Mataio 6
6
Akoakoga ke Fehoahoani ki Tagata Mātitiva
1 #
Mat 23.5
“Ke mautinoa ko autou gāluega lelei, e hē faia i mua o tagata kae ke ki lātou kitea ai autou mea e fai. Kāfai e fai vēnā e koutou nā mea iēnei i mua o tagata, ka hē maua houtou taui mai te koutou Tamana i te lagi.
2“Ko te mea ia, kāfai e fōki hau mea mo he tino mativa, nahe fakapiha lele ke iloa e tagata e vē ko faiga a tagata āmio pepelo e fai i loto o nā hūnako ma luga o nā auala. E fai e ki lātou kae ke maua ai ni o lātou vīkiga. E takutino atu e au ki a te koutou, ko tēnā oioti lava to lātou taui ka maua. 3Kae kāfai e kave hau fehoahoani ki he tino mativa, nahe iloa e te lima tauagavale te mea e fai e te lima taumatau, 4kae ke nahe iloa ai e he tino tau fehoahoani kua fai. E kitea e te koutou Tamana nā mea e fai munimuni, ma ka fōki atu e ia he taui mo koe.
Akoakoga e uiga ki te Tatalo
(Luka 11.2-4)
5 #
Luk 18.10-14
“Kāfai koutou e tatalo, ia koutou nā vē ko faiga a nā tino āmio pepelo. E fiafia oi tutū ma tatalo i loto o nā hūnako ma nā auala kae ke kitea ki lātou e tagata. E takutino atu e au ki a te koutou, ko tēnā oioti lava to lātou taui ka maua. 6Kāfai koe e tatalo, fano ki tō potu, tapuni te faitotoka, oi tatalo ai ki tō Tamana. Ko tō Tamana e hē kitea e he tino, kae e kitea e ia au mea e fai munimuni, ma ka ia fōki atua tō taui.
7“Kāfai koutou e tatalo, nahe koutou fakaaogā ni kupu e lahi e hēai ni uiga e vē ko faiga a tagata nukukehe. E vēakē kāfai e loloa a lātou tatalo oi ka lagona ai ki lātou e o lātou atua. 8Koutou nahe fakatakitaki ki ei. Kua uma te iloa e te koutou Tamana nā mea e fofou koutou ki ei ka ko hēki lea atu koutou ki a te ia. 9E vēnei la kāfai koutou e tatalo:
‘To mātou Tamana i te lagi:
Ke tapu tō igoa.
10Ke pa mai tō Mālō,
ke fai tō loto i te lalolagi e vē oi faia i te lagi.
11Fōki mai i te aho nei#6.11 Fōki mai i te aho nei: pe fōki mai i te aho nei ma taeao. nā meakai e ola ai ki mātou.
12Fakamāgalo o mātou hehē,
e vē oi fakamāgalo e ki mātou ia hehē o iētahi tino ki a te ki mātou.
13Ma nahe takitakia ki mātou ki nā fakaohoohoga,
kae laveaki ki mātou mai te kino.’#6.13 kino: pe Tiāpolo. Ko iētahi tuhituhiga e fakaopoopo ki ei: Auā e o koe te mālō ma te mana ma te vīkiga e fakavavau. Amene.
14 #
Mlk 11.25-26
“Auā kāfai e fakamāgalo e koutou ia hehē o iētahi tino ki a te koutou, ka vēnā foki oi fakamāgalo koutou e te koutou Tamana i te lagi. 15Kae kāfai e hē fakamāgaloa e koutou ia hehē o iētahi tino ki a te koutou, ka vēnā foki oi hē fakamāgaloa koutou e te koutou Tamana, i autou mea hehē kua fai.
Akoakoga e uiga ki te Fakalāina
16“Kāfai koutou e fakalāina, koutou nā mata fakanoanoa e vē ko faiga a nā tino āmio pepelo. E hē teuteua fakalelei o lātou fōliga kae ke matea ai e tagata ko ki lātou e fakalāina. E takutino atu e au ki a te koutou, ko tēnā oioti lava to lātou taui ka maua. 17Kāfai koe e fakalāina, fufulu ō mata ma helu tō ulu, 18kae ke nahe iloa e nā tino ko koe e fakalāina — nā ko tō Tamana oioti, e hē kitea e he tino, te ka ia iloa. Ko te koutou Tamana e ia kitea au mea e fai munimuni, ma ka fōki atu e ia tō taui.
Nā Koloa i te Lagi
(Luka 12.33-34)
19 #
Iak 5.2-3
“Nahe fakaputua ni koloa mo koutou i te lalolagi, auā e fakakino e nā mogamoga ma te palatoki, ma oatu nā tino oi kaihohoa. 20Kae fakaputu ni koloa mo koutou i te lagi, te mea e hē fakakinoa ai e nā mogamoga ma te palatoki, ma hē mafai e nā tino ke olo ki loto ma kaihohoa e ki lātou. 21Auā ko te mea e i ei autou koloa, ka i ei ai foki ma outou loto.
Ko te Mōlī o te Tino
(Luka 11.34-36)
22“Ko nā mata o koe e vē ko he mōlī mo tō tino. Kāfai ō mata e lelei, ko tō tino kātoa ka tumu i te mālamalama; 23kae kāfai ō mata e kino, ko tō tino kātoa ka i te pōuliuli. Kāfai la ko te mōlī i loto o koe ko te pōuliuli, kai te kino ātili lele o te pōuli ka i ei ai!
Ko te Atua ma nā Tupe
(Luka 16.13; 12.22-31)
24“E hēai he tino e mafai ke kaukauna ki ni matai e toka lua; auā ka ita ki tētahi kae alofa ki tētahi; ka fakamāoni ki tētahi kae inoino ki tētahi. E hē mafai koe ke kaukauna uma ki te Atua ma nā tupe.
25“Ko te mea ia e lea atu ai au ki a te koutou, ia koutou nahe popole ki nā ola o koutou, pe ni a te ka kakai ma inu ai koutou; nahe popole foki ki nā tino o koutou, pe ni a te ka kokofu ai koutou. Auā e hē hili atu nei te tāua o te ola i lo nā meakai, ma te tino i lo nā kofu? 26Kikila koutou ki nā manulele: e hē ki lātou totōa ni fatu haito, fakaputu he helehelega ma tuku ki loto o nā fale haito; kae e tauhi pea lava ki lātou e te koutou Tamana i te lagi. E hē hili lele atu nei te tāua o koutou i lo nā manulele? 27E i ei he tino o koutou e ia mafaia oi fakaopoopo he kupita e fokotahi ki tona ola#6.27: fakaopoopo he kupita e fokotahi ki tona ōlaga; pe fakaopoopo he kupita e fokotahi ki tona loa. i te popole ki ei?
28“He ā foki te popole ai koutou ki nā kofu? Kikila ki nā tiale o te vao pe ola vēhea; e hē gālulue pe hui ni o lātou kofu. 29#1 Tup 10.4-7; 2 NT 9.3-6Kae e lea atu au ki a te koutou, ke pa lava ki te Tupu ko Holomona ma te lahi o ana koloa, e hēki ia maua ni kofu mānanaia e vē ko he tiale o nā tiale iēnei. 30Kae kāfai ko te Atua te ia fakakofua te mutia ola vale, te ia e ola mai i te aho nei kae taeao e togi ki loto o te ogāumu ke huhunu, ka hē hili atu nei la ona mautinoa ka ia fakakofua koutou? Kai te taigole ātili o te koutou fakatuatua!
31“Ko te mea ia, koutou nā popole ma lea vē: ‘Ka maua nei i fea ha mātou mea ke kai? pe ko ha mātou mea ke inu? pe ni o mātou kofu?’ 32Auā ko nā mea uma iēnei e popole pea lava ki ei ia tagata nukukehe; ma e iloa e te koutou Tamana i te lagi ko nā mea uma iēnei e manakomia e koutou. 33Kae hakili muamua e koutou te Mālō o te Atua ma nā mea e fofou ia ke koutou faia, oi fōki atu ai e ia ki a te koutou nā mea uma iēnei. 34Ko te mea ia, koutou nahe popole ki te aho taeao; auā ka popole lava te aho taeao ki a te ia lava. Kua lava lava nā fakafītāuli o te aho mo te aho lava tēnā.
सध्या निवडलेले:
Mataio 6: TNT
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Tokelauan New Testament © Bible Society New Zealand, 2009.