Matyo 10

Bèmpwɔnɔntɔm wum ǹchwɔ̀ fyee

(Mak 3:13-19; Luk 6:12-16)

1Éngɛ Yeso zɔʼ bɔ bɛɛrɛ abwa mɔ wum ǹchwɔ̀ fyee afwɔbi gɛ̀rɛ̀ ndɛ̀ʼ ekama ebe angɔ é fli ezhwɛɛrɛ bɔɔbɔɔ gɛ̀rɛ̀ gli m̀pèrè eŋwan gimkpaʼ mane aŋwan byɛ à ma nde bɔ ene gôb ekwa ngɛ. 2Azɔnɔ na akumu bèmpwɔnɔntɔm wum ǹchwɔ̀ fyee byɛ. Embèmbè à na Shimun wɛ â ma zɔʼrɔ kpe Petoro ngɛ mane ghongwaanɔm mɔ Andere, Jems mane ghongwaanɔm mɔ Eyɔɔ, bwɔanɔm Zɛbɛdii. 3Firiboʼ mane Batolomyo, Tɔmas mane Matyo wɛ â mwɔ àshuru aŋwɛ ngɛ, Jems ŋwɔanɔm Alfiyɔs mane Tadayus. 4Shimun gho kaanan wɛ à mwɔ abwaʼ abɔ byɛ â me le edoʼ ene abɛ àmɔ̀ ngɛ mane Judas Iskariyɔd wɛ à fɛn enji Yeso ngɛ.

Afwɛʼ yɛ bɔ bɛɛrɛ abwa wum ǹchwɔ̀ fyee à ma ngo fwɛʼ ngɛ

(Mak 6:7-13; Luk 9:1-6)

5Yeso tɔm anɔm wum ǹchwɔ̀ fyee bɔnɔ ese nè etsɛrɛ zɔnɔ kpe, “Mbɔn ke ngɔɔ efwɔ afwɔ ebɛbɔ deʼ kà efwɔ abɛ bɔ Samariya deʼ bo. 6Mbɔn ngɔɔ me ebe bɔ Israel byɛ e mwɔ na ǹglɔ̀rɔ̀ chɛ â shi nyimi nɔ. 7Aŋu mbɔn ma ngɔ̀ɔ ngɛ, mbɔn sɛɛrɛ kpe ebwa m̀fɔ̀ ekere shi tini! 8Mbɔn gli abɔ e ma gwɔ̀n ngɛ, zhwɛɛmɛ bɔ kudu, gli abɔ byɛ e ma zɔ ǹgoʼ ene aŋwan byɛ e ma nde angɔ ene gôb ekwa ngɛ, gɛ̀rɛ̀ fli ezhwɛɛrɛ bɔɔbɔɔ sàa ese. Mmɛ shi ndɛʼ ekama endɔn bli, éngɛ mbɔn gɛrɛ ndɛ̀ʼ ese bli. 9Mbɔn ke ekɛb deʼ efwɔ ǹtɛʼrɛ ntsɔn ge ka de mwɔ ayɛ. 10Mbɔn ke beʼ achwɔ̀ deʼ ene eghɛb, kà ǹdi tsɛrɛ, kà ebla tsɛrɛ, kà atam bo. E we koʼro é ndɛʼ ela byɛ gho afwɛʼ ŋwàʼaŋwàʼ ma ke é fwɛʼ anyi ngɛ. 11Èndzobo chɛ mbɔn bwɛrɛ efwɔ antiri abɛ kà efwɔ abɛ ngɛ, mbɔn nyii ngɔɔ efwɔ, mbɔn kɔʼrɔ gho ǹchwɔ̀ deʼ gɛ̀rɛ̀ tsɔmɔ nè engɔ bwɛn èndzobo chɛ mbɔn ma nyɛ̀rɛ̀ efwɔ afwɔ yɛ ngɛ. 12Èndzobo chɛ mbɔn nyii efwɔ ndɔ deʼ ngɛ, mbɔn gamma ebe abɔ byɛ kpe m̀bwarambwad mwɔ nè mbɔn. 13Mala abɔ byɛ efwɔ ndɔ yɛ ngɛ chɛdɛ angɔn, atsaʼra m̀bwarambwad ndzɔn nɔ nè angɔ. Bɛʼngɛ mala angɔ ne chɛdɛ angɔn bo atsaʼra m̀bwarambwad ndzɔn wu nɔ achim endɔn. 14Mala ndɔ kà antiri abɛ deʼ gɛrɛ ne chɛdɛ angɔn kà ne zhuru endɔn bo, mbɔn nyɛrɛ afwɔ yɛ, kuru ebun elo mbɔn. 15Mmɛ ga éŋwaʼa endɔn kpe anji etsɛrɛ esɛʼ, Ngwe yà tee eklasɔn ebe bɔ Sodɔm mane Gomora fɔɔ bɔ efwɔ abɛ yɛ.”

