San Mateo 4
4
Vati ai Jesure cu'ache cho'oa'kʉ chini chʉ̃'ʉte'esi'ere kʉamʉ
(Mr 1.12-13; Lc 4.1-13)
1Ũcuarʉmʉ Jesús Dios Rekochoji chʉ̃'ʉʉna pãi peochejana sanisõasomʉ. Sani pa'iʉna vati ai repaʉni cacʉ'ora chini cu'are chʉ̃'ʉasomʉ.
2Sani cuarentarepaumucujñana'me cuarentarepañami ãu ãima'ñe pa'iʉna ãucuhaasomʉ repaʉ'te. 3Ũcuarʉmʉ vati ai rani Jesuni cacʉ'ora chini ija'che i'kaasomʉ:
—Mʉ'ʉpi Dios Mamarepakʉ pani ipʉã catapʉã mini, pãpʉã carʉñojʉ̃'ʉ —chiniasomʉ.
4Chikʉna Jesús ija'che sãiñe i'kaasomʉ repaʉ'te:
—Dios chʉ'o aperʉmʉ tocha jo'kasi'e ija'che kʉamʉ:
Pãipi chʉ'ʉrejẽ'e cuasama'ñe repana ãijañe ãuchi'a cuasajʉ pa'ito cu'amʉ.
Jã'achi'a cuasama'ñe chʉ'ʉ chʉ'o asa chẽa cho'ojʉ pani re'oja'che pa'ijanaa'me pãi,
chiimʉ —chiniasomʉ Jesús repaʉ'te vatire.
5-6Jã'a i'kacuhasirʉmʉ vati ai repaʉ'te Jesure Dios neejoopo Jerusalén vʉ'ejoopona sa Dios vʉ'e sẽ'sevʉna mʉa ija'che i'kaasomʉ:
—Dios chʉ'o aperʉmʉ tocha jo'kasi'e ija'che kʉamʉ:
Dios, mʉ'ʉni kuirajʉ mʉ'ʉ tuã'ito repana jʉ̃jñapi chẽaa'jʉ chini, ángele'te raoja'mʉ,
mʉ'ʉpi tuãni asi cho'omanea'kʉ chini,
chiimʉ. Jã'ajekʉna mʉ'ʉpi Dios Mamarepakʉ pani ichejapi chejana chã'ijʉ̃'ʉ. Dios i'kasi'epi ũcuarepa pa'ito ichejapi chãni asi cho'omaneja'mʉ mʉ'ʉ —chiniasomʉ vati ai.
7Chikʉna Jesús i'kaasomʉ.
—Ũcuachi'a Dios chʉ'o aperʉmʉ tocha jo'kasi'e ija'che kʉamʉ:
Chʉ'ʉ cho'omasiche'te rupʉ ñañu chini sẽemanejʉ̃'ʉ mʉsanʉkona pãi,
chiimʉ Dios —chiniasomʉ Jesús repaʉ'te vati aire.
8-9Jã'a cho'o pi'nisirʉmʉ vati ai repaʉ'te Jesure cuhacho aikũtina rʉa ʉmʉ pa'ikũtina sa mʉa teana te'erʉmʉ peore chejña pãi pa'ichejñana'me repachejña pa'imajñarʉã re'oja'chere ñokʉ ija'che i'kaasomʉ:
—Mʉ'ʉpi chʉ'ʉni, “Peore masikʉ'mʉ mʉ'ʉ”, chiiʉ ro're ñu'iʉ pojoru mʉ'ʉni peore ĩsija'mʉ chʉ'ʉ ichejña —chiniasomʉ vati.
10Chikʉna Jesús i'kaasomʉ repaʉ'te.
—¡Vati ai, saijʉ̃'ʉ mʉ'ʉ! Dios chʉ'o tocha jo'kasi'e ija'che kʉamʉ:
Diore Pãi Ũcuanʉkore Paakʉ'techi'a, “Peore masikʉ'mʉ mʉ'ʉ”, chiijʉ cuasajʉ pojojʉ
Repaʉ chʉ̃'ʉñechi'a cho'ojʉ pa'ijʉ̃'ʉ mʉsanʉkona pãi,
chiimʉ —chiniasomʉ Jesús repaʉ'te.
11Jã'aja'ñe i'kaʉna vati ai Jesure jo'ka sanisõasomʉ. Repaʉ sanisõsirʉmʉ ángelepi rani kuiraasome repaʉ'te.
Jesús Galilea cheja apevʉamʉ pãi chʉ'vache
(Mr 1.14-15; Lc 4.14-15)
12Jã'a cho'ocuha repaʉ co'isirʉmʉ Jesús, Juan Pãi Okoro'vesi'kʉre pãi chẽavʉ'e cuaosi'ere asa Galilea chejana saniasomʉ. 13Repacheja cajoopona Nazaret vʉ'ejoopona sani rʉa keerʉmʉ pa'ima'ñe chiara rʉ'tʉva cajoopona Zabulonna'me Neftalí ve'ochejña cajoopona Capernaum vʉ'ejoopo'te pasa chini saniasomʉ repaʉ. 14Jã'aja'ñe cho'oʉna aperʉmʉ Dios chʉ'o kʉasi'kʉ Isaías tocha jo'kasi'epi ũcuarepa ti'jñesi'kʉa'mʉ.
15Galilea chiara rʉ'tʉva pa'ichejñare Zabulón chejana'me Neftalí cheja ve'osichejñare judío peona jainʉko pa'ime.
Chura Galilea cheja jã'aja'ñe ve'emʉ repachejña.
Jordán chiacha chekʉkã'ko cacheja ũcuaja'che judío peona jainʉko pa'ime.
16Ũcuachejñare pa'ijʉ chijacheja pa'inaja'ñe cu'ache pa'inapi miañe ñañeja'ñe
chʉ'o re'oja'chere asaasome repana,
re'oja'che pa'iche chʉ'vachʉ'ore.
Ũcuaja'che cu'ache pa'inapi umucuse ñataʉna miañe ñoñeja'ñere re'oja'che pa'iche'te asaasome repana,
chiimʉ Isaías tocha jo'kasi'e.
17Repacheja saisirʉmʉpi vʉa Jesús ija'che chiiʉ pãire chʉ'vakʉ paniasomʉ:
—Mʉsanʉkona cu'ache cho'oche ũhasõ mama cuasajʉ̃'ʉ. Dios Raosi'kʉ pãi ũcuanʉkore chʉ̃'ʉpi'ramʉ —chiiʉ chʉ'vaasomʉ repaʉ.
Va'i chonare ũcuaka'chapanare Repaʉ chʉ̃'ʉñe'te cho'ojʉ paapʉ chini Jesús chẽasi'ere kʉamʉ
(Mr 1.16-20)
18Na'a pa'isirʉmʉ Jesús Galilea chiara rʉ'tʉva'te ku'iʉ Simonre cho'jeʉ Andrena'me pa'ikʉni ñaasomʉ. Repaʉ Simón cheke mami Pedro ve'emʉ. Va'i chonajejʉ va'i chorʉji chiara'te chojʉ paniasome repana. 19Repanare ña Jesús ija'che i'kaasomʉ:
—Chʉ'ʉni ja'me ku'ijʉ chʉ'ʉ chʉ̃'ʉñe'te cho'ojʉ pa'ijʉ̃'ʉ. Va'i sani va'ire jñaa ranaa'me mʉsanʉkona. Chura chʉ'ʉpi cho'okaiʉna sani pãire jñaa chʉ'ʉni rakaijʉ pa'ijʉ̃'ʉ —chiniasomʉ Jesús repanare.
20Jã'aja'ñe i'kaʉna asa teana va'i chorʉã jo'ka ũcuaʉna'me saniasome repana.
21Jã'achejapi jo'e jmachenerʉ sani Zebedeo chĩire Santiagona'me Juanre ñaasomʉ repaʉ. Pʉka'kʉna'me choovʉ'te pa'ijʉ va'i chorʉãre care'vajʉ paniasome repana. Pa'ijʉna ña Jesús repanare, repaʉna'me saapʉ chini soniasomʉ. 22Soiʉna asa, “Jaʉ”, chini choovʉna'me pʉka'kʉre teana jo'ka ũcuaʉna'me saniasome repana Santiagona'me Juan.
Pãi jainʉkore che'chomʉ Jesús
(Lc 6.17-19)
23Reparʉmʉ Jesús Galilea cheja si'achejña ku'iʉ repacheja pa'ivʉ'ña judíopãi chi'ivʉ'ñana si'arʉmʉ kaka che'chokʉ ku'iʉ pa'isi'kʉa'mʉ. Ũcuachi'a pãi cu'ache cho'oche ũhasõsinare Dios chẽa paache'te chʉ'vakʉ pãi si'ache ravʉ jũ'inare vasokʉ ca'nivʉã asiche si'ache jũ'inare vasokʉ ku'iʉ pa'isi'kʉa'mʉ repaʉ. 24Repaʉ cho'oche'te ñajʉ pãipi si'arʉmʉ kʉajʉna asa Siria cheja si'achejña pa'ina pãi ravʉ si'ache jũ'iva'nare, ca'nivʉã asiche si'ache jũ'inare, vati paanare, vẽ've ravʉ paanana'me nʉka ku'imanare Jesuni saasome. Sarena Jesús repanare ũcuanʉkore vasokaisi'kʉa'mʉ.
25Reparʉmʉ pãi rʉa jainʉko Jesure ja'me ku'ijʉ pa'isinaa'me, Galilea cheja cana Decápolis cheja cajoopoã cana Jerusalén vʉ'ejoopo cana Judea cheja canana'me Jordán chiacha chekʉkã'ko cana.
सध्या निवडलेले:
San Mateo 4: coe
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2009, Wycliffe Bible Translators, Inc. All rights reserved.