Lukas 22
22
Cov Thawjcoj Nrhav Kev Nteg Yexus
(Mathais 26:1-5; Malakaus 14:1-2; Yauhaas 11:45-53)
1Thaus lub sijhawm ua kevcai Noj Ncuav Tsi Xyaw Keeb, kws hu ua kevcai Hlaa Dlhau, lug yuav txug. #Tsiv 12:1-27 2Cov thawj povthawj hlub hab cov xwbfwb kws qha Kevcai ntshai cov pejxeem, yogle ntawd, puab txawm nrhav kev tuabywv yuav nteg Yexus coj moog tua.
Yudas Pumzoo Ntxeevsab Rua Yexus
(Mathais 26:14-16; Malakaus 14:10-11)
3Thaus ntawd Xataas txawm nkaag rua huv Yudas Ixakali-us, kws yog ib tug ntawm kaum-ob tug thwjtim. 4Yogle ntawd, Yudas txhaj tawm moog saablaaj rua cov thawj povthawj hlub hab cov thawj tubrog kws zuv lub Tuamtsev has tas nwg muaj peevxwm kws yuav muab tau Yexus moog cob rua puab. 5Puab zoosab heev hab coglug yuav them nyaj rua nwg. 6Yudas txawm pumzoo le puab has, tes nwg txawm pib nrhav kev muab kuas tau Yexus moog cob rua puab, kws tsi pub kuas tej tuabneeg paub txug hlo le.
Yexus Npaaj Noj Pluag Mov Ua Kevcai Hlaa Dlhau
(Mathais 26:17-25; Malakaus 14:12-21; Yauhaas 13:21-30)
7Thaus txug nub ua kevcai Noj Ncuav Tsi Xyaw Keeb kws yog nub suavdlawg tua mivnyuas yaaj noj ua kevcai Hlaa Dlhau. 8Yexus txawm khaiv Petus hab Yauhaas obtug has tas, “Meb moog npaaj pluag mov ua kevcai Hlaa Dlhau rua peb noj.”
9Obtug nug Yexus has tas, “Koj xaav kuas wb moog npaaj rua qhovtwg?”
10Yexus teb tas, “Thaus meb moog rua huv nroog, yuav muaj ib tug txivneej kwv ib hub dlej lug ntsib meb. Meb cale lawv nwg qaab moog huv tsev 11hab has rua tug tswvtsev tas, ‘Xwbfwb has tas, Chaav kws koj muab rua Kuv hab Kuv cov thwjtim noj pluag mov ua kevcai Hlaa Dlhau nyob qhovtwg?’ 12Nwg yuav coj meb moog qha ib chaav dlaav-dlaav nyob txheej sau kws tub muaj rooj muaj tog txhijzog lawm rua meb. Meb cale npaaj txhua yaam rua qhov chaw ntawd.”
13Obtug txawm moog hab pum txhua yaam lawvle Yexus qha rua obtug, tes obtug txhaj npaaj pluag mov ua kevcai Hlaa Dlhau rua qhov ntawd.
Tug Tswv Rooj Mov
(Mathais 26:26-30; Malakaus 14:22-26; 1 Kauleethaus 11:23-25)
14Thaus txug sijhawm lawm, Yexus hab Nwg cov timthawj txawm lug nyob ntawm rooj mov. 15Nwg has rua puab tas, “Uantej kws Kuv yuav raug kev tsimtxom, Kuv xaav nrug mej noj pluag mov ua kevcai Hlaa Dlhau nuav kawg le! 16Kuv qha rua mej has tas, Kuv yuav tsi noj le nuav ntxiv moog txug nub kws lub ntsablug ntawm pluag mov nuav tav nyob rua huv Vaajtswv lub Tebchaws.”
17Thaus ntawd, Yexus txawm muab khob cawv txivmaab lug ua Vaajtswv tsaug hab has tas, “Txais lub khob nuav moog hab muab faib rua mej suavdlawg haus. 18Kuv qha rua mej has tas, Kuv yuav tsi haus cov cawv txivmaab nuav ntxiv moog txug nub kws Vaajtswv lub Tebchaws lug txug.”
