Génesis 23
23
Sara jakamtai ikusmau
1Saraka ciento veintisiete uwí pujusuiti. 2Tuma Canaán nugkanam yaakat Hebrónnum jakauwaiti. Tumamtai Abraham Saran aneak útnaiti. 3Abraham nina nuwe jakamtai Hettan uchiri ainan chicharuk: 4Wika chikich nugkanmaya shuaraitjai. Turasha wait aneasrum nugka surustarma, nuwarun ikurmastajai, tusa tinaiti. 5Tama Hettan uchiri aina Abrahaman chicharainak: 6Apu, wait aneasam anturkartukta. Ii ainaj juiya, Yuus etegkamumka ametme. Tuma asam nuwem jaka nuka ina ikumatairi pegker aina nui ikusta. Chikichik shuarkesha ii ainaj juiyagka ni ikumatairin suritrammainka pegkesha atsawai, tusa tiaruiti.
7Tutai Abraham wajaki Hettan uchiri ainan yaaktarini tsuntsumaa 8nitan chicharuk: Atumsha wina nuwar jaka juna ikusat tusarum wakerakrumka, wait aneasrum wina pachittsarum Zohar uchiri Efrón aujtursatarma. 9Nina nugken yantamen ikumastin Macpelanam nugka taimu a nuna kuitjai surusti, urutam akik turuttig takaisha imatiksanak akikan, nu ikumatain nerennuri jastatjai, tusa tinaiti.
10Takai Efrónsha nui pujau asa nina patai ainan, tura chikich shuar ainasha anturtukarti tusa Abrahaman ayak: 11Atsaa, apuru wait aneasam anturtukta, wina pataar ainasha antuinamunam tajame, nugkanka tura waancha antranak amastajme. Turamtai amina nuwem jaka nusha ai ikusta, tusa tinaiti. 12Tama shuar ainan emtin Abraham tsuntsumaa 13Efrónkan ayak: Wait aneasam winasha anturtukta. Nugka urutam akikkit imanun akikmakan wina nuwar jaka nuna ikustasan wakerajai, tusa tinaiti.
14Tama Efrón ayak: 15Apuru anturtukta, nugka akikkrigka cuatrocientosaiti. Nu pachisrika chichaa pujuchmi. Amina nuwem jaka nuka ikusta, tusa tinaiti. 16Tama Abraham Hettan uchirisha wainainamunam Efrón timaunka imatiksag akikuiti. 17Tura Efrónkan nugke Mamrénam etsa watainmani Macpela a nuka, nina uuntri wa umikmauwa nujai, ashi númi nina uuntrinu aina jukimujai, nuiyasha ashi nina yaaktarin nagkatkamunmaya ainajai, 18Abrahamnau jasuiti. Hettan uchiri ainasha wainainamunam, tura shuar yaaktan waitirin matsatainasha wainmaunam nugkan sumakuiti. 19Tura Abraham nina nuwe Sara jakaun juki Macpela Mamrénam Hebrón tutai Canaán nugkanam a nui ikusuiti. 20Nui nagkama nu nugkaka, tura nui wa auka Abraham ikumatai jasuiti.
सध्या निवडलेले:
Génesis 23: hubDBL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2010, Wycliffe Bible Translators, Inc. All rights reserved.