Jɔnə 4
4
Yeso pó Məngyě Samalitan Yitsə̌
1Əghâ ándó Mmaʼmbîə a nə ńjî nə́ ńgə́ Pəfalasi pó zóʼ ńgə́ pɨ pipə nɨ́ nə́ pó nə ńtə́ ndzoŋ ndzəm Yeso a kə́ fɛ̂ nkǐ á mbô pɨ pi nɨ́ nə́ tə ńtsɛɛlə̂ Jɔn lə̂. 2(Lə́ Yeso a nə ḿbə́ ńkě nkǐə á mbô ŋwu tsə̌ fɛ̂ pô, lə́ nə fɛ̂ ngaŋə́zoŋə́ndzəm əjíə.) 3A mɛdtə̂ mboʼ Judya mbɨ ḿbəənə̂ Galiliə. 4Ńchîə á mə́ laŋ nə́ á mboʼ Samalya, 5ńgyǐ ńkwúnə tɔ̂ŋ yitsə̌ á mboʼ Samalya pə́ fóŋə nə́ Sika, ḿbáatə á afoonə Jekɔb páʼ a nə fɛ̂ nə́ á mbô mɔ́ əyǐ Jɔsɛfə. 6Apɛ́lə nkǐ páʼ Jekɔbə a nə ńtóŋ nə́ á nə ńchîə aliʼ yi ə́wə́, Yeso a nə ńnyi tə ńkéenə, ńtíʼ ńnáanə á nəpɛnə́ nə apɛ́lə nkǐ yi ə́wɨ́ ńtə́ ńjwitə̂. Á nə́ ḿbə́ lə́ ándó ntɨ mə́numə.
7Məngyě Samalitan yitsə̌ a yǐəə á mə́ tóʼ nə́ nkǐə, Yeso a sóŋə á mbô yí ńgə́, “Fɛ̂ nkǐ maŋ nô.” 8(Əghâ wɨ́ lə́, ngaŋə́zoŋə́ndzəm əjí ə́ ghɛnə̂ á mə́m tɔ̂ŋə á mə́ jú nə́ məjîə).
9Məngyě Samalitan wə́ a sóŋə á mbô yí ńgə́, “Gho lə́ ŋwu Jus maŋ pə́ məngyě Samalitanə, lə́ ghɛlə̂ akə̂ gho pítə nkǐə á mbô maŋ?” (Ńté ńgə́ Pəjusə pópə Pəsamalitan ə́ kě jínə pô.)
10Yeso a kwěe yí ńgə́, “Gho lə́ pěʼ jî məfɛ̂nə mə́ Əsê, ə́ kə́ jîə ŋwu páʼ a sóŋ nə́ á mbô gho ńgə́, fɛ̂ nkǐ nə́ yə́ á nô tə ḿbə́ gho pěʼ ḿbítə a yə́ a fɛ̂ nkǐ páʼ ə́ fɛ̂ nə́ nchîmbîə á mbô gho.”
11Məngyě wə̂ a sóŋə á mbô yí ńgə́, “Tǎ, gho kě nə́ ajú chî təmbɔʼ gho soŋ nkǐ ə́wɨ́ pô, apɛ́lə nkǐə á kə́ ə́shǐəə, gho yǐ lɔg nkǐ yi ə́wɨ́ páʼ ə́ fɛ̂ nə́ nchîmbî lə́ ə́fó? 12Gho tsɛɛlə̂ a Tǎ əwəg Jekɔb páʼ a nə fɛ̂ nə́ apɛ́lə nkǐ zəənə́ á mbô pəg, ńkə́ ńnô ajíə wɨ́d pópə pɔ́ pí nə məna mí?” 13Yeso a kwěe á mbô yí ńgə́, “Ŋwu ntsəm páʼ a nô nə́ nkǐ ghɛn, nji nkǐ ə́ yǐ pɨ záŋə yə́, 14lə́ ŋwu ntsəm páʼ a yǐ nə́ ńnô nkǐ páʼ maŋ yǐ nə́ fɛ̂ lə́, nji nkǐ ə́ láʼ kě yí pɨ záŋ pô, nkǐ páʼ maŋ yǒ nə́ fɛ̂ á mbô yí ə́ yǒ pə́ lə́ sáʼə́sê nkǐ páʼə ä fɛ̂ nə́ nchîmbî ńkə́ fɛ̂ nchîntɨ páʼ ə́ mɛdnə̂ nə́ ngǎ mɔʼə́ á mbô yə́.”