19Yexus muab ib lub ncuav lug ua Vaajtswv tsaug, Nwg muab ndlais faib rua puab hab has tas, “Nuav yog Kuv lub cev, kws yog muab rua mej. Mej ua le nuav, ua lub chaw ncu txug Kuv.” 20Thaus puab noj mov taag, Yexus muab ib khob cawv txivmaab lug ua ib yaam nkaus le ntawd, Nwg has tas, “Lub khob nuav yog Vaajtswv lulug cogtseg tshab huv Kuv cov ntshaav, kws tau ndlwg lug rua mej.#22:20: Tej phoo ntawv qub kws xuas teg sau, tsi muaj cov lug tomqaab ntawm Yexus cov lug kws Nwg has tas Nuav yog Kuv lub cev huv nqai 19 hab taagnrho nqai 20 huv tuabsi. #Yelemi 31:31-34
21“Tabsis mej saib nawb, tug kws ntxeevsab rua Kuv, nwg taabtom nrug Kuv nyob uake ntawm lub rooj nuav! #Nnkauj 41:9 22Tuabneeg Leejtub yeej yuav tuag lawvle Vaajtswv npaaj tseg lawm, tabsis kev puamtsuaj yuav raug rua tug kws ntxeevsab rua Tuabneeg Leejtub!”
23Tes puab txawm sisnug zumzawg has tas nyob huv puab cov ntawd, leejtwg yog tug kws yuav ua le ntawd?
Kev Siscaav Has Tas Leejtwg Yog Tug Luj Dlua Ndlais
24Tau muaj kev siscaav nyob rua huv cov thwjtim has tas seb puab leejtwg yog tug luj dlua ndlais. #Math 18:1; Malak 9:34; Lukas 9:46 25Yexus has rua puab tas, “Tej vaajntxwv huv nplajteb nuav yeej muaj fwjchim kaav puab tej pejxeem, hab tej numtswv kws muaj fwjchim khaav has tas puab yog ‘Phoojywg rua tej pejxeem.’ #Math 20:25-27; Malak 10:42-44 26Tabsis mej tsi zoole ntawd; tug kws luj kawg nkaus huv mej, nwg yuavtsum ua tug kws yau kawg nkaus, hab tug kws yog thawjcoj, nwg yuavtsum ua le yog tug tubqhe. #Math 23:11; Malak 9:35 27Tug twg yog tug luj dlua? Tug kws nyob quastsawg noj mov lossis tug kws nqaa zaub nqaa mov? Tub yog tug kws nyob quastsawg noj mov ntaag. Tabsis Kuv nrug mej nyob zoo ib yaam le ib tug tubqhe. #Yauh 13:12-15
28“Thaus Kuv raug kev txomnyem, mej sawv nregnroog nrug Kuv; 29Kuv Txiv tsaa Kuv ua tug muaj fwjchim kaav ib lub tebchaws lecaag, Kuv yuav tsaa mej kuas muaj fwjchim ib yaam le ntawd. 30Mej yuav tau nrug Kuv noj hab haus nyob ntawm Kuv lub rooj huv Kuv lub Tebchaws, hab mej yuav tau nyob sau lub zwmtxwv, txavtxim rua kaum-ob xeem Yixalayees. #Math 19:28
Yexus Qha Uantej Txug Qhov Kws Petus Yuav Tsi Leeg Paub Nwg
(Mathais 26:31-35; Malakaus 14:27-31; Yauhaas 13:36-38)
31“Ximoos, Ximoos 'e, ua tuabzoo noog nawb! Xataas tau thov sim mej txhua tug, yuav muab tug zoo cais tawm ntawm tug phem, ib yaam le tug yaaj nplej muab vaab ntxuaj cov npluag tawm ntawm cov nplej. 32Tabsis Ximoos, Kuv tub thov Vaajtswv paab koj lawm, kuas koj txuj kev ntseeg tsi xob tu. Hab thaus koj tig rov lug cuag Kuv, koj yuavtsum txhawb koj cov kwvtij lub zug.”
33Petus teb tas, “Tug Tswv, kuv yeej txaussab nrug Koj moog, txawm yuav raug kaw hab raug tuag los xij!”
34Yexus has tas, “Petus, Kuv qha rua koj has tas, mo nuav uantej qab qua, koj yuav tsi leeg paub Kuv txug peb zag.”
