मर्कुस 10

छित्‍काछित मुमाओ अ़तुक्‌वादा येसुआ म़चिन्‍तुचिओ

मत्‍ति १९:१-१२; लुका १६:१८

1खोन्‍किना येसुआ मो तेन अ़छिरादाकि यर्दन याङ्‌वामाओ अ़ह्‍याउधेत यहुदिया धिखाहुप्‌ह्‍यात्‍नि म़खारा। खोन्‍कि म़ना मुक्‍लाचि खोक्‍कोएदा म़लासान्‍कोवान्‍चिन, खोन्‍कि खोक्‍कोसाआ अ़धुन्‌वात्‍निङा मोचि चिन्‍मा म़पुङ्‌सुचि। 2खा-खाक्‍को फरिसिचि म़ता, खोन्‍कि येसु चिन्‍माखाङ्‌मा निकिना मोचिआ अ़सेना, “दि दुवाछाआ अ़खिम्‍हाङ्‌मा छित्‍मा य़ङ्‌हुप्‌वा लि?” 3येसुआ मोचि म़सेनुचि, “निनाम्‍हाङ्‌य़ङ खाकालु मोसाआ खानानिन दे ऩलोन्‌युङ्‌सिन?” 4मोचिआ अ़लोवा, “निनाम्‍हाङ्‌य़ङ खाकालु मोसाआ सायाकाम्‍माय़ङ छित्‍मुमा छाप्‍लावा दुवाछाआ छाप्‍माकि अ़खिम्‍हाङ्‌मा छिरुने”नि य़ङायुङ्‌सा। 5मेन येसुआ मोचि म़लोचि, “आम्‍नुओ साकोङ्‌वा ऱक्‍भाक मुवाङाओसा खोसाआ ओ य़ङ्‌हुप खानानिन ऩछाप्‍तिन्‍प़न ओ। 6मेन ‘अ़पुङ्‌चिपुक्‌दाङ्‌काङा निनाम्‍हाङ्‌आ दुवाछा खोन्‍कि मेत्‍छाछा म़मुयुचि।’#पुङ्‌चिपुक १:२७; २:२४ 7‘खोन्‌ओसा दुवाछाआ अ़पा खोन्‍कि अ़मा छिरुदाचिकि अ़खिम्‍हाङ्‌माएनान युङ। 8खोन्‍कि मोचि ह्‍वापोक अ़क्‌तात्‌ङा लिचि।’ खोन्‌ओसा मोचि ह़वाङ माआङ, मेन अ़क पोक लिचि।#पुङ्‌चिपुक २:२४ 9खोन्‌ओसा निनाम्‍हाङ्‌आ म़काम्‍सुचिओचि म़नाआ फेक्‍माचि अ़नुनिन।” 10खोचि खिम्‌दा म़लासाताकिना अ़चुकाखेङ्‌पाचिआ ओ य़ङ्‌ओ अ़तुक्‌वादा येसु अ़लासासेना। 11खोन्‍किना येसुआ खोचि म़लोचि, “साङ्‌आ अ़खिम्‍हाङ्‌मा छिरुकि निएनान सायाकाम, खोसाआ अ़खिम्‍हाङ्‌माओ अ़देङ्‌सालाप्‍पादा ताङ्‌लान मु। 12खोन्‍कि अ़खिम्‍हाङ्‌पा छिरुकि नि म़नाएनान सायाकाम्‌नालो मो ताङ्‌लान मु।”

येसुआ अ़चुप्‍पो छाचि आसिखा म़प़चि

मत्‍ति १९:१३-१५; लुका १८:१५-१७

13खोन्‍कि म़नाचिआ अ़चुप्‍पो छाचि येसुआ म़नोप्‍तुचिकि आसिखा म़प़चिने निकिना खोक्‍कोएदा म़तारुचि, मेन अ़चुकाखेङ्‌चिआ मोचि म़रेन्‍तुचि। 14मेन येसुआ मो अ़खाकिना खोक्‍कोसोओ अ़चुमाइसुङ कारा खोन्‍कि खोचि म़लोचि, “छाचि अ़ङ्‌काएदा तामा पुवानुम्‍च़म, मोचि मान्‍छेक्‍दानुम्‍च़म! देकिनालो निनाम्‍हाङ्‌ओ अ़चुहाङ्‌होन ओ छाचिवाकोचिओ निकिङा ओ। 15अ़नुछ्‍या अ़ङ्‌का खानानिन लोनानिन, साङ्‌आ अ़क्‍छा छाआवात्‍नि निनाम्‍हाङ्‌ओ अ़चुहाङ्‌होन अ़लोउन, मो देम्‍खाछाङ मोदा वाङ्‌मा अ़ऱनिन।” 16खोन्‍कि येसुआ मो छाचि म़हेप्‍तुचि खोन्‍कि अ़चुछुक छाचिओ अ़चुताङ्‌दा अ़युङ्‌साकि मोचि आसिखा म़प़चि।