15Məngyě wə̂ a sóŋə á mbô yí ńgə́, “Tǎ, fɛ̂ nkǐ yí wə́ á mbô maŋ ńjî ńgə́ kɔ nji nkǐ ə́ yǒ ḿbɨ́ ńdzáŋə mə, kɔ maŋ kə́ ḿbɨ ńgyǐəə aliʼə́ nə́ atóʼə́nkǐə.
16Yeso a sóŋə á mbô yí ńgə́, Ghɛn ə́fóŋə a ndú əgho pɨ yí yǐəə.”
17Məngyě wə̂ a kwěe Yeso ńgə́, “Maŋ kě nə́ ndú chî pô.”
Yeso a sóŋə á mbô yí ńgə́, “Gho sóŋə lə́ ndə̌ŋdəŋ ńgə́, ‘maŋ kě nə́ ndu chî pô’. 18Ńté ńgə́ gho nə ḿbɛ́d tə ńdzɔ́ʼ pəlú pɛ́n pə́ tênə, lə́ ŋwu mbyâŋnə pɨ yí chî nə əghâ nə́ lə́, lə́ kě ndú gho pô. Gho sóŋ lə́ ndə̌ŋdəŋə́.”
19Məngyě wə̂ a sóŋə á mbô yí ńgə́, “Tǎ, maŋ jɨ́ ńgə́ gho lə́ ntûsê.” 20Pətǎ pə́ pətǎ pə́g á Samalya pó nə̈ ńgóʼkə Əsê lə́ á ndú nkwəənə ghɛnə̂, lə́ pɨ Pəjusə nə́ sóŋ ńgə́ Jɛlusalɛm lə́ aliʼ páʼ pɨ pə́ chî nə́ á mə́ ghóʼkə nə Əsê ə́wə́.
21Yeso a sóŋə á mbô yí ńgə́, “Məngyě, pímə anu páʼ mäŋ sóŋ nə́, ndɛd tə ńgyǐəə páʼ pə yǒ nə́ kě Tǎ a ndu nkwəənə ghɛn kəənə Jɛlusalɛm pɨ ghóʼkə pô. 22Nə̈ ghóʼkə lə́ ŋwu páʼ nə́ kě nə jî pô, lə́ pəg pə̈ ńgóʼkə lə́ ŋwu pəg jî nə́, ńté ńgə́ mə chwádkə nə́ mə́ fɛ́d lə́ á mbô Pəjusə. 23Lə́ ndɛd ə́ tə́ ńgyǐəə, ə́ pɛ́d tə ńgyǐəə, páʼ pɨ pó ghóʼkə nə́ Əsê nə́ ntɨ́ əghɔ́b ətsəm pó yǒ nə́ ghóʼkə Tǎ á mə́mə ajwi pópə ndə̌ŋdəŋə́, Lɛ̌ mbô pɨ páʼ Tǎ ä lɔ nə́ ńgə́ pó ghóʼkə yə́. 24Əsê lə́ ajwǐə, pɨ pə̈ ghóʼkə nə́ a yí, pó shib ńgóʼkə a yə́ á mə́mə ajwi pópə ndə̌ŋdəŋə́.”
25Məngyě wə̂ á sóŋə á mbô yí ńgə́, “Maŋ jî ńgə́ Yi Ńtsəʼ nə́ wə̂ a tə́ ńgyǐəə (yí páʼ pə̈ fóŋ nə́ nə́ Klisto lə́). Əghâ páʼ a yǒ nə́ yǐ a yǒ zéʼkə áwɛ́n nə́ mənu mətsəmə.”
26Yeso a sóŋə á mbô yí ńgə́, “Maŋ páʼ mäŋ tsáb nə́ á mbô gho, lə́ Yi Ńtsəʼ nə́ yi ə́wə́.”
27Ndzaŋə ándó Yeso a nə ńtə́ nə́ ḿbɛ́lə ńtséebə pó məngyě wə́ lə́ ngaŋə́zoŋə́ndzəm əjí páʼ pó nə ńgɛn nə́ á mə́ jú nə́ məjî lə́ pó pəənə̂. A kɨʼnə̂ ághɔ́b ndzaŋ pó nə́ ńjɨ́ nə́ Yeso a tə́ ńtséebə pó məngyě wə́, ŋwu tsə̌ á mə́m pó a pə́ ńkě anu yitsə̌ pítə ńgə́, Gho loonə̂ lə́ akə̂? kɨ “gho tséebə pɨ yí ńté lə́ ńgə́ akə̂?”
