Ap'u 15
15
A Mlin Eia ituran an a Epram a ti a natn ipaiak
(Isrel 11:8-10)
1Itauatah a si lera v'nenan a Mlin Eia ima asn a Epram naran im'atr kala sei, kavr ani, kavr ti a, “Madedrn, Epram. Kana nv'i sil itukarh arna naur. Ulienam ipalil istudau.”
2V'eti a Epram ivr ani, kavr ti a, “?Mlin Lil Atua, patu v'ata a kana, sena ti a natk ihei? Dui ipalev' siak udlani naran p'am'a iv'i a Eliesa, iv'i dui a Tamaskas.” 3A Epram ivri ml kavr ti a, “Palei, kdatu kana mardel kinkin pr. Sena si lera, dui na m'akarienak, la iak al nmahak ha, ipalev' siak udlani naran p'am'a.”
4Laha, v'nenan a Mlin Eia ima asnn, kavr ti a, “Dui lera ikalev' siam udlani naran pam'a, v'eti a natm la ipandan al p'akm ha ipalev' siam udlani naran pam'a.” 5#Rum 4:18; Isrel 11:12.Laha, iv'av'ei kauirv'a av'aran, kavr ani, kavr ti a, “Pap'a p'knaran eia kaspandina msi, ipavr ti krndu ti paspan udlanr.” Laha, ivr ani, kavr ti a, “A natm apavnelnal ipanap'i lera.”
6 #
Rum 4:3; Kalesia 3:6; Sim'is 2:23. A Epram iv'ah a Mlin Eia, laha ilei inep'a ti iviviln.
7Sarei, ivr ani, kavr ti a, “Kana nv'i a Mlin Eia la nv'av'ah kdan arna nut a Ur a Kaltia ha, a ti p'etu nadep' laha anh ipav'i nkam.”
8Laha, ivr ti a, “?Mlin Atua, p'erndu ti nadep' laha ipav'i nkak ipanap'i?”
9Ivr ani, kavr ti a, “Pauirma asnk prapar na pluk ipamk, paian ipatl, prapar na nani ipamk, paian ipatl, pua na sivsiv ipamk, paian ipatl, m'a navimar ipamk, m'a vntau ipamk--nki iak ser.” 10Sarei, iuirv'a si udlani lera asn Atua, katrpaprr arna p't nut nar, kalev' tv'eliel nen kataui arna nut iruru, v'eti iatrprr m'anh arna p't nut. 11Laha, naran vultsa (la avv'i m'anh lilil ha) avrama a nadep' a ti apavhan sei im'a, a Epram itp'av'r avruh.
12 #
Sup 4:13,14. Sarei, naran neiel ihih ti ipatpl, m'etrien lil iamk ima aranan a Epram, sarei ti im'atr vnapn. Arna naran lera, dedrenien lil m'a m'alk lil iamk ima aranan. 13#Avruh 1:1-14; Parei 7:6.Sarei, Atua ivr an a Epram kavr ti a, “Parndu mamh ti a natm apavv'i v'anudl arna v'anu ipamk la iav'i nkar ha, kavv'i m'ertu na m'akarienar. Laha, apavutakm anr pai ipanelnal ipav'av'a (400). 14#Avruh 12:40,41; Parei 7:7.V'eti Kana p'utakm a v'anu la ipani ti apavrama kavv'i m'ertu na m'akarienar ha. Itauatah, apavruh m'a siar ipastuduet. 15V'eti nakm pam'a uaki arna tamat kap'lt m'er arm'ertarep'am. Apatinah naran patrtarep' dau. 16V'eti arna naran a m'hip'r a m'hip'am apavm'alet ml atlaha, sena ti si stuar ardu Amur idahiris udlani uam.”
17Dav'a, naran neiel itpl nut im't, parn, uaven iamk ienap' iendan a nln, m'a nel iamk iv'en, arv'el a p't nut na pnpna si slm lahara. 18#Parei 7:5.Arna napn lera a Mlin Eia ien turanien m'ei a Epram kavr ti a, “Nttu sera nadep' laha an a natm, tv'eliel ipater arna nauei a Itsip, tv'eliel ipaier naui lil iv'i Iuvretis. 19Iv'i nadep'ar ardu a Ken, ardu a Kenas, m'er ardu a Katmun, 20m'er ardu a Het, ardu a Peris, m'er ardu a Rivaim, 21ardu Amur, ardu a Kenan, ardu a Kirkas, m'er ardu a Sepus.”
सध्या निवडलेले:
Ap'u 15: nmb
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023 Presbyterian Reformed Church of Australia