कातोक म़ना

मत्‍ति १९:१६-३०; लुका १८:१८-३०

17खोन्‍कि येसु मोदाङ्‌का खात्‍मा म़मुवाङाहिदा अ़क्‍छा म़ना लोत्‌याङ्‌सा ताकि खोक्‍कोसोओ अ़चुबुदा अ़तुम्‍प़छ़क तोम्‍तु, खोन्‍कि खोक्‍को सेनु, “अ़नुवाक काचिन्‍पो, अ़लुक्‍निन्‌ओ ह़ङ्‌म़ङ तोक्‍मा अ़ङ्‌का दे च़मादोत?” 18येसुआ खो अ़लोवा, “देकि खाना अ़ङ्‌का अ़नुवाक्‌नि त़लोङाङा? अ़नुवाक ना निनाम्‍हाङ ओन्‍ङा म़मुयाङ। 19खाना निनाम्‍हाङ्‌ओ अ़चुलोमाय़ङ्‌चि ना त़सिन्‍तुङुचि: म़ना अ़सेरिमिन, ताङ्‌लान अ़मुन्‍मिन, अ़ख़सिमिन, सोज्‍जेओ सालुम्‍स़ङ अ़प़न्‍मिन, अ़च़न्‍तिमिन खोन्‍कि आम्‍नुओ पापा खोन्‍कि मामाचि साया मेत्‍तानुम्‍च़म।”#लाम्‌वाङ्‌माय़ङ २०:१२-१६; य़ङ्‌हुप ५:१६-२० 20खोन्‍कि मो म़नाआ येसु लासुलो, “काचिन्‍पो, ओ झारा लोमाय़ङ्‌चि ना अ़ङ्‌का अ़ङ्‌थाङाछादाङ्‌काङा मुङ्‌युङ्‌सुङ्‌च़ङ।” 21येसुआ खो अ़चोवाकिना सोमाअ़तुक्‍ता, खोन्‍कि खो अ़लोवा, “हान्‍छाङ खाना अ़क्‌तात काचि मुमादोत। खारा, खोन्‍कि खानाएदा म़युङ्‌याङ्‌ओ झारा आम्‍सामाचि इनुचिकि मान्‍तोक्‍कादाचि प़चि, खोन्‍कि खाना निनाम्‍मादु चासुम्‍छेन्‍बि त़तोक्‍तु। खोन्‍किना बानाकि अ़ङ्‌का त़ङ्‌ताङ।” 22ओ य़ङ एनुकि मो म़नाआ अ़ङाइवा सेरु, खोन्‍कि खोसोओ अ़मिन्‍मा सुवाकि खारालावा, देकिनालो खोसोओ ब़द्‍धे अ़चासुम्‍छेन्‍बि युङाङा। 23खोन्‍किना येसुआ अ़चुऱङ्‌कोप्‍नि म़खाचिकि अ़चुकाखेङ्‌पाचि म़लोचि, “कातोक म़ना निनाम्‍हाङ्‌ओ अ़चुहाङ्‌होन्‌दा वाङ्‌मा ब़द्‍धे चाअ़त।” 24येसुओ अ़चुय़ङ्‌आ अ़चुकाखेङ्‌पाचि दोम्‍तुदोचि। मेन येसुआ मोचि म़लासुलोचि, “अ़ङ्‌छाचि ओ! निनाम्‍हाङ्‌ओ अ़चुहाङ्‌होन्‌दा वाङ्‌मा ब़द्‍धे चाअ़त। 25कातोक म़ना निनाम्‍हाङ्‌ओ अ़चुहाङ्‌होन्‌दा वाङ्‌मादाङ्‌का ना उता लुप्‍मित्‌ओ अ़खेत्‌दाङ्‌का लेन्‍मालोन्‍मा नुसुम्‍पेन्‍ता लि।” 26अ़चुकाखेङ्‌पाचि अ़न्‍नुनु दोम्‍तुदोचि खोन्‍कि अ़क्‍छा निएदा सेन्‍कासेन म़मुवा, “खोन्‍नालो साङ लेन्‍मा ऱ?” 27येसुआ मोचि नुलोक म़चोउचि खोन्‍कि म़लोचि, “म़नाचिदाङ्‌का ओ लिमा अ़ऱनिन, मेन निनाम्‍हाङ्‌एदाङ्‌का ओ लिमा अ़ऱनिन्‌ओ अ़मुनिनिन। झारा य़ङ्‌चि निनाम्‍हाङ्‌एदा लिमा म़ऱ।” 28खोन्‍कि पत्रुस्‌आ खोक्‍को अ़लोवा, “खानुम, आन्‍कान्‍का झारा सामाचि छिरुम्दोम्‍च़म्‍काकि खानानिन त़ङ्‌निङ्‌नि।” 29येसुआ म़लोचि, “अ़नुछ्‍या अ़ङ्‌का खानानिन लोनानिन, साङ्‌आ अ़ङ्‌को निम्‍पाङ खोन्‍कि नुय़ङ्‌खान्‌ओ निम्‍पाङ अ़खिम माङ्‌लो अ़द़क्‍छा-बुवाचि माङ्‌लो अ़ना-निछाचि, अ़पा माङ्‌लो अ़मा माङ्‌लो अ़छाचि, माङ्‌लो अ़व़क्‍स़ङ्‌चि छिरुचि, 30खोसाआ दुखाएनान सयेकास़रो ब़द्‍धे खिम्‌चि, अ़द़क्‍छा-बुवाचि, अ़ना-निछाचि, अ़मा, अ़छाचि खोन्‍कि अ़व़क्‍स़ङ्‌चि ओन्‍ग़रिङा खोन्‍किना तायाङ्‌ओ लेन्‌दा अ़लुक्‍निन्‌ओ ह़ङ्‌म़ङ तोक्‍तु। 31मेन बुया कालिचि देङ्‌दा म़लि, खोन्‍कि देङ्‌दा कालिचि बुया म़लि।”

