Mark 3
3
Iyesu be Yafu ne Wobungkon, te te kone vanten ran, te Farrasi worhu ete rrmelole he en toō kabnu rrbyan.
1Ngate mōl mōn Iyesu te a lon imkon kakae ne tamtamyaōan, te en ōrr ge a vanten hu te rru ge veran te lunglung ge telōn yekya ge he ne seetoto.
2Ngate vanten worhu err ho le, te err rrō uumyarrne Iyesu he ne kone vanten ge a ran Wobungkon. Lor te jeene ge he ene lhe sese te hu ge ne rrwene ge ne kbwiti lingsenean ne Wobungkon, te efe nga halkete nge tebyan.
3Ngate Iyesu te fe byane vanten ge a ge, “Ee, ō totor, te ō me li bwe.”
4Ngate Iyesu te whu nyer ge, “Ran Wobungkon rruan ge mwi yi be nge ma knon e lingsenean? Ma knon e ge eba rrwene rruan ge eb roōne vanten sōn, o ge eba mlone vanten sōn? Bu ten ne ge eb kone vanten an, o eb toō kabnu vanten an?” Te vanten nyer err nga ho rongrong nga.
5Ngate, Iyesu te rrō teteeto nyer, te lon te fri ne nyer, te te lol hane nyer tebyan ge bweter te hel ten. Ngate, te fe byane vanten ge a ge, “Ō seetoto veram.” Ngate, te seetoto veran, te te wu mōl.
6Te Farrasi nyer, err houre lon imkon kakae ne tamtamyaōan, te belbel ten nga err kukur krine ge nyer ge err ho en tahi Herrot. Te ete rrwene sarōan hu ge efe toō kabnu Iyesu.
Iyesu te hrene mwenan vanten ne ōman nyer err ve 12.
7Mōl mōn, Iyesu krinen mwenan vanten nyer err yel metenen ōrr ge le, te err vya bon Tee Kakre Kalili. Te vanten err ve lol, err rrō rrutōn te err me tamtee ran vere ge rrlam Kalili,
8te Jutia, te lon tan ne ōrr Itumia, te besaō ge rrlam Jerrusalem, te en tahi Wehal Jotan bya en ōrr ge yal rrō fngifngi en, te en ōrr ge be fyaasi ne besaō ge nyerō a, Taea te Saeton. Vanten ge nyer a err me ne Iyesu nga rrbyan ge err rongtane sese ge Iyesu te rrō rrwene nyer.
9 #
Mak 4:1; Luk 5:1-3 Te tebyan ge vanten err ve yel ten ho, Iyesu te fe byanen mwenan vanten nyer ge efe nangnangne afloo kakae te hu ge e vya tataa ran, tebyan ge vanten nyer err rrō ho rrmurrmu nge.
10Nge te kone vanten lol ne mesean ge nyer a. Te rrwene ge vanten rrute ge ete mse mang ho, err rrō ho rrmurrmu Iyesu ge en tongve nge.
11Te ngamto vanten ge nyer ge sōnhal te ho rar, err rrō lhe Iyesu, err rrō murr mō ne nge, te err rrō fwifwir bya mre ge, “Neng ōm be Terere Mleng Genti Yafukon.”
12Te Iyesu te rrō sur te hel byane sōnhal ge nyer a, te rrō surgoro nyer ge efe lōn fe ge nge be Terere Mleng Genti Yafukon.
13Ngate, Iyesu te fngi bya ran bukōkō, te te je vanten nyer ge nge te rrmelole. Ngate, err me ne nge.
14Te te hrene vanten te e 12, te te lngi ee ne #3:14 Rral ne abosol ge a be Greek, te ran tolongken be abhyobhyor. Rral ge nyerō a mōrō yiyi nga ho. Te lon Tuuankon err rrō fe abosol ran vanten ne ōman mwena Iyesu ge Iyesu te rrō hutamne nyer.abosol rar. Nge te lngi nyer ge efe rrutōn, te nge eb hutamne nyer efe a suuto rral ge rrwu lon #3:14 Myayan rrō saarōne vanten hu ge rrō yel, o rrō bhyor, o rrō rrwene ōman hu mwenan vanten ge mu hutamne rru. myayan.
15Te te sene mwenan helan bya rar ge efe a korkuku sōnhal metenen vanten.
16San abosol, ge be 12, nge nyer a: Saemon, ge Iyesu te lngi san ge sōn, nge Bita,
17te Jemes krine taalan ge Jon ge mōrō e teere mwena Sebeti. Iyesu te lngi ee hu rarō nge, ‘Boanejes,’ ge me fe ‘ntin byalta’.
18Te Antrru, te Filib, te Batolemiu, te Matyu, te Tomas, te Jemes ge be teere mwena Alfeas, te Tateas, te Saemon ge be #3:18 Selot be rral ge rrō fe ge ngamto nga vanten rrō rrinrrin hel hel ne sese hu. Mwe yen vanten hu ne bolitik. Te terere mleng hu ne woye tōtōrr. Saemon te e vanten hu ne bolitik myarin. Te bone ge le te lngilngi tebya Iyesu. Selot hu,
19te Jutas Iskarriot ge te jerrne Iyesu ge err toō kabnu.
Si nge em ho lon buluim ma Iyesu? Vanten ge em rrō rrwene temelolean mwena Yafukon. Te nyer ge err rrlō rrō rrinkete ōman ne Nin Myuran Kon, Yafukon eb lōn rrumyune nyer.
20Mōl mōn, Iyesu te la mōl me bsaō. Ngate, vanten err rrlam, err rrō me ne nge mōn. He en yen fona lon liyal ge le, te telōn e ngrengre ge he en yen!
21-22 # Mat 9:34; 10:25 Te vanten worhu err rrō fe ge, “Vanten ge a be burrnerrne rru!” Te vanten ne wuhuran ne lingsenean ge err me Jerrusalem, err me en ōrr ge a te err rrō fe ge, “Bielsebul, yafu ne sōnhal nyer, nge mu rru ran vanten ge a. Iyesu rrō ōm myaya Bielsebul nga. Ma rrwene ge mwe yekya ge rrō korku sōnhal metenen vanten.” Bone ge man buluim, err rongtane rral nan, err me ge en gurrku nge.
23Te bone ge Iyesu te rongtane rral nan, te je vanten ge nyer a, err me fyaasi ne nge. Te te fe #3:23 Tabarryean be sarōan hu ge rrō surfyaara sese hu ge te lo rro lhe an. Iyesu te saarōne tatabarryean tebyan ge vanten nyer ge lolor te hel ten, err rrlōn yekya sene rral ge rrwu ne limhian mwena Yafukon.tabarryean hu byane nyer, “Gimi, mim rrō rrme he Setan ma kya eb korku Setan!? Tōlō ngrengre eb yi le.
24 “Mwe yen ge he yafu hu rrlam ne vere hu mwenan vanten nyer efe felbaba nyer, te nyer rrute efe rrō surtōwōrrwō nyer rrute, tōlō ngrengre vanten nyer, mwenan yafu ne vere ge a efe ho kii.
25 “Te he lon buluim hu, vanten ge nyer le efe rrō felbaba nyer wor eve ru, buluim ge le tōlō ngrengre efe ho kii.
26 “Te ge he Setan eb rrō bal mōl byane nge nga, te eb rrō felbaba nge nga, tōlō ngrengre eb rru kii, nge eba me rranga.
27 “Tōlō ngrengre vanten te hu e vya lon im man vanten helhel te hu, ge eb holkuku hilngin. Ge he eba rrmelole ge eb yi le, eve mō eba lvyalvya vanten helhel ge le bwe. Ngate eb nga vya holkuku hilngin.
28 “Fetinan, nam rrō fe byane gimi, Yafukon ma kya eb rrumyune hakbean ge vanten ma rrwene, te rral ge nyer ge rrō surteherrhe vanten sōn an ne.
29 # Luk 12:10 “Te ge he vanten hu ge eb surteherrhe ōman ne Nin Myuran Kon, Yafukon tōlō ngrengre eb rrumyune mwenan hakbean wobung te hu. Vanten ge rrō surteherrhe Nin Myuran Kon mwi yi le, mwenan hakbean eb rru ngamto nga eb lōne nong wobung te hu.”
30Iyesu te rrō sur te yi le, tebyan ge, teemō, nyer err rrō fe ge nge sōnhal hu te rru ran.
31Ngate, taalan nyesul krine rahen, tesu me tamtee en ōrr ge a. Tesu fyarr houre bon im, te tesu sene rral byane Iyesu ge eba me lhe nyesul.
32Lon liyal ge le, vanten te lol err taa goro Iyesu rru, te err fe byanen ge, “Ee, rahem krinen helam te iunyem nyesul musu houre. Musu rrmelole ge ebsu lhe neng.”
33Te Iyesu te fe, “Si nge be raheng, te si nge be helang?”
34Ngate nge te lhe vanten ge nyer ge err taa goro rru, te te fe ge, “Gimi nge, mim be raheng, te gimi mim be helang nyer.
35 “He gimi hu ge rrō rrwene temelolean mwena Yafukon, nge nge be taalang, te be iunyeng, te be raheng.”
सध्या निवडलेले:
Mark 3: mmg
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Wycliffe Bible Translators, Inc. All rights reserved.