Mak 9
9
1Jisas bep mwetani nuhu, “Mwetaknga letlet nambep mini gimi, datngin ajini ramdi nadokah non ah ran baililngi gonga ah ran mat mulngan ah ran gita goah God man supmulma le mamban nokon bi mini rowoktegol.”
Mamjin Jisas telih
2Limalen goah ren telapaleh tevan, ba Jisas matkae Pita bi Jemes bi Jon, bi ram sak lirep, ut ah rat vanma nedi silik i ni dini datgnin tarutni. Goah ni kajil ah rat van jukun ratgam git ba ram gita goah mamjin Jisas mwilih mwegamui hal watnende. 3Nokon bwelan tei temramram bos bi tei tedapsisi. Aji tebulong li uruu ah batleli batdap tapmak. 4Goah ni kajil ram gita goah Elaeja nuru Moses ramru doptop mini Jisas. 5Pita modoptop, bep mini Jisas nuhu, “Sesesrakan, mwegabis nagoah tamdi dokah. Tekabis nuhu tamleli biribiri valkajil. Valim bi valin Moses bi valin Elaeja.” 6Tarut non Jisas ah ni kajil rat temtaji tokol gonong bi rat bamuililngi apma nga ah ramavep. 7Metmet mapma bi malngin morori ni. Dalekte mapma le metmet nong bep nuhu, “Mamjin Nujuk ahe namgaji bamte. Kanrongtak gololo.” 8Rat gam git mapma dalji ni ba rat bam gitate aji bwaleh nga, tegamui Jisas nge nihken tedi bee.
9Entorah rat supmulma dini ut lirep, ba Jisas maskani vehuran tetkol mini ni bep nuhu, “Kanba vepte apmaan i kat kita nong mini aji watwatnende ni, manei mulngan ngate ah nana niah nambi Nujun Aji nan dumre bamul dini mete.” 10Rat ioh li dalen Jisas ba rat gamdima nesale sige mapma mase, nuhu jumre bamulan dini mete ba meramnan ah nimbeh. 11Ram uhleli i Jisas nuhu, “Gavak nagoah, goah ramabuhu Temwat ba rabep nuhu Elaeja man nepma bawo?” 12Ba Jisas balu ini mini ni bep nuhu, “Mwetaknga nangate nagoah Elaeja man nepma bawo nemumumtani hal. Ba mwegai gavak nagoah ululan at mwate bep nuhu, ‘Nana ah nambi Nujun Aji ba naneli illan kawu lengleng, bi ran barik nana’? 13Nabep luhmwi mini gimi nuhu Elaeja tepmate, ba tarutni rat leli leut halkawu lengleng vanokon ah rat toni niah rat kapma, tedapmak luhmwi go naah ululan at mwate tevep.”
Jisas tevamwesa aji malgel ah loah tedi lelen
14Entorah rat mulma ben datngi ni ba ram gita tarutmumu ah ratti. Datngin goah rat wuhu Temwat ratti newalwalule mini datngin tarut non Jisas. 15Entorah rat kita Jisas ba rat tetkoh tokol ini, bi rat temtaji bos. Ramrop mapma ben bi rabep renmamak mini. 16Jisas muhleli i non tarutni nuhu, “Ani katti newalwalule mini ni u apma?”
17Aji le tarutmumu ah ratti balu ini bep nuhu, “Sesesrakan, natetkae nujuk mapma bem gonani loah mwidi lelen, bi tebaililngi vehuran nga. 18Entorah loah mapma lin, ba mweleli ba maiah vali tan, bi mamjin boswos bi mwididi liwon, bi bihon mapma wanbongon. Nat uhleli dopmi i non tarutni nuhu rama koro loah dini ba rat ba lelbwiri nga.” 19Jisas bep mini ni nuhu, “Ajini rah ramdok mwerani ba no vihni mwetakngaan tebulong tokol. Merapnan man geni apma nagoah nandok bemi, bi neselkani atnami? Karut kae aji havak nong mapma bek.”
20Ram matkae aji havak nong mapma ben, tei vilbwaleh entorah loah i tedi le aji havak nong tekita Jisas bi mweleli aji havak nong maiah vatavan bi matmul bi mamlil dobo li tan. Bihon baut wan bongon. 21Jisas muhleli i teman nuhu, “Loah tepma bawo le nujum ahe entorapma?” Teman balu ini bep nuhu, “Tepma bawo nge entorah tei havak. 22Tei vahalkawu lengleng nagoah tedok neleldopmi nuhu nema hi, tedok neleli bi maiah vali kaba, bi vale sileng. Kobeji gemarusi tigoah bwaremaru mandok nokom.”
23Jisas bep mini nuhu, “U apma ba kobep nuhu, ‘Tigoah kondoni ba kobeji gemaru’? Gonani aji ah bihni mwetaknga ba leut sera boswos mini.” 24Teman aji havak nong mwegaa bep nuhu, “Nok vihni mwetakngaan tedok ba tewep. Kobeji nana.”
