मत्ति 28
28
येसु म़सुवादाओदाङ्का म़खोन्तालोन्ताओ
मर्कुस १६:१-११; लुका २४:१-१२; युहन्ना २०:१-१८
1सावातोम्खा-लेन चिआकिना नाम्लेन्ओ लेन फ़ऱऱऱवा खादाराङाहिदा मग्दला सहरादाओ मरियम खोन्कि नि मरियम एप्मा खाङ्सि खाराचि। 2मोदा अ़धिवो लुत्लि खारा! देकिनालो निनाम्हाङ्ओ अ़क्छा अ़चुकाफा निनाम्मादुङ्का धाकि लुङ्ताक ह्यात्नि ध़सुखाइसुकि मो दुङ्दा युङा। 3मोसोओ अ़ङाइवा नाम्चिम्पिलेक्वाको खोन्कि अ़तित नाङ्छोरोप्वा छोक्छोक्छोक्वा मुवाङा। 4चाअ़त्लो अ़चुक़माआ काहुङ्चि धुन्तुचि, खोन्कि स़न्दान्वा म़लिसा।
5मेन निनाम्हाङ काफाआ मो मेत्छामाचि लोचि, “खानानिन मान्क़दानिन। अ़ङ्का सिन्तुङ्योङ, खानानिन क्रुस्दा अ़ख़न्तासेराओ येसु त़लामुम्योम। 6खोक्को ओदा मात्द़ङ्चि, देकिनालो खोक्को म़य़ङावात्नि खोक्को म़सुवादाओदाङ्का म़खोन्तालोन्तायुङ्सा। बानानिन, खोन्कि खोक्को अ़युङ्साओदा खानुम! 7हान, च़क्नि खारानिन्कि खोक्कोसोओ अ़चुकाखेङ्पाचि खाएत्तानुम्च़म, खो म़सुवादाओदाङ्का म़खोन्तालोन्तायुङ्सा, खोन्कि खोक्को खानानिन्एदाङ्का आम्नुओ बुबु गालिल्ह्यात्नि म़खात्याङ। खानानिन्आ खोक्को मोदा त़धिरुम। खानुम, अ़ङ्का खानानिन लोनायुङ्नानिन।”
8खोन्किना मो मेत्छामाचि अ़चुक़माआ खोन्कि अ़न्नुनु ऩङानुमाआ च़क्नि एप्मादाङ्का म़खारा, खोन्कि खोक्कोसोओ अ़चुकाखेङ्पाचि खाएत्सि म़लोरा।
9छोङ्तुप्नि येसुआ मोचि लाम्दा म़तुउचिकि म़लोचि, “खानानिन सेवाङ्नि लिसानिन!” मोचि अ़चुच़क्दा म़ताकि खोक्कोसोओ अ़चुलाङ अ़क़क्ता खोन्कि खोक्कोसोओ अ़चुलाङ्दा म़बोम्सान्चिन। 10खोन्किना येसुआ मोचि म़लोचि, “मान्क़दानिन, खारानिन्कि अ़ङ्को अ़ङ्निछाचि गालिल्दा खात्मानि लोवानुम्च़म, खोन्कि मोदा मोचिआ अ़ङ्का ऩखाङ्ङा।”
काहुङ्चिओ य़ङ्खान
11मेन मो मेत्छामाचि लाम्दाङा म़खाराङाहिदा खा-खाक्को काहुङ्चि सहरादा म़खाराकि मुलो काब़क्पाचि मोदा झारा म़लिसाओचिओसोओ अ़तुक्वादा खाम़एत्तुचि। 12मुलो काब़क्पाचि अ़धुवाचिएनान म़कोआन्चिन, खोन्कि मोचि याम़योआकि रात्खामिचि ब़द्धे याङ म़प़चि, खोन्कि म़लोचि, 13“खानानिन य़ङानिन, ‘आन्कान्का अ़खाखुत इम्सिन्दान्काहिदा खोसोओ अ़चुकाखेङ्पाचि म़ताकि अ़चुस़पोक अ़ख़साखात्ता।’ 14धिखाहुप काखाङ्ओ अ़नाबाक्दा ओ य़ङ तालानालो आन्कान्का खो अ़सोम्सेत्तुम्काकि खानानिन रात्नि।” 15खोन्किना रात्खामिचिआ याङ अ़लोआकि म़चिन्तुचिवा म़चुवा, खोन्कि यहुदिचिदा आय़ओ लेन्तारि ओ दुम्ङा फेसायुङ्सा।
येसु अ़चुकाखेङ्पाचिएदा खाङ्म़मुसान्चिन्ओ
मर्कुस १६:१४-१८; लुका २४:३६-४९; युहन्ना २०:१९-२३; छाम्माय़ङ १:६-८
16मो एघारकापाङ्माङ काखेङ्पाचि गालिल्ओ मो भ़ऱदु म़खारा, मोदु खात्मा निकिना येसुआ म़लोचिओ। 17मोचिआ खोक्को अ़खाकि खोक्कोएदा म़बोम्सान्चिन, मेन देम्कापाङ्आ मान्केङ अ़मुवा। 18खोन्कि येसु मोचिएदा म़ताकि म़लोचि, “निनाम्मा खोन्कि हेन्खामादाओ झारा पाङ अ़ङ्का ऩपुवाङ्युङ्साङ। 19खोन्ओसा खारानिन, खोन्कि झारा रावाचि काखेङ मुवानुम्च़म, निनाम्हाङ पापा, अ़चुछा खोन्कि सेङ्लावाओ अ़चुऩङ्दा मोचि बप्तिस्मा पुवानुम्च़म। 20अ़ङ्का खानानिन लोनानिन्ओ झारा य़ङ्चि मोचि मुमा चिन्तानुम्च़म। खानुम, अ़ङ्का जुगाओ आदेङ्तारि अ़धुन खानानिन्एनान युङ्ङायुङ्ङा।”
सध्या निवडलेले:
मत्ति 28: bap
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Wycliffe Bible Translators, Inc. All rights reserved.