Naab Rau Nyaj, Naab Thoobpuab, Hab Raab Ntaaj
35Tes Yexus nug puab has tas, “Zag dlhau lug kws Kuv khaiv mej moog, mej tsi nqaa naab rau nyaj, naab thoobpuab hab khau, es mej puas tuncua dlaabtsi hab?” #Math 10:9-10; Malak 6:8-9; Lukas 9:3; 10:4
Puab teb tas, “Peb tsi tuncua dlaabtsi le.”
36Yexus has tas, “Tabsis nwgnuav, tug kws muaj naab rau nyaj lossis naab thoobpuab, cale nqaa nrug nwg moog; tug kws tsi muaj ntaaj, cale muab nwg lub tsho luj muag hab moog yuav ib raab ntaaj. 37Kuv qha rua mej has tas, Vaajtswv Txujlug kws has tas, ‘Nwg raug suav nrug rua cov tuabneeg muaj txim’ yuav tav nyob rua ntawm Kuv. Ruaqhov tej kws sau has txug Kuv ntawd taabtom yuav tav.” #Yaxaya 53:12
38Cov thwjtim has tas, “Tug Tswv, Koj saib maj, peb muaj ob raab ntaaj nyob ntawm nuav!”
Yexus teb tas, “Txaus lawm!”#22:38: Txaus lawm; lossis Le nuav xwb tau lawm.
Yexus Thov Vaajtswv Sau Roob Txiv Ntoo-Roj
(Mathais 26:36-46; Malakaus 14:32-42)
39Yexus tawm huv lub nroog moog rua peg Roob Txiv Ntoo-Roj lawvle Nwg ibtxwm moog; hab Nwg cov thwjtim nrug Nwg moog. 40Thaus puab moog txug peg, Yexus has rua puab tas, “Mej yuavtsum thov Vaajtswv paab, mej txhaj tsi qaug rua kev simsab.”
41Yexus txawm ncaim puab moog nrug dleb kwvlaam le laim ib ncuas pobzeb, hab Nwg txhuscaug thov Vaajtswv has tas, 42“Txiv, yog Koj pumzoo, thov Koj muab lub khob ab khob dlaw nuav tshem ntawm Kuv moog. Txawm lecaag los thov tsi xob ua lawvle Kuv lub sab nyam, tabsis ca ua lawvle Koj lub sab nyam xwb.” 43Muaj ib tug timtswv ceebtsheej lug tshwm rua Yexus pum hab txhawb Nwg lub zug. 44Yexus nyuajsab kawg nkaus, Nwg yimfuab siv zug thov Vaajtswv; Nwg cov fws zoole tej teev ntshaav nrug rua huv aav.#22:44: Tej phoo ntawv qub kws xuas teg sau, tsi muaj nqai 43-44.
45Thaus Yexus thov Vaajtswv taag, Nwg txawm sawv rov moog rua tom cov thwjtim hab pum puab tsaugzug taag lawm, puab saab kawg vim kev nyuajsab. 46Yexus has rua puab tas, “Mej pw tsaugzug ua dlaabtsi? Cale sawv hab thov Vaajtswv paab, mej txhaj yuav tsi poob rua kev simsab.”
Yexus Raug Nteg
(Mathais 26:47-56; Malakaus 14:43-50; Yauhaas 18:3-11)
47Thaus Yexus taabtom has le ntawd, muaj ib paab tuabneeg coob-coob txawm tuaj txug; Yudas kws yog ib tug ntawm kaum-ob tug thwjtim yog tug coj puab tuaj. Nwg txaav zog lug nwj Yexus, 48tabsis Yexus has tas, “Yudas, koj ntxeevsab rua Tuabneeg Leejtub lug ntawm kev nwj nua lov?”
49Thaus cov thwjtim kws nrug Yexus uake pum tas yuav muaj xwm, tes puab txawm has tas, “Tug Tswv, Koj puas kheev peb siv peb cov ntaaj?” 50Muaj ib tug thwjtim txawm rhu hlo ntaaj lug tuab ntaag rua tug Tuam Povthawj Hlub ib tug tubqhe saab nploojntseg xis tunrho.
51Tabsis Yexus has tas, “Tsum kag! Le nuav xwb tau lawm!” Yexus txawm cev teg moog tuav tug ntawd lub nploojntseg hab khu rov zoole qub.
