Piilimka 1
1
1A nyini piilimka po ate Wen a nye wenzukku ale tɛŋka la. 2Tɛŋka a jam ka magsa ale chim tɛŋ koruk. Legi nna kpitɔ ale jam a lik nya liuŋtaŋa ate Wen Chiika a yaa bo nyiamu zuk a ja.
3Ate Wen yaa weeni ayen, <<Ku be nyaksi a nya,>> ate ku yaa a nya. 4Wen a nya ayen, ku la a nya la a nala, ate wa gaari nyaka legini po. 5Wen yaa wi ku le nyaksi a nya la ayen kantueŋ ale a wi legini ayen yok. Ate saluik ale junɔi yaa deri boro. Piilimka danni jam le la.
6Wen yaa ŋman weeni ayen, <<Basi ate peelim a bo nyaataŋa suŋsuŋ a gaari ti tɔgatɔga.>> 7Wen yaa nye peelimmu a poori wenzuk nyiamu ale tɛŋzuk nyiamu. Ate ku nye va wa le weeni diila. 8Wen yaa wi ŋmazukku ayen wen. Ate saluik ale junɔi a ŋman boro. Da dila jam saari ka daa ŋaye.
9Wen yaa ŋman weeni ayen, <<Basi ate nya buui ale bo tɛŋka la a chuiri ga duek jigi yeŋ ate tɛŋ kosik a nya.>> Ate ku nye dila. 10Wen yaa wi tɛŋ kosikka ayen tɛŋ alege a wi nya tii ale chuiri dua jigi yeŋ ka la ayen nyakpiem. Wen yaa nya ate ku nala te wa.
11Wen yaa weeni ayen, <<Basi ate ŋanta tɔgatɔga ale tiisa a nyini tɛŋka zuk ate ba a yɔni yɔna a ta bie a va ba buuni ale ka diila.>> Ate ku nye dila. 12Ate ŋanta tɔgatɔga ale tiisa a nyini tɛŋka zuk a yɔni yɔna a ta bie a va ba buuni ale ka diila. Wen yaa nya ate ku nala te wa. 13Ate saluik ale junɔi a ŋman boro. Da dila jam saari ka daa ŋata.
14Wen yaa ŋman weeni ayen, <<Basi ate ŋan nyaksinta a bo wenzukku a gaari yok ale kantueŋ. Ŋan bala mɛ ale ba gaari wenkarik ale yoei ale daa ale bena. 15Bala mɛ ale ba bo wenzukku a nyaksi ate tɛŋka zuk a nya.>> Ate ku nye dila. 16Wen a nye ka ŋan nyaksin kpienta baye wenbinni ale chiika. Wenbinni ale soa kantueŋka ate chiika a soa yokku. Wa nye chiŋmarisaŋa mɛ. 17Wen a nye ba kama a basi wenzukku ayen tɛŋka zuk a nya, 18wenbinni a nya kantueŋ abe chiika mɛ a nya yokku. Wenbinni le chiika ale poori legini. Wen yaa nya ayen ku nala a te wa. 19Ate saluik ale junɔi a ŋman boro. Da dila a saari ka daa ŋanaansi.
20Wen yaa ŋman weeni ayen, <<Basi ate nyiamu a ta ŋanvuta abe nuinsa a yiri wenzukku.>> 21Dila Wen yaa nye nyiam po ŋan kpienta ale ŋan fiisa ate ba bo nyiamu po a cheŋ, ba jam ka ŋanta tɔgatɔga a bo nyiamu po. Wa nye nuinsa mɛ tɔgatɔga. Wen yaa nya ate ku nala a te wa. 22Wen yaa niak ŋantaŋa ale weeni ayen ba biak abe ba wɔgri a sueri nyiamu po meena abe nuinsaŋa a wɔgri a sueri tɛŋka. 23Ate saluik ale junɔi a ŋman boro. Da dila a saari ka daa ŋanu.
24Wen ŋman weeni ayen, <<Basi ate ŋanvuta tɔgatɔga a bo tɛŋka zuk, yeri duŋsa, ŋan baai meena ale vuuri a cheŋ ale gɔi duŋsa ba meena ba tɔga ba tɔga.>> Ate ku nye dila. 25Wen a nye gɔi duŋsa buuni ale yeri duŋsa buuni ale ŋan baai ale vuuri a cheŋ la buuni. Ate Wen nya ate ku nala te wa nna yegayega. 26Wen yaa ŋman weeni ayen, <<Ni te ti nye nuru ase tidek la ate wa a neensi ti ate wa a nya nyakpiemu jumaŋa ale nuinsaŋa, ale bo wenzukku la ale duŋsaŋa ale bo tɛŋka zuk ale ŋan baai meena ale vuuri a cheŋ la zuk.>>
27Dila Wen yaa nye nuru ase wadek la, wadek ale ka diila ate wa nye wa, nidoa ale nipok ate wa nye.
28Wen a niak ba ale weeni ba ayen, <<Ni biak a sueri tɛŋka a nya ka zuk. Ayen ba a nya jumaŋa ale bo nyakpiemu po la, ale nuinsaŋa ale bo wenzukku la, ale ŋanvutaŋa meena ale a cheŋ tɛŋka zuk la.>>
29Wen yaa weeni ayen, <<M pai ŋan bie meena ale nyini tɛŋka a biak ŋmaa bɛ la ale tiisa meena ale a yɔni yɔna a te ni ayen ba chim ŋandiinta te ni. 30M pai duŋsaŋa ale nuinsa ale ŋan baai meena ale bo tɛŋka zuk a cheŋ ate ba ta nyuvuri la te ni. M pai va sobta meena a te ba ayen ba chim ba ŋandiinta.>> Ate ku nye dila.
31Wen yaa nya wa ale nye dii meena la ate ku nala te wa. Ate saluik ale junɔi a ŋman boro. Da dila a saari ka daa ŋayuebi.
सध्या निवडलेले:
Piilimka 1: BWU
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023, Ghana Institute of Linguistics, Literacy and Bible Translation