Matius 2
2
Tau ung bùruꞌ nai Mata kùlaꞌ, ung manarangna manghele i anaka hulang
1Jadiꞌ, nikianak‑ing ti Yesu i Yudea, i lipu: Betlehem, tempona Datu: Herodes muparenta. Tempo to, ara pira-pira ung manarangna manghele i anaka hulang bùruꞌ i Yerusalem nai karaona mui Mata kùlaꞌ. 2Mingkutikìna‑mi se moa teꞌ, “Iaka ti datuna tu Yahudi ung màli: nikianak‑ing? Sàbaꞌ ki ita‑moka ti anaka hulangNa soha:, dea pùna ki bùruꞌ‑mo mampinombai‑I.”
3To na sàding‑mi Datu: Herodes, masussa tungka tangaꞌna. Mène: ho ti nasang tau i Yerusalem.*#2:3 Nikapang moa teꞌ mariaꞌ‑i se mao i aka ti ung na pukauꞌa Herodes na tumang kareba aranna Anaka to, sàbaꞌ Herodes mukona: teꞌ datu: ung madàli mapaꞌ pang makarraꞌ. 4Na hàngona‑mi ti nasang kapala-kapala imang pang ung si manarangna i aluku tu Yahudi. Na pampalaui makàsona moa teꞌ, “Iaka nikianàking ti Datu: Pipasalamaꞌ ung niàluꞌ?”
5Na sùmuinna‑mi se moa teꞌ, “I Yudea, i lipu: Betlehem. Sàbaꞌ mène:‑mo to ti ung nironno: mangola: nabi moa teꞌ,
6‘Dea ti lipu: Betlehem i pangalanna Yudea, moi supi:‑i,
handei:-dei:‑da lipu: ung nihele supi:‑i i àlaꞌna tau ung muparenta i Yudea.
Sàbaꞌ nai Betlehem nikianàking besa Tau ung mampidolung‑ing,
pang mangkuyaꞌa taungKu tu Israel.’*#2:6 Mi. 5:1 tu Israel, dea‑mo tu Yahudi.”
7Tòna pakorai:‑mo makàsona, Herodes mimmànaꞌ-mànaꞌ manghàngo to ung manarangna manghele i anaka hulang. Na kutikìna‑mi belo:-belo:, i sangkanna ti na ita‑i se ti anaka hulang to, mangking sua: te na pintokaꞌi. 8Na suona‑mi lumao i Betlehem, pang na pasakiꞌ moa teꞌ, “Nao: se. Pingkutik‑ingko se belo:-belo: to Anaka to. Ìna u korai:‑mo se, paìsàngi‑rangkaꞌ se mai, mangking ku lumao‑ra:ko ho mampinombai‑I.”
9Jadiꞌ, lumanna‑mi se. I pulummuna dalang, oꞌ na ita‑mi se pole ti anaka hulang, ung na ita‑i se dolung tempona soha: i Mata kùlaꞌ, mampidolung‑ing se deaꞌ tonto: sipumpa: kaoneangna Anaka to. 10Haka:‑i se tungka tòna mangita‑mo anaka hulang to.
11Bùruꞌna‑mi se i rasangNa, mintama, pang na ita‑mi se ti Anaka to sola: Maria, dea‑mo inanNa. Mukalimuntuꞌna‑mi se tumunnuku minomba mao i Anaka to. Na hungkainna‑mi se ti aka ung na baha, pang na pinomba‑ing, dea‑mo bulahang, dupa ung nikonai: kemenyan, pang hingkùrang ung nikonai: mur.
12Mangulena‑ming se mao i lipuna, hampoꞌ mangola: dalang sintàna:, sàbaꞌ na pasakiꞌ Puang i laling pangipi mangking hang sumule:‑i se pole mao i Herodes.
