ወንጌል ዘሉቃስ 20
20
ምዕራፍ 20
ዘከመ ተስእልዎ ለእግዚእ ኢየሱስ ሊቃነ ካህናት
1 #
ማቴ. 21፥23-27፤ ማር. 11፥27-33። ወእምዝ አሐተ ዕለተ እንዘ ይሜህሮሙ ለሕዝብ በምኵራብ ወይነግሮሙ ቆሙ ላዕሌሁ ሊቃነ ካህናት ወጸሐፍት ወረበናት። 2ወይቤልዎ ንግረነ በመባሕተ መኑ ትገብር ዘንተ ወመኑ አብሐከ ትግበር ከመዝ። 3ወአውሥአ ወይቤሎሙ እሴአለክሙ አነሂ አሐተ ነገረ ወንግሩኒ። 4ጥምቀቱ ለዮሐንስ እምአይቴ ይእቲ እምሰማይኑ ወሚመ እምሰብእ። 5ወተባሀሉ በበይናቲሆሙ እመሂ ንብሎ እምሰማይ ይብለነ እፎ ኢአመንክምዎ። 6ወእመሂ ንብሎ እምሰብእ ይዌግሩነ ኵሉ ሕዝብ እስመ ኵሎሙ ተአመንዎ ለዮሐንስ ከመ ነቢይ ውእቱ። 7ወአውሥእዎ ወይቤልዎ ኢነአምር እምኀበ ኮነት። 8ወይቤሎሙ እግዚእ ኢየሱስ አነሂ ኢይነግረክሙ በመባሕተ መኑ እገብር ከመዝ።
በእንተ ዐቀበተ ወይን
9 #
መዝ. 79፥8-9፤ ኢሳ. 5፥1-2፤ ማቴ. 21፥23-46፤ ማር. 12፥1-12። ወአኀዘ ይመስል ሎሙ ለሕዝብ ዘንተ ምሳሌ ወይቤሎሙ ብእሲ ተከለ ወይነ ወሤመ ሎቱ ዐቀብተ ለወይኑ ወአክረየ ምክያደ ወሐነጸ ማኅፈደ ወነገደ ርኁቀ ብሔረ ወጐንደየ አቲወ። 10#2ዜና መዋ. 36፥15-16። ወአመ ኮነ ጊዜ ፍሬሁ ፈነወ ገብሮ ኀበ ዐቀብተ ወይን ከመ ይፈንዉ ሎቱ እምፍሬ ወይኑ ወዘበጥዎ ዐቀብተ ወይን ለገብሩ ወፈነውዎ ዕራቆ። 11ወዳግመ ፈነወ ካልአኒ ገብሮ ወኪያሁኒ ዘበጥዎ ወአኅሠርዎ ወፈነውዎ ዕራቆ። 12ወካዕበ ፈነወ ሣልሰኒ ገብሮ ወኪያሁኒ ፈቅእዎ ወሰደድዎ። 13ወይቤ በዓለ ዓጸደ ወይን ምንተ እንከ እሬሲ እፌኑ ወልድየ ዘአፈቅር ለእመ ኪያሁ ርእዮሙ የኀፍሩ ወፈነዎ። 14#መዝ. 2፥8፤ ዕብ. 1፥2። ወሶበ ርእይዎ ዐቀብተ ወይን ተማከሩ ወይቤሉ ዝንቱ ውእቱ ወራሲሁ ንዑ ንቅትሎ ወንርከብ ርስቶ። 15ወአውፅእዎ አፍኣ እምዐጸደ ወይን ወቀተልዎ። 16ወሶበ መጽአ በዓለ ዐጸደ ወይን ምንተ እንከ ይሬስዮሙ ይመጽእ ወይቀትሎሙ ለእልክቱ ዐቀብተ ዐጸደ ወይን ወይሁብ ወይኖ ለካልኣን ወሰሚዖሙ ቃሎ ይቤሉ ሐሰ ኢይከውን ከመዝ። 17#መዝ. 117፥22-23፤ ማቴ. 21፥42፤ ግብረ ሐዋ. 4፥11። ወነጸሮሙ ወይቤሎሙ ምንትኑመ ጽሑፍ ዘይብል «እብን እንተ መነንዋ ነደቅት ይእቲ ኮነት ውስተ ርእሰ ማዕዘንት።» 18#1ጴጥ. 2፥6-8፤ ዳን. 2፥34-46፤ ኢሳ. 8፥14፤ ሮሜ 9፥33። ወኵሉ ዘወድቀ ዲበ ይእቲ እብን ይትቀጠቀጥ ወለዘኒ ወድቀት ላዕሌሁ ትቀጥቅጦ። 19#19፥47። ወፈቀዱ ሊቃነ ካህናት ወጸሐፍት የአኀዝዎ ሶቤሃ ወፈርህዎሙ ለሕዝብ እስመ አእመሩ ከመ በእንቲኣሆሙ መሰለ ከመዝ።
በእንተ ውሂበ ጸባሕት
20 #
ማቴ. 22፥15-22፤ ማር. 12፥13-17። ወተግኂሦሙ እምኔሁ አጽንሑ ሎቱ እለ ይትዐቀብዎ ወፈነዉ ኀቤሁ ሰብአ ዐይን እለ ያጸድቁ ርእሶሙ ከመ ያስሕትዎ በቃሉ ወከመ ያግብእዎ ለመኳንንት ወለመሳፍንት። 21ወተሰእልዎ ወይቤልዎ ሊቅ ነአምር ከመ ጽድቀ ትነግር ወትሜህር ወኢታደሉ ለገጽ ወርቱዐ ትሜህር ፍኖተ እግዚአብሔር። 22ይከውነነሁ ነሀብ ጸባሕተ ለቄሳር ወሚመ አልቦኑ። 23ወአእመሮሙ ትምይንቶሙ ወይቤሎሙ ለምንት ታሜክሩኒ አርእዩኒ ዲናረ። 24ወአምጽኡ ወአርአይዎ ወይቤሎሙ ዘመኑ መልክዑ ወመጽሐፉ ወአውሥእዎ ወይቤልዎ ዘቄሳር። 25ወይቤሎሙ ሀቡ ዘቄሳር ለቄሳር ወዘእግዚአብሔር ለእግዚአብሔር። 26ወስእንዎ አስሕቶቶ በቃሉ በቅድመ ኵሉ ሕዝብ ወአንከሩ ሣእሣአ አፉሁ ወአውሥኦቶ ወአርመሙ።
