If you have would like a copy of this version please contact info@davarpartners.org

Pahari Mahasu New Testament, CC-BY-SA-4.0, The Love Fellowship (Text), Pahari Mahasu New Testament Audio Bible, CC-BY-SA-4.0, Davar Partners International, 2021 (Audio)

Pahari Mahasu New Testament

This work is licensed under Creative Commons Attribution-ShareAlike 4.0 License.

पुरै संसार चाणनै कु पैहलै वचन थौ, और वचन परमेश्‍वरा आइलै थौ, और वचन ई परमेश्‍वर थौ। एऊ ई पैहलै परमेश्‍वरा आइलै थौ। परमेश्‍वरै सारौ कुछ़ तेसी कौरी चाणौ, ज़ो कुछ़ हुऔ आ तिऊं मांझ़िआ कु केज़ी भी च़िज़ै तेसरै बगैर नाईं हुई। सेऊ सारी ज़िन्दगी रौ मूल़ आ और सेऊ आ ज़ुण सारै लोगु लै प्याशौ दिआ आ। प्याशौ न्यारै दी च़ौमका आ, और न्यारै सेऊ नाईं इशाऔ। परमेश्‍वरै एक आदमी भेज़ौ ज़ासरौ नाऊं यहुन्ना थौ। सेऊ एथीलै आशौ कि प्याशै री गवाही दिआ, ताकी सारै तेसरी गवाही कौरी तेस प्याशै माथै विश्वास कौरा। यहुन्ना आपु ता सेज़ौ प्याशौ नाईं थौ, पर सेऊ सेज़ै प्याशै री गवाही दैंदै आशौ थौ।
सौच़्च़ौ प्याशौ ज़ुण हर एक आदमी प्याशलौ कौरा सा, सेऊ दुनिया रै लोगु मांझ़िऐ पौगड़ौ हुणै वाल़ौ थौ सेऊ दुनिया दी थौ, पुरी दुनिया तेसी कु हुई, पर दुनिया रै लोगुऐ सेऊ नाईं रवावौ। सेऊ आपणै लोगु काऐ आशौ पर तेसरै आपणै लोगुऐ सेऊ नाईं अपणाऔ। पर ज़ुणिऐ सेऊ अपणाऔ, तिउंकै तिणीऐ परमेश्‍वरा री सन्तान हुणै रौ हक्क दैऔ, तिउंकै भी ज़ुण तेस माथै विश्वास छ़ाड़ाई। सै ना ता आपणै मां-बाबा कु, ना शरीरा री मौरज़ी कु, ना आदमी री मौरज़ी कु, पर परमेश्‍वरा कु पैदै हुऐ ई।
और वचन आदमी बौणौ। बौड़ी दया और सौच़्च़ाई कु भरपूर हुईऔ आमु मांझ़िऐ वास कियौ, और आमुऐ तेसरी इणी महिमा देखी, ज़िणी बाबा रै एकलौतै री बौड़ाई। यहुन्नै तेसरै बारै दी गवाही देई, और हाका देइऔ बोलौ, “एऊ सेज़ौ आ, ज़ासरै बारै दी मुंइऐ बोलौ की ज़ुण मुं बासिऐ आशा आ, सेऊ मुकु भी बौड़ौ आ, कैलैकि सेऊ मुकु पैहलै थौ।” कैलैकि तेसरी भरपुरी कौरी आमु सौभी माथै बौड़ी दया मिली। एथीलै कि नियम ता मुसा रै ई दैऔ ऐन्दै, पर परमेश्‍वरै बौड़ी दया और सौच़्च़ाई यीशु मसीह रै ज़ौरिऐ देखा ई। परमेश्‍वर कोइऐ केबी नाईं देखौ, सिरफ एकलौतौ छ़ोहरु ज़ुण आपु ई परमेश्‍वर आ और बाबा री उंगाल़ी दी आ, तिणीऐ परमेश्‍वर पौगड़ौ कियौ।


