Lukas 7
7
Yesus nahataggahai ata pahalewana kapala tentara Roma
(Mat. 8:5-13)
1Kolei Yesus ɓanaɓe hatakwe ta aro ata buta, kakonage ta kota Kapernaum. 2Neɗo ɗaan kapala tentara Roma kapang ata pahalewana, pahadda hamanawarana. Naɗa ata nakalawara kamhamate. 3Kole naɗa kapala tentara ɓana rangewe tutnai Yesus, nyi nahalewayi kapirrana ngora ata Yahudi kaɗa kako tabara-Na, karaiyiy kana mai mono hataggahanan ata pahalewana. 4Kole ɓaɗa ɗikkini Yesus, raɗa ata ɗaraino-Ni tannam kana tulluni kapala tentara. Maliɗage tabaranai Yesus, “Ama, naɗa kapala tentara natuɓawe ɓam tulluni. 5Oroge nyiyo namanawarada yitta ata Yahudi, mono narayiɓege umma hadau kangoteda.”
6Nyiwei Yesus nakako marangadi. Kole namanar ɗikkiy Yesus ta ummana, kapala tentara nahalewayi olena tabarai Yesus, maliɗage, “Nyammaꞌtonage, ilam hamayilla wikam mai ta ummagu. Nauwa waleg marakkaꞌmawa ɓag hibaw lar ta ummagu Ama. 7Oro ɓatauɗage, waleg marakkaꞌmawa ɓag arog, Ama. Yiikaꞌmowe harehamu tannam kana taggaha atagu. 8Oroge nauwa kangaꞌkawa ta kab harehana kadau ɗete walta nauwa, mono ta kabug ɗaad tentaragu ɗakangaꞌkaɗaho ta harehagu. Ɓag halewai wu tentara, ‘Kakow!’ Nakakoɗaho; mono ɓa lugulkan naɗa wu wal, ‘Mai nim!’ Namai ɗummoɗaho. Mono ɓag harehai atagu, ‘Rayige nne!’ Narayi ɗummoɗahoge.”
9Yesus nahangatara ɓana rangewe hanewena kapala tentara. Nyi nagilaka mono linage tabaraɗa ata buta kaɗoku-Ni, “Wale haɓataꞌmawe hatenana naɗe ata, loko ai ata Israelɗuyi. Waleg kal taɓokaꞌmahowe hatena kataukalana madakkana, ta jonga ata Israel!”
10Kole raɗa ata halewana kapala tentara ɓaɗa hagga ta umma, naɗa atana kapala tentara kalawara nataggahaɓe.
Yesus nahamourha haggai anana wu lawai ɓalu
11Walna moʄahoge, Yesus nakako ta kota Nain. Ana hakodo halole-Na mono buta ata ka oleɗanga-Ni. 12Ɓana ɗikkiy Yesus ta ɓinna kalla nna ta kota, ɗaad ata kaɗita ata mate ta bal kota. Naɗa lakawa ɓaumane kamate, ana nahhanani wu lawai ɓal. Buta ata walta kota ka oleni. 13Kolei Mori Yesus ɓana etai naɗa lawai, Nyi natumwe manawara tabarana, malinage, “Ilam hookaw inya!” 14Ɓeggei Yesus naɗahekawe raka hadauge karogona mono nanaroge. Nyiwe raɗa ata kaɗitayi ɗangahu. Malinagei Yesus, “Taa ɓaumane, lugɗaguge, kaɗewu!” 15Naɗa ɓaumane kamate, namourha hagga, nakaɗe ngoɗo mono nahanewe. Nyiwei Yesus mana pahaggani ta inyana.
16Tangngaɗa ata ɗaɓangara mono ɗahaɗiyi Alla. Maliɗage, “Wu lede lii kamadakka nahuddaɓe ta jongada! Alla namaiɓe tut hamanemarada yitta!”
17Lii tutnai Yesus namahaɓarawe ta tangngage tana Yudea kahha ta hadau waɗeka ta bal tana Yudea.
Ana pahalewa waltai Yohanis Pembaptis
(Mat. 11:2-19)
18Ana pahalewanai Yohanis Pembaptis ɗataknage tabarana tangngage harayinai Yesus. Nyiwe mana kamaikadi ɗuɗa ana pahalewana walta jongaɗa kaɗokuni, 19lohho nahalewayi tabarai Mori Yesus mono kanukawe, “Ama, Yauꞌna ata pakira-hajajnai Alla ka amna nim, wale laɗalkaꞌhona ata heka haremama?”
