Ap'u 25
25
A Epraham iuei a Ketura
(1 Krunikel 1:32-33)
1Sarei, a Epraham iua tav'et ml iamk, nahan iv'i a Ketura. 2Hin ilev' a Simran asnn, a Suksan, a Mitan, a Mitian, a Ispak m'ei a Sua. 3A Suksan iv'i a tetian a Sipa m'ei a Titan. A natn a Titan avv'i ardu Asur, ardu a Letus m'er ardu a Leum. 4A natn a Mitian avv'i a Iva, a Iver, a Hanuk, Apaita m'ei a Elta. Hir udlani avv'i a natn a Ketura.
5Laha, a Epraham itu sian udlani an Aisak. 6V'eti a Epraham ituvn a sei anr a natr tav'etan uraur, katap'er avrav'a arna v'anu iter arna Is, naran idsilv' uam, a ti amavlak m'ei Aisak, iv'i a natn. Itap'er avrav'a arna nut a Ketem.
A Epraham im'a
7Ki laha iv'i pai udlani na silv'ienan a Epraham. Paian ier inelnal iv'amk pln ilm' (175). 8Sarei, a Epraham iam'im'in ml, kadam'a naran paian inelnal istudau. Ittrtarep' dau, atini ip'lt m'er a tetian udlani. 9Laha, a natn arru, Aisak m'ei a Ismail, artini al navap a Mahpela, arna nadep'an a Evrun, iv'i a natn a Suhar, dui a Het. Nut nen imima asn nut a Mamrei, 10#Ap'u 23:3-16.iv'i nadep' a Epraham iuli asnr ardu a Het. Atin a Epraham atlera m'ei a naun, iv'i a Sera. 11Dav'a, itauatah a m'ienen a Epraham, Atua imhmah an Aisak, a natn. Laha, Aisak ilak asn tah na nauei iamk, nahan iv'i Lahai Rui.
Nl nam'elan a Ismail
(1 Krunikel 1:29-31)
12Ki laha iv'i nl nam'elan a Ismail, a natn a Epraham, la Heka, iv'i tav'et a Itsip ha, kav'i vitar na m'akarienan a Sera, ilav'i asn a Epraham. 13Hilaha nahar a natn a Ismail. Nahar iviviln a naran aviak. A natn titiamu nan a Ismail iv'i a Nepasut, itauatah a Kitar, Atpil, a Mipsam, 14a Misma, a Tuma, a Masa, 15a Hatar, a Tema, a Setur, a Napis, m'ei a Ketema. 16Ki laha avv'i a natn a Ismail m'er nahar udlani, iv'iv'en v'anu lilar m'a nl nam'elar, mlin inal lman iru iviviln a v'anuar. 17Ki laha iv'i pai na silv'ienan a Ismail, pai inelnal iv'amk pln ineltl pln isaru (137), sarei, iam'im'in ml, atini ip'lt m'er a tetian udlani. 18Avlak arna nut a Havila dav'a ier a Sur, iter arna tv'eliel na nut a Itsip, arna nut neiel itpeia dan, naran ksapa navanel ipav'a asn nut Asiria. Hin ilak m'er arm'ertu udlani arna nl nam'elan.
A Isau m'ei a Sikup aviak
19Ki laha iv'i pla nl nam'elan Aisak, iv'i a natn a Epraham. A Epraham iv'i a tetian Aisak. 20Naran paian inelv'a (40) Aisak iua tav'etan, iv'i a Ripeka, iv'i a natn a Petuel, iv'i dui a Siria arna nut a Patan Aram, kav'i a v'nn a Lapan iv'i dui a Siria. 21Aisak itu tamat asn a Mlin Eia sena tav'etan, sena ti ialev' sei. Sarei, a Mlin Eia ivrpren tamatan, dav'a ti tav'etan, iv'i a Ripeka, itkar. 22V'eti a natn artp'tp' hir a nln a uniar. Laha, ivr ti a, “?Ipavr ti inap'i lera, si lera ier kana sena v'ata?” Laha, kadav'a kamimani asn a Mlin Eia.
23 #
Rum 9:12. Sarei, a Mlin Eia ivr ani, kavr ti a, “V'anu iru iter al v'atm. M'ertu ururaur aparru aparandan al p'akm. Tv'el v'anu ipahua kasiv' tv'aln. Laha, titiamu ipav'i dui na m'akarienan a titiatah nan.”
24Naran ier napn iviviln a ti tav'et ipalev' a natn, parn, m'elev'ru arlak al v'atn. 25Titiamu iak p'akn im'iel. Niln inpakar p'akn udlani. Laha, avtu nahan ani iv'i a Isau. 26Sarei, titiatah iak kauada plah tln a Isau. Laha, atu nahan iv'i a Sikup. Hin Aisak paian inellm'sei (60) naran tav'etan ilav'r.
A Isau iulul a nut hua na titiamu asn a Sikup
(Isrel 12:16)
27Dav'a dui pa arma karlilil. A Isau iv'i dui lil na raharahien, kav'i dui ilak al lili nakl, v'eti a Sikup ilak ms uaki nakl al nmah kanuis. 28Aisak ilap'as an a Isau sena ti ihan si dedrn nakl, v'eti a Ripeka ilap'as an a Sikup.
29A Sikup iukuk lasuv, dav'a ti a Isau ima, naran itraharah sarei. Np'n istu ihuadau. 30Kavr an a Sikup kavr ti a, “Pamsnen kana a si m'iel lera, sena ti np'k istu” (Sena si lera atu nahan ani, iv'i a Itum).
31V'eti a Sikup ivrprani, kavr ti a, “Pulul a nut hua na titiamu ipav'i nkak.”
32A Isau ivr ti a, “Palei, kana nut pa ti p'am'a. ?Nut hua na titiamu ipamhmah a kana ipanap'i?”
33 #
Isrel 12:16. A Sikup ivr ti a, “Pah lm'am katuran asnk arna dika laha.” Laha, iah lm'an katuran asnn, kulul a nut hua na titiamu asn a Sikup. 34Sarei, a Sikup ilev' p'ret m'a lasuv, la riku iter a nln ha, katau an a Isau. Laha, ihatat kam'nm'n kap'tir kadahau. Inap'i lera a Isau isip'len nut hua na titiamu.
सध्या निवडलेले:
Ap'u 25: nmb
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023 Presbyterian Reformed Church of Australia