Mateo 12
12
1Ja cꞌa Jesús e rachbil ja rdiscípulo, pa jun xulaꞌnbal kꞌij quimajon binem chipan juleꞌ trigo. Ja cꞌa rdiscípulo chaka jalal xemajtaj rmal rkꞌakꞌanil quepan rmalcꞌariꞌ tok quemaj rkꞌolic ja trigo in quetij. 2Ja cꞌa fariseo ejeꞌeꞌ tok xequetzꞌat quibij tre ja Jesús:
—Pakasaꞌ radiscípulo leꞌ, ja netajini quimajon rbanic jalaꞌ xajan nbani pa tak xulaꞌnbal kꞌij, xecheꞌ tre. 3Bix chique rmal ja Jesús:
—¿La ma esiqꞌuin ta laꞌan chipan ja rtzobal Dios ja xuban ja rojer rey David ja tok xuban jutij arjaꞌ majtaj rmal rkꞌakꞌanil rupan in ja re rachbil chakajaꞌ? 4Ja cꞌa xuban, xoc chipan ja rochoch Dios in xutij ja caxlanway ja partiꞌin chwach ja Dios. Queriꞌ xuban masqui jariꞌ caxlanway tzꞌibtal chipan ja ley xin Dios chi xa queyon sacerdote ja netijowi. 5In ¿la ma esiqꞌuin ta cꞌa chakajaꞌ ja nbij ja ley chique ja sacerdote tre ja samaj nqueban chipan ja nimlaj templo xin Dios chi ejeꞌeꞌ rjawaxic nesamaji pa tak xulaꞌnbal kꞌij, maquexulaꞌni? Pro xulaꞌnbal kꞌij cꞌa in nesamaji pro ma xajan ta. 6Ja cꞌa ranin nbij chewe chi anin más chi na nim nukꞌij chwach ja nimlaj templo xin Dios. 7Cꞌo jun tzij rbin can ja Dios quewariꞌ: —Ja kas nwajoꞌ chewe chi neban, tepokonaj quewach ja winak, jariꞌ más chi na ncꞌatzini chwach ja netzujuj juleꞌ sacrificio chinwach, neꞌe. Ja wixta chꞌobtajnak emwal ja nbij ja tzij riꞌ maquita xebij ariꞌ chi xajan ja queban ja ndiscípulo tok ma xajan ta. 8Queriꞌ nbij chewe como ja ranin ja rin Alcꞌwalaxel ja xinoc alaxic cuqꞌuin ja winak, pa nukꞌaꞌ anin cꞌo wiꞌ ja nbani chipan ja xulaꞌnbal tak kꞌij. Queriꞌ xbij ja Jesús chique.
* * * * * * * * * *
9Cꞌacꞌariꞌ xeli ja Jesús, be, xoc chipan ja jay xin molbal riꞌil quixin ja fariseo. 10Cꞌo cꞌa jun achi siquirnak jun rukꞌaꞌ. Ja cꞌa fariseo ejeꞌeꞌ quimajon rcanoxic rij rwach ja Jesús nak ja nquichapbej rxin rmalcꞌariꞌ tok quewaꞌ quibij tre riꞌ:
—¿La nuyaꞌ lugar chawe ja ley chi neꞌatzursaj yawaꞌiꞌ pa tak xulaꞌnbal kꞌij? xecheꞌ tre. 11Bix chique rmal ja Jesús:
—¿La cꞌo cꞌa jun chewe cꞌo ta jun rcarnelo ntzakel pa jul pa jun xulaꞌnbal kꞌij in matuyic chi nlasajto chipan ja jul? 12Pro jun winak más chi na nim rukꞌij chwach jun carnelo rmalcꞌariꞌ nbij chewe chi ja ley nuyaꞌ lugar chake chi nkaban ja rutzil pa tak xulaꞌnbal kꞌij, xecheꞌxi. 13Cꞌacꞌariꞌ xbij tre ja yawaꞌ:
—Tayukuꞌ ja rakꞌaꞌ, neꞌ tre, in xuyuk ja rukꞌaꞌ in tzuri, junan chic chi caꞌiꞌ. 14Ja cꞌa fariseo ejeꞌeꞌ xebe, xequimoloꞌ quiꞌ in quemaj rchꞌobic nak nqueban tre ja Jesús chi nquicamsaj.
