Mataayi 1
1
Bakaa ba Yiisu
1Ma ni makuumbu ma bakaa ba Yiisu Kristo, mwaana a Daavidi, mwaana a Abraami.
2Isaki mwaana a Abraami; Yaakobi mwaana a Isaki; Yuuda na baana banguu ba nde, baana ba Yaakobi. 3Peresi na Zeera baana ba Yuuda. Nguu a bo ali Tamare; Eseroni mwaana a Peresi, na Laama mwaana a Eseroni. 4Aminadabi mwaana a Laama; Nasoni mwaana a Aminadabi, Salamoni mwaana a Nasoni. 5Booze mwaana a Salamoni; na Laabi ali nguu a Booze. Obedi mwaana a Booze, na nguu a Obedi ali Luuta. Yeese mwaana a Obedi. 6Mutini Daavidi mwaana a Yeese.
Salomo mwaana a Daavidi. Nguu a nde ali mukari a Uuli. 7Loboami mwaana a Salomo; Abia mwaana a Loboami; Asafi mwaana a Abia; 8Yosafate mwaana a Asafi; Yorami mwaana a Yosafate; Oziyase mwaana a Yorami; 9Yotami mwaana Oziyase; Akazi mwaana a Yotami; Ezekiyase mwaana a Akazi; 10Manase mwaana a Ezekiyase; Amoni mwaana a Manase; Yosiya mwaana a Amoni; 11Yekoniyase na baana ba nguu ba nde, baana ba Yosiya, mu taanga di babiti baana ba Iseraeli mu bukori ku ngaanda a Babilooni.
12Nha mbisi a nha babiti baana ba Iseraeli mu bukori ku ngaanda a Babilooni, Selatieli mwaana a Yekoniya, na Zorobabeeli mwaana a Salatieeli. 13Abiyudi mwaana a Zorobabeeli; Eliyakimi mwaana a Abiyudi; Azori mwaana a Eliyakimi. 14Sadoki mwaana a Azori; Akimi mwaana a Sadoki; Eliyudi mwaana a Akimi. 15Eleazari mwaana a Eliyudi; Matani mwaana a Eleazari; Yaakobi mwaana a Matani. 16Yoosefi mwaana a Yaakobi; ni Yoosefi me wuu, mulumi a Mari, wuli nguu a Yiisu wu bali mu uta Kristo.
17Litaanga la bisieende bioosi, umatuu mu Abraami natee mu taanga dia Daavidi ali kuumi na bina. Tumake, kuumi na bina umatuu mu taanga dia Daavidi, natee bu babiti baana ba Iseraeli mu bukori ku Babilooni. Na kuumi na bina, umatuu bu babiti baana ba Iseraeli ku Babilooni natee mu taanga dia mbutili a Kristo.
Mbutili a Yiisu
(Luka 2.1-7)
18Mono bwali mbutili a Yiisu Kristo. Mari, nguu a nde, ali na lilasina la makweele na Yoosefi. Ka tswaamini ti bo budiaala itwaari, Mari abayi yimi mu litu la Muheebili wa Ngira. 19Yoosefi wali mulumi a nde, ali muutu wasuungunu. Na bu nde ali a atoono pe umweese Mari tsionyi nha kulu a baata, Yoosefi aholi kesili ya ukabuu na nde mu tsweeyi. 20Bu nde akitsimi ndaa yii, tumu a Pfumu wamumonii mu nziori, wamuleeli: «Yoosefi, mwaana a Daavidi, a ba na boomo mu ukweele Mari pe, mundaa ti mu litu la Muheebili wa Ngira nde abayi yimi lii. 21Mari sa abutu mwaana wa baala, wu we kaaha kuumbu Yiisu, ka mwaana wuu sa avuusu baata ba nde mu masumu ma bo.»
22Maa moosi mayilimi, paa ti maleeli Pfumu mu mubili, mayene tsitsi:
23«Mono, nduumbu#1.23 Nduumbu wu keni a avuutu nyutu na baala pe. sa abaa yimi,
na sa abutu mwaana wa baala,
wu bakaata Emanweeli.»
Mbiindila kuumbu yii: «Nziaambi li na bisi».
24Yoosefi bu asiimbii, ayilii weti bwamutumi tumu a Pfumu, na nde aholi Mari mu uba mukari a nde. 25Ka nde a avuuti mbuu na mukari pe, natee bu Mari abuti mwaana a nde wa baala, wu Yoosefi ahi kuumbu Yiisu.
सध्या निवडलेले:
Mataayi 1: iyxYAK
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2024 (Active) Wycliffe Bible Translators, Inc. All rights reserved.