Malai mao i Masir
13Tòna kakarang‑mi se sumule: ti ung manarangna manghele i anaka hulang, besa malaikaꞌna Puang mampingèneꞌi Yusup i laling pangipi moa teꞌ, “Tèdeꞌ‑mo:! Baha‑mi ti Anaka ti sola: inanNa. Malai‑ko se mao i Masir, sàbaꞌ Herodes mampisuoa‑ming mangokaꞌ Anaka ti, pang na pateia. Leta:‑ko se one: deaꞌ u ku paìsàngi se pole matung.” 14Tèdeꞌna‑mi ti Yusup, pang hengi dea to kakarang‑i se mao i Masir. 15Leta:‑i se one: deaꞌ mate ti Herodes. Mène:‑mo to ti ung nipaara, siulaꞌ aka ti ung na pusua: Puang mangola: nabi moa teꞌ, “Ku manghàngoa AnakàKu nai Masir.”*#2:15 Hos. 11:1.
Nipateinna ti anaka ung si supi:‑i i Betlehem
16A, to na ìsang‑mi Herodes moa teꞌ na tangkèdaꞌ ung manarangna manghele i anaka hulang, lalakàna‑mi tungka. Na piparentanna‑ming ti mampatei nasang anaka muane ung si idua‑i maang heaꞌna pàli polu, i pangalanna Betlehem, siulaꞌ tempo ung na pumakàso:‑ing tau ung manarangna manghele i anaka hulang. 17Dea ti hùlingna anaka i Betlehem, mène: ho ti ung nipukauꞌ lùlung i lipu: Rama, mangkannaꞌi aka ti ung na padeaꞌ nabi Yermia dolung moa teꞌ,
18“I Rama, nisàding
ti moni sikàra-kàràki.
Hatiꞌna Rahel mangkàràki ana-anakàna.
Hang mio:‑i nipakatana,
sàbaꞌ hari: hura: anakàna‑i se.”*#2:18 Yer. 31:15. Tu Yahudi (mintama ho tu Benyamin) liung mangola: kaburuꞌna Rahel i lipu: Rama, tempona na baha poni: nipaliꞌ mao i Babel.
Sumule: nai Masir
19Tempona mate‑mo ti Herodes, pang Yusup one: maang i Masir, besa malaikaꞌna Puang mampingèneꞌi Yusup i laling pangipinna. 20Malaikaꞌ to musua: moa teꞌ, “Tèdeꞌ‑mo:. Ala‑mi ti Anaka ti sola: inanNa, pang baha‑mi sumule: mao i Israel, sàbaꞌ mate‑mo ti tau ung mangaku: mampatei Anaka ti.”
21Tòna tèdeꞌ‑mo ti Yusup, na baha‑mo ti Anaka to sola: inanNa sumule: mao i Israel. 22Hampoꞌ na sàding moa teꞌ Arkelaus, anakàna Herodes, massònoꞌ amanna miluhali ung muparenta i Yudea. Jadiꞌ, Yusup mariaꞌ tùrung lumao. Tòna mangkorai:‑mo pasakiꞌ nai Puang i laling pangipinna, na pissàlana‑ming pang tùrung mao i pangalanna Galilea.*#2:22 Hele peta i pepa: x. 23Onena‑mi i anto leta:, i lipu: Nasareꞌ.*#2:23a Sitongangna, Nasareꞌ dea‑mo lipuna Yusup pang Maria. Hele i Luk. 1:26-27, 2:4, 39. Mène:‑mo to ti ung nipaara, tikannaꞌ‑mo ti aka ung na pusua: pira-pira nabi moa teꞌ Datu: Pipasalamaꞌ nikonaia tu Nasareꞌ.*#2:23b Sitongangna Pangàluꞌ Dolung ha mampusua:‑i lipu: Nasareꞌ. Ung nironno: i Pangàluꞌ Dolung dea‑mo ti sua:-sua: ung mangkonai: moa teꞌ Datu: Pipasalamaꞌ nihele polua i àlaꞌna tu Israel. Hele i Mas. 22:6, Yes. 53:3. Tòna Matius marronno: suraꞌ tee, tu Nasareꞌ na hele polu santuYahudinna. Hele i Yoh. 1:46. Deanna‑mo to, na àna: moa teꞌ Yesu miluhali tu Nasareꞌ mangkannaꞌi sua:-sua: moa teꞌ Datu: Pipasalamaꞌ nihele polua.
सध्या निवडलेले:
Matius 2: skx
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन