Samba Leko - 2007 - BSCAM NT Drama

Nouveau Testament en Samba Leko © Alliance Biblique du Cameroun, 1998. 

Zɔ̀ŋ aa Yéésù pìì Yeriko bìlə́ gə́, bít taà dàà bìlá. Yeriko bìlə́ rə, nɛ́ŋ váàndo nə́ŋ̀ wərà, nə́gə́l oò Zasse. Oòrə, nɛ́b ba'káám bə̀ ke'ǹ bəd gààrá, bít nɛ́d gbaŋə̀ bìá. Zasse sàà gabm̀bə̀ nɛ́ɛ̀réè kùmsə̀n Yéésù nɛ́b zùúm bəraa tə́ŋə́ gú. Zá oòrə, nɛ́ŋə̀ si' kə́ddo yée gə́, bán Yéésù bé'ǹmbə̀ sé. Kàanyée gə́, nùù ɛ̀m númú, kpaŋ̀ aa Yéésù dá bagǹ də ba. Dá na' kpùkulə́ nyìírú, í' Yéésù bé'ǹmbìá. Zɔ̀ŋ aa Yéésù dáá wə́ə́ téé nyìì aa Zasse na' rú rə dùù gə́, zá' ɛ̀g núù lɛgə́ gə́, bít bààù: «Zasse, ǹ náŋ sí, ǹ símà kə̀ báŋ báŋ! Nyà'aa yée mə́ sɛ̀ɛ́n ń da.»
Zasse kɔ̀ nɔ̀ŋ símà kə̀ báŋ, bít kè' yaà pááù oò yiilú, kə̀ sɛ̀ɛ́n oò kíin, kə̀ tɛ́m làmkèá. Nɛ́b aa bé' nɛɛ̀n aa Yéésù sím dú Zasse yiìl lə kóólé, bə̀ zòl bəd iná, kə̀ baànmbə̀: «Nɛ́ŋ Váàndo aa yée, ɛ̀m dá sím tə́ nɛ́d invaksə́ bə̀ ma'ǹ kàrú.»
Zasse ɛ̀m gbarà Yéésù númú gə́, bít bààù: «Ǹ zɛ̀ŋ túŋá Báátììkpɛ̀ŋá, má in bəraa mə́ kə̀ naà rə pɛdǹ tə́ŋtəŋú, má nɛ́b búúd bə̀ bəd piinàá; bít dáà zóó mə́ kè' nɛ́ŋə̀ ba' tə́ kə̀ gúsuúm gə́, káá máù bí'ǹ zɔ̀ŋ naara.»
Yéésù bààù: «Nyà'aa yóo, nɛ́b aa zɔ̀ŋə yiìl lə, Vɛnɛ́b pii bə̀ súúke yàá. Kàandə, nɛ́ŋ váàndo aa yée kɔ̀ Abraham wàà kàásá. Kə̀ aakíin də, nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə, yaà nɛ́b aa bə̀ bɔ̀bə́l lə saànmbìá, bít boò bə̀ súùnmbìá.»


Yéésù ɛ̀m sɛ̀ɛ́n kpaŋ̀, gbad yaà wə́ə́ Urusalima bìl kàd ba. Nɛ́b bəd tə́ù kíìn zɛŋàá. Nɛ́b zùúm bəd sèl bə̀ bàà nyà'aa Vɛnɛ́b gààd dáà kíìn yaànà záàn zɔ̀gɔ̀. Yéésù gám nɛ́b aa tə́ù zɛŋ̀ də nwɔŋ kə̀ zagəmú. Aa yée nwɔŋ aa Yéésù bàà roó: «Gààd kun nə́ŋ̀ zá' ɛ̀m zɔ̀ŋ bùúrá, yɛ́b nə́ŋ̀ ba, bɔ̀b gààd dáàn ləə̀nmbìá. Bòórú bə̀ lə́ə́ùwà gààrì gə́, dáà kid dáà kíìn bíràá. Bə́ŋ̀ dá ɛɛ̀m gə́, dɛ̀d àà nɛ́b tù' bə̀ ma'ǹ oò bəd kób, oò númú. Pii kóó nɛ́ɛ̀réè, ba' lɛ̀ɛ́ŋə̀ nə́ŋ̀, bít bàà bə̀: ‹Ìì lɛ́bà in bərá, bít gə́l ìì lɛ́b kúnú, bɔ̀b basaa rə oò tóó kúnú, bíd yaà máà wə́ə́ zé.›
«Zá nɛ́b oò yɛ́b bə bə̀ zèèù kúnú. Bə̀ tùm gbantumsə̀ bəd bòórú, bɔ̀b dá boò bàà gààd bəd gààd: ‹Obə́ gə́, bə́ í' nɛ́ŋə̀ aa oò ləə gààd obə́ yílə́ sí.›
«Bə̀ lə́ə́ùwà gààd gə́, bít kidbírà oò yɛ́b ba. Kàanyée gə́, dɛ̀rà nɛ́b tù' bə̀ ma'ǹ oò bəraa pii bə̀ ba' naà roó. Í' nɛ́b tù' bə̀ ma'ǹ oò bəd boò bàà bəǹ basaa bə̀ lɛ́b kə̀ in, bít gə́l bə̀ bɔ̀b yílə́ wərə̀ roó.
«Nɛ́d də̀gə̀ də̀gə̀ bə̀ yaà wə́ə́ gə́, bàà: ‹Gbàároá, lɛ́b gə́l mə́ bɔ̀b ba' lɛ̀ɛ́ŋə̀ kób, ba' lɛ̀ɛ́ŋə̀ nə́ŋ̀ aa ḿ pii mə́ rə rú.›
«Gààd bààù: ‹Ń kùmsə̀n nɛ́d tù' bə̀ ma'ǹ sɔ̀ɔ̀ná, ń kùm sína nɛ́d sɔ̀ɔ̀n in bɛ̀ŋ́sə̀ yɛbú yée gə́ roó. Kə̀ taàbìá, mə́ pii n taà kpɛŋsɛ́l, gààd ləə̀nmbə̀ bìl yíl kób yílú.›
«Nɛ́d iirúb aa bàg də yaà wə́ə́ gə́, bàà: ‹Gbàároá, lɛ́b gə́l mə́ bɔ̀bà ba' lɛ̀ɛ́ŋə̀ núnà, ba' lɛ̀ɛ́ŋə̀ nə́ŋ̀ aa ḿ pii mə́ rə rú.›
«Gààd bàà nɛ́d tù' bə̀ ma'ǹ aarə: ‹Ám kɔ̀ mə́ piìn kpɛŋsɛ́l gààd bə̀ ləə̀n yàá. Kə̀ taàbìá, mə́ pii n taà kpɛŋsɛ́l gààd bə̀ ləə̀n bìl yíl núnə̀ yílú.›
«Nɛ́d tù' bə̀ ma'ǹ toorúb də yaà wə́ə́ gə́, bàà: ‹Gbàároá, ǹ kè' ba' lɛ̀ɛ́ŋə̀ nə́ŋ̀ aa ḿ pii mə́ roó. Mə́ dàbə̀ gɔ̀sú, bít dá mə́ zígə̀ zɔ̀ŋ mə́'ke rú. Mə́ mà' kə̀ aakíin də, mə́ nùù də́dǹ kə̀ ám da. Kàandə, ám də, ń nɛ́ŋə̀ tɛ́m kpɛŋkéá. Ḿ pà' in aa ń zíg sə̀n gá roó, bít ń kɛ̀d in aa ń wùù sə̀n gá roó.›
«Gààd bààù: ‹Ń kùmsə̀n nɛ́d tù' bə̀ ma'ǹ vaksá. Máàn fágǹ kə̀ nwɔŋ aa vúg ám gú' bəroó. Ń gàb yàá, máá gə́, mə́ nɛ́ŋə̀ kpɛŋkéá. Pà' mə́ sáá in aa mə́ zíg sə̀n gá roó, bít mə́ kɛ̀d in aa mə́ wùù sə̀n gá roó. Kàandə, kə̀ níìbə̀ ɛ̀m dá ń zíg taà ba' mə́ wúl ba' bə̀ zígǹnú sín gú? Dáà ḿ mà'ì kə̀ aakíin gə́, sɛŋ aa máà bídǹnà bərə, yaà má ba' mə́ ke'ǹ kə̀ tɔ̀d tá.›
«Bít bàà nɛ́b aa pe' kə̀ oò tə́ rə, boò kè' ba' lɛ̀ɛ́ŋə̀ aa kə̀ naà roó, bít boò pii màn aa kə̀ ba' lɛ̀ɛ́ŋə̀ naà kób doó.
«Bə̀ bàà: ‹Zá gbàároá, tə́ kə̀ ba' lɛ̀ɛ́ŋə̀ ɔ̀d naà kób gbòód!›
«Gààd kè' í', bàà: ‹Mə́ tə́ ii kíìn baanàá, kóó nɛ́ɛ̀réè, tə́ kə̀ naà gə́, Vɛnɛ́b pii dáù ɔ̀d zəgàá. Zá màn aa kə̀ naà síndə, aa wàà aa kə̀ naà rə máá, Vɛnɛ́b nyá' dákíìn ke'nàá. Ɔ̀dmáàn mə́ bəraa ìì í' máà ləə gààd obənə́ yílə́ sí rə, ìì àà bà zɔ̀ŋə, bít yaà ìì lòd bə̀ zɔ̀ŋə máá númú.› »


Zɔ̀ŋ aa Yéésù nàà bɛ́' zagəm aa kàangə́, na' ɛ̀m boò númú, Urusalima bìlú. Zɔ̀ŋ aa ɛ̀m ìì gbarà Bɛdfaze kə̀ Betaniya, bìl bəraa pe' kə̀ kɔ̀l aa bə̀ dɛ̀d Oliva kɔ̀l lə kàd bə gə́, Yéésù tùm nɛ́b sáànmbə̀ oò bəd iirə númú, bàà bə̀: «Ìì ɛ̀m bìl aa obə́n númú yée rú. Màìgə́, ɛ̀m íí dáráàn piìn bìlə́ gə́, íí dáráàn bɔbm̀ bə̀ tab vɔɔmlə̀ wàà tə́ wərà, bə́ŋ̀ nɛ́ŋə̀ nə́ŋ̀má na' kùm bèrə̀ yílə́ sé. Ìì bìnə̀wà kúnú, bít ìì ààùwà zɔ̀ŋə máá sunú; bít nɛ́ŋə̀ nə́ŋ̀ dɛ̀riyì, kə̀ níìbə̀ íí tə́ù taà biìn gú gə́, ìì bààù Báátììkpɛ̀ŋ í' tə́ kúnú.»
Nɛ́b sáànmbə̀ bəraa iirə rə bə̀ ɛ̀m gə́, bít dá ìì bɔ̀b in gə́ kóólé, kìínmbə̀ nɛɛ̀n aa Yéésù bàà bə̀ rə kíin. Sɛŋ aa ìì tə́ vɔɔmlə̀ wàà biìn də, nɛ́b vɔɔmlə̀ wàà bə̀ bəd də dɛ̀d bə̀: «Kə̀ níìbə̀ íí tə́ taà vɔɔmlə̀ wàà aa biìn gú?»
Kè' bə̀ í': «Báátììkpɛ̀ŋ í' tə́ kúnú.»
Bítsɔ̀ŋ, bə̀ àà taà vɔɔmlə̀ wàà rə Yéésù sunú. Bə̀ wɔ̀d gɔ̀' boò bəd vɔɔmlə̀ wàà pɛŋú, bít bə̀ láŋ taà Yéésù na'ǹ kuùmbə̀ vɔɔmlə̀ wàà rə yílú. Nɛ́ɛ̀m Yéésù tə́ ɛɛ̀m gbadǹ vɔɔmlə̀ yílə́ gə́, nɛ́b bəd wɔ̀d gɔ̀' boò bəd kpaŋ̀ tɛ́mú, bɔ̀b oò bə̀ káŋ̀mbìá.
Sɛŋ aa ɛ̀m ìì tóò gbadǹnà Urusalima bìlə́ rə, ìì bàgà kpaŋ̀ aa símà Oliva kɔ̀l bəroó. Nɛ́b sáànmbə̀ bəd kóólé, bə̀ nyìì kə̀ tɛ́mlàmkèá. Bə̀ pìì Vɛnɛ́b káŋ̀mbìá, kə̀ kpə̀ə́ǹ páànmbə̀ lɛgú, inwulubə̀ bəraa ìì bé'à rə bòórú.
Bə̀ bàà bəd: «Vɛnɛ́b oò zíg gààraa tóò yaànà Báátììkpɛ̀ŋ nə́gə́lə́ rə nɛɛ̀n yílú! Tɛbə̀ gə́, tə́ lɛgə́ poú, bít kaŋsɛ́l kɔ̀, bə́ pii Vɛnɛ́b aa lɛgə́ paà roó!»
Farisa kam bəraa kùm nɛ́b zùúm tə́ŋə́ wərə̀ rə, bə̀ bàà Yéésù: «Nɛ̀ná, ǹ gám nɛ́b sáànmbə̀ ḿ bəd nwɔŋ kə̀ váàndoá, bɔ̀b boò tɛb kúnú!»
Yéésù kè' í' bə̀: «Mə́ tə́ ii kíìn baanàá, dáà nɛ́b aa yée bə̀ tɛbì gə́, bəŋ bəd dá kpə̀ə́ǹ kíìn páálàá, bɔ̀b oò bə̀ káŋ̀mbìá!»