* * * * * * * * * *
15Ja cꞌa Jesús arjaꞌ rotak chi ncajoꞌ nquicamsaj, xelel chipan ja lugar in be. E qꞌuiy ja winak xetreꞌel trij. Arjaꞌ xertzursaj canojelal 16in xbij chique chi majun bar ta triꞌ nquitzijoj wiꞌ. 17Jawaꞌ ja xuban riꞌ utzcꞌa chi triꞌ bantaj wiꞌ cumplir ja bitajnak can ojer rmal ja Dios in xoqui ja profeta Isaías chi rbixic quewariꞌ: 18—Tetzꞌataꞌ mpeꞌ ja rajsamajel wxin ja nchaꞌon riꞌ, arjaꞌ congana nwajoꞌ, janila nquicot wanma trij. Anin xtinyaꞌ tre ja rEspíritu Santo wxin in arjaꞌ xtucꞌut ja bey xin Dios chiquewach ja winak ja ma e aj Israel ta. 19Ja tok ntzijon cuqꞌuin ja winak arjaꞌ ma xtucoj ta ja tzij ja xa chꞌaꞌoj rcꞌamonto nixtacꞌa xturak ta ruchiꞌ, maticꞌaxaxi ja rukul chi nat. 20Ja winak ja congana lawuloꞌ quibanon in capujnak quecꞌuꞌx rmal, arjaꞌ maqueruyoj más, neruyic in nerutoꞌ. Niquirwariꞌ xtuban in rmal arjaꞌ tok xtoqui ja rbey Dios pro chijutij xtoqui in nij arjaꞌ wiꞌ ja nchꞌocmaji. 21Arjaꞌ nekaj na rbixic cuqꞌuin ja winak ja ma e aj Israel ta in ejeꞌeꞌ nyukeꞌ na quecꞌuꞌx ruqꞌuin, neꞌe ja Dios.
* * * * * * * * * *
22Ja cꞌa Jesús cꞌamarel jun achi chwach, ja rachi moy in mem chakajaꞌ in cꞌo jun itzel espíritu ocnak tre. Xtzursaj ja rachi, ncaꞌy chic in ncowin chic ntzijoni. 23Ja cꞌa winak kas cꞌascꞌoꞌi quetzꞌat pro ni canojel in quewaꞌ quibij riꞌ:
—¿La maxta jalaꞌ ja Cristo ja Ralcꞌwal can ja rojer rey David? xecheꞌe. 24Ja cꞌa fariseo ejeꞌeꞌ quicꞌaxaj ja quibij ja winak in quewaꞌ quibij riꞌ:
—Jalaꞌ rachi leꞌ ja tok nerlasaj itzel tak espíritu chique ja winak xa poder xin Beelzebú nucoj ja jefe quixin ja ritzel tak espíritu, xecheꞌe. 25Pro ja cꞌa Jesús arjaꞌ bien rotak ja quimajon rchꞌobic ja fariseo in xbij chique:
—Ja gobierno xa nak ta chi gobiernoꞌil, wi xa división nuban chibil riꞌ jariꞌ xa nyojtaji. In queriꞌ tre jun tinamit chakajaꞌ in chique juleꞌ winak ecꞌo pa jun jay, wi xa división nqueban chibil tak quiꞌ jariꞌ xa neqꞌuisi. 26In queriꞌ cꞌa tre ja Satanás chakajaꞌ, ja wi nerlasaj ja rach tak demonio jariꞌ xa división nuban kaj tre arjaꞌ ruyon. Ja wi queriꞌ nuban, ja gobierno rxin ¿nak moda maquita xtiqꞌuisi? 27Ja rixix nebij chwe chi xa poder xin Beelzebú ncoj ja tok nenlasaj ja demonio pro ja rediscípulo ixix nequiwasaj waꞌan demonio chakajaꞌ ¿la xcꞌa poder xin Beelzebú nquecoj nechꞌob ixix? Ja rediscípulo ixix ejeꞌeꞌ cꞌariꞌ xquekꞌalasani chi ma katzij ta ja xebij chwe. 28Ja ranin poder rxin ja rEspíritu Santo xin Dios ncoj ja tok nenlasaj ja demonio in wi queriꞌ nban tibij cꞌa tzij ariꞌ chi ja gobierno xin Dios kajnakto chic checojol. 29Ja wi natekaj ruqꞌuin jun achi congana rchokꞌakꞌ in wi nachꞌob chi nalasaj tre ja rnakun cꞌo pa rochoch rjawaxic chi nabacꞌ na nabey ja rachi. Ja wi queriꞌ naban jariꞌ natcowini nalasaj tre nojel ja cꞌo pa rochoch. Queriꞌ xinban anin tre ja Satanás chakajaꞌ. 30Ja winak ja matiquecoj quiꞌ wqꞌuin jariꞌ xa ruqꞌuin Satanás ja ncꞌulel nquecoj wiꞌ quiꞌ in chakajaꞌ ja maquetoꞌo wxin chi quimolic ja winak jariꞌ xa nequichicaj.
