Luku 21
21
Enda Walyakae Mendeme Opaa Maiyamo Doko
1 #
Make 12:41-44
Lotuu anda nee nyetae dokonya opaa pyandenge penge dokonya yuunya kamongo dupame muni pyandeaminopa, Jisasame kandamao kandea. 2Dokopa enda walyakae daa jepae mendeme muni konde yakane lapoma pyandeamo kandea. 3Kandatala baame lao pituu, “Nambame nyakama kiningi langilyo: Enda walyakae daa jepae dakeme muni pyandalamo dokome, endakali waka dupame muni pyandalamino dupa pitaka ita minao pyandalamo. 4Endakali dokaitame nyakamanya muni longo sipya dupanya kakana nyoo Gote opaa maiyamino. Dopa piminopa, enda daa jepae dakeme baa tange napenge sipya dupa pitaka pyandalamona” lea.
Lotuu Anda Nee Nyetae Doko Kaluu Nepatamina Leamo Doko
5 #
Matyu 24:1-2; Make 13:1-2 Kana auu pipaepi, opaa maitaepi, dupame lotuu anda nee nyetae doko yati petae kalyamona lao endakali mendapuame leaminopa, Jisasame lao pituu, 6“Gii doko ipatamopa, nyakamame kandelyamino datupa dopa petae katena lao kaeyala naenya kaluu nepataminopa, kana mendaipi mende namba-namba petae nakatatana” lea.
Tanga Pita Dupanya Leamo Doko
7 #
Matyu 24:3-14; Make 13:3-13 Dopa leamopa endakali dokaitame baa tipa pyoo, “Mana Lenge, embame lelyeno dutupa gii andukupa pita? Dutupa pyaanya tengesa pitamopa, kongali aipale mende pitape?” leami. 8Dokopa Jisasame lao pituu, “Endakali mendeme nyakama minakasetana, kandao kalyepape. Aipumape, endakali longo mendapu nambanya kengenya ipupala lao pituu, ‘Namba akali dokona’ latami. ‘Gii doko tengesa ipatelyamona’ latamiaka. Dopa lataminopa, nyakamame dokaita watao napupape. 9Dokopa yanda andake mendapu pilyamino lapaepi, endakali dupame gapomane yanda pimailyamino lapaepi, dupa sepala nyakama paka nakaeyalapape. Dopale dupa wambao ipupenge. Dopaka doko, yuu etapenge gii doko, dokopa yapa naipatana” lea.
10Dopa latala baame dokaita lamaiyoo, “Akali tata mendeme akali tata mende yanda pimaita, kingdom mendeme kingdom mende yanda pimaita pitami. 11Yuu mendapuanya titiwali andake dupa minata, lopo andake dupa sepa, endakali longo-kisa yainame andinyeta pita. Kaiti-kisa katao makande paka pipaepi, mirakolo andakepi, dupa petae ipataka. 12Dopaka doko, dopale dupa pitaka ene pyaanya pitamopa, nyakamame nambanya kenge doko lao panelyamino latala, endakali dupame nyakama anjetala, tanda dyoo koeyasetala, lotuu andapi, anjingi andapi dupanya laminao patami. Laminao pupala, kiŋipi, gapenapi dupanya enombanya katasetami. 13Dopa pitami dokome, nyakamame kandelyaminopi, silyaminopi dupa lao panalapale lao kaitini mende setakatami. 14-15#Luku 12:11-12Pii lapengepi, masepae epepi, dupa nambame nyakama ditopa, nyakamanya yandapipi dupanya mendaipi mendeme kapa pao nyakamanya pii tanga laa naeyao, nyakama ita minala naeyaowaka pitami. Dopana, nyakamame pii dupa aipa pyoo yanu pyamanape lao wambao mona kenda nakaeyalapape. 16Nyakamanya endangipi, takangepi, tatapi, kaita miningipi, kaiminingipi dupame nyakama yanda singi dupanya kinginya maitami. Dopa pitaminopa, dupame nyakamanya mendapu pyao kumasetami. 17Nyakamame nambanya kenge doko lao panelyamino latala, endakali dupa pitakame nyakama imbu kaeyatami. 18Dopaka doko, nyakamanya aiyomba iti dupanya mendaipi mende alu napita. 19Nyakama kyeto joo katatami dokome, nyakamanya lete katenge doko nyetamina” lea.