በእንተ ሰዱቃውያን ወትንሣኤ ሙታን
27 #
ማቴ. 22፥23-33፤ ማር. 12፥18-27፤ ግብረ ሐዋ. 23፥8። ወመጽኡ ኀቤሁ ሰዱቃውያን እለ ይብሉ ኢየሐይዉ ምዉታን። 28#ዘዳ. 25፥5። ወተስእልዎ ወይቤልዎ ሊቅ ሙሴ ጸሐፈ ለነ እንዘ ይብል «ለእመቦ ብእሲ ዘሞተ እኁሁ ወኀደገ ብእሲቶ እንዘ አልቦ ውሉድ ያውስባ እኁሁ ለብእሲቱ ወያቅም ዘርዐ ለእኁሁ።» 29ወሀለዉ እንከ ኅቤነ ሰብዐቱ አኀው ወአውሰበ ዘይልኅቅ ብእሲተ ወሞተ እንዘ አልቦ ውሉድ። 30ወከማሁ አውሰባ ካልኡሂ ወኢወለደ ወከማሁ ሣልሱሂ ወኢኀደጉ ውሉደ። 31ወሰብዓቲሆሙ ከማሁ አውሰብዋ ወሞቱ እንዘ አልቦሙ ውሉድ። 32ወድኅረ ኵሎሙ ሞተት ይእቲ ብእሲት። 33ወአመ የሐይዉ እንከ ምዉታን ለመኑ እምኔሆሙ ትከውኖ ብእሲተ እስመ ናሁ ሰብዓቲሆሙ አውሰብዋ። 34ወአውሥአ እግዚእ ኢየሱስ ወይቤሎሙ ውሉደ ዝንቱ ዓለም ያወስቡ ወይትዋሰቡ ወይወልዱ ወይትዋለዱ። 35#1ቆሮ. 15፥23-53። ወእለሰ ይደልዎሙ ይርከብዎ ለዝክቱ ዓለም አመ የሐይዉ ሙታን ኢያወስቡ ወኢይትዋሰቡ። 36#ሮሜ 8፥23፤ 1ዮሐ. 3፥2፤ ራእ. 20፥6፤ 21፥4። ወኢይትከሀሎሙ እንከ መዊት አላ ከመ መላእክተ እግዚአብሔር እሙንቱ ወውሉደ እግዚአብሔር ይከውኑ ወውሉደ ሕይወት እሙንቱ። 37#ዘፀ. 3፥6፤ ግብረ ሐዋ. 7፥32። ወከመሰ የሐይዉ ሙታን ሙሴሂ ነገረ ዘከመ ይቤሎ እግዚአብሔር በኀበ ዕፀ ጳጦስ አነ ውእቱ አምላከ አብርሃም ወአምላከ ይስሐቅ ወአምላከ ያዕቆብ። 38ኢኮነኬ አምላከ ሙታን አላ አምላከ ሕያዋን ውእቱ እስመ ኵሎሙ ሕያዋን እሙንቱ በኀቤሁ። 39ወአውሥኡ ሰብእ እምጸሐፍት ወይቤሉ ሊቅ ሠናየ ትቤ። 40ወአልቦ እንከ መኑሂ ዘተኀበለ ይሰአሎ።
ዘከመ ተስእሎሙ እግዚእነ ለፈሪሳውያን
41 #
ማቴ. 22፥41-45፤ ማር. 12፥35-37። ወይቤሎሙ እፎኑ ይብልዎ ለክርስቶስ ወልደ ዳዊት። 42#መዝ. 109፥1። ወለሊሁ ዳዊት ይቤ በመጽሐፈ መዝሙር «ይቤሎ እግዚእ ለእግዚእየ ንበር በየማንየ 43እስከ አገብኦሙ ለጸላእትከ ታሕተ መከየደ እገሪከ።» 44ዘለሊሁ እንከ ዳዊት እግዚእየ ይቤሎ እፎ እንከ ይከውኖ ወልዶ። 45#ማቴ. 23፥1-36፤ ማር. 12፥38-40። ወእንዘ ኵሎሙ ሕዝብ ይሰምዑ ይቤሎሙ ለአርዳኢሁ። 46#11፥43፤ ማቴ. 23፥6-7። ተዐቀብዎሙ ለጸሐፍት እለ ይፈቅዱ ያንሶስዉ ተላቢሶሙ ወያፈቅሩ ተአምኆ በምሥያጣት ወነቢረ ፍጽም በውስተ አዕዋዳት ወርእሰ ምርፋቃት በውስተ ምሳሓት። 47#ማር. 12፥40። እለ ይውኅጥዎን ለአብያተ መበለታት ወለምክንያት ያነውኁ ጸሎተ እሙንቱ ይነሥኡ ዘየዐቢ ኵነኔ።
सध्या निवडलेले:
ወንጌል ዘሉቃስ 20: ሐኪግ
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन