Yohana 3
3
UNikodeemu ikimuposa uYeesu
1Wáali akwali umukhome yumonga wa Vayahuudi wa mu shipuga sha Vafalisaayo, ilitaawa lyakwe akhandi yu Nikodeemu. 2Ilisiku limonga paashilo, wáaluta kwa Yeesu wámujovela wáaja, “Wee Mumanyisaaji, timeenye kiija, owe uli Mumanyisaaji yuna ufiliikhwe nu Nguluvi, kwa kiiva kusiina umuunu yuna akwiliile kigaha ifimanyilo fina wiigaha owe, nda uNguluvi asili lumo nu mwene.” 3UYeesu wámugomosesa wáaja, “Shiyooli nikikujovela, kusiina umuunu yuna akwiliile kiyinjila mu Wutwa wa Nguluvi#3:3 Wutwa wa Nguluvi: Yimba iliswi ili mu Maswi aMahensa. nda asisaviilwe ulwa wuvili.” 4UNikodeemu wámuposa uYeesu wáaja, “Wuli, umugogolo akwiliile wuli kisawa ulwa wuvili?#3:4 Kisawa ulwa wuvili: Kukwene kiiva mwana wa Nguluvi. Yimba mu litaafili lya Yohana 1:13. Wuli, akwiliile kiyinjila mu wutumbu wa maayi waakwe, baheene asawe khanji?” 5UYeesu wámugomosesa wáaja, “Shiyooli nikikujovela, kusiina umuunu yuna akwiliile kiyinjila mu Wutwa wa Nguluvi, nda asisaviilwe kwa malenga na kwa Numbula wa Nguluvi. 6Umuunu iisawa nu wiihe nu maayi waakwe, leelo iisawa shinumbula nu Numbula wa Nguluvi. 7Usikhaswigaga gina nakujovela kiija, ‘Yisakulwa usawe ulwa wuvili.’ 8Ilipepo likutukha kiluta kuna lisakula. Ukwiliile kipulikha shina likutukha, leelo usingamanya kuna liihuma na kuna liiluta. Shiisho ndeeno kwa muunu yoyoona yuna asaviilwe nu Numbula wa Nguluvi.”
9UNikodeemu wámuposa uYeesu wáaja, “Amaswi aga, gakwiliile wuli kiiva ndeeni?” 10UYeesu wámugomosesa wáaja, “Owe uli mumanyisaaji mutiilwa wa Vaisilaheli, wuli, usigameenye goona aga? 11Shiyooli nikikujovela, ose tigameenye gina tikigalogola, khanji tigaajile gina titaviilila. Leelo omwe musihuviilila ulubedalo lwesu. 12Nikivajovela gina gisenjekha mu nyi muno, leelo omwe musihuviilila. Lino, lusiive lukhamu mandu kunyeenyu kinihuviilila, pina hambi nikivajovela gina gisenjekha kushaanya. 13Kusiina umuunu yoyoona yuna awaahile kiluta kushaanya kwa Nguluvi. Leelo uLusawo lwa Muunu, wáyinsaga kihuma kushaanya kwa Nguluvi.
14“AVaisilaheli pina vali mu lunyikha, uMusa wánosaaga isanaamu ya njokha iya shaaba na kiyitaania mu mupishi,#3:14 Yimba mu litaafili lya Luvaso 21:9. baheene avakuluse. Shiisho ndeeno nayu Lusawo lwa Muunu akhayinsa kitansiwa pa musalaaba, 15baheene avapeele uwuumi wa shiluta avaanu vina vikimuhuviilila.”
16UNguluvi avageene mandu avaanu woona ava mu nyi muno. Lulwene wámuhumyaga kuveene uLusawo lwakwe yuna ali mwene duguli, kiyinsa mu nyi muno, kiija umuunu yoyoona yuna ikimuhuviilila asikhayagaga, leelo awupate uwuumi wa shiluta. 17Kiiva, uNguluvi asikhamufiliishe uLusawo lwakwe mu nyi kivahiga avaanu, leelo kivakulusa.