Jerusalema Koeyatana Leamo Doko
20 #
Matyu 24:15-21; Make 13:14-19 “Nyakamame kandataminopa, amii kambu longo mendapuame Jerusalema kakopanya palyetami. Gii dokopa, Jerusalema koeyapenge doko tengesa petelyamona lao masalapape. 21-22#Osea 9:7Koo dupanya yanu pyao Goteme tanda maipenge gii dokonyana, Gotenya pii pepa pyapae singi dupa pitaka angi jeta. Dopana, endakali Judia katatami dupa yuu manda dupanya paka pupenge jeta. Jerusalema katatami dupa siti doko yakinapenge jeta. Eenya katatami dupa Jerusalema pilyala naeyapenge jeta. 23Gotenya imbu kaenge andake doko akali tata dake-kisa ipatamopa, yuu dakenya kenda etete andake ipata. Gii dokopa enda wane tongotapi, enda wane andu nengepi, dupa etete kondo pita. 24Dopa pitamopa, endakali yangi dupa konjuwame pyao kumasetala, yangi dupa anjetala laminao yuu waka dupanya patami. Gii dokopa, akali tata waka dupame Jerusalema moko katao nepao pao, dopa pyoo etatamina lao gii setapae dokonya tuu latamina” lea.
Akalinya Ikiningi Doko Ipatana Leamo Doko
25 #
Matyu 24:29-31; Make 13:24-27 #
Ais 13:10; Esek 32:7; Joele 2:31; Rev 6:12-13 “Nikipi, kanapi, buipi dupanya kongali mendapu pita. Dokopa solowata andake dupa buli pyao, oo lao, lakao ipatamopa, yuu dakenya akali tata longo mendapu aipa pimape lao masala naeyapala pakame kumatami. 26Kaitinya kyeto singi dupa ema-ema pitamopa, kenda andake mendapu yuu dakenya ipatelyamona lao kandatala, endakali dupa mona andao, pakame lombapae setami. 27#Dan 7:13; Rev 1:7Dokopa Akalinya Ikiningi doko baanya kyetopi, tii pipae andakepi dupanya pituu, kopa mendenya tambetambe ipatamopa endakali dupame kandatami. 28Nambame lelyo datupa tee pyao ipatamopa, nyakama mokao nyepenge doko tengesa ipatelyamona lao masetala, nyakama toeya katapala kandalyetae kalyepape” lea.
Piki Ita-Pipa Makande Pyoo Mana Leamo Doko
29 #
Matyu 24:32-35; Make 13:28-31 Dokopa Jisasame kongali mende dokaita lamaiyoo, “Nyakamame piki itapi, ita waka dupa pitakapi, dupa kanjepape. 30Ita dupanya mange popo pilya dupa kandatala, paina pyaanya tengesa pilyamona lao nyakamame masingima. 31Dopana, lelyo dutupa pitamopa nyakamame kandatala, Gotenya kingdom doko ipanya tengesa petelyamona lao masalapape. 32Nambame nyakama kiningi langilyo: Endakali indupa palelyamino dupa kumao etala naeyataminopa, lelyo dutupa pitaka pita. 33Yuupa kaitipa dolapo alu pita. Dopaka doko, nambanya pii dupa alu napitana” lea.
Nyakama Koeyasetana Kandao Kalyepape Leamo Doko
34-35 “Yuu dakenya endakali palelyamino dupa pitaka-kisa gii doko ipata. Dopa pitana, yongenya koo pyoani kaengepi, bia nao kyakengepi, yuu dakenya nee kaeyapae singipi, dupanya-kaita nyakama isa pyakataminopa, kone makatae lokalyingili pyoo, gii doko nyakama-kisa lee mendai ipatana, kandao kalyepape. 36Koteaka lao nyakama lenge tao kalyepape. Goteme nyakama epena lao masetamopa, pita dutupa pitakanya paka pupala, Akalinya Ikiningi dokonya enombanya katatamanopa lao loma soo kalyepape” lea.
37 #
Luku 19:47
Yuu gii dii lao, lotuu anda nee nyetae kamapu dokonya Jisasame mana lamaitapu, yuu kuiyala epeamopa, Olipimanda lenge dokonya pao palipa pia. 38Dopa piamopa, endakali dupa pitaka yongama wamba sakatatala, lotuu anda nee nyetae kamapu dokonya pii sala ipata piami.
सध्या निवडलेले:
Luku 21: Enga
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023 Wycliffe Bible Translators, Inc. All rights reserved.