Zyan 4
4
Zyezu ní Samarii ye céw
1A Zyezu ga gi cán ncan Farisibèle n gi lóʔo woro n tágafɔɔlɔ saʔa taa, ní i be batize a be nɛʔɛ n sɔ̀lɔ Zyan wóbèle na, 2(bi gi taa Zyezu tiimaa ban wi da ni syɛ́ɛnbèle batize í, fwɔɔ wi pìitamabèle,) 3lǎli bee ni a wi yiri Zyude ni n lúru ni syée Galile ma. 4Ki si maa pye ŋàʔanaga kéele wi foro Samarii ni.
5 #
Sél 33:19; Zyoz 24:32 A wi sáà nan Samarii kègaa na, pe i gi yiri Sisyari, Zyakɔbi maa seʔe kaan wi jáaw Zyozɛfu ma, kěgi maa pye ségi bee taana. 6Kɔ̀lɔ́ si maa pye yaà Zyakɔbi wóo. Amɛɛ Zyezu tánʔa n fɔ̀rɔ lè, a wi sáà tɛ́ɛn kɔ̀lɔ́w bee taana. Cángi maa kɔ́ ni maa nyùngo ma.
7A Samarii ye céwaa wɔ́ɔ̀ pan ba kóo. A Zyezu baa wi pye: «Lɔ̀ʔɔ kaan mii ma mii í gbaa.» 8Wi pìitamabèle si maa jée kěgi ni bi sa lìile caa syɔɔ. 9A céw wi pye: «Mɔ i nyɛ Zyefuo, mii si i nyɛ Samarii ye wóo, nyàʔá na mɔ lògbaʔa nyɛ́ɛri mii ma?» (Níì cán Zyefubèle ní Samarii syɛ́ɛnbèle o bɛ̀ɛgí í.) 10A Zyezu wi yari: «Kapye mɔ maa Kolocɔlɔɔ yakaangi cán, ní wee ní wi mɔ pye lè: Lɔ̀ʔɔ kaan mii ma mii í gbaa, mɔ mǎà dée wɔ́ɔ wi nyɛ́ɛri lògaa na, gee gi nyɛ lè sìíw wóʔo, wi mǎà dée gi kaan mɔ ma.»
11A céw wi pye: «Kàfɔw, kɔ̀lɔ́w naa wi cùru lè nya, kɔ̀lɔ́jɛnnɛ si o nyɛ mɔ ma í, sán mɔ a sìi lǒgi bee taa? 12A mɔ kpɔ́ʔɔ lé n sɔ̀lɔ wolo tóow Zyakɔbi na, woro wee wi kɔ̀lɔ́w naa kaan wolo ma lè? Woro tiimaa, ní wi pìíbèle, ní wi yaweeri si maa ni lǒgi naa gbo.» 13A Zyezu wi yari: «Syɔɔn o syɔɔn wi lǒgi naa gbo lè, lògbaʔa a sèʔé ní wi jáa. 14Kàjáa syɔ́ɔnwee faala wi ga mii lòkaangi gbaa lè, lògbaʔa a ní wee bee jáa bi nyaa í, lǒgee mii a kaan wi ma lè, koro a pye wi fúngi ni púloweele bàā púlo sáā fóo bi taa sa nan sìibangwɔɔw na.» 15A céw wi pye: «Kàfɔw, lǒgi bee kàa kaan mii ma, koro ga pye lògbaʔa a ní kɔ́ mii jáa mii í ní pan nɛɛ naa ba kóo í.»
16A Zyezu wi pye: «Da syée mi sa mɔ nanw yeri maa maa.» 17A céw wi yari: «Nàɔn o mii ma í.» A Zyezu wi pye: «Kányɛʔɛ mɔ joo níì jo, nàɔn o nyɛ mɔ ma í. 18Níì cán mɔ maa ni kòró nǎnbèle ma n baa taa kagunɔ. Alí wee má mɔ nyɛ lè tɔ́ɔliw ni, mɔ wóo ban í. Mɔ n tɔ̀nɔ n kányɛʔɛ joo.»
