Ohuchaaka 10
10
Abeechuhulu b'abaana ba Nowa
(1 Biha 1:5-23)
1Bano nibo abeechuhulu b'abaana ba Nowa, Seemu, Haamu, neende Yafeesi. Abaana ba Nowa bano, beebula abaana amaachi k'ofwomboole nikaweere.
2Abaana ba Yafeesi nibo: Gomeri, Magoogi, Madai, Yafani, Tubbali, Meseki, neende Tirasi. Bano nibo bakuukaang'ene baandu balaangirwa hu meeta kano. 3Abeechuhulu ba Gomeri nibo, Asikanaasi, Rifati, neende Togariima. 4Abeechuhulu ba Yafani nibo, Elisa, Tarisiisi, Kitimu, neende Dodanimu. 5Abo nibo bakuukaang'ene baandu bamenya hu ndulo w'enyaanja neende hu bisiinga. Bano nibo abeechuhulu ba Yafesi, abamenya mu nja chikabuhaane neende mu byaalo bikabuhaane. Buli baandu balomaloma olulimi lwaabwe.
6Bano nibo abaana ba Haamu: Kuusi, Misiri, Libbya, neende Kanani. Bano nibo bakuukaang'ene baandu balaangirwa hu meeta kano. 7Abeechuhulu ba Kuusi nibo abaandu ba Seebba, Hafila, Sabbuta, Raama, neende Sabbiteka. Abeechuhulu ba Raama nibo abaandu ba Sebba neende Dedani. 8Kuusi niye laatang'ene Nimuroodi; oyo niye owataangira ohuba omuundu muhunuufu w'amaani hu syaalo. 9Yali omuyiimi w'amaani muno hulw'obunyala bw'Omwaami; sakira siboolwa siti, “Leha Omwaami ahuhole obe omuyiimi muhunuufu koti Nimuroodi.” 10Muhuchaaka, obwaami bwae bwali mu Bbabbilooni, Ereki, neende Akadi, bino byoosi byali mu syaalo sya Sinari. 11Niyatula mu Sinari, yachia mu Asiria, mani niyoombaha ebiko bya Ninefe neende Rehobboti-Yiiri, Kala, neende 12Reseni esiri akatikaati wa Ninefe neende esiko sihoongo muno sya Kala.
13Abeechuhulu ba Misiri nibo abaandu ba Lidya, Anamu, Lehabbu, Nafitu, 14Patirusimu, Kasiluuhi neende aba Kireeti (omwatulamo Abafilisiti).
15Kanani niye owali laatang'ene Sidoni omwaana wae waamberi, neende Heti. Bano nibo bakuukaang'ene baandu balaangwa ameeta kano. 16Kanani yesi niye kukaang'ene Abayebbusi, Abaamoori, neende Abagiriguuti, 17Abahiifi, Abariiki, Abasiini, 18Abarifaadi, Abasemari, neende Abahamati. Endaalo nyiingi nichabitao, amadaala k'Abakanani kawuuya kaasalaanira mu byaalo by'erwaanyi. 19Mani obwaami bw'Abakanani bwaabaambaliya ohutula Sidoni, esiri olwaande lwa Gerari, ohwoolera elalira Gasa, neende hu lwaande lwa Sodomu, Gomora, Adima, neende Sebboyimu, ohwoolera elalira hu Lasa. 20Bano nibo abeechuhulu ba Haamu, abamenya mu nono chaabwe chikabuhaane, neende mu byaalo bikabuhaane. Buli baandu balomalomaanga olulimi lwaabwe boong'ene.
21Seemu mwaanang'ina Yafeesi muhuluundu, niye kukaang'ene Abaibburania boosi. 22Bano nibo abaana ba Seemu: Elamu, Asuri, Aripakusaadi, Ludi, neende Aramu. Bano nibo bakuukaang'ene baandu balaangwa ameeta kano. 23Abeechuhulu ba Aramu nibo: Wusi, Huli, Geteri neende Meseki. 24Aripakusaadi niye laatang'ene Sela; nae Sela niye laatang'ene Ebberi. 25Ebberi yeebula abaana basyaani babiri. Mulala yakulihwa Pelegi, olwohuba esyaalo syakabulwamo mu ndaalo chae. Omwaana wuundi yakulihwa Yokitaani. 26Yokitaani niye laatang'ene Alimodadi, Selefi, Hasarimafeeti, Yeera, 27Hadoramu, Wusali, Dikila, 28Obbali, Abbimaeli, Seebba, 29Ofiri, Hafila, neende Yobbabbu; bano boosi bali abaana ba Yokitaani. 30Obwaami bu bali bamenyamo bwali bwabaambaliya ohutula Mesa esiri olwaande lwa Sefari ohwoola mu syaalo sy'engulu esyali ebukwe. 31Bano nibo abeechuhulu ba Seemu: Abamenya mu nono chaabwe chikabuhaane neende mu byaalo bikabuhaane. Buli baandu nibalomaloma olulimi lwaabwe.
32Abaandu bano boosi beechuhulu ba Nowa, ohuloondakana neende enjibulo chaabwe, mu byaalo byaabwe. Amaachi k'ofwomboole nikaweere, abaandu bohu syaalo boosi batula mu baana ba Nowa bano.
सध्या निवडलेले:
Ohuchaaka 10: SAMIA
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
©Bible Society of Kenya, 2019
©Bible Society of Uganda, 2019