ƐSLA 8
8
Nungei nasia ti gbuani kɔhou hu ti yamani
1Jisia mia ti mbondawuisia le, nasia mua tieni mu gbuani Babilɔn, Mahei Aatasasi mahaya watii hu jisia mia ti mbonda gbambi le: 2Fineasi mbondɛi, Gaasɔmi, Itima mbondɛi, Daniɛl. Devidi mbondɛi, Hatusi gbuani 3Sɛkanaya mbondɛi hu lɔ. Palɔsi mbondɛi, Sɛkalaya tawao hingaa hɔndɔ yila kalɛ numu fele gbɔyɔngɔ mahu puu (150), ti biyeisia nyɛingɔ mbonda gbambi hu taa Sɛkalayani. 4Pahati Moabi mbondɛi hu, Ɛliehoenai Sɛlahaya hindoloi, hingaa hɔndɔ felenga ti biyeisia ti nyɛingɔ mbonda gbambi hu taa Ɛliehoenaini. 5Satu mbondɛi, Sɛkanaya Jahasiɛli hindoloi, tawao hingaa hɔndɔ sawangaa ti yɛnilɔ ngi ma. 6Adini mbondɛi hu, Ɛbɛdi Jonɛtan hindoloi, tawao hinga numu fele gbɔyɔngɔ mahu puunga ti yɛnilɔ ngi ma. 7Iilami mbondɛi hu, Jɛsaya Atalaya hindoloi, tawao hinga numu sawa gbɔyɔngɔ mahu puunga ti yɛnilɔ ngi ma. 8Sɛfataya mbondɛi hu, Sɛbadaya Maikeɛli hindoloi, tawao hingaa numu naani gbɔyɔngɔngaa ti yɛnilɔ ngi ma. 9Joabi mbondɛi hu, Obadaya Jɛhiɛli hindoloi, tawao hingaa hɔndɔ fele kalɛ puu mahu wayakpanga (218) ti yɛnilɔ ngi ma. 10Banai mbondɛi hu, Sɛlɔmiti Josifaya hindoloi, tawao hingaa hɔndɔ yila kalɛ numu sawa gbɔyɔngɔnga (160) ti yɛnilɔ ngi ma. 11Bɛbai mbondɛi hu, Sɛkalaya Bɛbai hindoloi, tawao hingaa numu gbɔyɔngɔ mahu wayakpanga ti yɛnilɔ ngi ma. 12Asigadi mbondɛi hu, Johenani Hakatani hindoloi, tawao hingaa hɔndɔ yila kalɛ puunga (110) ti yɛnilɔ ngi ma. 13Adɔnaikami mbondɛi hu, nasia ti ngɛlɛnima a waa la, ti biyeisia mia a, Ɛlifɛlɛti, Jeiel, kɛ Sɛmaya, tawao hingaa numu sawa gbɔyɔngɔnga ti yɛnilɔ ti ma. 14Bigivai mbondɛi hu, Utai kɛ Sakɔ, tawao hingaa numu sawa gbɔyɔngɔ mahu puungaa ti yɛnilɔ ti ma.
Ɛsla i Livaitisia Gɔkɔlinga Ngewɔ Wɛlei va
15Ngi ti yandɔɔnilɔ njɛi na gblanga a yei Ahava, tawao mu heilɔ na folo sawa va. Kia ngi yɛ a nungaa kɛ saagbuablaa jɔgbɛ, ngii Livai mbonda humɔ gbi lɔni na. 16Na wooma ngi too wienilɔ Ɛliesa gama, kɛ Eɛliɛl, kɛ Sɛmaya, kɛ Elnetani, kɛ Jalibi, kɛ Elnetani, kɛ Netani, kɛ Sɛkalaya, kɛ Mɛsulami, nasia ti yɛni a tookulɔisia, kɛ Joialibi, kɛ Elnetani, nasia ti nɛmahulewengɔ yɛla, 17kɛ ngi ti loonga Ido gama, tokulɔmɔi na i yɛ hindei na ta na loli a Kasifia, ngi ndeilɔ ti ma na ta nde ldo ma kɛ ngi mbaangeisia Ngewɔ wɛlɛ bɔilopoisia mia Kasifia, kɔɔ ti Ngewɔ yengeblaa yoyo mu va yenge va Ngewɔi wɛlei bu. 18Kia mu Yewɔi loko yekpe yɛnilɔ mu ma, ti wailɔ mu gama a nɛmahulewe hindo yila, Mahili mbondɛi hu, Livai hindoloi, Isleɛl hindoloi, na ngi biyei yɛni a Sɛlɛbaya taa ngi hingalengaa kɛ ngi ndeweingaa, ti puu mahu wayakpa; 19gbɔma Hasabaya, kɛ Jɛsaya Mɛlali mbondɛi hu, taa ngi ndeweingeisia taa ti hingalengeisia, ti numu gbɔyɔngɔ; 20i gbua Ngewɔ wɛlɛ bu bɔilopo numu hɔndɔ fele kalɛ numu gbɔyɔngɔi na ma, na Devidi kɛ ngi gbakoisia ti ti gbuani ti ti hie gba kɔ ti yaa yenge Livaitisia wɛ. Ti jisia gbi la gɛnilɔ.