यहुन्ना री गवाही एज़ी आ, कि ज़ेबी यहुदिऊ रै मुख्यै लोगुऐ यरुशलेमा कु याजक और लेवी तेसकु इणौ पुछ़णा लै भेज़ै, “कि तू कुण ई?” तैबै तिणीऐ सौच़्च़ौ बोलौ, “हाऊं मसीह नाईं ऊ।” तैबै तिंउऐ तेसकु पुछ़ौ, “तैबै तू कुण ई? का तू एलियाह भविष्यवक्ता ई?” तिणीऐ बोलौ, “हाऊं नाईं ऊ।” “तैबै का तू भविष्यवक्ता ई?” तिणीऐ ज़वाब दैऔ, “नाईं।” तैबै तिंउऐ तेसकु पुछ़ौ, “तैबै तू कुण ई? ताकी आमै आपणै भेज़णै वाल़ेऊ कै ज़वाब दैऔ।” तू आपणै बारै दी का बोलाई? यहुन्नै यशायाह भविष्यवक्ता रै लिखै औन्दै वचना रै ज़ौरिऐ बोलौ, कि “हाऊं शुनशान ज़ागाह दी एक आदमी री हाक ऊ, प्रभु कालै आशणा लै बाट त्यार कौरौ, ज़ो बिल्कुल साफ और सिधी आ।”
सै फरीसीउ री तरफा कु थै भेज़ै औन्दै। तिंउऐ तेसकु एज़ौ सवाल पुछ़ौ, “अगर तू मसीह नाईं ई, और ना एलियाह आसतौ, ना सेज़ौ भविष्यवक्ता, तैबै बपतिस्मौ कैलै दिआई?” यहुन्नै तिउंलै ज़वाब दैऔ, “हाऊं ता पाणी कौरी बपतिस्मौ दिआऊ पर तुमु मांझ़िऐ एक आदमी खौड़ौ आ ज़ास तुमै नाईं ज़ाणदै। ज़ुण मुं बासिऐ आशणै वाल़ौ आ, ज़ासरै बुटा रै हाऊं तसमै खोलणै रै लाईक भी नाईं।” एज़ी बुशै यरदन नौईं पारभिलै बैतनिय्याह गांवा दी हुई, ज़िऐ यहुन्ना बपतिस्मौ दिया थौ।

दुजै दिनै तिणीऐ यीशु आपु भिलै आशदै देखीयौ बोलौ, “देखौ, एऊ परमेश्‍वरा रौ च़ेल़टु आ ज़ुण आपु बौल़ी हुइयौ धौतरी रै पाप उठाइयौ नियां सा। एऊ सेऊ आ, ज़ासरै बारै दी मुंइऐ बोलौ थौ, ‘कि एक मौरद मुं पिछ़ु आशा आ ज़ुण मुकु भी बौड़ौ सा, कैलैकि सेऊ मुकु भी पैहलै थौ।’ हाऊं ता तेस ज़ाणा भी नाईं थौ कि सेऊ मसीही आ, पर एथीलै हाऊं पाणी कौरी बपतिस्मौ दैंदै लागौ औन्दौ कि सेऊ इस्राइला माथै पौगड़ौ हुआ।” और यहुन्नै एज़ी गवाही देई, “कि मुंइऐ आत्मा कबुतरा ज़िणी सौरगा कु उतुरदै देखी आ, और सै तेस माथै रुकी गोई। हाऊं ता तेस नाईं रवावा थौ, पर ज़ुणिऐ हाऊं पाणी कौरी बपतिस्मौ दैंदै भेज़ौ ऊ, तिणीऐ मुलै बोलौ, ‘ज़ास माथै तू आत्मा उतुरदै और रुकदै देखा लौ, सेऊ पवित्र आत्मा कौरी वपतिस्मा दैणै वाल़ौ आ।’ मुंइऐ सेऊ देखौ, और तुमुकै सौच़्च़ौ बोलौ आ कि एऊ परमेश्‍वरा रौ छ़ोहरु आ।”

दुजै दिनै तौंइऐ यहुन्ना और तेसरै च़ेलेऊ मांझ़िया कु दुई ज़ौणै खौड़ै थै हुऐ औन्दै, और तिणीऐ यीशु ज़ुण डेउंदै थौ लागौ औन्दौ, देखीयौ बोलौ, “देखौ, एऊ परमेश्‍वरा रौ च़ेल़टु आ।” तैबै सै दुई च़ेलै तेसरी इणी बुशै शुणियौ यीशु पिछु च़ाल पौड़ै। यीशुऐ सै मुड़ियौ पिछ़ाड़िऐ आशदै देखै और तिउंलै बोलौ, “तुमै कास लोड़दै ई लागै औन्दै?” तिंउऐ तेसलै बोलौ, “ओ गुरु, तू कियै रौआ ई?” यीशुऐ तिउंलै बोलौ, “च़ालौ, पोरु देखौ।” तैबै तिंउऐ डेइयौ तेसरी रौइणै री ज़ागाह देखी, और सेज़ै दिनै तेसीई आइलै रौऐ। कैलैकि ब्याल़कै लगभग च़ार बाज़ी गौऐ थै।
तिऊं दुई मांझिया कु, ज़ुण यहुन्ना री बुशै शुणियौ यीशु पिछ़ु आशै थै, एक शमौन पतरसा रौ भाई आन्द्रियास थौ। तिणीऐ पैहलै आपणै सगै भाई शमौना कु मिलियौ तेसलै बोलौ, “आमुकै ख्रिस्ट, या मसीह, मिली गौ आ।” तिणीऐ सेऊ यीशु काऐ नियौं। यीशुऐ तेस देखीयौ बोलौ, “तू यहुन्ना रौ छ़ोहरु शमौन ई, ताउंलै कैफा बोलाई,” या पतरस ज़ेथरौ मतलब पात्थर आ।

दुजै दिनै यीशुऐ सुंच़ी गौ आ कि हाऊं गलील परदेशा लै डिआऊ। सेऊ फिलिप्पुसा कु मिलौ और बोलौ, “मुं पिछ़ु हांड।” फिलिप्पुस, आन्द्रियास और पतरसा रै इलाकै बैतसैदा रौ रौइणै वाल़ौ थौ। फिलिप्पुस नतनएला कु मिलौ और तेसलै बोलौ, “ज़ासरै बारै दी मुसा भविष्यवक्तुऐ पवित्रशास्त्रा दी और भविष्यवक्तुऐ बोलौ आ, सेऊ आमुकै मिली गौ आ। सेऊ युसुफा रौ छ़ोहरु, यीशु नासरी आ।” नतनएलै तेसलै बोलौ, “का कोई आच़्छ़ी च़ीज़ भी नासरता कु निकल़ा आ?” फिलिप्पुसै तेसलै बोलौ, “च़ालियौ देख।” यीशुऐ नतनएल आपु भिलै आशदै देखीयौ, तेसरै बारै दी बोलौ, “देखौ, एऊ पाकौ इस्राइली आ, एसदी कोई कपट नाईं।” नतनएलै तेसलै बोलौ, “तू मुं किणै कौरीऐ ज़ाणाई?” यीशुऐ तेसलै ज़वाब दैऔ, “एथकु पैहलै कि फिलिप्पुसे तू औटाऔ, ज़ेबी तू फेड़ु रै पेड़ा थालै थौ, तेबी मुंइऐ तू देखौ ई।” नतनएलै तेसलै ज़वाब दैऔ, “ओ गुरु, तू परमेश्‍वरा रौ छ़ोहरु ई। तू इस्राइला रौ महाराज़ौ ई।” यीशुऐ तेसलै ज़वाब दैऔ, “मुंइऐ ज़ो कुछ़ ताऊं लै बोलौ कि मुंइऐ तू फेड़ु रै पेड़ा थालिऐ देखोई, का तू तैबै कौरा ई विश्वास? तू एथकु भी बौड़ै-बौड़ै काम देखा ई।” यीशुऐ तौंइऐ बोलौ, “हाऊं तुमुलै सौच़्च़ौ-सौच़्च़ौ बोलाऊ कि तुमै सौरग खुलौ औन्दौ, और परमेश्‍वरा रै सौरगदूतु मुं आदमी रै छ़ोहरु माथै उतुरदै और उपरै डेउंदै देखा ई।”

ऐका यहुन्ना 1