Génesis 18
18
Yuus Abrahaman uchi akiattame tusa ataksha ujakmau
1Mamrénam númi encina tutai irunmaunam Abraham jeen waitinam pujaun, etsa tutupnira ai Yuus wantintukuiti. 2Abraham iimsatajkama tres shuar wininan wainak tsekegki aa jinki tikishmatrauwaiti. 3Tura chicharuk: Wina Apur ainata, wina pegker enentaimturkurmeka wait aneasrum nagkatukirpa. 4Entsan shikikan itaamtai nawem nijartarma, tumarum númi wakenam pujusrum ayamratarma. 5Wii atumin umirnun pujamunam tau asarum, yutain itaamtai yuarum wetaarma tusa tinaiti. Tama nitasha ayu tusar tiaruiti.
6Tuinakai Abraham nina jeen wayaa Saran chicharuk: Wári harina shir pegker veinte kilos tumain jukim pan najanata. 7Tusa ikuak vaca matsatmaunam tsekegki jeaa, nina inatairi ainan, vaca tsakat nuweram iisrum maarum wári inarkatarma, tusa tinaiti.
8Tama mantequillan, vaca muntsuri ijuraamun, tura vaca namagke inarkamujai juki ejéti apujtusuiti. Nutikam númi wakenam pujusar yuinakai ii wajatu. 9Nuna yuawar Abrahaman ininak: ¿Amina nuwemsha tui pujawa? tusa tuina. Tusa tama ni ayak: Jea pujawai, tusa tinaiti.
10Tama chichaak: Chikich uwítin ataksha irarsattajme. Turasha wika taatsaig amina nuwem Sara uchin jurertatui, tusa tinaiti. Nu tu chichaamun Sarasha Abrahaman ukurin wajas antu wajau. 11Abrahamka nina nuwe Sarajai shir untach ajakaruiti. Tumau asa Saraka nantu waintancha nagkankau ajakuiti. 12Tumau asa wina aishrujai unchitaj junasha uruk uchincha jurertajak tu enentaimas wishikmamrauwaiti. 13Tumakai Yuus Abrahaman chicharuk: ¿Saraka ima unchitaj junasha uruk uchincha jurertajak tusag wishia? 14¿Yuus tujinmaincha awak? Chikich uwítin wika taatsaig Saraka uchin jurertatui, tusa tinaiti. 15Yuus tamaun Sara antuk ashamak: “Wishirchajai, tusa tinaiti. Takai Yuus ayak: Ame wishirum nunaka wika nekajai”, tusa tinaiti.
Abraham yaakat Sodoman pachis Yuusan iniasuiti
16Nuna tusa inaiyak: Yaakat Sodomanmani wenakai, aujsaran akupkartajai, tusa Abrahamsha nitajai wuwaiti. 17-18Nigka nukap shuar ainan, tura kakaram ainan apachri atin asamtai, wii nutikattaj nuna, tura ni weantu ainan pegkernum yaigtajai tinaitaj nunasha ujaktajai tusa Yuus enentaimu. 19Wii Abrahamnaka: Nina uchiri ainan, tura ni weantu ainancha Yuusa chichame umiakrum tunauka inaiyakrum pegker ataarma tusa jintintaawarti tusan etegkawaitjai. 20Yuus Abrahaman chicharuk:
Yaakat Sodomanmaya shuar aina, tura Gomorranmaya ainasha shir nukap tunaun takainamun nekajai. 21Tura asan tunaun nekas takainawash tusan iisartasan wetatjai. 22Nuna tusa jimar shuar yaakat Sodoman iisartasa wenai, Abrahamka Yuusjai juakuiti. 23Tuma Abraham Yuusan iniak: ¿Shuar tunaun takachu ainasha, shuar tunaun takaujai metekak ijinattam? 24¿Nu yaaktanam cincuenta shuar tunaun takachu pujuinakaisha tsagkurtsukek ijinmainaitam? tusa tinaiti. 25Ameka ashi nugkanmaya shuar ainan tunauri nekau asam, shuar tunaun takachu aina, tunaun takau ainajai metek ijinmaitsume, tusa tinaiti.
26Tama Yuus ayak: Yaakat Sodomanam cincuenta shuar tunaun takachu pujuinakaigka nitan aneakun ijinmaitsujai, tusa tinaiti. 27Takai Abraham ataksha chicharuk: Wika nugka juki najanamu ayatan ame wina Apur aminig juna pachisan takaisha wait aneasam anturtukta. 28¿Cuarenta y cinco shuar tunaun takachu pujuinakaisha ijinmainkaitam? tusa tinaiti. Tusa tama Yuus ayak: Cuarenta y cinco shuar tunaun takachu pujuinakaigka shuar ainanka ijinmaitsujai, tusa tinaiti. 29Takai Abraham chicharuk:
¿Turasha cuarenta shuar tunaun takachu pujuinakaisha iturkattame? tusa tinaiti. Tama Yuus ayak: Cuarenta shuar tunaun takachu pujuinakaigka ijinashtatjai, tusa tinaiti. 30Takai ataksha iniak: Apuru wait aneasam kajertukaipa. ¿Treinta shuar tunaun takachu pujuinakaisha iturkattame? tama ni ayak: Treinta shuar tunaun takachu pujuinakaigka ijinashtatjai, tusa tinaiti.
31Abraham ataksha chicharuk: Wina Apuru juna takaisha wait aneasam anturtukta, ¿veinte shuar tunaun takachu pujakaisha iturkattame? Tama Yuus ayak: Shuar tunaun takachu veinte pujuinakaisha ijinashtatjai, tusa tinaiti. 32Abraham ataksha chicharuk: Yuusa wait aneasam kajertukaipa yamaika inagnamun iniastajme ¿diez shuar tunaun takachu pujuinakaisha iturkattame? Tama Yuus ayak: Diez shuar tunaun takachu pujuinakaisha ijinmaitsujai, tusa tinaiti. 33Yuus Abrahamjai chichas umik wuwaiti. Tumamtai Abrahamsha nina jeen waketkinaiti.
सध्या निवडलेले:
Génesis 18: hubDBL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2010, Wycliffe Bible Translators, Inc. All rights reserved.