18UNguluvi asikimuhiga umuunu yuna ikimuhuviilila, leelo umuunu yuna asikimuhuviilila muhije, kwa kiiva asimuhuviliile uLusawo lwakwe yuna ali mwene duguli. 19Uwuhigo wuweene uwu, uwuvalafu wuyinsile mu nyi muno, leelo avaanu vinshi vidobokha kiiva mu nshiisi kishila kiiva mu wuvalafu, kwa kiiva insengo saanave, mbi. 20Avaanu woona vina viigaha amavi, vikiwukhalalila uwuvalafu uwo. Khanji vasiiluta mu wuvalafu, kiija amavi gaanave gasikhawonekhaga bahawuvalafu. 21Leelo avaanu woona vina viigaha aga shiyooli viiluta mu wuvalafu uwo, kiija injendo saanave sive bahawuvalafu, yimanyishe kiija, vikigasenga ago kwa kimutiila uNguluvi.
UYohana uMutwiniaji ilogola imola sa Yeesu
22Gaganile kishila ago, uYeesu na vamanyisiwa vaakwe vaashila mu nyi ya Yudeya. Wáahwa ukho lumo nawo, wáava ikivatwinia avaanu. 23Mu luhaavi lulula, woope uYohana wátwiniaga avaanu mu Ayinoni, nkholeela na mu lijumbi lya mu Salimu, kwa kiiva gakhandi gakwali amalenga minshi. Avaanu vinshi vaaluta kunyaakwe, kiija avatwinie. 24Uluhaavi ulo, uYohana uMutwiniaji akhandi asinaakhatwe na kidindilwa mu shifungo.
25Baheene avamanyisiwa avamonga va Yohana, vayansa kikhaanania nu Muyahuudi yumonga, ulwa ngʼoma ya kiyivalasa. 26Baheene vaaluta kwa Yohana, vamujovela vaaja, “Wee Mumanyisaaji, umuunu yuna ukhandi nawo ku mwambwa yila iya mukhoga gwa Yolodani, yuna watubedelaga imola saakwe, woope itwinia avaanu. Khanji vinshi viiluta kunyaakwe, kishila kunyaakho.”
27UYohana wávagomosesa wáaja, “Umuunu asikwiliile kipata shiinu shoshoona, nda uNguluvi asimupeelile. 28Omwe yuumwe mukinibedela, kwa gina nikigalogola kiija, ‘One nisili yuune Mukulusaaji,#3:28 Mukulusaaji: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. leelo uNguluvi wánifilikhaga one kiija, nilongole pamwandi yaakwe.’ 29Umuhinja yuna itoolwa, isakulwa kiluta kwa mugoosi yuna ikimutoola. One nili ngaja mumanyi wa yuna itoola uwashimaayi, niyiimile mulubali lwakwe yuna itoola, nishendeeva pina nipulikha ishawuti yaakwe. Shiyooli, iliswi ili lishendeefya mandu. 30Yisakulwa uYeesu ave mukhome mandu, leelo one nive munangʼana mandu.”
Imola sa yuna iyinsa kihuma kwa Nguluvi
31Umuunu yuna ahumile kushaanya kwa Nguluvi ana wutawulilwa kivashila avaanu woona. Yoyoona yuna asiihuma kwa Nguluvi, ilogola mwene duguli amaswi ga mu nyi muno. Lulwene kiija, umuunu yuna ahumile kwa Nguluvi yumwene ana wutawulilwa kishila avaanu woona. 32UYeesu itaviilila gina wágaagaga na kigapulikha kihuma kwa Nguluvi, leelo avaanu vasheefu hela vihuviilila kiija, gina ilogola ga shiyooli. 33Umuunu yoyoona yuna ikunda amaswi ga Yeesu, iijinia kiija, gina uNguluvi ilogola ga shiyooli, 34kwa kiiva uNguluvi yumwene yuna wámufilikhaga uYeesu kilogola amaswi ga Nguluvi. UNguluvi amupeelile uLusawo lwakwe uNumbula uMunofu,#3:34 UNumbula uMunofu: Yimba iliswi Numbula uMunofu mu Maswi aMahensa. bila shijelo. 35UDaada uNguluvi amuganile uLusawo lwakwe, woope amupeelile uwutawulilwa uwa kitema ifiinu fyona. 36Umuunu yoyoona yuna ikimuhuviilila uLusawo lwa Nguluvi ana wuumi wa shiluta, leelo umuunu yoyoona yuna asikimuhuviilila asiina uwuumi wa shiluta, kwa kiiva inkhalasi ya Nguluvi yisiyiteneshe kiiva pamwene.
सध्या निवडलेले:
Yohana 3: Shisangu
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2020, Wycliffe Bible Translators, Inc. All rights reserved.