Luki 21
21
Yakaangee fɔ̀ngɔfɔ-lɔgucewaa kaan lè
(Mar 12:41-44)
1Zyezu maa wi nyúngi yìrige n wéle n lɔ́ri fɔ̀ɔlɔ nyaa pe i be kpɔ́ʔɔri nii wálile-kásuw ni, 2ní wɔ́ɔ̀ lɔgucewaa nyaa a wi támapiigéle siin le yaà, ncan wi maa pye foomɔfɔlɔ. 3A Zyezu jo: «Mii a gi joo yele ma kányɛʔɛ ni, gee lɔguca-foomɔfɔw naa le yaà lè, ki n nɛʔɛ n sɔ̀lɔ bele myɛ wóʔo na. 4Níì cán bele myɛ n wàa wòlo be wonɛʔɛw ni n le yaà. Kàjáa céw naa, wi fóomi ní ki myɛ ní, wi n wi lìíli lɔ́rɔ myɛ le yaà.»
Zyezu n kpɔ̀ʔɔrɔli kpaʔa cáanna kéele joo
(Mat 24:1-2; Mar 13:1-2)
5Lǎli ni pèle da ni nyuu lè kpɔ̀ʔɔrɔli kpaʔa kéele na níì jo pe n gi sámaga ní kàdɛnɛjànya ní, ní Kolocɔlɔɔ kpɔ́ʔɔri yárira ní a gi nyɔɔ, a Zyezu be pye: 6«Yáriri naa yele wéle lè, canyaa i maa yee ni kàdɛnɛgaa faala a ba kòro kàa na lè í, pe a yi myɛ cáan.»
Kagbanyi ní wɔʔɔyi kéele
(Mat 24:3-14; Mar 13:3-13)
7A be wi yíbe níì jo: «Tamafɔw, làlìí ni kérigèle bee a ba kpéʔele? Nyàʔá fɛ̀ɛfeleo wi a kɔ́ ba gi tɛ̀ɛn wolo na wolo í gi cán ke làrigbeʔeleli n nan?»
8A wi be pye: «Yaa yeyɛɛ kɔ̀rɔsíi, yele a kɔ́ syɔɔn faala yaʔa wi yele fáana pùuni í. Níì cán syɛ̀ɛnnɛ saʔa a pan ba ra mii mɛ́ɛgi nii peyɛɛ na si jo poro be nyɛ Kirisi, si ní jo: ‹Lǎli n nan.› Ye a kɔ́ taʔa be na í. 9Yele ga kɔ́ ni kapɛɛngèle toolo ní kàsiikpoloyi kéele lúro lǎlee ni lè, ye a kɔ́ ra fɛ̀ɛgí í, níì cán ŋàʔanaga gii fwɔɔ kérigèle bee myɛ í kpéʔele gbɛnʔɛnɛ. Kàjáa gee bee ban ki a pye gi kwɔ́ɔmi í.»
10A wi níì be pye: «Syɛɛnfelegaa a ba ra tuun kàa na, fàngaa si wɔ́ɔ ba ra tuun kàa na. 11Tári cúngogboloyo, ní kateekpoloyo, ní káfalagi yáama a kɔ́ ba pye tátɛɛyɛ saʔa ni. Fyáari yárira ní fɛ̀ɛkpoloyo si a wɔ́ɔ ba pye nyɛ̀ʔɛni na. 12Kàjáa sáni kérigèle bee myɛ í ba kpéʔele lè, pe a ra yele có bàā wɔʔɔ gbanʔama, sáā yele nii sérikpaayi kútiijoobéle kɔ́yɔ ni, si wɔ́ɔ ra yele nii kàsow ni, si ní da yele kɔ́ri da syée fànʔafɔbèle ní tári kacɔɔnribéle ma mii mɛ́ɛgi kéele na. 13Gee bee a ba pye yele ma séeraw kpéʔelele sábabuwaa. 14#Luk 12:11-12 Ye gi kɔ̀rirɔ ye tímana yele fúnyi ni bi jo yele a tée ra sɔ̀ngí yele syɛ́ɛnri jooganma na sáni lǎli bee í nan lè í. 15Níì cán mii tiimaa wi a nyɔɔsyɛɛnri kaan yele ma n fàra sícilimi na, koro ga pye yele nígoowaa faala a fànʔa taa yele na bi joo yele jáa í, wàlá bàā yele kábala ní wi syɛ́ɛnri ní í. 16Alí yele seefɔbèle, ní yele laayirinyɛnbèle, ní yele narigbaayi wòolo, ní yele tàannyɛnbèle a kɔ́ ba ra yele nii be kɔ́yi ni, pe a ra yele pèle saʔa kúu. 17Yele kéeli a ba syɛ́ɛnbèle myɛ bɛɛn mii mɛ́ɛgi kéele na. 18Kàjáa yele wàa ǹjookanna nibin a tée pùuni í. 19Yele a ba yele sìíw taa yele fɔ̀rɔyi kpàracogo báriga ni.
Zyezu n Zyerusalɛmi kálagili kéele joo
(Mat 24:15-21; Mar 13:14-19)
20«Yele ga kɔ́ɔ̀ kapɛɛnkɔyi nyaa a yi i Zyerusalɛmi máari lǎlee ni lè, ye gi cán ki làrigalagili n nan. 21Lǎli bee ni bele be nyɛ lè Zyude tári ni, ki n yɛlɛ be fàn be kári nyanbeleyi ma, bele si be nyɛ lè Zyerusalɛmi fúngi ni, ki n yɛlɛ paa fé bàā yirigi gi ni, bele si be wɔ́ɔ̄ nyɛ lè séyi ni, ki ga yɛlɛ pe ní kɔ́ jo poro a jée kěgi ni í. 22#Oz 9:7 Níì cán gee bee ki a pye kapeegèle gɔ̀lɔ́-wòloro canya, koro ga pye Kolocɔlɔɔ syɛɛnsɛbɛri myɛ í foro. 23Cébèle bele pe a pye ní fícarigèle ní lè cányi bee ni, ki a tɔ̀nɔ́ gbàn bele bee ma n fàra bele na pe a ra pìibēle kaangi paa ŋɔri lè! Níì cán fɔ̀rɔgbɔʔɔ a pye tári naa na, Kolocɔlɔɔ fundanʔari si wɔ́ɔ kòro syɛ́ɛnbèle naa na. 24Pe a pèle kpóo ní ŋɔséebèle ní, si pèle kɔ́ri kári pe sa pye pulobèlē tátɛɛyi myɛ ni. Syɛɛnfeleyi si a ba Zyerusalɛmi jáa, sáā gi kàfalimi táanri bi taa syɛɛnfeleyi làla í ba foro.
Syɔɔn-pya lúrubanni kéele
(Mat 24:29-31; Mar 13:24-27)
25 #
Eza 13:10; Ezek 32:7; Zyow 3:4; Tɛ̀ɛn 6:12-13 «Fɛ̀ɛ́bèle a kɔ́ ba pye cángi, ní yégi, ní ŋɔripiigèle na. Yɛɛfuugo ní funjurugoro a tɔ̀nɔ́ ba pye syɛɛnfeleyi na tári na, sólomi lɔ́ʔɔ ní gi kùnguruyi tìnmɛ kéele na. 26Kérigèle ge maa ba kpéʔele lè dulunyanw tɛ́ɛyɛ myɛ ni, gele bee sigele fyáakpɔɔrɔ a ba gi kaan syɛ́ɛnbèle í da círigi, níì cán nyɛ̀ʔɛni fàngboloyo a ba cúngo. 27#Dan 7:13; Tɛ̀ɛn 1:7 Lǎli bee ni ‹pe a Syɔɔn-pya nyaa waa maa fàfaangaa ni› ní séew, ní nìjangbɔɔri saʔa ní. 28Kérigèle bee ga kɔ́ baa séli lǎlee ni lè, ye sámaga ye yére, yé yele nyǔnyi yìrige yaa wéle ǹjoʔo ma, níì cán yele nyùnzyɔɔri n nùuni.»
Tamana děsyaantiigi kéele na
(Mat 24:32-35; Mar 13:28-31)
29A wi kàseele wáa be ma níì jo: «Ye děsyaantiigi ní tíiri wozanra kéele wéle. 30Ti ga kɔlɔ, ní kɔ́ ba ni fún á yele di nyaa, yele n gi cán yeyɛɛ ma ncan wɔ̀ɔ́gi n nùuni. 31Anbée si ki a wɔ́ɔ ba pye, lǎli ni yele ga kɔ́ɔ̀ kérigèle bee nyaa ke i kpéʔele lè, ki n yɛlɛ ye gi cán Kolocɔlɔɔ fǎngi n nùuni. 32Mii a gi joo yele ma kányɛʔɛ ni, lǎli naa syɛ̀ɛnnɛ a tɔ̀nɔ́ kwɔ́ɔ í bi taa kérigèle bee myɛ í ba kpéʔele. 33Nyɛ̀ʔɛni ní tári a kwɔ́ɔ, kàjáa mii syɛ́ɛnri a tɔ̀nɔ́ kwɔ́ɔ í.
Gee na gi yɛlɛ wo kòro nyɛ̀nɛ na lè
34«Yaa yeyɛɛ kɔ̀rɔsíi koro ga pye yele fúnyi a kɔ́ curugo làáwologi, ní singbaadinri, ní dulunyanw naa kasɔngugēle kéele na í, kapye koro ban í, cángi bee a kɔ́ ba yele pàla 35àmɛɛ karinyanga gáà yarigaa cò lè, níì cán ki a kɔ́ ba pàlá nan syɛ́ɛnbèle myɛ na be nyɛ lè wodɛ́ɛnbéle ní dulunyanw tɛ́ɛyɛ myɛ ni. 36Ye kòro nyɛ̀nɛ na làrigèle myɛ ni, yáā Kolocɔlɔɔ nyɛ́ɛri, koro ga pye yele í ba fànʔa taa bi syɔɔ kérigèle bee myɛ ma ge maa lè, si taa bi yére Syɔɔn-pya yɛ́ʔɛ ma.»
37Zyezu maa ni syɛ́ɛnbèle tama cányi bee ni kpɔ̀ʔɔrɔli kpaʔa ni cángi làla ni, ní i syée cângwɔɔyi nyɔ́ɔ na Olivye tíiri nyanbelege ma, n sa ni syɔ̀ɔ́n yaà. 38Ki ga pye nyǐngi nyɔ́ɔ na pɛ́ɛn pɛ́ɛn, syɛ́ɛnbèle myɛ n ni syée wi ma n sa ni wi syɛ́ɛnri lúro kpɔ̀ʔɔrɔli kpaʔa ni.
सध्या निवडलेले:
Luki 21: CB10
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Kolocɔlɔɔ Syɛ́ɛnri © Bible Society of Côte d'Ivoire, 2008.