Génesis 20
20
Abimelec Abrahamjai pachisa etsermau
1Abraham ni pujamun ikuak Négueb nugkanam yaakat Gerar tutainam, yaakat Shurjai iinias amaunam pujusuiti. 2Abraham nina nuwen Saran juka wina umaaruiti tau asamtai, Gerarnumia apu Abimelec wina nuwar atii, tusa jukinaiti. 3Turamtai Yuus karanam chicharuk: Ame nuwa jukinam nuka aishrinnaiti. Tura asam jakattame, tusa tinaiti. 4Turasha nigka nuwan takaschau asa, Yuusan ayak: ¿Apuru, nuwan takaschau aigkik jakattame tusam turutam? tusa tinaiti.
5Abraham nigki chichartak: Juka wina umaaruiti turutmayi. Tura nuwasha juka wina umaaruiti turutmayi. Tuinakai nekastsukaitti tusan jukimjai. Turasha nuwanka takaschajai, tusa tinaiti. 6Tutai Yuus karanam chicharuk: Ame agkantuapita tusam jukimun shir nekau asan, tunaun takartusai tusan nuwanka wakerumtikachmajme. 7Turasha yamaika nuwaka aishrin awaigkita. Turawakminka wina chichamrun etserturin asa, amina pachitmas iwáku pujusti tusa wina seattatui. Antsu nina nuwe awagtachkumka ame tura amina pataim ainajai jakattame, tusa tinaiti.
8Timau asa káshikmas nantaki nina inatairi ainan ashi untsuk ikaanmak, karanam timaunka ashi ujakuiti. Turam antukar senchi ashamkaruiti. 9Tumawarmatai Abimelec Abrahaman chicharuk: ¿Wari pegkerchau takasmaunma winasha, tura wina pataar ainasha tunaun takasarmatai Yuus waittan susarti tusamsha jutikkartame? 10¿Ju jutikartuattsamsha uruk enentaimmame? tusa tinaiti
11Takai Abraham ayak: Juiyagka Yuusan umirchau asar, wina nuwarun wainkar jukiartasa mantuawarai tu enentaimsan, wina nuwaruiti tumainaitiatan tichamjai. 12Nuiyasha Saraka wina aparu nawantri asa, winaka umaaruiti. Turasha wina nukuruin akinachu asamtai nuatkauwaitjai. 13Amina nugkeminia jinkita tusa Yuus turutna nui Saran chicharkun: Ii tuig jeataj nuniakrisha wina umaaruiti turutta tusan tinaitjai.
14Timatai Abimelec Abrahaman Saran awagtak: Oveja ainan, vaca ainan, inatairi aishmag ainan, tura nuwa ainancha susauwaiti. 15Tura chicharuk: Ju aina juka wina nugkaruiti. Tuma asamtai ame tui pujustasam wakeram nui pujusta, tusa tinaiti.
16Tura Saran chicharuk: Amina umaimin susaj nuka kuit mil amainan susajai. Tura nujai ame pegkerchau takantsachmaun shuar aina ashi nekaawaru asar, amina pachitmasarka pegkerchaun chichartammain ainatsui, tusa tinaiti.
17-18Yuus Abrahaman nuwen Saran, Abimelec jukimtai, Abimeleckan jeen nuwa pujuinanka uchin jurechu amajkauwaiti. Turasha Saran awaigkimtai, Abraham Abimeleckan pachis Yuusan seawaiti. Turam Abimeleckan, nina nuwejai pegker amajeak nina jeen nuwa aina matsatuncha ataksha uchin juren amajsauwaiti.
सध्या निवडलेले:
Génesis 20: hubDBL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2010, Wycliffe Bible Translators, Inc. All rights reserved.