31Rmalcꞌariꞌ tok anin nbij chewe, ja winak masqui nqueban ja il mac xa nak ta chi il maquil in chakajaꞌ masqui nquibij juleꞌ tzij tre ja Dios ja xa ofensa rcꞌamonto tre jariꞌ cꞌo cuytajic trij. Pro ja wi nquibij juleꞌ tzij tre ja rEspíritu Santo in wi: —Xa itzel ja nuban, wi necheꞌ tre, jariꞌ mta cuytajic trij. 32Ja wi cꞌo jun winak xa nak ta chi winakil masqui arjaꞌ nbij juleꞌ tzij tre ja Ralcꞌwalaxel ja xoc alaxic cuqꞌuin ja winak, juleꞌ tzij ja xa ofensa rcꞌamonto tre, jariꞌ cꞌo cuytajic trij pro wi nbij juleꞌ tzij tre ja rEspíritu Santo ja xa ofensa rcꞌamonto tre jariꞌ ni mta wiꞌ cuytajic trij nixtacꞌa chipan awaꞌ tiempo ja rokcꞌo wiꞌ riꞌ in nixtacꞌa chipan ja jun chic tiempo ja majaꞌn tipeti.
* * * * * * * * * *
33Ja cꞌa wi nebij tre jun cheꞌ chi xa itzel cheꞌ ¿nak cꞌa tre tok matebij tre chi xa itzel rwach chakajaꞌ? In wi nebij tre jun cheꞌ chi utzlaj cheꞌ tebij cꞌa tre chakajaꞌ chi utz ja rwach nuyaꞌ. Queriꞌ nbij chewe como ja jun mocaj cheꞌ, rumac ja rwach nuyaꞌ chewiꞌ tok notakixi nak chi cheꞌal. 34Ixix congana itzel tak naꞌoj ewcꞌan, ix caniꞌ juleꞌ itzel tak cumatz. Congana cꞌayew xtelpi ta juleꞌ utzlaj tak tzij pan echiꞌ como xa ix itzel tak winak. Queriꞌ nbij chewe como ja nojnak pa tak ewanma jariꞌ nelto pan echiꞌ. 35Jun utzlaj achi utzil ja rcꞌolon pa ranma in tok ntzijoni utzil rcꞌamonto ja nbij. Jun itzel achi xa itzelal ja rcꞌolon pa ranma in tok ntzijoni xa itzelal rcꞌamonto ja nbij. 36Ja cꞌa ranin nbij chewe, ja tok xterilaꞌ ja nimlaj kꞌij xin juicio nojel ja tzij ja quibij ja winak ja chaka quigana quibij nequijachaꞌ na cuenta chwach ja Dios rmal. 37Queriꞌ nbij chewe como ja tzij xebij waweꞌ chwachꞌulew jariꞌ tzij noc na chewij chakajaꞌ chi nkꞌetbex tzij chewij nak xtiban chewe rmal ja Dios, wi xquixrwasajel libre owi xquixrutakel chipan ja rpokonal. Queriꞌ xbij ja Jesús.