28Əghâ wɨ́d wə̂ məngyě wə̂ a mɛdtə̂ ambáŋə́ nkǐə ají ńtíʼ ńgɛnə̂ á mə́m tɔ̂ŋ ə́sóŋə á mbô pɨ ńgə́, 29“Yǐ nə́ ńdzə́ənə a ŋwu páʼ a fiʼtə̂ anuə atsəm páʼ maŋ nə ḿbɛ́d nə tə ńgɛlə̂ á mə́m nchîmbîə mə. Təmbɔʼ a pə́ lə́ Yi Ńtsəʼ nə́ wə̂?” 30Pɨ pə̂ pó tíʼ fɛ́lə á tɔ̂ŋ ńchúʼə á mə́ ghɛn nə́ á mbô Yeso.
31Əghâ wɨ́d wə̂ ngaŋə́zoŋə́ndzəm əjí pó legtə̂ a yí ə́sóŋ ńgə́, “Ndzéʼkə jî məjîə.” 32Lə́ Yeso a tíʼ ə́sóŋə á mbô pó ńgə́, “Maŋ túg məjîə á mə́ jî nə́ páʼ nə́ kě nə́ anu yətsə̌ ńté mɨ́d jî pô.” 33Ngaŋə́zoŋə́ndzəm əjí tíʼ ḿbítə tətɨ pó ńgə́, “Təmbɔʼ ŋwu tsə̌ a pěʼ ńgyǐəə nə́ məjî ə́fɛ̂ á mbô yí?”
34Yeso a kwěe ághɔ́b ńgə́, “Məjîə mə lə́ mə faʼ nə́ anuə ŋwu yi páʼ a tú nə́ mə́ á lɔ nə́, ə́ kə́ məgə̂ afaʼ páʼ a fɛ̂ nə́ nə́ maŋ. 35Pɨ túgə atséebə́nə́múʼ yitsə̌ páʼ á sóŋ nə́ ńgə́, Nə́ sáŋ nəkwa pə́ yǐ foʼ məjîə, Maŋ fiʼtə̂ wɨ́ ńgə́ nə́ chígə́ ńnáŋ əliʼ páʼ ə́ páatə nə́ áwə́ənə́, nə yǐ jɨ́ ńgə́ məjî mə́ koʼə̂ á mə́ foʼ nə́. 36Ŋwu páʼ a tə́ nə foʼə̂ məjîə afɔ a túg ńtsɔ́ʼə afaʼ əjǐə; məjî páʼ a kyeetə̂ nə́ lə́ pɨ páʼ pó túg nə́ nchîntɨ páʼ ə́ ḿmɛdnə̂ ngǎ mɔʼə́#4.36 Pɨ pó néŋ nə́ ntɨ́ nə́ Klisto ńkə́ ńtúg nchîntɨ páʼ mɛdnə̂ nə́ ngǎ mɔʼə́., ńjî ńgə́ ŋwu páʼ a tə́ nə́ ḿbîə pó ŋwu páʼ a tə́ nə́ ə́foʼə̂, pó pətsəm kyeetə̂ ńkɔŋtə̂. 37Lə́ atsáb páʼ á sóŋ nə́ ńgə́, ‘Ŋwu ndaʼə a pǐ əpú yí ndaʼə a foʼ; lə́ ndə̌ŋdəŋə́.’ 38Maŋ túmə áwɨ́ ńgə́ nə́ ghɛn ə́foʼ məjîə afɔ páʼ pɨ nə́ ńkě nə pǐ pô, pɨ pə́ ndaʼ pó faʼ ə́wɨ́ nə́ tíʼ ə́foʼə̂ á mə́m nətáŋ əghoobə́.”
39Pɨ pə́ Samalitan pipə nɨ́ nə́ á tɔ̂ŋ wə́ kə néŋ ntɨ́ nə́ yí ńté ńgə́ məngyě wə́ a kə sóŋ ńgə́, “A fiʼtə̂ mə nə́ anuə atsəm páʼ maŋ nə̈ ḿbɛ́d nə́ tə ńdáʼ ə́faʼə̂.” 40Lə́, əghâ ándó Pəsamalitan pó nə ńgyǐ nə́ ńdzə́ənə Yeso lə́, ḿbóʼmbô ńgə́ a chî pó po, Yeso a tíʼ ńchî pó po əlěmbî pɛn pɛ̌. 41Ńté anu páʼ Yeso a kə́ sóŋ nə́ pɨ pə́ nɨ́ nə́ pó néŋ ntɨ́ nə́ yə́. 42Pó tíʼ sóŋə á mbô məngyě wə́ ńgə́, “Pəg kě pɛ́d ḿbí ńté lə́ anu páʼ gho nə sóŋ nə nə́ pəg lə́ pô, pəg pí ńté lə́ ńgə́ pəg zóʼə a ngǎ pəgə́, ńtíʼ ńjî ńgə́ lə́ Nchwádkə mbîə.”