52Tes Yexus has rua cov thawj povthawj hlub, cov thawj tubrog kws zuv lub Tuamtsev, hab cov txwjlaug kws tuaj nteg Yexus ntawd has tas, “Mej nqaa ntaaj nqaa qws tuaj nteg Kuv ib yaam le Kuv yog tubsaab nua lov? 53Kuv tub najnub nrug mej nyob huv lub Tuamtsev, tabsis mej ho tsi nteg Kuv. Tabsis lub sijhawm nuav yog mej lub hab yog txuj kev tsausntuj lub fwjchim ua tug kaav lawm.” #Lukas 19:47; 21:37
Petus Tsi Leeg Paub Yexus
(Mathais 26:57-58, 69-75; Malakaus 14:53-54, 66-72; Yauhaas 18:12-18, 25-27)
54Puab nteg Yexus hab coj Nwg moog rua huv tug Tuam Povthawj Hlub lub tsev; Petus lawv qaab nrug dleb tsawv. 55Muaj tuabneeg rauv ib cubtawg rua huv plawv ntawm lub tshaavloog, tes Petus txawm nkaag moog nrug cov tuabneeg kws nyob quastsawg ntawd nte tawg uake. 56Muaj ib tug ntxhais qhev pum Petus nyob nte tawg rua ntawd, nwg txawm saibntsoov Petus hab has tas, “Tug txivneej nuav yog ib tug kws nrug Yexus uake hab!”
57Tabsis Petus has tas, “Tug muam, kuv yeej tsi paub Nwg le os!”
58Dlhau ntawd mivntsiv, muaj ib tug txivneej pum Petus hab has tas, “Koj yog puab paab ntawd ib tug hab los sav!”
Tabsis Petus has tas, “Txivntxawm, kuv tsi yog!”
59Tomqaab ntawd kwvlaam le ib txoogteev, rov muaj dlua ib tug txivneej has khov-khov tas, “Tug nuav yeej yog ib tug kws txeev nrug Yexus tag-tag le, ruaqhov nwg kuj yog tuabneeg Kalilais hab!”
60Tabsis Petus teb tas, “Txivntxawm, tej kws koj has ko kuv yeej tsi paub txug hlo le!”
Thaus Petus tseem taabtom has le ntawd tsi tau tu, tes qab txawm qua taamsim. 61Tug Tswv txawm tig moog saib Petus, tes Petus txhaj ncudlheev txug tej kws tug Tswv tau has rua nwg tas, “Mo nuav uantej qab qua, koj yuav tsi leeg paub Kuv txug peb zag.” 62Petus txawm tawm moog rua saabnrau hab quaj tusab kawg le.
Yexus Raug Thuam Hab Raug Ntaus
(Mathais 26:67-68; Malakaus 14:65)
63Cov tuabneeg kws zuv Yexus txawm ua saib tsi taug Nwg hab muab Nwg ntaus. 64Puab muab phuam lug paav Nwg qhovmuag hab nug has tas, “Koj sim twv seb yog leejtwg ntaus Koj?” 65Hab puab has ntau yaam saib tsi taug Nwg.
Cov Numtswv Taug Yexus Zaaj
(Mathais 26:59-66; Malakaus 14:55-64; Yauhaas 18:19-24)
66Thaus kaajntug lawm, cov txwjlaug, cov thawj povthawj hlub, hab cov xwbfwb kws qha Kevcai tuaj saablaaj uake, tes muaj tuabneeg coj Yexus lug sawv taabmeeg puab. 67Puab has rua Yexus tas, “Yog Koj yog tug Mexiyas, thov Koj qha rua peb paub.”
Yexus teb tas, “Txawm yog Kuv qha mej los mej yeej yuav tsi ntseeg Kuv; 68hab yog Kuv nug mej los mej yuav tsi teb Kuv; 69Tabsis txij nuav moog Tuabneeg Leejtub yuav nyob ntawm Vaajtswv tug kws muaj Fwjchim Luj Kawg Nkaus saab xis.”
70Puab txhua tug txawm nug has tas, “Yogle ntawd, Koj yog Vaajtswv tug Tub lov?”
Yexus teb puab has tas, “Yog le mej has lawm.”
71Puab has tas, “Peb tsi taag yuav moog nrhav timkhawv ntxiv lawm! Peb tub nov kag ntawm Nwg lub ncauj lawm!”
सध्या निवडलेले:
Lukas 22: HNJ2022
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2022 United Bible Societies. All rights reserved.