnian nemba wulmetan. 18Birin metami mwidi masen gonani katba kita ut nga ini, bi dalingami mwatka ba katba rongo ut nga. Kamaluni gote ah 19nat wabwerawera bered bol kalim niah tarut tevata vakalim rat kani? Tei limalen goah rat kan sera ba kat songi watant kavih i riaknan hinak ah rat kani?” Rabep nuhu, “Tei watang tesangwul vepnan karu.” 20“Bi entorah nat wabwerawera bered bol telaviru, niah tarut tevata vakavet rat kani ba tei watang kavih ah kat songi i riaknan hinak ah rat kani?” Rabep mini nuhu, “Tei watang telaviru.” 21Muhleli i ni nuhu, “Gavak nagoah kat baililngi nwatwen nok vehuran nga?”
Jisas tevamwesa aji ah tei matbi
22Rat tepmabis li vini ah Betsaeda, ba ajini ramatkae aji mapma ben Jisas ah tei matbi. Bi ram uhleli i Jisas nuhu nemalngi ngan lin. 23Jisas mwatka nokon nagan aji nong bi matkae silik ini ban dini vini. Jisas mwegasu vale birin metan, bi malngi ngan lin, bi muhleli ini nuhu, “Komgit dihi ut io tebu?” 24Aji nong mwigit vamere bi bep nuhu, “Nam gita ajini, ba ram geni bujuka, ah ram rop.” 25Jisas mwiling mwetani ngan lin. Entorah aji nong tekit vamere bi birin metan mwegabis bi mwigit luhmwi ut. 26Jisas masro ban van vehuran tetkol bep mini nuhu, “Konba vantean li vini nong, ba komul bamul li vininam.”
Pita tevep seresere goah Jisas tei ni Kraes
27Jisas bi non tarutni ramamlu bi raban li vini ah Sisaria Pilipae. Entorah rat hural ban li hal ba Jisas muhleli i non tarutni nuhu, “Karu vep mini nana, tarutni rabihni nuhu nana itan?” 28Rabep mini nuhu, “Datngin rabep nuhu kik Jon Baptaes. Ba datngin rabep nuhu kik Elaeja. Ba datngin rabep nuhu kobi datngin ajinan dalen God.” 29Muhleli i ni nuhu, “Ba u gimi ba kabihni nuhu nana itan?” Pita balu ini bep nuhu, “Kik Kraes.”
30Jisas botani ni bep nuhu, “Kanba vep sereserete nanaan mini aji watwatnende ni.”
Jisas tedoptop nokon illan ah maneli, bi metenan
31Jisas bawo mwesesra non tarutni, bep mini ni nuhu, “Nana ah nambi Nujun Aji, ba nan rongo illan kawu lengleng, lemtan tarutni, bi ajinan salean le valin God. Bi goah ramabuhu Temwat ba ran varik nana. Ranih bamte nana, bi nan mat ba limalen goah ren kajil man ban ba nan dumre bamul dini mete vale masen.” 32Teleli vehuran nong temram tokol mini ni. Ba Pita mwegam leli nuhu nemadi goro Jisas. 33Tehu ba Jisas mwegarabukak bi mwigit vali non tarutni, mwidi goro Pita, bep nuhu, “Kovan dini nana, Setan, gonani nom vihnian ba bi vihnian nge non aji, teba kente vihnian nga non God.”
Gelnan tahkurunan Jisas
34Jisas mahu tarutmumu bi non tarutni mapma ben, bi bep mini ni nuhu, “Tigoah aji man doni nuhu man nepma jukuk, ba man bihni gabarak sera leut ah non, bi mweselkani non kawolwol bi mapma jukuk. 35Gonani tigoah aji ah man doni nuhu man bamwesa non masan, ba man bate bawora non masan. Ba u aji ah man bate non masan u nana bi nok dalek teraba, ba aji nanong man bamwesa non masan. 36Aji tebulong ah man lep sera leut at li uruu bi bate non masan uru. 37Tigoah non masan man gapma, ba man bamdi nga nuhu man ling lihi i masan terabwa. 38Nanong ba bibi taron goah tarutni ramleli lelian tekapma niah teba woswos nga lemtan God. Ba tigoah aji man bus i nana bi nok sesesrakan, ba nana niah nambi Nujun Aji ba nan bus ini entorah nan supmulma mini nok enjil niah rabi sangbak, bi le mamban nokon Tadat.”
Одоогоор Сонгогдсон:
Mak 8: APMA
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Published by the Bible Society of the South Pacific in 1977.