20Kaɗuɗana ana pahalewanai Yohanis ɗakako tabarai Yesus mono liɗage, “Yohanis Pembaptis nahalewama kanukaw Ama, Yau takkaꞌna ata kamai, ɗoukge pakira-hajajnai Alla, wale laɗalkaꞌhona ata heka haremama?”
21Ɓatangrahoɗa ana pahalewai Yohanis ɓa ɗaad neɗo, buta ata pahataggahanai Yesus, nawugai wad japata mono butai ata kamoro paha eta hagga-Na. 22Nyiwei Yesus manabalehai, “Haggami tabarai Yohanis mono taknage agawe harangem mono ha etami: ata moro na eta, ata kalikku nakako, ata katoub nataggaha, ata katillu narange, ata mate namourha hagga, mono Lii Dahha waltai Alla talarage tabaraɗa ata milla. 23Maringkana ata aika dudal hatena tabara-Gu mono aika tullara-Ga.”
24Kole ana pahalewanai Yohanis ɓaɗa hagga, nahalegewe hanewenai Yesus tabara ata buta, tutnai Yohanis, malinage, “Ɓam kakom ta maraɗa gilra agaɗayi kag etayi halimna? Kama torroi naɗa ata katuʄai malawo ɗo bulle?#7.24 Nne lii-hatuʄa lar ta Jurata Ɓiha hanewe ʄawage buluh yang digoyangkan angin kian kemari. Nne lii-hatuʄa ta hanewe Laboyage naɗa ata katuʄai malawo ɗo bulle ngihge ata nut-nim pahangaɗana. Ɗoukɗage waleꞌmaǃ 25Nna ɓam kakom agay ha etam? Wu ata katau kalabbe dahha ɗahe? Ɗoukɗage waleꞌma, oroge raɗa ata katau kalabbe tauɗana mono kamourha majaɓola kadauɗai ta umma raja! 26Nyina ɓam huuna, tut agay ha etam? Tut eta ɗahemin wu lede lii? Tenawe, lohho Yohanis nareihɗaho walta lede lii. 27Oroge natulhaɓewe lar ta Jurata Ɓiha, Mori Alla nataknage ta Raja kahatoulka-manemara tutnai Yohanis pembaptis, linage,
‘Nyiꞌnai Yohanis ana pahalewa-Gu,
Nauwa enga halewaguni ul wal tabara-Mu,
tannam nyi kana ɓugerana lara tutu-Mu!’ ”
28Malina ɗummogei Yesus, “Apewela, ta pan-tana wale kal laꞌma ata kareih madakka waltai Yohanis Pembaptis. Tanyiɗuwe ata kayiiwe mourhana tannam kana harehai Alla, loko ata marrahaɗuyi yiɗɗa ɗareih madakkaɗaho waltai Yohanis Pembaptis.”
29Tangngana ata, gaudi ata kakahha walkatak karangeyi Yesus ɓana takwe nna; yiɗɗaꞌna ata kamangaakɓege agawe nna hataknai Alla natenawe, mono yiɗɗa pahariha ʄalaɓenai Yohanis. 30Tabolo ata walta kalibbo Farisi mono gurr agama ata Yahudi walɗa auꞌma hibawe hakab atenai Alla tut ɗauɗa, nyiɗawe mawaleɗa au ɓana harihayi Yohanis.
31Lohhoi Yesus nahanewe piwal linage, “Agaɗahona pahamera waigudi ata nna ɓatauge? Yiɗɗa iyaɗayi tuʄaɗa? 32Yiɗɗa ɗatuʄai lakawa kangoɗo ta haragana; kahawula wikna tabara oleɗa maliɗage,
‘Nami mamalengoni lawiti lagahara tutum, tabolo mi walem auꞌmam nego!
Nami malawitini lawit baꞌ, tabolo mi walem hoꞌmami!’
