Matayu 18
18
Qeli Gege Togon Mat Kotino Maŋo Suwaine Okanmaike?
1Naso yewao dokoine eŋe Yesu wano sariu paki, olale rakoi, “Ŋedannom desikene, maŋo natne yuwan-one more qeli gege togon mat kotino suwaine okanmaike?”
2Rau, Yesu eŋe medep nigatne mane oraki sariki birakaki kaiteno okorake. 3Paki edange, “Iwa rawe detpi! ŋine qeinge more, medep nigatne iwa eŋane kop mi okangeiwo, yemo ŋine qeli gege togon mat kotino mi wakesikei. 4Qeli gege togon mat kotino suwaine gege wane, yemo mane eŋe oŋomka ket more, ketkele medep nigatne iwa wane rokop geyakeŋo suwaine okaniyake. 5So mane eŋe naŋane eŋet biŋeknane raki paki, medep nigatne iwa eŋe yale eya ora teba-kayake, eŋe na yalewaka nora teba-naniyake.”
Borikinane Liwe Liwek
6“Mane eŋe medep nigatne iwa eŋe mali malipene naŋano motpi pamaike, eya ŋinane keuwo ŋine medep mane borikine mayakane sorin-kaki, mali malipine naŋano eya kitare more, borikine mayakeo, yemo ŋei yewa eŋe maine yaben mane suwaine ebino qeu kiki lukkau paki, rupapkau kiwetko ket siukki rap, yemo menaŋgi rap. 7Yai, kepe iwa wane ŋei eŋe ŋei ŋerep borikine makei wane sorin-on okanmami, eŋe daleo okangei? Kine kine yaline eya baŋ naso baŋem wakoniyake, ŋo mane eŋe borikine yaline eya sorin-ongi makei, ŋo eŋe baŋ daleo okaniyake? Eŋe maine baŋ siukeyake me?
8“Ge meteŋoneŋo me kiyeŋoneŋo waraŋ-gangi ari borikine maneo rasukeneo, yemo eya kitare more biranom ariyake! Ge gege togon matko yemo kiyeŋone so meteŋone midaine maine waketkene, ŋo meteretke ŋone so kiyeretke ŋone weneŋ sot korop magekeneo, yemo sora gerep papa togon yewao birau ketnom gaeyake. 9So geŋone deŋoneŋo borikine makenane simile wetŋono mosiyakeo, ge qepitike bira-onnom yeine ariyake! Eyamo maine, ge mo gege togon matko deŋone weku eyaŋoka wakesikene, ŋo deŋone etkeka sot weneŋ epu gekene, yemo ge baŋ biraganbi gerep sora togole ze pamaike, eyao ketnom gaeyake.”
Lama Siukke Eya Wane Don Naŋengo Rake
10“Na don welekatne ŋidanbe detpi, ŋine kauluke more, medep nigatne kopne iwa eŋane mane detpi ketkele misuk okaniyake, onoka wane eŋane aŋelokopene eŋe weti qeliwo gemami, eŋe naso baŋem Magane qeliwo gemaike, eŋane kaitko ge okanmami, wane ŋine eŋe maine mi mauluk-onbi, yemo aŋelokopene eŋe ŋine wikile ŋibonikei. 11Ŋei Wawainane Gipole eŋe lama siukkoi, eya zuwaŋ-one ebuyakane ketke.”
12“Ŋine eya wane detmami ŋei mane eŋe lamakoune 100 okorakei eya eŋano ŋine mane siukki, eŋe daleo okaniyake? Eŋe dere mezet okane more qeliŋ-ongi, lamakoune 99 eya meŋo rere ŋino ŋaraene ne geu, eŋe ari lamaine mane siukike, eya wane zuwaŋ-kayake. 13Na welekatne ŋidanbe detpi, eŋe zuwaŋ-lukmage marat-kayake, paki eŋe lamakoune 99 eŋane mi detmaike, wekuwa siukike, eŋane wet pese suwaine desiyake. 14Numa weku yewaka, Magaŋine qeliwo gemaike, eŋe nigatnekoune iwa ŋinano ŋine maneŋo mane siukeyakane mi simin-kamaike.”
Kima Mane Sot Okangi, Makoboe-kaikene
15“Ge kimaŋone maneŋo geŋano sot okangi, ge eŋano arinom paki, sotine eya sikan-kakene. Ŋo siluŋ ŋire ŋiritneka bonepŋitne okangeik, eŋe olatnom donŋone detmaikeo, yemo ge kimaŋone eya mo mainka numa maino bira-kamaine. 16Ŋo eŋe donŋone mi desiyakeo, yemo ge ŋei weku me etke epunom ererop weneŋ ari kineine detkau paki, ŋei etke me kareweŋo don ra makoboe okangei. 17Ŋo eŋe eŋane don mane mi desiyakeo, yemo doku tau tau magu kineine edanikene, paki eŋe doku tau tau magu eŋano birakaikene. Paki eŋe eŋane don mi desiyakeo, yemo detkau, eŋe ŋei lobo mane so takis borikine mama mane sot korop okaniyake.”
Kaisale Eŋe Doku Tau Tau Magu Eŋane Keuwo Gemaike
18“Eso na rawe korop detpi, ŋine yeye kine kine korop kepeo iwa rawetkeu, Kaisaleŋo qeliwo yalewaka rawot-keyake, ŋo yeye kine kine kepeo iwa rakokeu, Kaisaleŋo qeliwo yalewaka rakokeyake.
19“So na mane takotke rawe detpi, ŋire ŋei etkeŋo yeye mane wane ra more, wetŋitne weku more meŋen-kauk, Magane qeliwo gemaike, eŋe baŋ ŋiponiyake. 20Ŋei etke me karewe eŋe naŋane eŋet biŋeknane rau paki, wekuwoka qeturaŋ ge metpi, na weneŋ yewa eŋerop eŋane keuweno metkale.”
Qelit Ŋei Sotkorop Eŋane Don Naŋengo Rake
21Yesu eŋe don yale raki Petoroŋo Yesu wano sariki paki, qesonka rake, “Waom, nolatnom desikale, naŋane kimane eŋe atak loutne borikine okan-nangi, na maine turuŋine atak darap qeliŋgale? Na maine atak sewen sot turuŋine qeliŋgale?”
22Yesuŋo olale rake, “Mida, atak sewen midaka, ŋo siluŋ sewenti magu sewen yale qelige mangene, 23onoka wane qeli gege togon wane numa eya yemo, ŋei Waom mane oŋo qelit ŋeikoune eŋine sotaene makokkei wane lolike kake, eya wane rokop. 24Eŋe lolike kayakane kiyekki, eyaka qelit ŋei mane ma sarikoi, oŋo 10 milion kina eŋane waom wane biŋek yale omakake. 25Wane qelit ŋei eya eŋe wesi mane mi magekane, sotaine eya mi qoleke, eso ŋei waomine eŋe raki, eŋe qelit qeqe mane yale, eŋine so ŋanomine, so medewekoune, so yeye kine kineine korop mageke, eya ŋei ebongi, eŋe wesi manbi sotaine eya qeyakane olatke. 26Olatki, qelit ŋei waominane kino wawetine qeki paki rake, ‘Ge naŋane wetŋone boriki, qeliŋ-nannom, na baŋ korop sotane makok warekale!’ 27Raki, ŋei waom eŋe wetine boriki, sotaine eya yeine qeliŋgi paki, ŋei birakaki arike.
28“Eso qelit qeqe ŋei yewa, eŋe ariki paki qelit ŋei kimaine mane wesimde ewekine 100 kina yale oma-kake, eŋe marat-kake. Marat-kaki paki, malipka more, ebine maguloke rake, ‘Ge naŋane wesi neu makone, eya wane sota eya koso turuŋine qole-nanikene!’ 29Raki qelit ŋei kimaine eŋe umi ket more olale rake, ‘Ge naŋane wetŋone boriki qeligenom, na baŋ sotaŋone eya mainge qole-gangale!’ 30Ŋo eŋe siluŋ don raki dere mi loloŋ-kake, eya wane turuŋine yemo eŋe mulap urumgo birakake, eya mere sotaine eya mainge qoleka-wareki qoeki sa kesiyakane. 31Qelit ŋei kimakoune eŋe tanik yewa okangi, kau borike, paki ari ŋei waomene eya donkisi korop olat-warekoi. 32Eso ŋei waom eŋe qelit ŋei oraki sari saketki olale rake, ‘Ge qelit ŋei borikine sot korop! Ge naŋano ŋine wesi suwaine oma nan-gone, wane na turuŋone qeligewe paki sese-ganile, kine onoka wane goŋom nolatnom mo na loloŋ-ganile. 33Ge qelit ŋei kimaŋonane wetŋone boriki loloŋ-ganile yale, mi okankene’ 34Yale ra more sotine osiki qelit ŋei eya birakaki, mulap urumgo wikile mane makoboe kakeiwane waketke, eya mere sotaine eya korop makok wareki qoeki, sakesiyakane.”
35Pakiso Yesuŋo don iwa yale raki qoeke, “Ŋine wetŋineŋo kimakopŋine eŋane sot turuŋene mi qeliŋgeiwo, yemo Magane qeliwo gemaike, eŋe masi tanik yelewaka, eyaŋine weku weku baŋ okan-ŋuniyake.”
सध्या निवडलेले:
Matayu 18: onsNT
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2012, Wycliffe Bible Translators, Inc. All rights reserved.