येसुआ सुम्‌कादु अ़चुस़माओ अ़तुक्‌वादा खाअ़लुसाओ

मत्‍ति २०:१७-१९; लुका १८:३१-३४

32येसु खोन्‍कि खोक्‍कोसोओ अ़चुकाखेङ्‌चि यरुसलेम म़खाराङा, खोन्‍कि येसु खोचिओ अ़चुबु-बु म़कोलाङा। खोन्‍कि अ़चुकाखेङ्‌पाचि दोम्‍तुदोचि, खोन्‍कि देङ्‌दा काबान्‌चि म़क़सा। खोन्‍कि येसुआ बारकापाङ अ़चुकाखेङ्‌पाचि अ़क्‍चित ह्‍यात्‍नि म़बुत्‍तुचिकि खोक्‍कोएदा तामामुवाङाओसोओ य़ङ्‌चिओ अ़चुतुक्‌वादा खोचि खाएत्‍मा म़पुङ्‌सुचि। 33“एनानुम, आन्‍कान यरुसलेम्‌ह्‍यात्‍नि खारिन्‌येन। मोदा म़नाओ अ़छा मुलो काब़क्‍पाचि खोन्‍कि य़ङ्‌हुप काचिन्‍पाचिओ अ़चुछुक्‌दा अ़पाक। मोचिआ खो सेत्‍मादोत निकिना लाहि अ़पाक, खोन्‍कि निरावाचिओ अ़चुछुक्‌दा अ़पाक। 34मोचिआ खो अ़सुङ, खो अ़थुक, खो य़हुप अ़पाक, खोन्‍कि खो अ़सेत। मेन सुम्‌कालेन्‌दा खो लाखोन्‍लोन।”

याकुब खोन्‍कि युहन्‍नाओ अ़चुछुक फाङ्‌माय़ङ

मत्‍ति २०:२०-२८

35खोन्‍किना जब्‍दियाओ अ़दुवाछा अ़छाचि याकुब खोन्‍कि युहन्‍ना येसुएदा ताचिकि खोक्‍को अ़लोवाचु, “काचिन्‍पो, आन्‍काच्‍या खानानिन्‌एदा दि दोत्‍चिया मोङा त़मेत्‍निप़निनि आन्‍काच्‍या मिन्‍चिङ्‌चिया।” 36खोन्‍कि खोक्‍कोसाआ मोचि म़सेनुचि, “अ़ङ्‌का दि खानाचि मेत्‍नाप़नाचिनेनि त़मिन्‍चिङ्‌चि?” 37खोचिआ येसु अ़लासालोवाचु, “आम्‍नुओ साम्‍स़रिओ हाङ्‌होन्‌दा आन्‍काच्‍याएदाओ अ़क्‍छा आम्‍नुओ चुप्‍ताङ्‌लिप्‍पा खोन्‍कि अ़क्‍छा बेङ्‌साङ्‌लिप्‍पा युङ्‌मा प़नि।” 38मेन येसुआ मोचि म़लोचि, “खानाचिआ दि त़दोत्‍चिङ्‌चि मो खानाचिङा त़सिन्‍चुन्‍चुन! दि अ़ङ्‌का दुङ्‌मादोत्‌ओ दुखाचिओ लाङ्‌चोक्‍खुङ्‌दाङ्‌का खानाचिआ दुङ्‌मा त़ऱचु माङ्‌लो दि अ़ङ्‌का मुमादोत्‌ओ स़माओ बप्‍तिस्‍मा खानाचिआ लोक्‍मा त़ऱचु?” 39खोन्‍कि खोचिआ खोक्‍को अ़लासालोवाचु, “आन्‍काच्‍या ऱचुवा।” खोन्‍किना येसुआ खोचि म़लोचि, “अ़ङ्‌का आङ्‌तुङ्‌ओ दुखाओ खुङ्‌दाङ्‌का खानाचिआ त़दुङ्‌चु, खोन्‍कि अ़ङ्‌का मुङ्‌ओ स़माओ बप्‍तिस्‍मा खानाचिआ त़लोक्‍चु। 40मेन अ़ङ्‌चुप्‍ताङ खोन्‍कि अ़ङ्‌बेङ्‌साङ्‌लिप्‍पा युङ्‌मा प़मा पाङ अ़ङ्‌छुक्‌दा मात्‍द़ङ। मेन ओ ना साङ्‌को निकिना अ़चुम्‍सायुङ्‌सा, खोसोओ निकिना ओ।” 41ओ य़ङ अ़एनाकिना नि दस्‌कापाङ अ़चुकाखेङ्‌पाचि याकुब खोन्‍कि युहन्‍नाएदा अ़चुमाइसुङ्‌कारा। 42खोन्‍कि येसुआ मोचि अ़क्‍नि खोक्‍कोएदा म़बुत्‍तुचिकि मोचि म़लोचि, “खानानिन त़सिन्‍तुम्‌योम्‌ङा, हाङ्‌काचि कामुचिआ निरावाचि चाअ़त्‍लो म़तिमुचि, खोन्‍कि मो अ़धुवा म़नाचि मोचिएदा पाङ म़मु। 43आम्‍नुओ रादा ओवात्‍नि लिमा अ़नुनिन। मेन आम्‍नुओ रादा साङ तोक्‍पो लिमा लाम, खो आम्‍नुओ हारुक लिमादोत। 44आम्‍नुओ रादा साङ बुदाओ लिमा लाम, खो झारासो अ़चुहारुक लिमादोत। 45देकिनालो म़नाओ अ़छाछाङ ब़त्‍लुसि माआङ, मेन ब़त्‍सि, खोन्‍कि ब़द्‍धेकापाङ फोङ्‌माओ अ़लुङ छोन्‍सि निकिना अ़ह़ङ्‌म़ङ प़सि ताओ।”