Yeso a Tsóʼə Mɔ́ Tə́kɔʼ Ŋwu tsə̌
43Ndzaŋə ándó əlě pɛ́n pɛ̌ páʼ a nə ńchî nə́ pópə Pəsamalitan nə ńdaŋ nə́ lə́, Yeso a fɛ́d ńtíʼə ńgɛnə̂ á mboʼ Galiliə. 44Ńté ńgə́ Yeso nə́ nkɔ̌ʼmbɨ əyə́ a nə́ sóŋ ńgə́ pə́ kě a ntûsê aláʼ pó pímə pô. 45Əghâ páʼ a nə ńkoʼ nə́ á Galili lə́, pɨ pə́ Galili pó kwáalə yí əshîʼnə, ńté ńgə́ pó nə́ ńkə́ ńgɛnə̂ aliʼ Akɔŋtə Ndzáʼkə á Jɛlusalɛm ńjɨ́ mənu mətsəm páʼ a ghɛd nə́.
46Yeso a pɨ ḿbəənə̂ á Kana á mboʼ Galiliə, aliʼ páʼ a nə sɛdkə̂ nə́ nkǐ nə məloʼ lə́. Nətû nə́ ngaŋə́maʼə́ntso yitsə̌ nə́ chîə á Kapanawum, mɔ́ əyǐ a tə́ ńgoonə̂. 47Əghâ ándó nətû nə́ ngaŋə́maʼə́ntso zə́ nə́ zóʼ nə́ ńgə́ Yeso a fɛ́lə á mboʼ Judya ńgyǐəə á Galili lə́, a ghɛn ḿbóʼmbô nə́ yí ńgə́ a yǐəə Kapanawum ńtsóʼə a mɔ́ əyǐ páʼ a nə ńgɔ nə tə ńtíʼ á mə́ kwû nə. 48Yeso a tíʼ ə́sóŋə á mbô yí ńgə́, “Tə ńdéʼtə nə́ jɨ́ əkyeʼmə́nu pópə mənu mi yɛ́d nə́ yɛ́d nə́ pɨ yǐ ńkě ntɨ́ əwɨ́ nə́ maŋ néŋ pô.” 49Nətû nə́ ngaŋə́maʼə́ntso zə̂ nə́ sóŋ nə́ yí ńgə́, “Tǎ, yǐ pɔ̌ ghɛn záʼ móonə mə a pɔŋə̂ kwûə.”
50Yeso a kwěe yí ńgə́, “Ghɛnə̂ á ndɛ̂, mɔ́ əgho a kě yǐ kwû pô.” Ŋwu ə́wə́ á néŋ ntɨ́ nə́ anu páʼ Yeso a sóŋ nə́ nə́ yí lə́ ńtíʼ ḿbəənə̂ yə́. 51Ndzaŋə ándó a nə ńtə́ nə́ ḿbəənə̂, ngaŋə́faʼ əjí tégə yí ńtíʼ sóŋ nə́ yí ńgə́, “Mɔ́ əgho a yáŋə.” 52A pítə ághɔ́b nə́ ndɛd páʼ əfə́g wə́ nə ńchúʼ nə́ á mə́ ḿmɛdtə̂ nə́ mɔ́ ə́wə́, pó kwěe a yí ńgə́, “Lə́ nə́ ḿbə́ á ndzəŋ mə́numə á əzoonə́ páʼ əfə́g wə́ kə měe nə́.” 53Tǎ əyǐə a jî ńgə́ lə́ nə́ ḿbə́ tsɔʼə nə́ ndɛd páʼ Yeso a nə fiʼtə̂ nə́ á mbô yí ńgə́, “Mɔ́ əgho a kě yǐ kwû pô.” A néŋ ntɨ́ əyí nə́ yí ńdzoŋ ḿbegə̂ ŋwu ntsəmə a ndɛ̂ yə́.
54Mə tsóʼ nə́ mɔ́ nətû nə́ ngaŋə́maʼə́ntso ə́wə́ lə́ nə ḿbə́ azoŋkə nkɨʼnənu páʼ Yeso nə́ ńgɛd nə́ əghâ páʼ a nə ńdǒo nə́ á Judya ńgyǐəə á Galiliə lə́.
सध्या निवडलेले:
Jɔnə 4: azo
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन