JUAN 3
3
Jesúz no Nicodem
1Güyuꞌ to mpyquie-nac fariseu ni le Nicodem, no rsahc ni rnii me lahd gyre meññ-Isṟael. 2Güya me guiaal ru nu Jesúz, no ra me lee:
―Muextr, nann noꞌ Dioz pshahl lii guidluuy noꞌ, porni rtzooy xtahl ni ngann, no ndruhty nehx beeiy ntzoo leeyahcu bâḻ nehx nu Dioz no lee.
3Ra Jesúz leeme:
―Gapyaꞌ lii ni uli, dxu di gahl gyzac, nehx beeiy tzu ru rtzoo Dioz mdad.
4Ra Nicodem leeme:
―Per ¿bia mód‑e ñahl to meññ gyzac no ba mînguhl lee? ¿Nehxni beeiy ñuꞌ me leññ xmam me sto no ñahl me gyzac?
5Ra Jesúz leeme:
―Gapyaꞌ lii ni uli, dxu di gahl de nzeꞌ no de xiSpirt Dioz, nehx beeiy tzu ru rtzoo Dioz mdad. 6Ni gahl de meññ la, meññ gahc‑e lee; no dxu gahl de xiSpirt Dioz, spirt‑e lee. 7Di gzacnganniꞌ de ni ren lii: “Rahp meññ de ni gahl gyzac.” 8Mbeꞌ rutisy rahcu rdedyu no rieññiꞌ xṟidu, per nehx nanniꞌ bá glo ziaadu o bá glo tzau. Mod-wé gahc zidguiahc gyre dxu gahl de xiSpirt Dioz.
9Gyzac günabdiidz Nicodem, ra leeme:
―¿Bia mód beeiy ñahc nirieꞌ?
10Ra Jesúz leeme:
―¿Lii naquiꞌ muextr-rsahc lahd meññ-Isṟael, no nehx rieññiꞌ nirieꞌ la? 11Gapyaꞌ lii ni uli, rnii noꞌ ni nann noꞌ, no rdee noꞌ diidz ni bwieꞌ noꞌ; per nehx rlíladzy laꞌd ni ra noꞌ laꞌd. 12Bâḻ nehx rlíladzy laꞌd naa hor-runon laꞌd de ni nu lo guiedzylie-rieꞌ, ¿bia mód‑e nlíladzy laꞌd naa hor-runon laꞌd de ni nu gybaa?
13’Nehx nu ndruhty ba güya gybaa, mazyg naa gahc, Mpyquie-Pshahl Dioz Lee ni byruu gybaa, no gybaa we dilgaraꞌ. 14No mod-gülesy Moiséz to xfigur mbaaḻ to lo yahg lo yu-bihdzy ba xtze, modé gahc‑e naa, Mpyquie-Pshahl Dioz Lee, rapaꞌ de ni guiasaꞌ, 15lehdy gyre dxu gylíladzy naa, di znihty, mazyg gap me guîlmbahñ ni nehx zluhx.
Ndzi Dioz meññ-nu lo guiedzylie
16’Porni ndzi Dioz meññ-nu lo guiedzylie, xtâ no bdee Xiñ-ngahc me, lehdy gyre dxu gylíladzy leeme, di znihty, mazyg gap guîlmbahñ ni nehx zluhx. 17Dioz nehx pshahl Xiiñ me lo guiedzylie lehdy gniꞌdy me meññ lo xguîlquie, mazyg lehdy guislaa me meññ de lo guîlnadz ni ziaad.
18’Dxu rlíladzy Xiiñ Dioz nehx znihty lo xguîlquie; per dxu nehx rlíladzy leeme, znihty lo xguîlquie, porni nehx rlíladzy me Xiñ-ngahc Dioz. 19No por nirieꞌ we gynihty meññ lo xguîlquie: porni biahd ni nac beeiy byniꞌ lo guiedzylie, per meññ aaḻ ma biuꞌladzy yâme ni nac beeiy guibcawy, no nehx biuꞌladzy yâme ni nac beeiy byniꞌ, porni rtzoo yâme ni nahcsy yahc. 20Gyre dxu rtzoo ni nahcsy néladzy me ni nac beeiy byniꞌ, no nehx rbigy me beeiy lo byniꞌ, lehdy ndruhty di zann ni rtzoo me. 21Per dxu rtzoo ni nac xñahzû rbigy beeiy lo byniꞌ, no modé neññ rtzoo me mod-racladzy Dioz.
Jesúz no Juaṉ ni rchôbnihs
22Bylux nirieꞌ, güya Jesúz no xmeññ me gydo lo ṟegioṉ-Judea, no bylee yâme uga, no gachôbnihs me meññ. 23Juaṉ zegahc gachôbnihs me meññ to ru le Enóṉ, gahsh gá ru le Salim, porni Enóṉ nu nze-ro; no uga ria meññ rigyrôbnihs. 24Nirieꞌ guhc dze-dgueññ ziaꞌ cu yâme Juaṉ lidzyguiib.
25Per lahd xmeññ Juaṉ guzlo gadeḻydiidz yâme no lahd meññ-Isṟael lguia ni racnyar meññ lehdy guiaꞌn yâme nye lo Dioz. 26No güya yâme, ra yâme Juaṉ:
―Muextr, mpyquie ni güya ru zuꞌy stiby chehsh guiagü-Jordáṉ, ni bdeedyiꞌ diidz de lee, gachôbnihs me, no gadohp gyre meññ leeme.
27Ra Juaṉ leeyâme:
―Ndruhty nehx beeiy ntzoo zâ niwé bâḻ Dioz nehx ndee ñahz gacu. 28Laꞌd gahc beeiy gdee diidz ni günin dac‑e naa nac Crist, mazyg pshahl Dioz naa no biaḻaꞌ nier naa que leeme, lehdy gdedyaꞌ diidz de ni guiaad me. 29To lo guîltziahl, ñoby-gayidzña dxie me coo ndzaꞌb ni gayidzña me lee; no xmígü me ni dxie, rieññ me rnii ñoby-gayidzña no modni rxihly me. No mod-wé gahc‑e, naa hôrrieꞌ ba gaxihlyaꞌ. 30Racladzyu to to dzé qysahc me mazy, no naa gácaꞌ ma lwiñ.
Xiiñ Dioz ni byruu gybaa
31’Dxu byruu gybaa ni pshahl Dioz lee, ma rsahc me que gyre meññ; no dxu nu lo guiedzylie, de lo gahc guiedzylie we lee, no rnii pur ni rahc lo guiedzylie. Per ni byruu gybaa, ma rsahc me que gyre meññ, 32no rnii me ni bwieꞌ me no ni bieññ me, per ndruhty nehx rlíladzy ni runo me lee. 33Per dxu rlíladzy ni runo me lee, rdee diidz Dioz rnii ni uli; 34porni dxu pshahl Dioz lee, xtiidz gahc Dioz‑e rnii, porni Dioz nehx rca me xiSpirt me par xiiñ me. 35Dioz ni nac dTad nó, ndzi me Xiiñ me, no bdee me lee de ni rtzoo Xiiñ me mdad gyre ni nu. 36Dxu rlíladzy Xiiñ Dioz rahp guîlmbahñ ni nehx zluhx; per dxu nehx rlíladzy, nehx zahp me guîlmbañ-rieꞌ, mazyg nu guîlné chehsh me ni rshahl Dioz.
सध्या निवडलेले:
JUAN 3: zpg
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2019, Wycliffe Bible Translators, Inc. All rights reserved.