Enyii yɛ e ma ngo zeʼ ngɛ

(Mak 13:9-13; Luk 21:12-17)

16Mbɔn zhuru, mmɛ na sàa angɔn ese na ǹglɔ̀rɔ̀ abwaʼ ekùru nɔ. Mbɔn zɔmmɔ angɔn na jwere nɔ, gɛ̀rɛ̀ bwada na mblɔ̂m nɔ. 17Mbɔn nu azɔm mbɔʼnga bɔ ba aŋu byɛ e ma ngo bèddè angɔn, gɛ̀rɛ̀ nu angɔn ngɔɔ a ndɔ m̀pàrà, angɔ gɛrɛ ba ngo wuru angɔn efwɔ ndɔ bɛ̀ɛrɛ abwa bɔ Juu. 18Ene egha ndza e ba nu angɔn ngɔɔ sɛʼ efàarà ekara mane m̀fɔ̀rɔ̀ mbɔʼtye mbɔn sɛɛrɛ ekɔn ǹchwɔ̀ ebe angɔ mane ebɛbɔ. 19Èndzobo chɛ e ma nu angɔn ngɔɔ é sɛʼ ngɛ, mbɔn ke sa nyìi angɔn ene abwa yɛ mbɔn ma ngo ga kà aŋu mbɔn ma ngo ga ngɛ bo, èndzobo chɛ ya de bwɛn, é ba ngo ndɛ̀ʼ abwa yɛ mbɔn ma ngo ga ngɛ. 20Ke ma mbɔn a ma ngo ga bo. Na azhwɛɛrɛ àtɛ ngɔn a ma ngo nyii akwa ndzɔn sa le mbɔn sa ga. 21Anɔm ba ngo fɛ̀n enjiri bwɔngwaanɔm amɔ kpe e zhudu, àtɛ gɛrɛ le éngɛ nkirinkin ebe ŋwɔ mɔ. Bwɔ ba sa ngwè èngwa àmɔ̀ gɛ̀rɛ̀ zhudu angɔ. 22Bɔ gimkpaʼ ba ngo gwe angɔn mbɔʼ mmɛ. Bɛʼngɛ egho wɛ ma le eklinitaa ene enyii bwɛn ene ngùdu ngɛ, e ba ngo pwèerè engɔ. 23Èndzobo chɛ enyii angɔn efwɔ abɛ ŋwaʼ ngɛ, mbɔn dɔrɔ ngɔɔ efwɔ abɛ tsɛrɛ. Mmɛ na tòʼrò éŋwaʼa endɔn kpe Ŋwɔ Gho yà sa zeʼe nɔ, mbɔn ne shi zhiri efwɔ ebɛ Israel gimkpaʼ bo. 24Tsɛ̀ʼ gho bɛ̀ɛrɛ abwa deʼ me fɔɔ àtee abwa mɔ bo, kà èdzob deʼ me fɔɔ masa mɔ bo. 25E we koʼro ebe gho bɛ̀ɛrɛ abwa é mwɔ na gho kɛ mɔ nɔ, gɛrɛ me koʼro ebe èdzob é mwɔ na masa mɔ nɔ. Mala e ma zɔʼrɔ ato efwɔ ekla kpe Bɛlzɛbul, shi e ba ngo ndɛ̀ʼ akumu bɔɔbɔɔ ebe bɔ ekla ngɔ̀ɔ bwɛn awe?

Engɔ wɛ e me koʼro é bumu ngɛ

(Luk 12:2-7)

26Éngɛ mbɔn ke sa bumu bɔ bo. Tsɛ̀ʼ ala deʼ yɛ e me kooro enjitsɔ ngɛ yɛ e ne ma ngo fuʼ ngɛ bo. Gɛrɛ ne tsɛʼ ebwa deʼ wɛ e me nɛŋɛ ngɛ wɛ e ne ma ngo gli apɛpɛ ngɛ bo. 27Abwa yɛ mmɛ ma ga endɔn enjitsɔ akwâ di ngɛ, mbɔn ga nchinchwe. Angɔ yɛ mbɔn gɛrɛ ma zo ene egeʼ ngɛ mbɔn ga apɛpɛ. 28Mbɔn ke sa bumu abɔ byɛ e ma zhudu nyɛm ekwa shi ne me né zhudu azhwɛɛrɛ ngɛ bo. Ankɔmɔ ngɛ bumu ma Ngwe yɛ me né tsɔŋɔ nyɛm ekwa mane azhwɛɛrɛ efwɔ edzɔwu asatan ngɛ. 29E ke me né zɔn ènɔ̀n enchwɛrɛ fyee ene âfwɔ ekɛb bo? Éngɛ nɔ shi me tsɛʼ enɔ̀rɔ deʼ èŋwaʼ e me né ku Àtɛ ngɔn Ngwe tɔrɔ ke nɛɛ bo. 30Ka de ma nyɔrɔ ato chɛ ato njɛ ngɛ â shi ta ègimkpaʼ. 31Éngɛ ka bum, ngwo we fɔɔ ènɔ̀n nchwɛn akɛkɛ akyɛ akɛkɛ.