दोप्‍म़क बारतिमै

मत्‍ति २०:२९-३४; लुका १८:३५-४३

46खोन्‍कि येसु अ़चुकाखेङ्‌पाचिएनान यरिहो सहरादा म़ताला। मो सहरा अ़छिरादाकि अ़धिवो म़ना मुक्‍लाएनान म़खाराङाहिदा लाम च़क्‌दा तिमैओ अ़छा बारतिमै अ़ऩङ मुवाङाओ अ़क्‍छा दोप्‍म़क चाकादोत युङाङा। 47खोसाआ नासरत्‌ओ येसु म़ताङाओ एनुकिना पात्‌याङ्‌सा लो, #१०:४७ दाउद्‌ओ अ़चुछा : ‘मसिह’नि बुत्‍माय़ङ येसुओ नितात अ़चुऩङ। अ़देङ्‌या य़ङ्‌सिवा अ़तुक्‌वाऩङ्‌दा ‘दाउद’ लामानुम।“दाउद्‌ओ अ़चुछा येसु, अ़ङ्‌का सोमातुक्‍नि!” 48ब़द्‍धेसाआ खो “वाइवेत युङा!”नि अ़रेन्‍ता, मेन खो अ़क्‍चित च़लोक पारा, “दाउद्‌ओ अ़चुछा, अ़ङ्‌का सोमातुक्‍नि!” 49येसु म़एवादिसा खोन्‍कि म़लोचि, “खो बुत्‍तानुम!” खोन्‍किना मोचिआ मो दोप्‍म़क म़ना अ़बुत्‍ता, खोन्‍कि अ़लोवा, “आम्‍राक पोइसु! पुवालोन्‍ता! येसुआ खाना ऩबुत्‌याङ।” 50बारतिमैआ अ़बोक्‍खु वेत्‍तुखाइसुकिना तान्‍तालोन्‍ता, खोन्‍कि येसुएदा ता। 51खोन्‍किना येसुआ खो अ़सेना, “आम्‍को निकि अ़ङ्‌का दे मुनानेनि खाना त़मिन्‌याङ?” दोप्‍म़क म़नाआ लासुलो, “काचिन्‍पो, अ़ङ्‌का लामाखाखाङ्‌मा ऱङाने।” 52येसुआ खो अ़लोवा, “खारा, आम्‍साकोङ्‌छ़ङ्‌आ खाना त़नुसायुङ्‌सा।” खोन्‍कि मोन्‍ग़रिङा खो लामाखाखाङ्‌मा रुवा खोन्‍कि लाम्‌दा खोसाआ येसु त़ङ्‌तु।

सध्या निवडलेले:

मर्कुस 10: bap

ठळक

सामायिक करा

कॉपी करा

तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन

बान्‍तावा राईबद्दल अधिक जाणून घ्या

मर्कुस 10