Zɔ̀ŋ aa Yéésù ɛ̀m gbarà Urusalima bìl kàd ba, bít bé' bìl lə gə́, kpə̀ə̀ in, in aa dá taàn nɛ́b aa bìlə́ wərə̀ rə yílú roó; bít bàà: «Íí nɛ́b Urusalima bìlə́ bìá, mə́ í' ìì gàb kíin nyà'aa yóo, in bəraa dáiyà tɛbə̀ aànnà roó! Zá bə́ŋyée in aarə mə́'ì aí núùrú! Nyàm vaksə́ bəd dáà yaànà aí yílú. Ɔ̀dmáàn íí bəd láŋ bə̀ dá ii páàn tə́ŋú, kə̀ ság və̀'kèá, íí bán vúgǹmbə̀ gá. Bə̀ dá ii kíìn ləŋ̀ vəràá, bít bə̀ dá ii ti'ǹ kàd gə́ kóólé. Zìb bə̀ dá nɛ́b ḿ bəraa wərə̀ rə kíìn lodǹ bɛ́'ǹ kə̀ zɔ̀ŋtá. Bə̀ dá bìl kíìn láánàá, bít bə̀ dàà wúl bəŋ nə́ŋ̀má ləə ɔ̀d yílə́ gá. Kàandə, sèl ń gàb sɛŋ aa Vɛnɛ́b yaà láŋ̀ bərə sé!»


Yéésù dá pìì láŋsə́ wúuú, dá sɔ̀d nɛ́b dùm bə̀ gə́ə̀l bəd niŋ̀ sa'ǹmbìá, bít bàà bə̀: «Bád bə̀ dàà tə́ Núúboòd Gìdń bərú: ‹Wúl mə́ dá kuùm wúl aa nɛ́b bəd dá mə́ nyɛɛ̀m dú roó.› Zá aí gə́, pà' íí bí'ù vɔ̀g lib aa lííro bəd wál bə̀ sáá rú roó!»
Sɛŋ gə́ kóólé, Yéésù sán nɛ́b bəd in láŋsə́ wúuú. Láŋsə́ gààd bərá, nɛ̀n indaŋ̀mbə̀ bərá, kə̀ nɛ́b gbàád yíl bə̀ bəd tá, bə̀ sàà Yéésù ko'ǹ lo'ǹmbìá. Zá ìì gàb nɛɛ̀n aa ìì dáù báàn ko'ǹmbə̀ rú rə sé. Kàandə, nɛ́b bəd kóólé, bə̀ zɛ̀ŋ Yéésù nwɔŋ bə̀ dàà bə sé. Bə̀ í' nwɔŋ nə́ŋ̀má bɔ̀'ǹmbə̀ rú wərə̀ sé.

ऐका Luka 19