Abɔ byɛ e bɛrɛ Kristo mane angɔ byɛ e ma tɔrɔ ngɔ ngɛ

(Luk 12:8-9)

32“Abɔ byɛ e ma ga apɛpɛ ebe abɔ tsɛrɛ kpe mbɔɔ ne ena ngɛ, mmɛ gɛrɛ wa ngo le éngɛ ekwa angɔ nkirinkin efàarà àtɛ ngu ezob. 33Bɛʼngɛ abɔ byɛ e tɔrɔ angu apɛpɛ efàarà abɔ tsɛrɛ ngɛ, mmɛ gɛrɛ wa tɔrɔ angɔ efàarà àtɛ ngu ekere.”

Yeso ne zeʼe é gɛ̀bbɛ̀, è ke me zeʼe ene m̀bwarambwad bo

(Luk 12:51-53; 14:26-27)

34“Mbɔn ke zhuŋu kpe mmɛ ne zeʼe é le m̀bwarambwad efwɔ ese bo, bɛʼngɛ mmɛ ne zeʼe é ti m̀bùʼ. 35Mmɛ ne zeʼ é le bwɔanɔm sa fɛ̀ɛrɛ nè ètɛ àmɔ̀, bwɔaye sa fɛ̀ɛrɛ nè éʼɔ̧̀ àmɔ̀, aye sa ngwe èngwarandu àmɔ̀. 36Bɔ m̀pɛ̀ʼ mbɔn ba ngo mwɔ bɔ atoo ekla ndzɔn. 37Abɔ byɛ e me doʼo àtɛ kà áʼɔ̧̀ àmɔ̀ fɔɔ angu ngɛ ke koʼro é mwɔ bɔ bɛɛrɛ abwa mbu bo. Abɔ byɛ e gɛrɛ me doʼo bwɔanɔm kà bwɔaye àmɔ̀ fɔɔ angu ngɛ ke koʼro é mwɔ bɔ bɛɛrɛ abwa mbu bo. 38Abɔ byɛ e ne beʼ azɔd baʼra àmɔ̀ kìrì alozhin ndza bo ngɛ ke koʼro é mwɔ bɔ bɛɛrɛ abwa mbu bo. 39Abɔ byɛ e ma ke é pwèerè etsɔmɔ àmɔ̀ ngɛ ba nyim. Bɛʼngɛ abɔ byɛ e ma nyiimi etyê àmɔ̀ mbɔʼ mmɛ ngɛ ba ngo tyè àkɔʼɔ.”

Ngwe ya ndɛʼ enɛrɛ

(Mak 9:41)

40“Gho deʼ wɛ chɛdɛ angɔn ngɛ, shi chɛdɛ angu. Gho deʼ wɛ gɛrɛ chɛdɛ angu ngɛ na chɛdɛ eŋwàʼ wɛ à tɔm angu ngɛ. 41Gho deʼ wɛ ma chɛdɛ ghontɔm Ngwe, mbɔʼnga engɔ ma ghontɔm Ngwe ngɛ, yà le enɛrɛ ghontɔm Ngwe. Gho deʼ wɛ gɛrɛ ma chɛdɛ gho wɛ ma le abwa yɛ a me koʼro efàarà Ngwe mbɔʼnga engɔ mwɔ gho wɛ me koʼro efàarà Ngwe ngɛ wa ngo le enɛrɛ gho wɛ ma le abwa yɛ à me koʼro efàarà Ngwe ngɛ. 42Gho deʼ ndɛʼ ka de mwɔ ǹtoʼndim jù ebe ampiʼ aŋwɔ wunɔ ebi abwaʼ abɔ bɔnɔ mbɔʼnga è ma kìrì angu, mmɛ ga éŋwaʼa endɔn kpe, egho wɛ wa ngo le enɛrɛ zeʼe ebe Ngwe.”

Terpilih Sekarang Ini:

Matyo 10: nbt

Highlight

Kongsi

Salin

Ingin menyimpan sorotan merentas semua peranti anda? Mendaftar atau log masuk

Ketahui Lebih Lanjut tentang Aŋwɛʼrɛ Ebuumu Fe Nè Ngwe