33Yohanis Pembaptis namai natahna ɓana pat wikna aina yaa-enu#7.33 natahna ɓana pat wikna aina yaa-enu lar ta hanewe ʄawage puasalinaɗawe. mono walna enuꞌma anggur, tabolo mi limge, ‘Nyi tamanan wad japata!’ 34Ana-Na Kaɗaꞌ Ata namai, Nyi na yaa mono na en, limɗalge, ‘Torroi naɗa ata! Ata dadara takkay, ata enui, olenad ata kakahha walkatak mono olenad ata doku-jala.’ 35Tabolo raɗa ata kahibayi Yohanis Pembaptis mono Nauwa Ana-Na Kaɗaꞌ Ata, enga ɗahatingoge ta mourhaɗa nna maniwola pahangaɗanai Alla tenawe.”
Lawai habanna jala naɓiwe minya ɓauburata ta leꞌnai Yesus
36Wu ata walta kalibbo Farisi, kangaranai Simon, nawaddai Yesus yaa. Manakakoi Yesus ta ummana mono nangoɗo yaa. 37Neɗa ta kota ɗaan wu lawai kamourha ta til doku-jala. Ɓana rangei Yesus ɓana yaa ta ummana naɗa ata walta kalibbo Farisi, nyi namai ngidwe minya kaɓauburata ta gour kaɓiꞌta hiina.#7.37 Naɗe gour harayiy walta wat marmer kaɓiꞌta hiina. 38Nakawoʄo ta liranai Yesus tabara leꞌ-Na mono nahoo, wee matana kamoun manamaglai leꞌnai Yesus. Maɓegge nahoup waige wuuna lohho nangaꞌhanad mono naɓiwe minya kaɓauburata. 39Kolei Simon ata walta kalibbo Farisi kawaddai Yesus ɓana etawe nna kaɗaꞌ, malinage ta atena, “Ɓa lede-lii takkaꞌnani Alla, enga natadayi ɓa iyai naɗe lawai kaʄoʄay, ɓa nyi lawai habanna doku-jala!”
40Nyiwei Yesus malinage tabaranai Simon, “Simon, ɗaage kagtaknage halugugu.”
Balehanai Simon, “Ngoo Ama Guru, takɗaꞌwe.”
41Malinagei Yesus, “Ɗaad ɗuɗa ata kapang wuttana ta ata kabunga amaha. Naɗa wu ata wuttana lima ngah amaha dinar,#7.41 Mata amaha dinar halinawe wuy amaha ɓahi harayi walta ɓah kaka. Nuthona kahewana wu ata karayi ulla ta oma ɗiha laɗo wu amaha dinar. mono naɗa wuwal ata lima bul amaha dinar. 42Kaɗuɗana ata walɗa mukaꞌmad bayaradi raɗa wuttaɗa, nyiwe mahoupɗadi wuttaɗa. Nyiɓatauɗage, iyai ta jongaɗa kaɗuɗakana ata kareih manawarani ata kabunga amahana?”
43Nabalehawei Simon, “Ɓaɗoukɗage nauwa ata kahadda buta pahoup wuttana!”
Yesus nabalehai, “Nahayappam natenawe.” 44Maɓeggei Yesus natorroi naɗa lawai malinage tabarai Simon, “Etaɗuyi naɗe lawai? Nauwag maiwa ta ummamu, walem haganaꞌmana wee hamurra hawaigadi leɗu-Gu. Tabolo naɗe lawai nahamurrahaɓe gadi leɗu-Gu waidi wee matana, nahamayara waigage wuuna. 45Yau walem hibawaiꞌma-Ga hangaꞌha, tabolo wal wunga ɗikki-Gu naɗe lawai walna ngahuꞌma ngaꞌhagad leɗu-Gu. 46Yau walem ɓiꞌmagage minya kaɓauburata ta katakku-Gu, tabolo naɗe lawai naɓiɓegage minya kaɓauburata ta leɗu-Gu. 47Katautakkanage: Nna manawarana kamadakka mawonage doku-jalana kahadda buta ɓa hawalɓenadi! Naɗa ata ɓa hoꞌkelkawe ɓa hawalini, nyi enga hoꞌ ʄalawe manawarana.
48Malinagei Yesus tabarana naɗa lawai, “Doku-jalamu hawalɓegudi.”
49Raɗa ata waɗeka kayaa oleɗangani Yesus ɗakangurka, “Iyai naɗe ata manaɗaꞌwe ɓana hawalna doku-jala?”
50Malinagei Yesus tabarana naɗa lawai, “Oro hatenam tabara-Gu, yau manemarawu. Kam kako waina mouli!”
सध्या निवडलेले:
Lukas 7: lmy
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2024 (Active), Wycliffe Bible Translators, Inc. All rights reserved.