Mareko 4
4
Ŋei Maneŋo Euwo Waet Ebotmaike Eŋane Don Rokop
1Pakimo, Yesu eŋe koso kito ebo ebon urataine takotke more, Galili doku namuŋ wane qalakino ŋei ŋerep kito ebonge. Pakiso ŋei ŋerep zok tego suwaineŋo sari eŋano manerop lewage more watke Yesu lolikkau eŋe kepo qelige ari seki mane kutno wa more ŋei ŋerep biraone weti toe namugo wa eŋineka metke. Metkiso, ŋei ŋerep magu eŋe qalakino lewage okorakoi. 2Eŋe yalewa okorau, Yesu eŋe don rokop mane kito more edane rake, 3“Ŋine detpi! Ŋei mane eŋe euwo wit ebosiyakane arike. 4Eŋe wit woune natne euwo ebotke, pakimo, natne ari numao kito metki naŋi edo sari nekoi. 5Woune natne ari kepe wesi tabilainerop kepe ewekine yewa wane kutno ket kito ikopka poripke wiyekoi. 6Wane kaiwe suwaine sa more wit komine yewa ezoke. Ŋodoene yewa qei mi ketlukke kepe wesi tabilainerop eya wane komine ururuke seukkoi. 7Wit woune natne touk okolerop eya wane koto ket kitokoi. Wane touk okolerop yewaŋo ikop wiye more pise walip onge. Walip ongiso, wit wele maine mi qekoi. 8Ŋo, wit woune natne kepe gukinerop yewao ket kitokoi. Ket kito more, komine poripke suwa more wele maine qekoi. Wele natne 30, natne edo 60, natne edo zok 100 yaline qekoi.”
9Eya wane Yesu eŋe edange, “Ŋei me ŋerep mane eŋe ketineropŋo yemo don iwa dere malipka more, kine detlukkayake.”
Don Rokop Wane Masi
10Ŋei ŋerep magu suwaine eŋe biraone ari warekoi, naso yewao Yesu eŋineka metki, eŋine dokoine 12 eŋe so ŋei natne mo Yesurop weneŋ ge okangoi, eŋe Yesu wane don raki detkakoi, eya wane eŋano sari qesonka rakoi, “Ge don rokop more rene eya ra qelaŋane ŋedannom detŋem.” 11Yesu eŋe mainge rake, “Kaisaleŋo don sanine so qeli ewe zonominane kine so ŋine dalino ware ŋunmaike, na ŋine eya desikei wane ŋidanmaile. Ŋei ŋerep natne ŋadino gemami eŋe naŋane don, eya don rokopkoka kito more edan edan wane raraine, eya wane rokop na korop kito edanbe, eŋe detwaremami. 12Yalewa wane,
‘Eŋe deeneŋo kaikei, ŋo, eŋe kine kine maine mi kau qelaŋaniyake. Eŋe keteneŋo maine desikei, ŋo, eŋe kine maine mi detlukkei, so wetene mi maingeu, sotene pa eboniyake. Eya wane eŋe wet maingeu, Kaisaleŋo eŋane sot qeliŋgi siukeyake.’ ”
Yesu Eŋe Wit Woune Ebo Ebot Wane Donkisi Kine Ra Qelaŋange.
13Pakiso, Yesu eŋe qeson-one rake, “Ŋine don rokop kito more rele, yewa koso maine weneŋ detlukkamami me? Pakimo, ŋine don rokop korop yewa wane kine dalino det lukkaikei? 14Ŋei wit woune ebotmaike, eya eŋe Kaisale wane don oŋom ebotmaike. 15Woune natne dumao ket kitoke, eya yemo ŋei ŋerep natne eŋe Kaisale wane don detpi, kotoeno ketki, nasomde bamgoka, Ŋei Borikine eŋe sari Kaisale wane don eya ŋei ŋerep natne eŋane kotoeno yasoke, eya ma biraki saket ariyake. 16Woune natne kepe kutka, wesi tabila weneŋ, eya wane kutno ket kitoke, eyamo ŋei ŋerep natne eŋe Kaisale wane don ikop dere ma more bakom kitokei. 17Ŋo, eŋe ŋodine qeirop mi ket ma qotke mesiyake. Eŋe kutka metki, ŋaba edo kisi maep wane umat natne wikilerop ebonbi, eŋe koso Kaisale ŋadekkaikei. 18Woune natne eŋe touk okolerop eya wane keuno ket kitokoi, eyamo ŋei ŋerep natne eŋe Kaisale wane don detkoi. 19Ŋo, kepe kutno gege wane umat so wesi aboŋ suwaine maratka maratka, so kine kine natne, eya wane bailalaŋ, eyaŋo ŋei ŋerep eŋane kotoeno waket more, Kaisale wane don kotoeno piseka more ma qorokka more, ma pelek kaki siukke, eya wane wele maine mi qekoi. 20Ŋo woune natne eŋe kepe kelokine-rop eyao ket kitokoi, eyamo ŋei ŋerep natne eŋe Kaisale wane don dere more malipka lukeu paki, ma qotkakoi. Eya wane eŋe wele maine qekoi, eya mo wele natne 30, natne 60, natne 100 yale qekoi.”
Don Sane Ŋado Didiwo Wakoniyake
21Pakiso, Yesu eŋe koso rake, “Ŋei mane kiwa kuwake more diyao qeki okorayake? Lase bano me rosaŋo more supaki mesiyake? Mida! Eŋe kuwake more qeki zake kutno didiwo okora korop qelaŋanoniyake. 22Yalewaka, kine kine korop sane pamaike, eya na ŋado didiwo mawe wakon wareyake. So kine kine natne supawe metmaike, eya ŋado na ma lalagewe didiwo wakon wareyake. 23Ŋei me ŋerep mane eŋe ketineropŋo don iwa wane kine dere more malipka lukki paki, korop detka wareyake.” 24Yale ra more eŋe koso edane rake, “Ŋine dere more kaulukkei! Ŋine ŋei ŋerep eŋano urata kine kine mauluke ebonikeiwo, Kaisale eŋe yalewaka ŋine mauluke ŋibone more koso manerop takotke yuwanka mauluk-ŋune ŋiboniyake. Ŋo, ŋine ŋei ŋerep matali ebonikeiwo, Kaisale eŋe ŋine yalewaka matali-ŋune more koso manerop yuwanka mataliŋune ŋiboniyake. 25Kaisale eŋe ŋei me ŋerep mane kine kine mo mangi make, eya togoleka malipka geyakeo, eŋe koso takotke mane more ma suwa maniyake. Ŋo, ŋei mane eŋe Kaisaleŋo kine kine nigatne mange, eya mi mauluke wareka mageyakeo, yemo Kaisale eŋe ŋei yewa wane kine kine mange, eya koropka omakka wareyake.”
Woune Kominerop Eya Wane Don Rokop
26Yesu eŋe koso rake, “Kaisaleŋo ware-ŋunmaike, eya wane tanikine iwa yale. Ŋei mane eŋe kine kine woune euwo ebore more, 27eŋine matko ari toma geyake. Ŋo eŋe mi detkamaike, wele dalino eu koto wakonmaike. Pakimo, woune eya eŋe poripke sayake. 28Saki, kepe oŋomka komine mapitkaki suwa wele qeyake. Mikepka kau saraine so pizulumine. Ŋadino wit wele wakone more menage laŋeniyake. 29Wit wele laŋengi, ŋei eŋe kiyeke pilaŋŋo kitatmaike.”
Kaisaleŋo Ware-ŋuniyakane Kine Yesu Eŋe Eya Wane Don Rokop Motke
30Yesu eŋe koso takotke more ŋei ŋerep qesonone more rake, “Na Kaisale wane kisi maep me qeli ewe zonom wane numa eya mo kine kine mane onokakao rokop kito takotke more ra qelaŋanikale? 31Eŋe eya mo mastet woune yale, nigatnemde okanmaike. Mastet woune nigatnemde kine kine natnane woune me waetne yuwane more zok manerop, nigatne okanmaike. Yalinane mastet woune eya ŋei maneŋo euino ebotke. 32Pakimo, eŋe poripke more, suwa eu kotino ŋara nenine natne korop yuwanone more, eŋe wiye weti wa qogine qe mesiyake. Pakimo, naŋi eŋe sari wa more naune koto matene kito more mesikei.” 33Yesu eŋe don rokop kine kine loutne iwao more ŋei ŋerep ra edange. Ŋei ŋerep edo dere qelaŋanikei wane Yesu eŋe dereretene rokouno edange. 34Yesu eŋe ŋei ŋerep don rokop eyaka edane okange. Ŋo, eŋe dokoine eŋerop mere more, don rokop wane kine ra qelaŋane edane okange.
Yesu Eŋe Dibom Ma Peseke
35Naso mane kepe qoe qoewo, Yesu eŋe dokoine edane rake, “Ŋene sekiwo wa more, doku namuŋ kitare erinat ariŋem.” 36Raki, eŋe ŋei ŋerep magu suwaine yewa qeliŋone more, Yesu alakane wa metkiso, dokoine eŋe ŋado seki yewa wane kutno wa more, eŋe weneŋ ma ariuso, seki natne eŋe weneŋ eŋerop arikoi. 37Ariu, ikopka dibom suwaine wiye more seki koto kiwet qakki ket watke ma muruŋ-oniyakane okange. 38Yesu eŋe seki sotno qaliŋan more kulu pake. Dokoine eŋe ari ma wirikka rakoi, “Kito ŋebo ŋebon ŋene zok bori more seukkenane okanmaine! Ge onoka wane mi det ŋonmaine?” 39Yesu eŋe wiye more togoleka kuroge momo olatke, “Doŋ mannom!” Ra more eŋe dibom olatke, “Ge, tikŋaneŋ doŋ mane panom!” Rakiso momo eŋe doŋ mangi, so dibom eŋe yaleka tik doŋ mane kaloŋ suwaine pake. 40Pakiso, Yesu eŋe dokoine edane rake, “Ŋine onoka wane kaet okanmami? Ŋine malip malipŋine mida me?” 41Eŋe kaet suwaine okane more, enŋene auye rakoi, “Ŋei iwa eŋe zok ŋei kine mane! Naso bano ŋei ŋerep zoma kubet-enerop so asu qotkoinerop ma menaŋ-onge, wane koso iwa momo so dibom suwaine iwa don etangi, ere done detka more qelige doŋ mane pamamik!”
सध्या निवडलेले:
Mareko 4: onsNT
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2012, Wycliffe Bible Translators, Inc. All rights reserved.