Ɛsla loonga nungaa gulɔ suu houla kɛ Ngewɔ vɛlila hu
21Na wooma ngi suhou jawa lanilɔ na, Ahava yei gblanga, kɔ mu muayekpe ma yei mu Yewɔi gulɔ, kɔɔ i pie mu bawoya majɔɔ muayekpe va jiei ji va mu kama mu lengeisia va kɛ mu hakeisia kpɛlɛɛ va ti mu yeya. 22Ajifa ngi wufeilɔ yɛla mahei vɛli va kɔɔ i mu gɔ a kɔgɔbleisia kɛ somahubleisia mu mabawo va mu gɔnyɔuisia yeya mu jiei hu, gbamaile mu ndenga mahei ma, kɛ mu Yewɔi a nasia gbi mabawolɔ ta lii vala ngi ma, kɛɛ ngi gbayei kɛ ngi liilewei a yɛ nasia gbi ma ta wove ngi ma. 23Fale mu suhouilɔ, mu mu Yewɔi manɛnɛ ji va, kɛ i wolonga mu woisia ma.
Mboyahakeisia Ngewɔ Wɛlei va
24Na wooma ngi numu puu mahu fele gbuanilɔ saagbuablaa yee tokulɔisia lia ngi ti loo gba: Sɛlɛbaya, kɛ Hasabaya, kɛ ti ndeweingaa puuisia tia tieni. 25Kɛ ngi kanigolei humanga, kɛ kanigbɔlu, kɛ hakeisia, kɛ saagbua hani mu Yewɔi wɛlei va, na mahei kɛ ngi lahiiwableisia, ngi gulɔloobleisia, kɛ Isleɛl kpɛlɛɛ ti yɛ na. 26Ngi kanigole gate hɔndɔ weita kalɛ numu fele gbɔyɔngɔ mahu puu (650) kɛ kanigole haka hɔndɔ yila, kɛ kanigbɔlu gate hɔndɔ yila humailɔ ti va, 27kanigbɔlu boola numu gbɔyɔngɔ na ngi jika ngungɔ a kɔpɔ taosin yila, kɛ blɔnsi haka nyandengɔ fele kia lekee kanigbɔlui na. 28Kɛ ngi ndenga ti ma ngɛɛ, “Wu magayemangɔ Ndemɔi gama tawao yee hakeisia ti magayemangɔ; kɛ kanigole kɛ kanigbɔlu yɛni a ndiiyekpe vehani lɔ Ndemɔi gama, wu kɛkɛni ti Yewɔi. 29A ti mahugbee, tawao wu ti lamagbatɛ haaŋ wu ti huma saagbuableisia ti mahangeisia kɛ Livaitisia kɛ Isleɛl mbondawuisia gulɔ mia Jelusalɛmi, haka lamagbatɛmeisia Ndemɔi wɛlɛ bu.” 30Fale saagbuableisia kɛ Livaitisia ti kanigole, kɛ kanigbɔlui, kɛ hakeisia wumbuilɔ kia lekee ti yɛ a huma, kɔɔ ti wa a tie Jelusalɛmi, mu Yewɔi wɛlei bu.
Yamalei Jelusalɛmi gbɔma
31Na wooma mu gbuanilɔ Ahava yeila foloi yee puu mahu felei ma ngalui yee haalayei hu li va Jelusalɛmi; Ngewɔ lokoi yɛnilɔ mu ma, tawao i mu mabawoilɔ mu gɔnyɔuisia yeya kɛ sɔɔwubleisia yeya pelei ma. 32Mu wanilɔ Jelusalɛmi, tawao mu yɛnilɔ na folo sawa va. 33Foloi yee naaniyei ma, ti kanigole kɛ kanigbɔlui kɛ hakeisia humailɔ mu Yewɔ wɛlei bu, saagbuamɔi Mɛlɛmɔti yeya Ulaya hindoloi, tawao Ɛleasa Fineasi hindoloi yɛ na ngi gama tawao Livaitisia, Josabadi Jɛsua hindoloi kɛ Noadaya Binnui hindoloi ti yɛnilɔ ti gama. 34Ti yee jikei kpɛlɛɛ gbawailɔ kɛ ti humanga, tawao ti yee jikei gbi nyɛinilɔ kɔlɔ hu.
35Yee watii na ma nasia ti gbuani kɔhou hu ti yamani, ti mɔ jaahaningaa gbuanilɔ a saa Isleɛl Yewɔi gama, nika hina puu mahu fele Isleɛl gbi va, mbala hina numu naani gbɔyɔngɔ mahu puu mahu weita, mbalalengaa numu sawa gbɔyɔngɔ mahu puu mahu wɔfila, njehinangaa puu mahu fele jumbu jaahani va; ji gbi yɛni a mɔ jaahaningaa lɔ Ndemɔi gama. 36Ti mahei jaweisia veilɔ mahei baagɔma gɔmineisia kɛ kpaalata gɔmineisia wɛ Yufletisi yei wooma; tawao ti gbɔnilɔ nungaa ma kɛ Ngewɔ wɛlei.
सध्या निवडलेले:
ƐSLA 8: RMB
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Mende Bible Portions © Bible Society in Sierra Leone and Lutheran Bible Translators, 2020.