* * * * * * * * * *
38Ecꞌo cꞌa juleꞌ maestro ja netijon quixin ja winak tre ja ley xin Dios ja tzꞌibtal can rmal ja Moisés e cachbil juleꞌ fariseo, ejeꞌeꞌ quibij tre ja Jesús:
—Maestro, ja nkajoꞌ ajoj chawe camic tabanaꞌ jun milagro chikawach utzcꞌa chi natkanimaj, xecheꞌ tre. 39Pro bix chique rmal ja Jesús:
—Ja winak ja necꞌutun chwe chi nban jun milagro utzcꞌa chi ninquinimaj ejeꞌeꞌ xa e itzel tak winak, xa quiyaꞌon can ja Dios. Pro ja milagro ja nquicꞌutuj jariꞌ ni matinban wiꞌ chiquewach xarwariꞌ cꞌo jun ja milagro nbantaj na chiquewach, jun milagro ja caniꞌ xuban ja rojer profeta Jonás. 40Como caniꞌ xuban ja Jonás ojer oxiꞌ kꞌij in oxiꞌ akꞌaꞌ qꞌuejeꞌ chupan jun nimlaj chꞌuꞌ in queriꞌ cꞌa chwe anin chakajaꞌ ja rin Alcꞌwalaxel ja xinoc alaxic cuqꞌuin ja winak, oxiꞌ kꞌij in oxiꞌ akꞌaꞌ ninqꞌuejeꞌ na chipan ja rwachꞌulew chipan ja lugar ja bar neqꞌuejeꞌ wiꞌ ja camnakiꞌ. 41Ja tok xterilaꞌ ja nimlaj kꞌij xin juicio ja rachiꞌiꞌ ja recꞌo chipan ja tinamit Nínive ojer ejeꞌeꞌ xqueyictaji ix cachbil ja rix tinamit Israel in ejeꞌeꞌ neꞌoc e kꞌetol tak tzij chewij. Queriꞌ nbij chewe como ja raj Nínive ejeꞌeꞌ tok quicꞌaxaj ja rtzobal Dios ja bix chique rmal ja Jonás ojer qꞌuextaji ja quinaꞌoj in queyaꞌ can ja ritzelal. In ja camic nbij chewe, anin más chi na nim nukꞌij chwach ja Jonás. 42Ja tok xterilaꞌ ja nimlaj kꞌij xin juicio ja rixok ja reina rxin ja nación ja cꞌo pa sur arjaꞌ xtiyictaji ix rachbil ja rix tinamit Israel in arjaꞌ noc kꞌetol tzij chewij. Queriꞌ nbij chewe como jariꞌ ixok arjaꞌ cꞌa cꞌa nat pi wiꞌ chi rcꞌaxaxic ja rnaꞌoj Dios ja yatajnak tre ja rojer rey Salomón. In ja camic nbij chewe, anin más chi na nim nukꞌij chwach ja Salomón.
* * * * * * * * * *
43Jun itzel espíritu tok nel pa ranma jun achi arjaꞌ nbe pa tak lugar ja bar mta wiꞌ yaꞌ, nercanoj jun lugar ja bar nxulaꞌn wiꞌ pro matuwil ja lugar 44in quewaꞌ nbij riꞌ: —Ninmeloj chic jutij chipan ja wochoch ja bar inelnakto wiꞌ nabey, neꞌe. Ja cꞌa tok nekaj chic jutij ruqꞌuin ja rachi nutzꞌat ja ranma caniꞌ jun jay congana talani, joskꞌin rpan in wekon chi utz. 45Cꞌacꞌariꞌ nmeloj chic jutij, neꞌercꞌamaꞌ wukuꞌ rach tak itzel espíritu ja más chi na e itzel chwach arjaꞌ. Ja cꞌa tok neꞌurkaj ruqꞌuin ja rachi neꞌoc pa ranma chi e waxakiꞌ in triꞌ neqꞌuejeꞌ wiꞌ. Xcꞌa chewiꞌ tok más chi na lawuloꞌ ja rcꞌaslemal ja rachi chwach ja nabey. In queriꞌ cꞌa xtiban ixix chewe chakajaꞌ ja rix tinamit Israel ja congana itzelal ebanon.
* * * * * * * * * *
46Ja Jesús cꞌa rmajon na tzij cuqꞌuin ja winak, ja cꞌa ruteꞌ in ja re rchꞌalal ecꞌo chwa jay in ncajoꞌ netzijon ruqꞌuin. 47In bix tre ja Jesús:
—Pakasaꞌ rateꞌ in ja re awachꞌalal ecꞌo chwa jay in ncajoꞌ netzijon awqꞌuin, neꞌxi. 48Ja cꞌa Jesús xbij tre:
—Camic nchꞌob chawach echinatak ja nuteꞌ in echinatak ja wachꞌalal, neꞌ tre. 49Cꞌacꞌariꞌ xerucꞌut ja rdiscípulo in xbij:
—Ejeꞌeꞌ cꞌawaꞌ eꞌocnak nuteꞌ in eꞌocnak wachꞌalal. 50Queriꞌ nbij chawe como xa nak ta ja nbanowi rvoluntad ja Nataꞌ ja cꞌo chilaꞌ chicaj arjaꞌ cꞌariꞌ ocnak nuchakꞌ owi wanaꞌ owi nuteꞌ, neꞌe.
सध्या निवडलेले:
Mateo 12: tzjW
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2010, Wycliffe Bible Translators, Inc. All rights reserved.