19A céw wi pye: «Kàfɔw, mii n gi nyaa mɔ i nyɛ kanyaajooo. 20Booma ni wolo tóolɛɛbèle maa ni Kolocɔlɔɔ kpɔ̀ʔɔrɔ́ nyanbelegi naa na, á yele si jo Zyerusalɛmi ni Kolocɔlɔɔ tɛɛkpɔʔɔrɔgi nyɛ.» 21A Zyezu wi pye: «Cɔlɔɔ, gee mii a joo mɔ ma lè, ki n yɛlɛ mi tága gi na, làlaa i maa lee ni yele a ba ra Tofɔw kpɔ̀ʔɔrɔ́ lè, ki si a ní pye nyanbelegi naa na í, wàlá Zyerusalɛmi ni í. 22Gee yele kpɔ̀ʔɔrɔ́ lè yele ga gi cán í. Gee si wolo kpɔ̀ʔɔrɔ́ lè wolo n gi cán, níì cán Zyefubèle má syɔɔli yìri. 23Kàjáa làlaa i maa, li si n nan n kwɔ́ɔ, bele be nyɛ lè Kolocɔlɔɔ kpɔ̀ʔɔrɔfɔ-dèlebèle, poro a ra Tofɔw Kolocɔlɔɔ kpɔ̀ʔɔrɔ́ pǐli ní kányɛɛgi na. Níì cán kpɔ̀ʔɔrɔfɔbèle bee félege Tofɔw caa paa woro kpɔ̀ʔɔrɔ́. 24Kolocɔlɔɔ i nyɛ pìle. Bele be wi kpɔ̀ʔɔrɔ́ lè, ki n yɛlɛ paa wi kpɔ̀ʔɔrɔ́ pǐli ní kányɛɛgi na.» 25A céw wi pye: «Mii n gi cán Mesii a kɔ́ pan, (wee be yiri lè Kirisi.) Wi ga pan, wi a ba kérigèle myɛ tɛ̀ɛn wolo na.» 26A Zyezu wi pye: «Jo woro si wi nyɛ mii , mii wee wi nyuu ní mɔ ní lè.»
27Lǎli bee ni a wi pìitamabèle fala n pan. A pe ga baa wi nyaa wi i nyuu ní céw ní, a gi be fúnyi wɔ́ɔ. Koro ní ki myɛ ní pe wàa ga fɔ̀lɔ n wi yíbe níì jo: «Nyàʔá mɔ caa céw naa ma í,» wàlá «nyàʔá na mɔ nyuu ní wi ní í?»
28A céw wi kasǎnni yaʔa kɔ̀lɔ́w taana, níì jée kěgi ni n sáà gi joo syɛ́ɛnbèle ma níì jo: 29«Yaa maa ye ba nànwaa wéle ní mii ní wee, kérigèle myɛ mii kpéʔele lè, wi n ke myɛ cán n joo mii ma. A yele jo lé woro ban wi nyɛ Kirisi í?» 30A be yiri kěgi ni ni syée Zyezu ma.
31Lǎli bee ni a wi pìitamabèle wi pye: «Tamafɔw, ki n yɛlɛ mi ba lìi nya.» 32A wi be yari: «Lìilaa i nyɛ mii ma, lee li lè yele ga li cán í.» 33A wi pìitamabèle i gi nyuu peyɛɛ ma níì jo: «A wàa si tɔ̀ʔɔ́ baa lìilaa kaan lé wi ma láà?» 34A Zyezu be pye: «Gee gi nyɛ lè mii lìíli, koro gi nyɛ mii í da mii Tunvɔw nyɛ́nɛ kèlē kpéʔele sáā wi fáliw forogi. 35Yele o gi nyuu níì jo ki n kòro yeye sicɛrɛ yaliiri làrilaala si náa nan ì? Ye wéle, mii a gi joo yele ma, ye séyi sámaga ye wéle, yaliiri n lɛɛ n kwɔ́ɔ, a di làrilaali nan. 36Wee wi yaliiri lée lè, wee bee i wi sàraw taagi, ní i yaliiri lée ni kpóʔoro sìibangwɔɔw yɛ́ʔɛ na, koro ga pye yaliilùguw ní yaliilaaw, pe myɛ siinw í pye fundaanra na. 37Syɛ́ɛnri naa i nyɛ kányɛʔɛ, dee be nyuu lè níì jo: ‹Wàa i lúru, wàa si i lée.› 38Mii n yele tun, yele í sa yele yaliinaa-sìnvalari láa. Ncan pèle be di fála, á yele baa pye di láafɔbèle di fálafɔbèle fáli báriga ni.»
