If you have would like a copy of this version please contact info@davarpartners.org

Bareli Pauri New Testament, CC-BY-SA-4.0, Friends Missionary Prayer Band (Text), Bareli Pauri New Testament Audio Bible, CC-BY-SA-4.0, Davar Partners International, Bridge Connectivity Solutions, 2022 (Audio).

Bareli Pauri New Testament

Bareli Pauri New Testament (TLF)

Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.

हिमी हेरोद राजान दाहळामा जेतार यहुदिया बेथलेहेममा येसुन जन्मो होयो, ती उगेवने भूनी गोथा ग्यानी यरुशलेममा आवीन पुछने बाज गोया, यहुदिन राजा जेरो जन्मो होयलो छे, कां छे? काहाकि आमुक पूरब मा तेरु तारू देखला छे एने तीनाक नोमोन कोरने आव रोया. यो सोमवीन हेरोद राजा एने तेरे साते आखो यरुशलेम वावा घाबराय गोया. तेत्यार चू माणसोन आखा प्रधान पुजारू काजे एने डायलु पुजारा काजे एखठा कोरीन तीनु काजे पुछु, मसिहन जन्मो कां होयनो जुवे? चे तीनाक कोया, यहुदियान बेथलेहेममा, काहाकि भविष्य कोरतान लारे यो लिखायलो छे.
“हे बेथलेहेम, तू यु यहुदान देसमा छे, तू काहनाबी रितीसी यहुदियान होकमा गोथू नानू नि होय; काहाकि तारेमा गोथू एक अधिकारी निकवसे, जू मारी प्रजा इस्राईलोन राखवावी कोरसे.” तेत्यार हेरोद ग्यानी माणसो काजे मोनेन बुलावीन तीनु काजे पुछु कि तारू काहने टेम देखायलु होतु, एने चू यो कोयीन तीनुक बेथलेहेममा मूकल्यु, जावू, तीना पुऱ्यान बारामा खोरो-खोरो मालूम कोरु एने जेतार चू जोळ जाय ती मेसेक खोबर आपु काहाकि मे बी आवीन तीनाक नोमोन कोरिस. चे राजान वात सोमवीन जात रोया, एने जू तारू चे पूरब मा देखला होता चू तिंदरे ओगो-ओगोव चाल्यू; एने जां बावो होतो तिना जागा पोर पुगीण उबरोय गोयू. तीना ताराक देखीन चे घोना खुश होय गोया. चे तीना ढूरोन वाळामा पुगीण तिना बावा काजे तेरी आया मरीयमोन साते देख्या, एने उबळू पोडीन येसु काजे नोमोन कोऱ्या, एने आपना-थोयल्या छुळीन तीनाक सोनो, एने लोबान, एने गंधरस भेट चोळाव्या. तेत्यार सोपनामा यो जोताळ्यो कि हेरोदोन चा पोछा झुन जाता, चे दिसरे वाट्ये आपना देसोमा जात रोया.

चे जाणेन ओवतेन प्रभून एक दूत सोपनामा युसूफ काजे देखाय पोळ्यु ने कोयू, उठ, इना पुऱ्या काजे एने तेरी आया काजे लीन मिसर देसोमा ढास जा; एने जेतार तोक मी तुसे काजे नि कोयो, तेत्यार तोक चांत रोयजी; काहाकि हेरोद इना पुऱ्या काजे हेरने वावु छे माराय देसे. तेत्यार तीनेत राती उठीन पुऱ्या काजे एने तेरी आया काजे लीन मिसरमा जात रोया. एने हेरोदोन माणसे तोक चांत रोया इनान कोरता कि चो वचन जो प्रभू भविष्य कोरतान लारे कोवायलो होतो पुरो होयो मे आपना पुऱ्या काजे मिसरमा गोथू बुलावलू छे.

जेतार हेरोद यो देख्यू, कि ग्यानी माणसे तेरे साते धुकू कोरला छे, तेत्यार चू रीसवाय गोयू, एने सिपायळा काजे मुकलीन ग्यानीन लारे खोरो-खोरो देखाळ देदला तिनी टेमोन अनसारे बेथलेहेम एने तेरे आस-पासोन जागान पुऱ्या काजे जे दुय सालोन एने तीनु गोथा नाना होता, माराव देदू. तेत्यार जो वचन यीर्मया भविष्य कोरतान लारे कोयलो होतो, चो पुरो होय गोयो.
रामाहमा एक दुखोन ओवाज सोमवायू,
रोडनो एने घोनो मोटो दुख,
राहेल तेरा पुऱ्यान कोरीन रोड रोयी होती,
एने हुग रोयती नि होती, काहाकि चू हिमी नि रोयु.

हेरोदोन मोरनेन ओवतेन, प्रभून दूत मिसरमा युसूफ काजे सोपनामा देखायीन कोयु, “उठ पुऱ्याक एने तेरी आया काजे लीन इस्राईल देसोमा जात रोय, काहाकि बावान जीव लेणे कोरता होता, चे मोर गोयला छे.” युसूफ उठ्यू एने तेरी आया मरीया काजे पुठी लीन इस्राईल देसोमा आव्यु. बाकीन यो सोमवीन कि अरखिलाउस आपना पुऱ्यान हेरोदोसोन जागे यहुदिया पोर राज कोरणे बाज रोयू, युसूफ चा जाणे बिह्यु एने सोपनामा परमेश्वरोन कोयनो सोमवीन गलील प्रदेशमा जात रोयू. एने नासरेथ नावोन सोहोरोमा जाय लाग्यू, काहाकि चो वचन पुरो होये, जो भविष्य कोरतान लारे कोवायलो होतो, चू नासुरी कोवायसे.

ऐका मत्ती 2