25Jisas tekita goah tarutmumu rat tepma sasari basla bi bep tokol mini loah nong nuhu, “Kik loah dalingam bubuko, bi kot baililngi toptowan nga. Kovaut dini aji havak ahe, ah kon bamdian neban mwetak lelen tenangih.”
26Loah nong mwengaa bi mweleli mamjin aji havak nong boswos, bi baut dini. Rat gam gita nuhu tei temat. Tarut sera ah rat kita rat vep nuhu temat. 27Jisas matka nokon ngan aji havak nong bi mali vadumre.
28Limalen goah Jisas tevamwesa aji havik nong, bi ban bwih leval go. Entorah tegamdi ma nihken mini non tarutni ba ram uhleli ini nuhu, “Gavak nagoah rowoma tebulong u goah kama koro loah?” 29Jisas balu ini bep nuhu, “Tangroan nante ah maililngi go man goro loah ah tapmak ah, apma go temubulong.”
Jisas tedoptop mwetak nokon metenan
30Ramalngi ut iginan bi raban li datngin vinini ah Galili. Jisas teba doni tenga nuhu aji bateililngite ut ah tedi iginan, 31gonani tesesra non tarutni. Bep mini ni nuhu, “Nana niah nabi Nujun Aji ba ran neskani nana ban li ngan tarutni bi ran nehi nana, ba limalen goah ren kajil man ban, ba nandumre bamul vale masan.” 32Tevep tapmak ba rat ba rongdurute non sesesrakan nga. Ba nannga ba rat temtani goah ram uhleli ini.
Itan ah kawu tokol
33Rat tepmabis Kapaneam bi ramsak leval. Jisas muhleli i non tarutni nuhu, “Katwalwalule le apma entorah tatepma li hal?” 34Tehu ba ramdi ronga. Ba entorah rat tepma lihal ba rat walwalule le goah manei itan ah kawu reini. 35Jisas mwesadok tavan bi mahu non tarutni ah ni tesangwul vepnan karu mapma ben. Bep mini ni nuhu, “Aji rei gimi ah mandoni nuhu nemai ni kawu ba manepma i noknan, bi man gamui ajinan nomi uman.” 36Mweselkani aji havak bi mweleli mwidi boswos lemta. Malngi ngan dalji bi bep mini ni nuhu, 37“Ajinan ah maneli aji havak tapmak ahe le hak valeiman ba tapma gonge ah bateli nana bi aji ah tesro nana valeiman.”
Aji ah tebadi ngai maudu ba bibi nondo
38Jon bep mini Jisas nuhu, “Sesesrakan, kamat kita aji ah tekoro loah dini aji ah loah tedi lelen le ham. Ba kamatti goro gonani tebaite datngin nom tarut nga.” 39Jisas bep mini nuhu, “Kanba digoroan, gonani man bante alibe ba man bambehu gapkavak nga vanokok. 40Aji ah tebadi nga i maudu ba mwidi u go nuhu tan leli mweran mini aji nanong. 41Mwetaknga letlet nabep mini gimi, tigoah ajinan ah man neskani sileng mini kik bi komamni gonani kobi nok aji niah nabi Kraes ba aji nanong ba maneli gelnan.”
Halan kapmwaan ah mweleli aji maiah
42“Tigoah aji man leli ba aji le havakni rahe niah bihni mwetaknga nak maneiah li kapmwaan ba aji nanong ba man mat. Bat kabis ngate mini aji nanong nuhu rabat liko bwera vet nokon kawan bi rabasro leteh ut ah bwalken tebulong. Illan non aji nanong ba manetkol tokol. 43Tigo nuhu maun ngam man leli ba kon neiah li halan kapmwaan ba kodas rotvi. Tekabis ngate nagoah kobat wutdihi masan van maun ngam bwaleh, vali ngam ah karu niah bateli kik vale bwera kabarada. 44Gonani ut iginan ba uhlinan goah rat mat ba ran ba matmat nga. Bi kaba man ba sebwe nga. 45Bi tigoah maun wokom man leli ba koneiah li halan kapmwaan ba kodas rotvi. Tekabis ngate nagoah kobat wutdihi masan van maun wokom ah bwaleh vali wokom ah karu niah batleli ba rabat wohni kik le kabarada. 46Gonani ut iginan ba uhlinan goah rat mat ba ran ba matmat nga. Bi kaba man ba sebwe nga. 47Tigoah maun birin metam man leli ba koneiah li halan kapmwaan, ba kokikji baiang. Tekabis ngate nagoah kobat wutdihi ut kokon non God van maun metam ah bwaleh, vali goah kobat wonihan vale kabarada van metam ah karu. 48Gonani ut iginan ba uhlinan goah rat mat ba ran ba matmat nga. Bi kaba man ba sebwe nga. 49God man leldopmi ajini mini kaba tekeni goah mwedahkian na hinak i sol. 50Teh ba bi apma tekabis. Ba tigoah tebam gaka nga, ba aji tebu ah manmuleli ba man gaka mwetak. Karu leli ba teh nedi le gimi bi kam leli uterororong mwidi le gimi.”
Одоогоор Сонгогдсон:
Mak 9: APMA
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Published by the Bible Society of the South Pacific in 1977.