39A Samarii wóbèle pèle saʔa tága wi na kěgi bee ni, céw joolo báriga ni, àmɛɛ wi da jo lè Zyezu n woro kapyegèle myɛ cán n joo woro ma. 40A pe ga sáà nan Zyezu na, a be wi nyɛ́ɛri níì jo wi canyaa kwɔ́ɔ ní poro ní. A wi canya siin kwɔ́ɔ ní be ní. 41A pèle níì tága Zyezu jooli báriga ni, a poro nɛʔɛ n sɔ̀lɔ wozelibèle na. 42A be céw pye: «Ki ga níì pye mɔ jooli báriga ni wolo tága í. Níì cán wolo tiimaa n wɔ́ɔ baa lóʔo wi ma, níì gi cán woro wi tɔ̀nɔ́ nyɛ dulunyanw Syɔɔfɔlɔ.»
Zyezu n syɛɛnkpɔɔwaa jáa pɔʔɔ
43A cányi bee siin ga kwɔ́ɔ, a Zyezu yiri nɛɛ bee n kári Galile ma. 44#Mat 13:57; Mar 6:4; Luk 4:24 Níì cán wi tiimaa maa gi fílige n joo níì jo: «Pe o kanyaajooo kpɔ́ʔɔgi wi tiimaa tári ni í.» 45#Zyan 2:23 Lǎli ni wi sáà jée lè Galile ni, a wi panni kéele tɔ̀nɔ n Galile wóbèle dɛ́nɛ, ncan kérigèle myɛ wi da kpéʔele lè Zyerusalɛmi ni sériw làla ni, pe maa ge nyaa. Níì cán pe maa wɔ́ɔ̀ pye yaà sériw na.
46 #
Zyan 2:11
A wi níì kári Kana ma ki lè Galile ni, kěgee ni wi da lǒgi kàriga lè dùvɛɛn. Fǎngi syɛɛnkpɔɔwaa jáa maa ni yáa Kapɛrinayumi ni. 47A wee bee ga gi lóʔo Zyezu n yiri Zyude ni n pan Galile ma, a wi kári n sáà wi nyɛ́ɛri níì jo wi kári ní woro ní wi sa woro pìíw pɔʔɔ, wi i yaà ni yáa ni caa bi kùu. 48A Zyezu wi yari: «Yele ga pye yele ga fɛ̀ɛbēle ní kakpoloyo nyaa í, yele o tági í.» 49A syɛɛnkpɔɔw bee jo: «Kàfɔw, da maa wo kári, kapye koro ban í, mii pìíw a kùu.» 50A Zyezu wi pye: «Da syée, mɔ jáaw i yaà sìi na.»
A nǎnw tága Zyezu syɛ́ɛnri na, dee wi joo woro ma lè, níì fala ni syée. 51A wi ga ni syée, a wi sáà fàra ní wi falipyebèle ní kólogi na, a be wi pye: «Mɔ piiw i yaà sìi na.» 52A wi be yíbe níì jo: «Làlìí ni wi pɔ́rɔ?» A be wi yari: «Cànʔaniw lǎli ni cángi nyùngo fàna lè, lǎli bee ni káfalaga jée wi ma.» 53A tofɔw gi nyaa lǎlee ni Zyezu da woro pye lè: «Mɔ jáaw i yaà sìi na,» lǎli bee wonijanna ni pìíw wɔ́ɔ̀ pɔʔɔ. A wi tága Zyezu na, woro ní wi kpáagi wòolo myɛ ní. 54Kakpɔɔgi naa si Zyezu ní baa kpéʔele siin wógi, àmɛɛ wi yiri lè Zyude ni n pan Galile ma lè.
सध्या निवडलेले:
Zyan 4: CB10
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Kolocɔlɔɔ Syɛ́ɛnri © Bible Society of Côte d'Ivoire, 2008.